1-2. (1) ?Moizi i su ndɛ benin yɛ Biblu’n kan-ɔn? (2) ?Ngue yɛ ɔ yoli-ɔ? (3) ?Ngue ti yɛ ɔ ti cinnjin kɛ e yo wun ase kanfuɛ-ɔ?

BIBLU’N se kɛ Moizi “ti wun ase kanfuɛ dan, asiɛ nga su wa sran fi to-mɛn i wun ase kanlɛ’n nun.” (Kal. 12:3) ?I sɔ’n kle kɛ Moizi ti srongble naan ajalɛ falɛ ti tankantankan i sa nun? Sran wie’m be ɲrun’n, kɛ sran ng’ɔ ti wun ase kanfuɛ’n ti sɔ-ɔ. Sanngɛ, be ndɛ sɔ’n timan su. Moizi yoli Ɲanmiɛn i sufuɛ kun m’ɔ ti yakpafuɛ-ɔ. Ɔ sisimɛn i bo naan w’a fa ajalɛ. Zoova fanngan nun’n, ɔ jrannin Ezipti famiɛn’n i ɲrun kekle. Yɛ ɔ fali sran kɔe miliɔn nsan kpɛli aawlɛ flɛnnɛn’n. Kpɛkun, ɔ ukali Izraɛlifuɛ mun naan b’a kwla be kpɔfuɛ mun.

² E su diman junman nga Moizi dili be’n, be wie le. Sanngɛ cɛn kwlakwla’n, sran wie’m be ti annzɛ sa wie’m be ti’n, kɛ ɔ ko yo naan y’a yo wun ase kanfuɛ’n, ɔ ti kekle e sa nun. Sanngɛ, ɔ ti cinnjin kɛ e yi nzuɛn sɔ’n i nglo. Afin, Zoova seli kɛ: “Yalɛfuɛ mun [yɛle kɛ wun ase kanfuɛ mun] yɛ mɛn’n ɔ́ wá yó be liɛ-ɔ.” (Jue. 37:11) ?A kwla se kɛ a ti wun ase kanfuɛ? ?Ɔ wiengu’m be sie i nzɔliɛ kɛ a ti wun ase kanfuɛ? Kɛ ɔ ko yo naan y’a wun kosan sɔ’m be su tɛlɛ’n, maan e dun mmua e kan like nga be fa sie sran ng’ɔ ti wun ase kanfuɛ’n i nzɔliɛ’n, i ndɛ.

3-4. (1) ?Ngue ti yɛ e kwla fa wun ase kanlɛ’n, e sunnzun desɛn klanman kpa kun-ɔn? (2) ?Sɛ e kunndɛ kɛ é yó wun ase kanfuɛ’n, nzuɛn benin mun yɛ ɔ fata kɛ e yi be nglo-ɔ? (3) ?Ngue ti-ɔ?

³ Be nga be si desɛn yi kpa’n, kɛ bé dí be junman’n, be fa ayre fanunfanun. Ayre sɔ’n i wie ti ble, wie ti ɔkwlɛ, yɛ wie ti ufue. Ayre fanunfanun sɔ’m be ti’n,  desɛn’n yo klanman kpa. I wafa kunngba’n, sɛ e kunndɛ kɛ é yó wun ase kanfuɛ’n, * ɔ fata kɛ e yi nzuɛn fanunfanun wie’m be nglo. Nzuɛn sɔ’n, i wie yɛle aɲinyiɛ’n, nin wɛtɛɛ yolɛ’n, yɛ yakpa yolɛ’n. Sɛ e kunndɛ kɛ Zoova i klun jɔ e wun’n, ɔ fata kɛ e yi nzuɛn sɔ’m be nglo. ?Ngue ti-ɔ?

⁴ Saan be nga be ti wun ase kanfuɛ’m be ngunmin yɛ be kwla yo Ɲanmiɛn i klun sa-ɔ. Nzuɛn nga Ɲanmiɛn kunndɛ kɛ e yi be nglo’n, be nun kun yɛle wɛtɛɛ yolɛ’n. (Mat. 5:5; Gal. 5:23) Kɛ e yo Ɲanmiɛn i klun sa’n, ɔ yoman Satan i fɛ mlɔnmlɔn. Kannzɛ e mian e ɲin e yo wun ase kanfuɛ annzɛ wɛtɛɛfuɛ’n, sanngɛ Satan i mɛn nunfuɛ’m be kpɔ e. (Zan 15:18, 19) I sɔ’n ti’n, ɔ fata kɛ e yo yakpafuɛ naan y’a kwla jran kekle.

