1. ?Ngue ti yɛ Biblu’n nun like suanlɛ’n ti kekle aniaan wie’m be sa nun-ɔn?

ANDƐ’N, ɔ fata kɛ e nun sunman e di junman kekle kpa naan y’a ɲan sika kan. Kɛ ɔ ko yo naan e niaan kpanngban be awlofuɛ’m b’a ɲan aliɛ nin tralɛ nin lawlɛ’n ti’n, be di junman nglɛmun lele lika’n fa san be. Wie’m be liɛ’n, cɛn kwlaa be fa loto be kɔ mmuammua kpa naan b’a ko di junman. Yɛ wie’m be di junman kekleekle mun naan b’a ɲan sika kan b’a fa nian be awlofuɛ’m be lika. Ɔ maan, kɛ lika’n fá sán’n, nn aniaan sɔ’m b’a fɛ dan. Kɛ ɔ ko yo sɔ’n, Biblu’n nun like suanlɛ’n ti kekle be nun sunman be sa nun.

2. ?Blɛ benin nun yɛ a suan like-ɔ?

² Ɔ ti cinnjin kɛ e ɲan blɛ e suan like. Afin i sɔ yɛ ɔ fata kɛ e yo naan y’a fa e wun y’a mantan Zoova, naan kusu y’a ɲan nguan m’ɔ leman awieliɛ’n niɔn. (1 Tim. 4:15) Aniaan wie’m be jaso nglɛmun ndɛ kpa’n be suan like. Afin blɛ sɔ nun’n, be awlo’n nun ti koun, kpɛkun be kwla bu like nga be suannin’n i su akunndan. Wie’m be liɛ’n, kɛ nnɔsua nun’n lika’n ko tɔ bliin’n, be fa blɛ kan be suan Biblu’n nin e fluwa’m be nun like, yɛ be bu su akunndan.

3-4. (1) ?Ajalɛ benin mun yɛ anuannzɛ’n fali be koko nun wa-ɔ? (2) ?Ngue ti yɛ ɔ fali ajalɛ sɔ mun-ɔn?

³ E si kɛ a wun i wlɛ kɛ ɔ ti cinnjin kɛ a fa blɛ suan like. ?Sanngɛ fluwa benin yɛ ɔ fata a suan nun like-ɔ? Atrɛkpa’n, a se ɔ wun kɛ: ‘Fluwa nga anuannzɛ’n yi be’n be sɔnnin. N kwlá kannganman be ngba be nun.’ Aniaan wie’m be mian be ɲin be kanngan fluwa kwlaa nga anuannzɛ’n yi be’n be nun. Sanngɛ aniaan sunman be wunman wafa nga bé yó naan b’a ɲan blɛ b’a yo sɔ wie’n. Anuannzɛ’n i ɲrun dinfuɛ’m be wunnin i sɔ liɛ’n i wlɛ. I sɔ’n ti’n, koko nun wa’n, be fali  ajalɛ wie mun. Ɔ maan siɛn’n, ndɛ nga be o e fluwa’m be nun’n, ɔ nin ɛntɛnɛti su’n, b’a sɔnman kɛ laa’n sa kun.

⁴ I wie yɛle kɛ, be yiman fluwa nga be flɛ i kɛ Annuaire des Témoins de Jéhovah i kun. Afin sɛ e kɔ jw.org^® su naan e nian jw.televiziɔn’n, é wún aniaan’m be su ndɛ kpanngban wie mɔ be kwla wla e fanngan-ɔn. Asa ekun’n, siɛn’n Sasafuɛ Tranwlɛ’n nga e fa bo jasin fɛ’n, ɔ nin An Tinnge! be fite kpɛ nsan cɛ afuɛ nuan kun nun. Nán kɛ anuannzɛ’n fali ajalɛ sɔ mun naan e ɲan blɛ e fa di junman uflɛ-ɔ. Sanngɛ ɔ yoli sɔ naan e fa e ɲin e sie i “ninnge nga be ti cinnjin kpa’n” be su. (Fp. 1:10) ?Wafa sɛ yɛ e kwla fa e ɲin e sie i ninnge nga be ti cinnjin kpa’n, be su-ɔ? ?É yó sɛ naan y’a ɲan Biblu’n nun like mɔ e tinuntinun e suan’n, i su ye?

5-6. ?Fluwa benin mun yɛ ɔ fata kɛ e suan be nun like kpa-ɔ?

⁵ ?Fluwa benin yɛ ɔ fata kɛ e dun mmua suan nun like-ɔ? Ɔ fata kɛ e kanngan Biblu’n nun naan e bu su akunndan cɛn kwlakwla. Biblu’n nun ndɛ mma nga kɛ é yó e lemɔcuɛ afiɛn nun aɲia’n e fa di junman asɔnun’n nun’n, b’a sɔnman kun. Anuannzɛ’n fɛli i sɔ ajalɛ naan e ɲan blɛ e bu Biblu’n nun ndɛ mma sɔ’m be su akunndan, yɛ e kunndɛ be su like kpa e fluwa’m be nun. I sɔ’n ti’n, ɔ fataman kɛ e kanngan ndɛ mma sɔ’m be nun e guɛ i lɛ sa ngbɛn. Sanngɛ ɔ fata kɛ e fa blɛ e bu be su akunndan, naan Biblu’n nun ndɛ’n wluwlu e wun. I sɔ yɛ ɔ fata kɛ e yo naan y’a fa e wun y’a mantan Zoova-ɔ.—Jue. 19:15.

