1. ?Junman benin yɛ Zoova fa mannin siɛ nin niɛn mun-ɔn?

KƐ ZOOVA bó yasua nin bla klikli’n, ɔ fali ba wulɛ akunndan wlali be ti nun. Asa ekun’n, Biblu’n se kɛ: “Aja nga Anannganman fa man awlo kun’n, [...] yɛlɛ be klun ba.” (Jue. 127:3) ?Ngue yɛ ndɛ sɔ’n kle e-ɔ? Wienun-ɔn, amun janvuɛ kpa kun w’a man amun sika kpanngban kɛ amun fa sie. E si kɛ i sɔ’n yó amun fɛ kpa. Afin i sɔ’n kle kɛ amun janvuɛ’n lafi amun su. Sanngɛ amun kwla usa amun wun kɛ amún yó sɛ naan amun a kwla sie sika sɔ’n naan w’a mlinman. I wafa kunngba’n Zoova m’ɔ ti e janvuɛ kpa’n, ɔ mannin siɛ nin niɛn’m be like kun mɔ i kpa tra sika lele’n kɛ be nian su. Like sɔ’n yɛle be mma mun. Ɔ kunndɛ kɛ be nian ba sɔ’m be lika naan be di aklunjuɛ.

2. ?Kosan benin mun yɛ é wá tɛ́ be su-ɔ?

² ?Sɛ yasua kun nin i yi bé wú ba annzɛ be su wuman wie’n, wan yɛ ɔ fata kɛ ɔ fɛ i sɔ ajalɛ’n niɔn? ?Ngue yɛ siɛ nin niɛn’m be kwla yo naan b’a uka be mma mun naan b’a di aklunjuɛ-ɔ? Maan e fa e ɲin e sie i Biblu’n nun ndɛ mma wie mɔ be kwla uka Klisifuɛ nga be le bla annzɛ bian’n naan b’a kwla fa ajalɛ kpa’n, i su.

3. (1) ?Sɛ yasua kun nin i yi bé wú ba annzɛ be su wuman wie’n, wan yɛ ɔ fata kɛ ɔ fɛ i sɔ ajalɛ’n niɔn? (2) ?Biblu’n nun ndɛ benin yɛ ɔ fata kɛ be nga b’a ja bla annzɛ bian’n be janvuɛ mun nin be osufuɛ’m be nanti su-ɔ?

³ Nvle sunman nun’n, kɛ yasua kun nin bla kun be ko ja’n, be osufuɛ’m be kunndɛ kɛ be wu ba ndɛ’n nun. Wie liɛ’n, be fɛ i sɔ’n mianmian be bɔbɔ. Be flɛ aniaan bian kun kɛ Zetro.  Ɔ tran Azi mɛn’n nun. Ɔ seli kɛ: “E asɔnun’n nun’n be nga be le ba’n, be nun wie’m be mian be nga be leman wie’n be kɛ be wu ba kekle nun.” Aniaan kun ekun tran Azi mɛn’n nun wie. Ɔ suan Zefre. Ɔ seli kɛ: “Sran wie’m be se be nga b’a ja bla annzɛ bian’n be kɛ sɛ b’a wuman ba’n, kɛ bé wá yó oke’n, be su ɲanman sran nianman be lika.” Sanngɛ be nga b’a ja bla annzɛ bian’n, be bɔbɔ yɛ ɔ fata kɛ be fɛ i sɔ ajalɛ’n niɔn. (Gal. 6:5) Kannzɛ be nga b’a ja bla annzɛ bian’n be janvuɛ mun nin be osufuɛ’m be kunndɛ kɛ be di aklunjuɛ be aja’n nun’n, sanngɛ sɛ yasua’n nin i yi’n bé wú ba-o, annzɛ be su wuman wie-o, be bɔbɔ yɛ ɔ fata kɛ be fɛ i sɔ ajalɛ’n niɔn.​—1 Tes. 4:11.

4-5. (1) ?Ninnge nɲɔn benin mun yɛ ɔ fata kɛ yasua kun nin i yi’n be koko su yalɛ kpa-ɔ? (2) ?Blɛ benin nun yɛ ɔ fata kɛ be koko yalɛ sɔ’n niɔn? An yiyi nun.

