Wienun-ɔn, sran kun w’a wun i i junman dilɛ mannzin’n nun kɛ seke dan kpa kun su wa kpɛ klɔ dan kun su. Kɛ ɔ ko yo naan sran’m b’a fite nun’n, ɔ wlɛ i wun ase bo i jɔ kle be.

Andɛ’n sɛ é kwlá sé’n, seke dan kpa kun mɔ be nin-a wunmɛn i wunsu le’n, ɔ su wa kpɛ asiɛ wunmuan’n su. Kɛ ɔ ko yo naan sran’m b’a fin nun b’a fite’n, Zoova bo i jɔ kle be. ?Wafa sɛ yɛ ɔ yo i sɔ-ɔ? ?Ngue yɛ ɔ kle kɛ ɔ man sran’m be blɛ kaka naan be fa ajalɛ naan b’a fite nun-ɔn? Kwlaa naan y’a tɛ kosan sɔ’m be su’n, maan e fa e ɲin e sie i wafa nga lalafuɛ nun’n Zoova boli sran’m be jɔ’n, i su.

Laa blɛ nun’n, be nga be ɲinfu be yoli ɲin kekle Zoova su’n, Zoova dun mmua boli su kleli be kɛ ɔ́ wá dí be jɔlɛ ka naan w’a yo sɔ. (Nya. 10:25; Zer. 30:23) Sa kwlaa nun’n, ɔ dun mmua bo like ng’ɔ́ wá yó’n su kle ɲin keklefuɛ mun lele naan i blɛ’n w’a ju. Kpɛkun like ng’ɔ fata kɛ be yo naan b’a kaci be sa’n, ɔ bo su kle be wie. (2 Fam. 17:12-15; Nee. 9:29, 30) Blɛ wie nun’n, kɛ ɔ ko yo naan nvle kun i nunfuɛ’m b’a kaci be sa’n, blɛ sunman nun’n Zoova sunmɛnnin i sufuɛ wie mun naan be ko kle be like nga be ko yo i ndɛndɛ naan b’a kwla nanti i mmla’n su’n.​—Amɔ. 3:7.

Sran sɔ’m be nun kun yɛle Nowe. Yakpa su Nowe fali afuɛ kpanngban boli nzue dan m’ɔ́ wá tɔ́’n, i jɔ kleli i blɛ su sran tɛtɛ mun. (Bob. 6:9-13, 17) Asa ekun’n ɔ kannin like ng’ɔ fata kɛ be yo naan b’a kwla fite nun’n, i ndɛ kleli be wie. I sɔ’n ti yɛ kɛ ɔ juli i ɲrun’n, be seli kɛ Nowe ti sran “m’ɔ boli sa nga be yo-ɔ ɔ ti su’n i ndolo’n” niɔn.​—2 Piɛ. 2:5.

Kannzɛ bɔbɔ Nowe wlɛli i wun ase boli sa ng’ɔ́ wá jú’n i ndolo’n, sanngɛ i blɛ sufuɛ’m b’a faman ndɛ ng’ɔ kannin’n su. I lɛ nun’n be kleli kɛ be lafiman Ɲanmiɛn su. Kɛ nzue dan’n kusu’n tɔli’n ɔ fali be kwlaa ɔli. Yɛle kɛ be kwlaa be wuli. (Mat. 24:39; Ebr. 11:7) Ɔ maan kwlaa naan sa sɔ’n w’a ɲan be’n, be kwlá seman mlɔnmlɔn kɛ Ɲanmiɛn w’a boman su w’a kleman be.

Blɛ uflɛ nun’n, kɛ Zoova bó sa ng’ɔ́ wá yó’n su klé sran wie mun’n, ɔ manman be blɛ kpanngban. Kannzɛ ɔ ti sɔ bɔbɔ’n sanngɛ ɔ man be nga sa sɔ’n su wá jú be su’n be blɛ naan be kaci be sa. I wie yɛle ɲrɛnnɛn blu ng’ɔ tɔli Ezipti mɛn’n su’n. Cɛn kun’n, Zoova sunmannin Moizi nin Aarɔn kɛ be kan ɲrɛnnɛn nso su’n i ndɛ kle Faraɔn nin i sufuɛ mun. Be waan ɲrɛnnɛn sɔ’n mɔ yɛle nzraama mɔ kɛ nzue tɔ-ɔ, ɔ gua’n, ɔ́ wá sáci like sunman kpa. ?Ɔ maan kɛ mɔ i aliɛ cɛ́n yɛ sa sɔ’n tɔ́ be su’n ti’n, é sé kɛ Ɲanmiɛn w’a manman be blɛ naan b’a kunndɛ fiawlɛ naan sa sɔ’n w’a ɲanman be? Biblu’n se kɛ: “Famiɛn’n i mantanfuɛ’m be nun wie’m be buli be jɔ mɔ Nyanmiɛn boli be’n i nanwlɛ, naan b’a se be sufuɛ’m be kɛ be nin nnɛn mun be fia sua’m be nun. Be nga b’a buman Anannganman i ndɛ’n kɛ ɔ ti ndɛ’n, be yacili be sufuɛ’m be nin nnɛn mun fie’m be su lɔ.” (Tul. 9:18-21) Nanwlɛ Zoova kannin ndɛ’n kleli be weiin, ɔ maan be nga be fali su ndɛndɛ’n sa sɔ’n to fuannin be.

