?A KWLA se kɛ a ti sran kun m’ɔ si ye-ɔ? Ɔ fata kɛ e kwlakwla e bu kosan sɔ’n i su akunndan kpa. Afin Biblu’n seli kɛ e blɛ liɛ’n su’n, sran kpanngban kpa “be su siman ye.” (2 Tim. 3:2) Atrɛkpa’n, amun si sran wie mɔ kɛ be o sa’n, be kunndɛ kɛ be wiengu mun yɛ be yo ninnge mun man be sa titi-ɔ, annzɛ be cɛ be like-ɔ. Kusu kɛ be wiengu’m be ko yo ninnge sɔ mun ko man be’n, be siman be ye mlɔnmlɔn. Atrɛkpa’n, amun sie i nzɔliɛ kɛ sran kɛ ngalɛ sa’m be tranlɛ yoman fɛ.

Sanngɛ Zoova wlɛ i sufuɛ’m be fanngan kɛ ‘be kle kɛ be si ye.’ Asa ekun’n, ɔ fata kɛ be “la Ɲanmiɛn i ase sa’n kwlaa nun.” (Kol. 3:15; 1 Tes. 5:18) Sɛ e yi i nglo kɛ e si ye’n, i sɔ’n ti kpa man e. Ninnge sunman ti yɛ e se sɔ’n. Maan e fa e ɲin e sie i be nun wie’m be su.

Like cinnjin nga ti yɛ ɔ fata kɛ e si ye titi’n, yɛle kɛ ɔ yo maan e bu e wun sran. Kɛ sran kun yo like mɛn i wiengu kun mɔ i wiengu sɔ’n yo i kwla’n, be sran nɲɔn’n be di aklunjuɛ. ?Ngue ti yɛ e se sɔ-ɔ? Wienun-ɔn sran kun fɛ i blɛ’n yo like kun man e. I lɛ nun’n, ɔ bu i kɛ like sɔ’n kwla yo e wun sa ye ti-ɔ. Kpɛkun ɔ kunndɛ kɛ ɔ́ klé e kɛ e ndɛ lo i. Kɛ e wun i sɔ liɛ’n i wlɛ’n, i sɔ’n yo maan e bu e wun sran. I wie yɛle Riti liɛ’n. Kɛ Boazi yoli Riti i ye’n, i sɔ’n yoli Riti i fɛ dan. Afin ɔ wunnin i wlɛ kɛ i ndɛ lo sran.​—Rit 2:10-13.

Sanngɛ sran ng’ɔ fata kɛ e si i ye tra sran kwlakwla’n, yɛle Ɲanmiɛn Kpli. Atrɛkpa’n, amun bu ninnge kwlaa nga Ɲanmiɛn yo naan amun a kwla su i kpa’n, ɔ ninnge uflɛ wie m’ɔ yo mannin amun blɛ wie nun’n i akunndan. Asa ekun’n, amun bu ninnge ng’ɔ te yo te man amun nin amun awlɛn su sran wie mun’n be akunndan wie. (Mml. 8:17, 18; Yol. 14:17) Kɛ e bu wafa nga e Yifuɛ’n yi i aklunye’n i nglo e lika’n i akunndan’n, e nin i e afiɛn mantan kpa. Kpɛkun e wun i wlɛ kɛ ɔ klo e naan e ndɛ lo i.​—1 Zan 4:9.

Ɔ fata kɛ e bu ninnge kwlaa nga Zoova yo man e’n be su akunndan. Sanngɛ ng’ɔ ti cinnjin’n yɛle kɛ maan e lɛ i ase wie. (Jue. 100:4, 5) Afin sran sunman be se kɛ “kɛ sran’m be si be wiengu’m be ye, be kwlakwla be di aklunjuɛ.”

Like kun ekun nga ti yɛ ye silɛ’n ti cinnjin’n, yɛle kɛ ɔ yo maan sran’m be afiɛn mantan kpa. Kɛ sran’m be yi i nglo kɛ e ndɛ lo be’n, i sɔ’n yo e fɛ dan. Ɔ maan, kɛ sran kun yo like kun man e mɔ e yo sran sɔ’n i kwla’n, e sran nɲɔn’n e afiɛn mantan kpa tra laa’n. (Rɔm. 16:3, 4) Asa ekun’n, be nga be yi i nglo kɛ be si ye’n be ti sran mɔ be klo be wiengu ukalɛ-ɔ. Asa’n, kɛ sran kun yo like kpa kun man be’n, be sie i nzɔliɛ. Kpɛkun i sɔ’n yo maan be kusu be kunndɛ kɛ bé úka be wiengu mun wie. Nanwlɛ, ye silɛ’n man aklunjuɛ sakpa. I sɔ’n ti’n, Zezi seli kɛ: “Sɛ a cɛ sran like’n, ɔ klun jɔ kpa tra kɛ be cɛ wɔ like.”​—Yol. 20:35.

Fluwa sifuɛ kun m’ɔ suan Robɛɛ Emɔnsu’n seli kɛ: “Sɛ e waan é klé kɛ e si ye’n, ɔ fata kɛ e wun i wlɛ kɛ e mian e wiengu’m be wun naan be kusu be mian e wun wie. Yɛle kɛ blɛ wie nun’n, be man e like yɛ blɛ wie nun kusu’n e yɛ e man be like-ɔ.” Ndɛ sɔ’n kle kɛ e kwlakwla e mian sran wun. Wie liɛ’n, be kwla man e aliɛ annzɛ kɛ e kwlaman nun’n, be kwla nian e lika. (1 Kor. 12:21) Sran ng’ɔ si ye’n i klun jɔ ninnge kwlaa nga i wiengu’m be yo mɛn i’n su. ?Yɛ e li? ?Kɛ e wiengu’m be yo ninnge wie mun man e’n, e kle kɛ e si ye?