⁴ Sɛ yasua kun nin i yi be kunndɛ kɛ bé wú ba’n, ɔ fata kɛ be bu ninnge nɲɔn be akunndan kpa. I klikli’n, yɛle blɛ nga i nun yɛ be kunndɛ kɛ bé wú ba’n. Yɛ i nɲɔn su’n, ba nɲɛ yɛ be kunndɛ kɛ bé wú be-ɔ. ?Sanngɛ blɛ benin nun yɛ ɔ fata kɛ be koko ndɛ sɔ’m be su yalɛ-ɔ? ?Ngue ti yɛ ndɛ sɔ’m be ti cinnjin-ɔn?

⁵ Kpɛ sunman’n, kwlaa naan yasua kun nin bla kun b’a ja’n, ɔ flunman kɛ be koko ba wulɛ’n i su yalɛ kpa. ?Ngue ti-ɔ? Afin ɔ fata kɛ yasua’n nin bla’n be nuan sɛ ba wulɛ’n i su ajalɛ nga be waan bé fá’n su kpa. Asa ekun’n, ɔ fata kɛ be bu ba nga bé wá wú i’n i lika nianlɛ’n, i akunndan wie. Be nga b’a ja’n, be nun wie’m be fa ajalɛ kɛ bé mínndɛ afuɛ kun annzɛ nɲɔn ka naan b’a wu ba. Like nga ti yɛ be yo sɔ’n yɛle kɛ be kunndɛ kɛ bé sí be wun naan be afiɛn mantan kpa ka. Afin be si kɛ sɛ be wu ba’n, be su ɲanman blɛ be nianman be wiengu lika kpa kun kɛ laa’n sa.​—Efɛ. 5:33.

6. ?Kɛ mɔ lika’n w’a yo kekle’n ti’n, ajalɛ benin yɛ yasua nin bla wie mɔ b’a ja’n be fa-ɔ?

⁶ Klisifuɛ wie’m be nian Nowe i wa yasua nsan nin be yi’m be ajalɛ’n su. Afin kɛ be jali’n b’a kaman lɛ b’a wuman ba. (Bob. 6:18; 9:18, 19; 10:1; 2 Piɛ. 2:5) Zezi kusu fali e blɛ’n sunnzunnin “Nowe i blɛ” liɛ’n. I sɔ’n kle weiin kɛ ‘lika’n w’a yo kekle kpa.’ (Mat. 24:37; 2 Tim. 3:1) I kwlaa sɔ’n ti’n, yasua nin bla wie mɔ b’a ja’n, be fa ajalɛ kɛ be wuman ba dɔ nga su. I liɛ’n bé ɲán blɛ bé sú Zoova kpa.

7. ?Wafa sɛ yɛ ndɛ ng’ɔ o Liki 14:28, 29 ɔ nin Nyanndra Mun 21:5 be nun’n kwla uka yasua kun nin i yi-ɔ?

⁷ Kwlaa naan yasua kun nin i yi’n b’a fa ajalɛ kɛ bé wú ba’n, annzɛ b’a bu ba nga be waan bé wú be’n be nuan’n i akunndan’n, ɔ fata kɛ be bu ndɛ ng’ɔ o Liki 14:28, 29 nun’n, i su  akunndan kpa. (An kanngan nun.) Ndɛ sɔ’n kle kɛ sɛ sran kun waan ɔ́ kplán sua’n, ɔ fata kɛ ɔ tran bu i sika’n i akunndan nian, sɛ sika sɔ’n kwla wie sua sɔ’n i kplan-o. I sɔ yolɛ’n ti cinnjin kpa. Afin siɛ nin niɛn nga be si ba talɛ’n nun ndɛ kpa’n, be nun wie’m be seli kɛ ba talɛ’n di sika. Kpɛkun ɔ fa blɛ yɛ ɔ yo maan siɛ nin niɛn’m be fɛ. I sɔ’n ti’n, ɔ ti cinnjin kɛ yasua kun nin i yi’n be usa be wun kɛ: ?Ɔ fata kɛ e sran nɲɔn’n e di junman naan y’a kwla ɲan ninnge nga e sa mian be wun’n? ?E nuan sɛ ninnge nga be mian e sa mɔ e waan é tó be’n, be su kpa? ?Sɛ e nɲɔn’n e di junman’n, waan yɛ ɔ́ nían ba’m be lika-ɔ? ?Wan i ajalɛ liɛ’n su yɛ e mma’m bé nían-ɔn? Kɛ yasua kun nin i yi’n bé bú kosan sɔ’m be su akunndan’n, maan be nanti ndɛ ng’ɔ o Nyanndra Mun 21:5 nun su.​—An kanngan nun.