⁶ ?Fluwa benin mun yɛ ɔ fata kɛ e fa e ɲin sie su kpa ekun-ɔn? Kwlaa naan y’a wɔ aɲia’m be bo’n, ɔ fata kɛ e suan Sasafuɛ Tranwlɛ’n nin fluwa nga asɔnun’n fa suan Biblu’n nun like’n, be nun like. Yɛ maan e bu ndɛ nga be o e aɲia fluwa’n nun’n, be su akunndan wie. Asa ekun’n, maan e kanngan Sasafuɛ Tranwlɛ’n nga e fa bo jasin fɛ’n nin An Tinnge! be nun wie.

7. ?Sɛ a kwlá kannganman ninnge kwlaa nga be o jw.televiziɔn su’n be nun’n, ngue ti yɛ ɔ fataman kɛ ɔ sa sin bubu wɔ-ɔ?

⁷ A kwla se kɛ: ‘?Yɛ ndɛ wlawla nin video kpanngban nga be o jw.org su’n, nin ninnge nga be kle i jw.org^® nun’n, be li? ?Ń yó sɛ naan m’an fa min ɲin m’an sie i be kwlaa ngalɛ’n be su?’ Maan e fa sunnzun ase kun naan w’a wun like ng’ɔ fata kɛ a yo’n, i wlɛ. Wienun-ɔn, w’a ɔ aliɛ tolɛ gua bo lɔ. Kusu aliɛ nga be o lɔ’n, be diman be yalɛ. ?I sɔ’n ti’n, á sé kɛ á dí aliɛ kwlaa ng’ɔ o lɔ’n? Cɛcɛ. Saan aliɛ ng’ɔ ju ɔ’n, yɛ á tó dí-ɔ. I wafa kunngba’n, sɛ a kwlá kannganman ninnge kwlaa nga be o jw.org su’n be nun’n, nán ɔ sa sin bubu wɔ. Ndɛ nga a kwla kanngan nun’n, kanngan. Yɛ video nga a kwla nian’n, nian. Sanngɛ e kwla usa e wun kɛ: ?Wafa sɛ yɛ ɔ fata kɛ e suan like-ɔ? ?É yó sɛ naan y’a ɲan like nga e suan’n i su ye?

8. (1) ?Kɛ á súan Sasafuɛ Tranwlɛ’n nun like’n, ajalɛ benin yɛ ɔ fata kɛ a fa-ɔ? (2) ?Yɛ i su ye benin yɛ a kwla ɲɛn i-ɔ?

⁸ Kɛ á súan fluwa kun nun like’n, fa ɔ ɲin sie i i nun ndɛ’n su kpa. I liɛ’n á ɲán su ye. Like suanlɛ’n timan fluwa nun kannganlɛ nin ndɛ’m be bo jajalɛ sa ngbɛn. Kɛ á súan Sasafuɛ Tranwlɛ’n nun like’n, dun mmua kanngan ndɛ’m be su fitilɛ’n nun kpa. I sin’n, kanngan like suanlɛ’n i flɛlɛ’n, nin ndɛ ce mun, ɔ nin kosan nga be fa flan like suanlɛ’n nun’n be nun. Kpɛkun bu be su akunndan. Kɛ a ko yo i sɔ liɛ’n, bo ɔ ɲin ase kanngan ndɛ kpɔlɛ’m be nun blɛblɛblɛ, nán kpli. Fa ɔ ɲin sie i ndɛ kpɔlɛ’m be nun ndɛ ɲanman klikli’n be su kpa. I liɛ’n, á wún ndɛ ng’ɔ o ndɛ kpɔlɛ’n nun’n, i wlɛ kpa.  Kɛ á kánngan like suanlɛ kun nun’n bu wafa nga ndɛ kpɔlɛ mun, nin ndɛ ce’m be kɔ likawlɛ’n i akunndan. Asa ekun’n, bu wafa nga ndɛ kpɔlɛ mun, nin like suanlɛ’n i flɛlɛ’n be kɔ likawlɛ’n i akunndan wie. Sɛ ndɛ mma kun o nun annzɛ ndɛ wie o nun naan a kunndɛ kɛ á súan su like kpa’n, klɛ sie.

9. (1) ?Kɛ á súan Sasafuɛ Tranwlɛ’n nun like’n, ngue ti yɛ ɔ fata kɛ a fa ɔ ɲin sie i Biblu’n nun ndɛ mma’m be su kpa-ɔ? (2) ?Yɛ wafa sɛ yɛ e kwla yo sɔ-ɔ? (3) ?Kɛ nga Zozie 1:8 fa kan’n sa’n, kɛ e kanngan Biblu’n nun’n, ngue yɛ ɔ fata kɛ e yo-ɔ?