Like uflɛ nga ti yɛ ye silɛ’n ti cinnjin’n, yɛle kɛ ɔ yo maan e fa e ɲin e sie i ninnge kpakpa nga e wiengu’m be yo’n, i ngunmin su. Ɔ maan sɛ é kwlá sé’n, kɛ e si ye’n e akunndan’n kaci kɛ kpukpusu wie sa. Yɛle kɛ ɔ yo maan e fa e ɲin e sie i ninnge wie’m be su tra wie mun. Sɛ e kle kɛ e si ye titi’n, é fá e ɲin é síe i ninnge nga be ti kpa’n be su. Ɔ maan e su faman e ɲin e siemɛn i e su sa’m be su ngboko. I sɔ’n ti’n, é sí ye trá laa’n. Sɛ e fa e ɲin e sie i ninnge nga be ti’n e kwla si ye’n be su’n, é dí “aklunjuɛ cɛn kwlaa” kɛ nga akoto Pɔlu fa kannin’n sa.​—Fp. 4:4.

Sɛ e kle kɛ e si ye’n e su buman akunndan tɛ. Asa ekun’n sɛ sran kun si ye’n ɔ su fɛmɛn i ɲin blomɛn i sran like su, i sa sin su bubumɛn i ndɛndɛ yɛ ɔ su faman ya ndɛndɛ. Asa kusu’n, be nga be si ye’n be faman aɲanbeun ninnge’m be kunndɛlɛ’n ciciman be ti. Afin ninnge nga be le i’n, ɔ ju be.​—Fp. 4:12.

E nga e ti Klisifuɛ’n, e si kɛ Satan kunndɛ kɛ ɔ́ yó naan sa kwlaa nga be tɔ e su’n, be bubu e sa sin. Asa ekun’n, sɛ e siman ye naan e ijɔ e konviabo’n, i sɔ’n jɔ́ i klun dan. Sɛ e yo sɔ kusu’n, kɛ é bó jasin fɛ’n sran’m be su sieman be su e nuan bo. Ye silɛ’n yo maan e yi nzuɛn nga Ɲanmiɛn wawɛ’n yo maan klɔ sran yi i nglo’n, be nglo. I wie yɛle kɛ sɛ e si ye’n, é dí ninnge kwlaa nga Ɲanmiɛn yo be man e’n, be su aklunjuɛ. Kpɛkun é láfi nda kwlaa nga Ɲanmiɛn tali be’n, be su.​—Gal. 5:22, 23.

Kɛ mɔ e ti Zoova i Lalofuɛ’n ti’n atrɛkpa’n, ndɛ kwlaa nga be kɛn i ye silɛ’n su ndɛ akpasua nga nun’n, ɔ ti e klun su. Asa ekun’n, e si kɛ e nin akunndan kpakpa bulɛ’n nin ye silɛ’n, e fiman e nin klun. Sanngɛ ɔ fataman kɛ i sɔ’n bubu e sa sin. Afin e kwla yo sran kun m’ɔ si ye-ɔ. Yɛ e kwla yi i sɔ liɛ’n i nglo titi. ?Wafa sɛ? Ɔ fata kɛ cɛn kwlakwla’n, e fa blɛ e bu ninnge kwlaa nga be ti’n e kwla si ye’n be su akunndan kpa. Sɛ e yo sɔ titi’n i sɔ’n káci e nzuɛn. Kpɛkun é dí aklunjuɛ trá be nga be fa be ɲin be sie i sa nga be tɔ be su mɛn tɛ nga nun’n, i su’n. Maan e fa e ɲin e sie ninnge nga Ɲanmiɛn nin e niaan’m be yo m’ɔ wla e fanngan’n be su. Sɛ e yo sɔ’n, é dí aklunjuɛ. I kpa bɔbɔ’n, e kwla klɛ ninnge sɔ mun fluwa kun nun e sie. Fluwa sɔ’n nun’n, e kwla klɛ ninnge nɲɔn annzɛ nsan mɔ be ti’n e kwla kle kɛ e si ye aliɛ ba kun’n, e sie.

Fluwa sifuɛ wie’m be sieli i nzɔliɛ kɛ sɛ e si ninnge nga sran’m be yo man e i su ye titi’n, wafa nga e bu akunndan’n ɔ kwla kaci. Kpɛkun e fa e ɲin e sie i ninnge kpakpa’m be su. Sran ng’ɔ si ye’n ɔ di aklunjuɛ titi. I sɔ’n ti’n, maan e bu ninnge kpakpa kwlaa nga sran’m be yo man e’n be akunndan, yɛ maan e klun jɔ ninnge nga e le be’n be su kpɛkun e si ye titi. Sɛ sran kun yo like wie man e’n, nán maan e bu i kɛ e nin i sɔ’n fata. Sanngɛ like sɔ’n ti’n, maan e ‘manman Zoova, afin ɔ ti kpa’. Yɛ e “la Ɲanmiɛn i ase sa’n kwlaa nun.”​—1 Nyo. 16:34; 1 Tes. 5:18.