8. (1) ?Ngue sa yɛ ɔ kle be nga be le ba’n be yalɛ-ɔ? (2) ?Ngue yɛ yasua ng’ɔ klo i yi’n, ɔ yo-ɔ?

⁸ Ba kunngba lika nianlɛ leman ba. I sɔ’n ti’n, sɛ yasua kun nin i yi’n be wu ba mun lɔngɔ su’n, kɛ ɔ ko yo naan b’a fa be ɲin b’a sie i ba’m be tinuntinun be su’n, ɔ kwla yo kekle. Be nga be le ba’n, be nun wie’m be dili i nanwlɛ kɛ ɔ ju wie’n junman’n bobo be su. Niɛn’m be kusu ba’m be lika nianlɛ’n ti’n, afɛ’n kwla tran be su titi. Kɛ ɔ ko yo sɔ’n, be ɲanman wunmiɛn be suanman like, be kwlá srɛman Ɲanmiɛn kpa kun yɛ be kwlá boman jasin fɛ’n i juejue su kɛ laa’n sa kun. Asa ekun’n, kɛ be kɔ aɲia’m be bo’n, be kwlá faman be ɲin be siemɛn i aɲia’n i su kpa naan b’a ɲan su ye wie. Yasua ng’ɔ klo i yi’n, maan ɔ wie awlo lɔ-o, annzɛ aɲia’m be bo lɔ-o, ɔ yo like kwlaa ng’ɔ kwla yo naan w’a ukɛ i yi’n ba’m be lika nianlɛ’n nun’n. I wie yɛle kɛ ɔ kwla ukɛ i naan b’a di awlo’n nun junman mun. Asa ekun’n, ɔ miɛn i ɲin kpa naan ɔ nin i awlofuɛ’m b’a su Ɲanmiɛn be awlo lɔ titi. Kpɛkun ɔ nin i awlofuɛ’m be bo jasin fɛ’n likawlɛ titi.

9-10. ?Sɛ siɛ nin niɛn’m be waan bé úka be mma mun’n, ngue yɛ ɔ fata kɛ be yo-ɔ?

⁹ ?Ngue yɛ siɛ nin niɛn’m be kwla yo naan b’a kle be mma’m be like naan b’a klo Zoova-ɔ? ?Bé yó sɛ naan b’a sasa be mma mun mɛn tɛ nga nun? Maan e fa e ɲin e sie i ninnge nga siɛ nin niɛn’m be kwla yo’n be nun wie’m be su.

¹⁰ Amun srɛ Zoova kɛ ɔ uka amun. I sɔ yolɛ nun’n, amun kwla nian Samsɔn i si Manoaki nin i yi’n be ajalɛ’n su. Kɛ Zoova seli be kɛ bé wá wú ba yasua kun’n, be srɛli Zoova kɛ ɔ kle be wafa nga be ko ta ba sɔ’n.

11. ?Wafa sɛ yɛ siɛ nin niɛn’m be kwla nian Manoaki i ajalɛ’n su-ɔ?

¹¹ Be flɛ aniaan bian kun kɛ Pɔlu yɛ i yi’n  suan Klisitinin. * Be fin nvle nga be flɛ i kɛ Bɔsinin-Ɛɛzegovinin’n su. Aniaan sɔ’m be niannin Manɔaki i ajalɛ’n su. Be seli kɛ: “Kɛ Manɔaki sa’n, e srɛli Zoova kɛ ɔ uka e naan e yo siɛ nin niɛn kpa. Zoova fali ninnge kpanngban tɛli e srɛlɛ’n su kusu. I wie yɛle Biblu’n nin e fluwa mun yɛ aɲia kanngan nin aɲia dandan mun.”​—An kanngan Jɔlɛ Difuɛ Mun 13:8 nun.

12. ?Ajalɛ benin yɛ Zozɛfu nin Mari be kleli be mma mun-ɔn?