5-6. (1) ?Ngue ti yɛ Satan kpɔ be nga be ti wun ase kanfuɛ’n mun-ɔn? (2) ?Kosan benin mun yɛ é wá wún be su tɛlɛ’n, like suanlɛ nga nun-ɔn?

⁵ Sran ng’ɔ timan wun ase kanfuɛ’n, ɔ tu i wun, ɔ fa ya ngbɛnngbɛn, kpɛkun ɔ kloman Zoova. Kɛ Satan ti kɛ ngalɛ’n sa cɛ. Ɔ kpɔ be nga be ti wun ase kanfuɛ’n. Afin be kle kɛ ɔ timan kpa naan i nzuɛn’n ti tɛ. Be kle ekun kɛ Satan ti gblɛfuɛ. ?Ngue ti yɛ e se sɔ-ɔ? Afin kannzɛ ɔ́ yó sɛ yó sɛ’n, be nga be ti wun ase kanfuɛ’n bé sú Zoova titi.—Zɔb 2:3-5.

⁶ ?Blɛ benin nun yɛ ɔ kwla yo kekle kɛ e kan e wun ase-ɔ? ?Ngue ti yɛ ɔ fata kɛ e mian e ɲin e yo wun ase kanfuɛ titi-ɔ? Kɛ ɔ ko yo naan y’a wun kosan sɔ’m be su tɛlɛ’n, maan e fa e ɲin e sie i Moizi nin Ebre gbanflɛn nsan mun yɛ Zezi be ajalɛ’n su.

7-8. ?Kɛ Moizi i niaan’m be ɲin w’a yimɛn i’n, ngue yɛ ɔ yoli-ɔ?

⁷ Kɛ e le kwlalɛ’n: Kɛ ɔ yo naan be nga be le kwlalɛ’n be yo wun ase kanfuɛ’n, ɔ kwla yo kekle. Yɛle kɛ ɔ ju wie’n, be nga be sie be’n be ɲin yiman be. Afin ajalɛ nga be fa’n, be klun jɔman su. ?Sa sɔ’n w’a ju ɔ su wie le? ?Sɛ a ti awlobo kpɛn naan sa sɔ’n ju ɔ su’n, ngue yɛ á yó-ɔ? Kɛ i sɔ sa’n juli Moizi su’n, like ng’ɔ yoli’n, maan e fa e ɲin e sie su.

 ⁸ Zoova kpali Moizi kɛ ɔ dun Izraɛlifuɛ’m be ɲrun mmua. Kpɛkun, Zoova maan Moizi klɛli Mmla wie mun fa mɛnnin i nvle’n. I sɔ’n kle weiin kɛ Zoova nin Moizi be o nun. Sanngɛ Moizi bɔbɔ i niaan bian Aarɔn, nin i niaan bla Miriamun be kɛnnin i wun ndɛ tɛtɛ, bla ng’ɔ jɛli i’n ti. Sɛ ɔ ti sran uflɛ yɛ ɔ le kwlalɛ kɛ Moizi sa’n, nn atrɛkpa ɔ́ fá ya yɛ ɔ́ kúnndɛ kɛ ɔ́ tú i klunngbɔ. Sanngɛ Moizi liɛ’n, w’a yoman sɔ. Afin ɔ faman ya ndɛndɛ. I kpa bɔbɔ’n, kɛ Zoova tuli Miriamun i fɔ’n, Moizi kpɛtɛli i. (Kal. 12:1-13) ?Ngue ti yɛ Moizi yoli sɔ-ɔ?

9-10. (1) ?Ngue yɛ Zoova ukali Moizi naan ɔ wun i wlɛ-ɔ? (2) ?Wafa sɛ yɛ awlobo kpɛn nin asɔnun kpɛnngbɛn’m be kwla nian Moizi i ajalɛ’n su-ɔ?