Kwlaa naan ɲrɛnnɛn blu su’n w’a ju’n, be boli i jɔ be kleli i Ezipti famiɛn’n nin i sufuɛ mun wie. Sanngɛ be kpaloli ndɛ sɔ’n. I lɛ nun’n be dili sinnzin. (Tul. 4:22, 23) Ɔ maan i bo nzuɛn nga be isali’n yɛle kɛ be mma klikli’m be kwlaa be wuli. Nanwlɛ ɔ yoli ɲrɛnnɛn dan. (Tul. 11:4-10; 12:29) ?Be kwla ɲannin  blɛ be siesieli be wun ka naan sa sɔ’n w’a ju? Ɛɛn! Afin Moizi w’a sisimɛn i bo, ɔ boli ɲrɛnnɛn blu su’n i jɔ kleli Izraɛlifuɛ mun kpɛkun ɔ kannin like nga be ko yo naan b’a kwla sasa be awlobofuɛ mun i ndɛ kleli be (Tul. 12:21-28) ?Kɛ Moizi kannin ndɛ sɔ’n kleli be’n sran nɲɛ yɛ be fɛli i afɔtuɛ sɔ’n su-ɔ? Izraɛlifuɛ kɔe miliɔn 3 ɔ nin “sran sunman bɔ be ti nvle uflɛ wie’m be nun sran’n” sa sɔ’n w’a ɲanman be wie kpɛkun be tuli Ezipti mɛn’n nun.​—Tul. 12:38.

Sa sɔ’m be kle kɛ kwlaa naan Zoova w’a yo sa kun’n, ɔ bo su kle sran mun yɛ ɔ man be blɛ kpanngban naan be kaci be sa. (Mml. 32:4) ?Ngue ti yɛ ɔ yo sɔ-ɔ? Akoto Piɛli seli kɛ Zoova “kunndɛman kɛ sran kun sa nunnun. Sanngɛ ɔ kunndɛ kɛ sran kwlaa kaci i akunndan’n.” (2 Piɛ. 3:9) Nanwlɛ sran’m be ndɛ lo Ɲanmiɛn. Afin ɔ kunndɛ kɛ be kaci be sa naan be nanti i mmla’m be su kwlaa naan i jɔlɛ dilɛ cɛn’n w’a ju.​—Eza. 48:17, 18; Rɔm. 2:4.

Andɛ kusu’n sa cinnjin kun su wa ju asiɛ’n wunmuan’n su. Kɛ bé bó i jɔ’n, ɔ fata kɛ sran’m be sie be su be tie. I nun mɔ Zezi o asiɛ’n su wa’n ɔ seli sran’m be kɛ bé núnnún mɛn tɛ nga e o nun yɛ’n “ɲrɛnnɛn dan’n” nun. (Mat. 24:21) I sɔ’n ti’n, Zezi kannin sa nga bé wá jú’n blɛ sɔ’n nun’n, be ndɛ kleli i sɔnnzɔnfuɛ mun. Sa ng’ɔ kannin be ndɛ’n e wun be dan lika e blɛ liɛ nga nun.​—Mat. 24:3-12; Lik. 21:10-13.

Sa nga bé wá jú’n be ti’n, Zoova wla sran’m be kwlaa be fanngan kɛ be fa ajalɛ kɛ be su i. I liɛ’n dɔ nga su’n, be liɛ yó ye kpɛkun mɛn klanman’n nun lɔ’n bé dí aklunjuɛ kpa ekun. (2 Piɛ. 3:13) Zoova kunndɛ kɛ ɔ́ yó naan sran’m be lafi nda ng’ɔ tali e’n, be su. I sɔ’n ti’n, ɔ se i sufuɛ’m be kɛ be ko kɛn i Famiɛn dilɛ’n i ndɛ kle sran mun. Famiɛn dilɛ’n sɔ’n yɛ Zezi seli kɛ ‘bé wá bó i jasin fɛ’n i mɛn wunmuan’n nun’n’ niɔn. (Mat. 24:14) Ɲanmiɛn maan i sufuɛ’m be bo ‘jasin fɛ sɔ’n’ nvle kɔe 240 nun. Zoova kunndɛ kɛ sran kpanngban kpa be ti jasin fɛ sɔ’n kwlaa naan i jɔlɛ dilɛ cɛn’n w’a ju.​—Sof. 1:14, 15; 2:2, 3.

Ndɛ kwlaa nga e kannin be lɛ’n, be kle kɛ kwlaa naan Zoova w’a di sran’m be jɔlɛ’n ɔ man be blɛ kpanngban naan be kaci be sa. Sanngɛ kosan ng’ɔ fata kɛ e fa usa e wun yɛle kɛ: ?Blɛ mɔ sran’m be te le i wun atin’n, bé síe be su bé tíe ndɛ nga Zoova kan’n? Maan e mɔ e ti Ɲanmiɛn i junman difuɛ’n e mian e ɲin e uka sran mun naan mɛn’n i awieliɛ cɛn’n nun’n b’a kwla ɲan be ti.