¹² Amun kle be ajalɛ kpa. Ndɛ nga amun kan kle ba mun’n, ɔ ti cinnjin. Sanngɛ like nga amun yo’n, ɔ ɲan ta kpa be su tra ndɛ nga amun kan’n. I sɔ’n yolɛ nun’n, e si kɛ Zozɛfu nin i yi Mari be kleli be mma’m be ajalɛ kpa. Afin Zozɛfu dili junman kekle naan w’a kwla niɛn i awlobofuɛ’m be lika. Asa ekun’n, ɔ wlɛli i awlobofuɛ’m be fanngan kɛ be fa Zoova i sulɛ’n be sie i like kwlaa ɲrun. (Mml. 4:9, 10) E si kɛ Moizi Mmla’n w’a seman kɛ awlobo kpɛn’m be fa be awlofuɛ’m be kwlaa be wɔ Zerizalɛmun be ko di Delɛ cɛn’n. Sanngɛ Zozɛfu liɛ’n “afuɛ nuan kwlaa” nun’n, ɔ nin i awlobofuɛ’m be kwlaa be kɔ cɛn sɔ’n i dilɛ. (Lik. 2:41, 42) Atrɛkpa Zozɛfu blɛ su’n, siɛ wie’m be buli i kɛ i sɔ yolɛ’n ti kekle dan. Afin ɔ kwla fa blɛ yɛ be kwla bo kalɛ. Sanngɛ Zozɛfu liɛ’n, ɔ fali Zoova i sulɛ’n sieli i like kwlaa ɲrun, yɛ ɔ wlɛli i mma’m be fanngan kɛ be niɛn i ajalɛ’n su. I yi Mari kusu’n, ɔ si Ɲanmiɛn Ndɛ’n kpa. Ɔ maan e si kɛ i ijɔlɛ nun-o, i ayeliɛ’n nun-o, ɔ kleli i mma’m be like naan be klo Ɲanmiɛn Ndɛ’n wie.

13. ?Wafa sɛ yɛ bian kun nin i yi’n be niannin ajalɛ nga Zozɛfu nin i yi Mari be kleli’n su-ɔ?

¹³ Aniaan bian Pɔlu nin i yi Klisitinin mɔ e kannin be ndɛ’n, be niannin Zozɛfu nin i yi Mari be ajalɛ’n su. ?Wafa sɛ yɛ be ajalɛ sɔ’n ukali be naan b’a kwla ta be wa yasua’n naan w’a klo Ɲanmiɛn kpɛkun w’a su i wie-ɔ? Be seli kɛ: “E yoli maan e wa yasua’n wunnin i wlɛ weiin kɛ sɛ sran kun nanti Zoova i mmla’m be su’n, ɔ ɲan su ye dan.” Klisitinin seli ekun kɛ: “Sɛ amun kunndɛ kɛ amun wa’n su Ɲanmiɛn kpa’n, ɔ fata kɛ amun bɔbɔ amun su Ɲanmiɛn kpa.”

14. ?Ngue ti yɛ ɔ fata kɛ siɛ nin niɛn’m be si be mma’m be janvuɛ mun-ɔn?

¹⁴ Amun uka amun mma mun naan be tra janvuɛ kpa. Ɔ fata kɛ amun si amun mma’m be janvuɛ mun, ɔ nin ninnge nga be nin be janvuɛ sɔ’m be yo’n. I wie yɛle kɛ ɔ fata kɛ amun si sran nga amun mma’m be nin be koko yalɛ ɛntɛnɛti su’n, ɔ nin be pɔɔtablu nun’n. Afin ba’m be kwla nian be janvuɛ’m be ayeliɛ’n su kpɛkun be kwla bu akunndan kɛ be sa wie.​—1 Kor. 15:33.

15. ?Ajalɛ benin yɛ Zesi kle siɛ nin niɛn mun-ɔn?