⁹ Moizi kplinnin su kɛ Zoova kle i like. I nun m’ɔ tran Ezipti famiɛn’n i awlo lɔ’n, ɔ timan wun ase kanfuɛ. Blɛ sɔ nun’n, i awlɛn ti fufu. Kɛ cɛn kun ɔ wunnin bian kun m’ɔ su yo sa wie m’ɔ timan su’n, ɔ kunnin i. Kpɛkun ɔ buli i kɛ Zoova klun jɔ sa sɔ’n su. Zoova ukali Moizi lele afuɛ 40 naan ɔ wun i wlɛ kɛ kannzɛ ɔ ti yakpafuɛ’n, sanngɛ ɔ fata kɛ ɔ yo wɛtɛɛfuɛ. Asa ekun’n, ɔ fata kɛ ɔ yo wun ase kanfuɛ nin aɲinyiɛfuɛ. Moizi wunnin i sɔ liɛ’n i wlɛ. Ɔ maan, ɔ kwla sieli Izraɛlifuɛ mun kɛ ɔ nin i fata’n sa.—Tul. 2:11, 12; Yol. 7:21-30, 36.

¹⁰ Awlobo kpɛn nin asɔnun kpɛnngbɛn mun, ɔ fata kɛ amun nian Moizi i ajalɛ’n su. Sɛ sran kun i ɲin yiman amun’n, ɔ fataman kɛ an fa ya. Asa ekun’n, sɛ amun fɔn’n, maan an di i nanwlɛ. (Aku. 7:9, 20) Sɛ sa wie tɔ’n, maan amun nanti ajalɛ nga Zoova kle’n su naan amun a wun i trawlɛ. Yɛ amun kan ndɛ amanniɛn su titi. (Nya. 15:1) Awlobo kpɛn nin asɔnun kpɛnngbɛn nga be nanti ajalɛ sɔ’m be su’n, Zoova klun jɔ be wun. Afin, be yo maan fɔundi tran be awlobo’n nin asɔnun’n nun. Kpɛkun, be kle be nga be sie be’n, be ajalɛ kpa.

11-13. ?Ajalɛ kpa benin yɛ Ebre gbanflɛn nsan’m be kle e-ɔ?

¹¹ Kɛ be kle e yalɛ’n: Kɛ ɔ fɛ i lalafuɛ nun lele andɛ’n, mɛn siefuɛ’m be kle Zoova i sufuɛ’m be yalɛ. Be bua e su ato kɛ e yo sa tɛ. Sa nga ti yɛ be yo e sɔ’n, yɛle kɛ ‘Ɲanmiɛn m’ɔ ti e siefuɛ’n yɛ e ɲin yi i-ɔ, nán klɔ sran mun-ɔn.’ (Yol. 5:29) Be kwla yo e finfin, be kwla wla e bisua annzɛ be kwla yo e kpokokpoko. Sanngɛ Zoova jran e sin ti’n, e kunndɛman kɛ é tú e klunngbɔ. Ɔ maan, kannzɛ be kle e yalɛ sɛ’n, e yo wɛtɛɛfuɛ titi.

¹² Be flɛ Ebre gbanflɛn nsan kɛ Anania, Misɛli, yɛ Azaria. * Kɛ Babilɔninfuɛ’m be  trali be ɔli be nvle nun lɔ’n, lɔ famiɛn’n seli be kɛ be koto sika ɔkwlɛ sran ng’ɔ takali’n, i bo. Sanngɛ be kan kleli i amanniɛn su kɛ be su kwlá yoman sɔ. Famiɛn’n seli be kɛ sɛ b’a kplinman su’n, bé fá be yí i sin dan kun nun. Ɔ nin i sɔ ngba’n, b’a kpɔciman Zoova le. Kɛ be yili be sin nun’n, Zoova deli be. Kusu b’a bumɛn i kɛ ɔ́ dé be kɛ ngalɛ’n sa. Be fali be wun wlali Zoova sa nun naan ɔ yo like ng’ɔ klo’n. (Dan. 3:1, 8-28) Gbanflɛn nsan sɔ’m be su ndɛ’n kle kɛ be nga be ti wɛtɛɛfuɛ’n, be ti yakpafuɛ. Mɛn siefuɛ’m be kwla wlanwlan e naan e fɔn Zoova i mmla mun. Sran wie’m be kwla se e kɛ sɛ y’a yoman like nga be klo’n, bé yó e like yaya. Wie liɛ bɔbɔ’n, be kwla kle e yalɛ tɛtɛ kpa. Sanngɛ, sran sɔ’m be kwlá yoman naan e yaci Zoova i sulɛ le.—Tul. 20:4, 5.

