?Kosan nga afuɛ 2019 nun Sasafuɛ Tranwlɛ’n fali e ɲin sieli be su’n, amun kwla tɛ be su?

Zoova seli kɛ: “Alɛ ninnge kwlaa nga be yi i kɛ bé fá kún amun’n, ɔ́ yó ngbɛn.” (Eza. 54:17) ?Ndɛ sɔ’n i bo’n yɛle benin?

Wie liɛ’n, “be nga be sie sran mun, mɔ be tin be su’n, be ya mɔ be fa’n,” ɔ ti kɛ nzue dan m’ɔ tɔ fin talɛ kun’n sa. Sanngɛ e kwla lafi su kɛ Zoova sásá e naan b’a yoman e abɔlɛ. (Eza. 25:4, 5) Zoova su kplinman su kɛ e kpɔfuɛ’m be yo e like wie mɔ é wún i su afɛ sa trilili.​—w19 Zanvie b. 6-7.

?Zoova nin Kanaanfuɛ mun nin Izraɛlifuɛ’m be nantilɛ nun’n, ngue yɛ ɔ kle kɛ ɔ yo sa i nuan su sɛsɛ-ɔ?

Ɲanmiɛn seli kɛ ɔ́ wá tú be nga be kunndɛli bla nin bian sukusuku nin be nga be kle bla nin ba kanngan’m be ɲrɛnnɛn’n, be fɔ kekle kpa. Sanngɛ be nga be ɲin yi i mɔ be buman be wiengu’m be lufle’n, ɔ́ yrá be su.​—w19 Fevrie b. 22-23.

?Sɛ sran kun m’ɔ suman Zoova’n ɔ su srɛ Ɲanmiɛn naan e o lɛ’n, ngue yɛ é yó-ɔ?

Sɛ i sɔ sa’n ju ɔ su’n, tran diin. Yɛ kle kɛ a ti aɲinyiɛfuɛ. Sanngɛ nán tɛ be srɛlɛ’n su kɛ “maan ɔ yo sɔ.” Sɛ bé srɛ́ naan be man be sa’n su’n, nán yo sɔ wie. Afin be kwla bu i kɛ a su srɛ wie. Sɛ a klo’n, a kwla srɛ Zoova ɔ klun lɔ.​—w19 Marsi b. 31.

?Ngue ti yɛ ba kanngan’m be kunndɛlɛ’n ti sa tɛ dan-ɔn?

Sɛ asɔnun’n nunfuɛ kun kunndɛ bakan kun’n, nn w’a yo bakan sɔ’n i abɔlɛ dan. Asa ekun’n, ɔ saci Zoova i sufuɛ’m be dunman, ɔ fɔn awa’n i mmla yɛ ɔ fɔn Ɲanmiɛn i mmla’n wie. Sɛ nvle nga e o nun’n, i nun mmla’n se kɛ be sanman be nga be yo i sɔ sa’n, asɔnun kpɛnngbɛn’m be nanti awa i mmla sɔ’n su.​—w19 Mɛ b. 9-10.

?É yó sɛ naan y’a kaci e akunndan’n?

Ninnge nga e kwla yo’n: Maan e srɛ Zoova, e bu e klun lɔ e nian naan e si sran wafa nga e ti’n, kpɛkun e tra janvuɛ kpa.​—w19 Zuɛn b. 11.

?Wafa sɛ yɛ dɔ nga su’n e kwla siesie e wun naan y’a kwla jran yalɛ klelɛ’n i ɲrun kekle-ɔ?

Maan e nin Zoova e afiɛn mantan kpa. Yɛ e lafi su kɛ ɔ klo e naan ɔ su yiman e ase le. Asa ekun’n, e kanngan Biblu’n nun cɛn kwlakwla, e srɛ Zoova titi, yɛ e lafi su kɛ ɔ́ yía nda kwlaa ng’ɔ tali’n, be nuan. Kpɛkun e fa Biblu’n nun ndɛ mma wie mun e sie e klun. Yɛ e to Zoova i manmanlɛ jue mun naan be ka e klun.​—w19 Zuie b. 2-4.

?Wafa sɛ yɛ e kwla uka e osufuɛ mun naan b’a ɲan be ti-ɔ?

Maan e mian e ɲin e wun wafa nga e osufuɛ’m be wun yo be’n i wlɛ, e kle be ajalɛ kpa. Asa ekun’n, nán e yaci be ukalɛ le yɛ e tra e awlɛn be wun.​—w19 Utu b. 15-17.

?Ngue ti yɛ ndɛ nga Zezi kannin m’ɔ o Matie 11:28 nun’n, ɔ gua e awlɛn su nzue-ɔ?

Be nga be nian e su’n, be leman wunsu. Asa’n, e janvuɛ’m be nzuɛn’n ti kpa dan. Kpɛkun junman nga e di’n leman wunsu.​—w19 Sɛptanblu b. 23.

?Wafa sɛ yɛ Zoova kwla yo naan y’a kunndɛ kɛ é yó like kun-ɔn? (Fp. 2:13)

Sɛ e kanngan Ɲanmiɛn Ndɛ’n nun yɛ e bu su akunndan’n, Ɲanmiɛn yó maan é kwlá yó i klun sa’n. Asa ekun’n, Ɲanmiɛn wawɛ’n úka maan é sí like nga e si i yo’n, i yo kpa trá laa’n.​—w19 Ɔktɔblu b. 21.

?Kwlaa naan y’a fa ajalɛ kun’n ngue yɛ ɔ fata kɛ e yo-ɔ?

Ɔ fata kɛ e yo ninnge nnun. E suan like nga e waan é yó’n i su like. E srɛ Ɲanmiɛn naan ɔ man e ngwlɛlɛ. E bu like nga ti yɛ e waan é yó like kun’n i sin kpa. Kpɛkun e si like trele nga e waan é yó’n. Yɛ e wun i wlɛ kɛ e kwlá yoman ninnge ngba.​—w19 Novanblu b 28.

?Ndɛ kɛ sɛ sran wu’n like kun o i nun naan ɔ wuman wie’n, ɔ fin ndɛ nga Satan kan kleli Ɛvu?

E kwla se kɛ cɛcɛ. Afin Satan w’a seman Ɛvu kɛ like kun o i nun naan sɛ ɔ wu’n like sɔ’n fíte kó trán lika uflɛ. Sanngɛ ɔ seli i kɛ ɔ su wuman mlɔnmlɔn. Kɛ anannganman su nzue’n tɔli’n, Ɲanmiɛn sulɛ wafawafa kwlaa nga be timan su’n be nunnunnin. Ɔ maan, ka naan Zoova w’a sanngan klɔ sran’m be aniɛn Babɛli lɔ’n yɛ sran’m be buali ato sɔ’n niɔn.​—w19 Desanblu b. 15.