¹⁵ ?Yɛ sɛ siɛ nin niɛn wie’m be siman ɔɔdinatɛli annzɛ pɔɔtablu nun kpa nin? Bé yó i sɛ? Be flɛ siɛ kun m’ɔ tran Filipinin’n kɛ Zesi. Ɔ seli kɛ: “E siman ajulisu mannzin’m be nun junman di kpa. Sanngɛ e kannin sa nga kɛ e mma’m bé fá dí junman’n, ɔ kwla ɲan be’n, i ndɛ e kleli be.” Kannzɛ Zesi bɔbɔ siman mannzin sɔ’m be nun junman di kpa’n, sanngɛ w’a semɛn i mma’m be kɛ nán be fa di junman. Ɔ seli: “N wlali e mma’m be fanngan kɛ be fa be ajulisu mannzin’m be suan aniɛn uflɛ. Asa ekun’n, n seli be kɛ kɛ bé síesíe be wun naan b’a wɔ aɲia bo’n, be fa di junman. Yɛ kɛ bé kánngan Biblu’n nun cɛn kwlakwla’n, be fa di junman wie.” Sɛ amun le ba’n, amun kanngan fluwa nga be klɛ i pɔɔtablu nun ko man sran’n, annzɛ foto nga be fa sie i ɛntɛnɛti su’n, be su ndɛ wie’m be nun e ɛntɛnɛti adrɛsi’n su. Kpɛkun amun nin be koko be su yalɛ. Ndɛ sɔ’m be o jw.org^® i bue nga be flɛ i kɛ “Adolescents” su. Asa ekun’n, amun nin be nian video nga be flɛ i kɛ ?A nin ajulisu mannzin mun, wan yɛ ɔ sie i wiengu-ɔ? ɔ nin nga be flɛ i ekun kɛ Nian ɔ wun su ɛntɛnɛti  su yalɛ kokolɛ’n nun. * Ninnge kwlaa sɔ’m be kwla uka amun naan amun a kle amun mma mun wafa nga be kwla fa ajulisu mannzin’m be di junman’n.​—Nya. 13:20.

16. (1) ?Ngue yɛ siɛ nin niɛn wie’m be yoli-ɔ? (2) ?Wafa sɛ yɛ i bo’n guali-ɔ?

¹⁶ Siɛ nin niɛn wie’m be fa ajalɛ naan be mma’m be fa be wun be mantan be nga Ɲanmiɛn sulɛ nun’n, be kle ajalɛ kpa’n. I sɔ yɛ aniaan bian Ndenin ɔ nin i yi Bominin mɔ be tran Kɔdivua’n, be yoli-ɔ. Kpɛ sunman’n kɛ akpasua sunianfuɛ’n ba’n, be sike i. Ndenin seli kɛ: “I sɔ mɔ e yoli’n, ɔ ukali e wa yasua’n kpa. Afin ɔ yoli atin bofuɛ. Yɛ kɛ é sé yɛ’n, ɔ ti akpasua sunianfuɛ’n i janunfuɛ.” Siɛ nin niɛn mun amun mma’m be ukalɛ nun’n, amun kwla nian aniaan sɔ’m be ajalɛ’n su wie.

17-18. ?Blɛ benin nun yɛ ɔ fata kɛ siɛ nin niɛn’m be bo be mma’m be like klelɛ bo-ɔ?

¹⁷ Amun kle amun mma’m be like ndɛ nun. Kɛ siɛ nin niɛn’m be kle be mma’m be like ndɛ nun’n, i sɔ’n ti kpa dan. (Nya. 22:6) I wie yɛle Timote m’ɔ nin akoto Pɔlu be tuli ajalɛ be ɔli likalika’m be nun’n, i liɛ’n. I ‘kaan nun’ yɛ i nannan Loisi nin i nin Enisi be boli i like klelɛ bo-ɔ.​—2 Tim. 1:5; 3:15.

¹⁸ Be flɛ aniaan bian kun kɛ Zan Klodu yɛ i yi’n suan Pisi. Be kusu be tran Kɔdivua wie. Be miannin be ɲin be kleli be mma nsiɛn’m be like naan be klo Zoova kpɛkun be su i. ?Ngue yɛ ɔ ukali be-ɔ? Be niannin Loisi nin Enisi be ajalɛ’n su. Be seli kɛ: “Kɛ e wuli e mma mun’n w’a cɛman yɛ e boli be like klelɛ bo-ɔ.”​—Mml. 6:6, 7.

19. ?Kɛ Mmla’n 6: 6, 7 fa kan’n sa’n, ngue yɛ ɔ fata kɛ siɛ nin niɛn’m be yo naan b’a kwla kle be mma’m be like-ɔ?