¹³ ?Wafa sɛ yɛ e kwla nian Ebre gbanflɛn nsan’m be ajalɛ’n su-ɔ? Sɛ sran’m be tanndan e ɲrun kɛ e yaci Zoova sulɛ’n, maan e kan e wun ase yɛ e lafi su kɛ Zoova nían e lika. (Jue. 118:6, 7) Sɛ sran’m be tɔn e suɛn’n, maan e tɛ be su amanniɛn su. (1 Piɛ. 3:15) Nán maan e yo like wie mɔ i ti’n, e nin e Si Ɲanmiɛn m’ɔ klo e’n, e afiɛn sáci’n.

14-15. (1) ?Sɛ e klun titi e’n, ngue yɛ e kwla yo-ɔ? (2) ?Kɛ nga Ezai 53:7, 10 fa kan sa’n, ngue ti yɛ e kwla se kɛ ajalɛ nga Zezi kle e’n ɔ leman wunsu-ɔ?

¹⁴ Kɛ e klun titi e’n: Sa sunman ti’n, e klun kwla titi e. Sɛ e kɔ suklu naan be su wa bo e ta’n, annzɛ sɛ e su wa di junman cinnjin wie’n, e klun kwla titi e. Sɛ e tɔ tukpacɛ naan e su minndɛ kɛ dɔɔtrɔ’m be kle e tukpacɛ ng’ɔ o e wun’n, nin ayre ng’ɔ fata kɛ be yo e’n, e klun kwla titi e wie. Sɛ e klun titi e’n, kɛ ɔ yo naan e yo wɛtɛɛfuɛ’n, ɔ kwla yo kekle man e. Kɛ ɔ ko yo sɔ’n, ndɛ kaan sa bɔbɔ kwla be e awlɛn. Kpɛkun, e kwla kan ndɛ ya su. Sɛ sa wie ti’n, e klun titi e’n, maan e nian Zezi i ajalɛ ng’ɔ kle e’n su.

¹⁵ Kɛ Zezi si kɛ ɔ ka kan bé kún i’n, i klun titili i dan. Ɔ si kɛ i kpɔfuɛ’m bé wá klé i ɲrɛnnɛn lele naan w’a wu. (Zan 3:14, 15; Gal. 3:13) Kɛ ɔ ka anglo nɲɔn kun bé kún i’n, Zezi seli kɛ i wla w’a bo i wun dan. (Lik. 12:50) I sin’n, kɛ ɔ ka cɛn ba nɲɔn kun bé kún i’n, Zezi seli kɛ i “akunndan’n w’a sanngan.” Ɔ seli ekun kɛ: “Min Si, de min blɛ sɔ’n nun. Kusu blɛ sɔ’n ti yɛ n bali-ɔ. Min Si, yo maan ɔ dunman’n fu.” (Zan 12:27, 28) I lɛ nun’n, e wun kɛ Zezi ti wun ase kanfuɛ naan i ɲin yi Ɲanmiɛn. Kɛ i kpɔfuɛ’m be bɛli i tralɛ’n, yakpa su Zezi fɛli i wun kleli be. Be trɛli i, be yoli i finnin lele naan b’a kun i. Kannzɛ Zezi i klun titili i annzɛ ɔ wunnin i ɲrun’n, sanngɛ ɔ kɛnnin i wun ase yoli Ɲanmiɛn i klun sa’n titi. I lɛ nun’n, ajalɛ ng’ɔ kle e’n, ɔ leman wunsu.—An kanngan Ezai 53:7, 10 nun.

16-17. (1) ?Ngue yɛ Zezi i janvuɛ’m be yoli m’ɔ kwla fɔkɔ i awlɛn-ɔn? (2) ?Wafa sɛ yɛ e kwla nian Zezi i ayeliɛ’n su-ɔ?

¹⁶ Kwlaa naan b’a kun Zezi’n, kɔnguɛ’n, i janvuɛ’m be yoli sa kun m’ɔ kwla fɔkɔ i awlɛn-ɔn. Kɛ ɔ́ yó sɔ’n, nn i wla w’a bo i wun dan. Atrɛkpa’n, ɔ usɛli i wun sɛ ɔ nin Ɲanmiɛn bé nánti klanman lele gúɛ i ti nin i bo o. Afin ɔ si kɛ sɛ ɔ nin Ɲanmiɛn b’a nantiman klanman’n, klɔ sran mɔ be ju miliar kpanngban’n, be liɛ su yoman ye. (Rɔm. 5:18, 19) Kpɛkun ng’ɔ ti cinnjin kpa’n, yɛle kɛ i Si i dunman’n kwla saci. (Zɔb 2:4) Kɛ ɔ nin i sɔnnzɔnfuɛ’m bé dí like kɔnguɛ sɔ nun’n, “akplowa dan kpa tɔli be afiɛn.” Afin “be klo kɛ bé sí be nun kun ng’ɔ ti be kwlaa be nun sran dan’n.” Sa kunngba sɔ’n ti’n, Zezi w’a dun mmua w’a tu be fɔ wie pɛ. Sanngɛ w’a faman be wun ya. Ɔ tuli be fɔ amanniɛn su, kpɛkun  ɔ kleli be like ng’ɔ fata kɛ be yo’n. I sin’n, ɔ yoli be mo, afin be nin i nantili klanman.—Lik. 22:24-28; Zan 13:1-5, 12-15.