¹⁹ Mmla’n ndɛ tre 6 i mma 6 nin 7 wla siɛ nin niɛn’m be fanngan kɛ be kle be mma’m be like flan nun. Kɛ ɔ ko yo naan b’a kwla yo sɔ’n, ɔ fata kɛ be fa blɛ naan be nin be mma’m be yo ninnge wie mun likawlɛ. Ɔ ju wie’n, kɛ siɛ nin niɛn’m be kle be mma’m be like flan nun’n, i sɔ’n kwla bubu be sa sin. Sanngɛ sɛ be mian be ɲin be kle be mma’m be like kɛ ngalɛ sa’n, be mma’m bé wún Ɲanmiɛn Ndɛ’n i wlɛ kpɛkun bé nánti su.

20. An yiyi wafa nga ba’m be talɛ nun’n ndɛ ng’ɔ o Jue Mun 127:4 kwla uka siɛ nin niɛn mun’n, i nun.

 ²⁰ Maan amun si amun mma’m be kpa. Jue Mun 127 fa ba mun sunnzun cua. (An kanngan Jue Mun 127: 4 nun.) Be kwla fa ninnge fanunfanun be yo cua yɛ cua’m be ngba be sɛman. I wafa kunngba’n, ba’m be ngba be timan kun. I sɔ’n ti’n, ɔ fata kɛ siɛ nin niɛn’m be si wafa nga be kwla uka be mma’m be tinuntinun’n. Aniaan bian kun nin i yi be tran e blɛ su klɔ nga be flɛ i kɛ Izraɛli su lɔ. Be miannin be ɲin be tali be mma nɲɔn’m be kpa. Be kannin like ng’ɔ ukali be’n i ndɛ. Be seli kɛ: “E kleli e mma’m be tinuntinun be Biblu’n nun like.” I lɛ nun’n awlobo kpɛn’n yɛ ɔ fata kɛ ɔ fa ajalɛ sɛ ɔ́ nían aniaan sɔ’m be ajalɛ’n su annzɛ ɔ su nianman su-o.

21. ?Ngue yɛ siɛ nin niɛn’m be kwla lafi su kɛ Zoova yó mán be-ɔ?

²¹ Ɔ ju wie’n, siɛ nin niɛn wie’m be di i nanwlɛ kɛ be mma’m be like klelɛ yo ya. Sanngɛ ba’m be ti aja like yɛ Zoova fa cɛli siɛ nin niɛn mun-ɔn. I sɔ’n ti’n, ɔ kunndɛ kpa kɛ ɔ́ úka be naan be ta be mma’m be kpa. Asa ekun’n, ɔ fɛ i su sie i be srɛlɛ’n i bo kpa. Yɛ ɔ fa Biblu’n nin e fluwa mun tɛ be srɛlɛ’n su. Wie liɛ’n, ɔ sin aniaan nga ba talɛ nun’n be kle ajalɛ kpa’n be lika man be afɔtuɛ.

22. ?Ngue yɛ ɔ fata kɛ siɛ nin niɛn’m be yo i titi-ɔ.

²² Sran wie’m be waan ba kunngba sa’n i talɛ’n di afuɛ 20. Sanngɛ kɛ e niɛn i kpa sa’n, ba talɛ junman nga siɛ nin niɛn’m be di’n, ɔ wieman le. Ɔ maan, lele nin kɛ ba’m bé fá yó kaklaka’n, ɔ fata kɛ siɛ nin niɛn’m be klo be. Kpɛkun be nin be yo ninnge wie mun likawlɛ, yɛ be mian be ɲin be kle be Biblu’n nun like titi. Sanngɛ ɔ fataman kɛ be wla fi su kɛ wafa nga be mma’m bé sɔ́ like nga be kle be nun’n, ɔ su yoman kun. Ba wie’m be liɛ’n, be si nin be nin mɔ be klo Zoova’n, yɛ be tali be-ɔ. Yɛ be wun yo be kɛ aniaan bla Zoana Mae m’ɔ tran Azi mɛn’n nun’n, i liɛ’n sa. Aniaan bla’n seli kɛ: “Kɛ n bu wafa nga min si nin min nin be tali min’n i akunndan’n, ɔ yo min fɛ dan. Afin be tuli min fɔ yɛ be kleli min like naan n klo Zoova. Nán wuli ngbɛn yɛ be wuli min-ɔn. Sanngɛ be ukali min maan min mɛn dilɛ wafa’n yoli kpa.” (Nya. 23:24, 25) Aniaan miliɔn kpanngban kpa be kan ndɛ kunngba sɔ’n wie.