¹⁷ ?Sɛ sa kɛ ngalɛ sa’n wie ju e su’n, ngue yɛ é yó-ɔ? E akunndan’n kwla sanngan. Sanngɛ, maan e yo wɛtɛɛfuɛ kɛ Zezi. Maan e fa ndɛ nga Zoova kan’n su. Yɛle kɛ ‘sɛ e wiengu yo e sa’n, maan ɔ sɔn e nun.’ (Kol. 3:13) Afin ɔ ju wie’n, e bɔbɔ e kan ndɛ wie annzɛ e yo like wie m’ɔ lo e wie-ngu’m be ngasi-ɔ. (Nya. 12:18; Zak. 3:2, 5) Sɛ e wiengu’m be yo like kpa wie’n maan e kan kle be yɛ e yo be mo.—Efɛ. 4:29.

18. (1) ?Wafa sɛ yɛ Zoova uka be nga be kan be wun ase’n naan b’a fa ajalɛ kpa-ɔ? (2) ?Sanngɛ ngue yɛ ɔ fata kɛ be yo-ɔ?

¹⁸ É fá ajalɛ kpa: ?Sɛ kekle o e su’n, Zoova kwla uka e? Ɛɛn. Sanngɛ sɛ e kan e wun ase’n, yɛ ɔ́ úka e-ɔ. Zoova seli kɛ sɛ be nga be kan be wun ase’n be srɛ i’n, ɔ́ tíe. (Jue. 10:17) Sanngɛ nán kɛ ɔ sie i su be nuan bo sa ngbɛn-ɔn. Afin Biblu’n se kɛ: “Ɔ kle wun ase kanfuɛ mun kɛ be fa yo sɛsɛ ju’n. Ɔ fɛ i atin’n kle wun ase kanfuɛ mun.” (Jue. 25:9) Zoova fa ninnge fanunfanun uka be. I wie yɛle Biblu’n, nin fluwa * nin video kwlaa nga ‘junman difuɛ nanwlɛfuɛ m’ɔ si ngwlɛlɛ’n’ yi be’n, yɛ e asɔnun aɲia mun. (Mat. 24:45-47) Maan e suan Biblu’n nin fluwa nga anuannzɛ’n yi be’n, be nun like. Yɛ e nanti like nga e suan’n su. Sɛ e yo sɔ’n, é klé kɛ e kunndɛ kɛ Zoova uka e.

19-21. (1) ?Sa tɛ benin yɛ Moizi yoli i Kadɛsi lɔ-ɔ? (2) ?Afɔtuɛ benin yɛ sa ng’ɔ juli Moizi su’n man e-ɔ?

¹⁹ E su yoman sa tɛ. Maan e kan sa ng’ɔ juli Moizi su’n i ndɛ kan e nian. Ɔ yoli wun ase kanfuɛ afuɛ kpanngban kpa. Yɛ Zoova klun jɔli i wun. Sanngɛ kɛ Izraɛlifuɛ’m be nantili aawlɛ flɛnnɛn’n nun lele afuɛ 40 m’ɔ ka kan’n bé wlú mɛn nga Zoova waan ɔ́ fá man be’n i nun’n, sa kun juli. Sa sɔ’n nun’n, Moizi w’a yoman wɛtɛɛfuɛ. Kɛ ɔ́ yó sɔ’n, nn i niaan bla m’ɔ niɛnnin i su Ezipti lɔ wie’n w’a wu, yɛ b’a sie i. Ɔ nin i sɔ’n ngba’n, Izraɛlifuɛ’m be jin i wun kɛ ɔ nianman be lika kpa. Biblu’n se kɛ be “kunndɛli Moiz i utre” nzuewe mɔ kun be’n ti. Zoova maan Moizi yoli abonuan sa wie mun. Asa kusu’n, w’a mianmianman be le. Sanngɛ be plɛnnin i su. Nán nzue mɔ be  ɲɛnmɛn i’n i ngunmin ti yɛ be plannin-ɔn. Sanngɛ Moizi bɔbɔ ba’n, i wun yo be tɛ wie. Ɔ tra kpa kɛ Moizi ti yɛ nzuewe kun be-ɔ.—Kal. 20:1-5, 9-11.

²⁰ I kwlaa sɔ’n ti’n, Moizi fali ya dan. Ɔ maan w’a yoman wɛtɛɛfuɛ. Zoova seli i kɛ ɔ kan ndɛ kle yɔbuɛ’n naan Izraɛlifuɛ’m be ɲan nzue be nɔn. Sanngɛ nɛ́n i sɔ yɛ Moizi yoli-ɔ. Ɔ ijɔli be. Kpɛkun, ɔ seli be kɛ i bɔbɔ yɛ ɔ su wa yo abonuan sa naan b’a ɲan nzue-ɔ. I sin’n, ɔ fɛli i kpɔnman’n finnin yɔbuɛ’n kpɛ nɲɔn. Kpɛkun nzue kpanngban kpa finnin yɛbuɛ’n nun fiteli. Ya dan mɔ Moizi fali ti’n, ɔ tuli i wun. Ɔ maan ɔ yoli sa tɛ dan. (Jue. 106:32, 33) Blɛ kpe kan sɔ’n nun mɔ Moizi w’a kɛnmɛn i wun ase ti’n, w’a wluman mɛn nga Zoova waan ɔ́ fá man be’n, i nun wie.—Kal. 20:12.

²¹ ?Afɔtuɛ benin yɛ sa ng’ɔ juli Moizi su’n man e-ɔ? Afɔtuɛ klikli’n yɛle kɛ maan e mian e ɲin kpa e kan e wun ase blɛ kwlaa nun. Sɛ e ɲin kpɛ i sɔ’n liɛ’n su kaan sa’n, ɔ cɛman naan y’a tu e wun. Kpɛkun e kwla kan ndɛ tɛtɛ yɛ e kwla yo sa tɛ. Afɔtuɛ’n i nɲɔn su’n, yɛle kɛ sɛ sa wie ti e akunndan sanngan’n, e wun ase kanlɛ’n kwla yo kekle man e. I sɔ’n ti’n, kannzɛ sa ng’ɔ o e su’n ti sɛ ti sɛ’n, maan e mian e ɲin e yo wɛtɛɛfuɛ titi.

22-23. (1) ?Ngue ti yɛ ɔ fata kɛ e mian e ɲin e yo wun ase kanfuɛ titi-ɔ? (2) ?Ngue yɛ ndɛ ng’ɔ o Sofoni 2:3 nun’n kle e-ɔ?

²² Zoova sásá e. Ɔ ka kan’n, Zoova wá núnnún klunwifuɛ’m be kwlakwla. Be nga be ti wun ase kanfuɛ’m be ngunmin cɛ yɛ bé ká lɛ-ɔ. Ɔ maan, asiɛ’n sufuɛ’m be wun jɔ́ be fɔuun. (Jue. 37:10, 11) ?É trán wun ase kanfuɛ sɔ’m be nun wie? Sɛ e nanti ndɛ nga Zoova maan i nuan ijɔfuɛ Sofoni kannin’n su’n, e kwla tran be nun wie.—An kanngan Sofoni 2:3 nun.

²³ Sofoni ndɛ tre 2 i mma 3 se kɛ: ‘Nja, sɛ amún ɲán amun ti o.’ ?Ngue ti yɛ ɔ se sɔ-ɔ? ?I sɔ’n kle kɛ Zoova kwlá sasaman be nga be yo i klun sa’n m’ɔ klo be mun’n ti-ɔ? I sɔ’n kleman sɔ mlɔnmlɔn. Sanngɛ, sɛ e waan é fíte nun’n, ɔ fataman kɛ e bubu e sa nin e ja mun e tran su. Ɔ fata kɛ e mian e ɲin kpa dɔ nga su naan e yo wun ase kanfuɛ, naan Zoova klun jɔ e wun. I liɛ’n, sɛ Zoova “i ya cɛn’n” ju’n, é kwlá fíte nun. Kpɛkun é ɲán nguan m’ɔ leman awieliɛ’n.