⁹ Kɛ e suan Sasafuɛ Tranwlɛ’n i nun like’n, i sɔ’n uka e naan y’a wun Biblu’n ndɛ’m be wlɛ. I sɔ’n ti’n, fa ɔ ɲin sie i Biblu’n nun ndɛ mma nga be o Sasafuɛ Tranwlɛ’n nun’n, be su kpa. I li Biblu’n nun ndɛ mma nga kɛ é súan like aɲia’n i bo lɔ’n e kanngan be nun’n, be su yɛ ɔ fata kɛ a fa ɔ ɲin sie i kpa-ɔ. Ɔ fata kɛ a wun wafa nga ndɛ nga be su yiyi nun’n, i ɲin fite Biblu’n nun ndɛ mma sɔ’m be nun’n, i wlɛ kpa. Asa ekun’n, kɛ á kánngan ndɛ mma sɔ’m be nun’n, bu be su akunndan kpa. Kpɛkun wafa nga a kwla nanti be su’n, bu i akunndan wie.—An kanngan Zozie 1:8 nun.

10. ?Kɛ nga Ebre Mun 5:14 fa kan’n sa’n, ngue ti yɛ ɔ fata kɛ siɛ nin niɛn’m be kle be mma mun wafa nga be kwla suan like’n niɔn?

¹⁰ Siɛ nin niɛn’m be kunndɛ kɛ, kɛ be nin be mma’m bé sú Ɲanmiɛn awlo lɔ lemɔcuɛ kwlaa nun’n, ba’m be wun kpaja be. Ɔ ti su kɛ ɔ fata kɛ be bu ndɛ nga be nin be mma’m be kwla koko su yalɛ’n i akunndan be sie. Sanngɛ ɔ fataman kɛ be bu i kɛ ɔ ti cinnjin kɛ be yo ninnge wie mun ekun blɛ sɔ’n nun naan b’a di aklunjuɛ dan kpa. Kɛ amun nin ba’m bé sú Ɲanmiɛn awlo lɔ’n, amun kwla nian video nga be fite JW televiziɔn nun anglo kwlaa nun’n annzɛ amun kwla yo like uflɛ. I wie yɛle kɛ, kɛ Nowe sa’n, amun kwla bobo mmeli kun. Sanngɛ like ng’ɔ ti cinnjin’n yɛle kɛ maan amun kle amun mma mun wafa nga be bɔbɔ be kwla suan like’n. Ɔ fata kɛ be si wafa nga be kwla siesie be wun naan b’a wɔ aɲia’m be bo’n, annzɛ wafa nga be kwla kunndɛ junman nga be man e aɲia’m be bo lɔ’n, be su ndɛ e fluwa’m be nun’n. (An kanngan Ebre Mun 5:14 nun.) Sɛ amun nin ba’m be suan like awlo lɔ’n, kɛ é yó aɲia kanngan nin dandan mun’n, bé fá be ɲin síe i be bo ndɛ’m be su kpa. Afin, nán aɲia kwlaa be bo yɛ e nian video-ɔ. Ɔ ti cinnjin kɛ amun bu amun mma’m be afuɛ’n nin be nzuɛn’n i akunndan kpa. I liɛ’n, kɛ amun nin bé súan like’n, amún wún dɔ ng’ɔ fata kɛ amun di’n i wlɛ.

11. (1) ?Ngue ti yɛ ɔ fata kɛ e kle be nga e kle be Biblu’n nun like’n wafa nga be kwla suan like’n niɔn?

 ¹¹ Be nga e kle be Biblu’n nun like’n be kusu’n, ɔ fata kɛ e kle be wafa nga be kwla suan like’n wie. Kɛ e bo sran kun i Biblu’n nun like klelɛ bo mɔ e wun kɛ ɔ jaja ndɛ nga be o i fluwa’n nun’n be bo ka naan e nin i y’a suan like’n, i sɔ’n yo e fɛ. Asa ekun’n, kɛ e wun kɛ ɔ yo i sɔ’n wie ka naan w’a wɔ aɲia’m be bo’n, i sɔ’n yo e fɛ kpa ekun. Sanngɛ ɔ fata kɛ e kle be wafa nga be kwla kunndɛ ndɛ’m be su like kpa’n, ɔ nin wafa nga be kwla suan like kpa’n. I liɛ’n, sɛ sa wie tɔ be su’n, be su minndɛman kɛ aniaan mun yɛ be man be afɔtuɛ-ɔ. Sanngɛ be bɔbɔ bé nían e fluwa’m be nun naan b’a wun wafa nga be kwla yo naan b’a wun sa sɔ’n i trawlɛ’n.

12. ?Ngue ti yɛ ɔ fata kɛ e suan Biblu’n nun like-ɔ?

¹² Sɛ a kloman like suanlɛ’n, a kwla bu i kɛ Biblu’n nun like suanlɛ’n su yoman ɔ fɛ le. Sanngɛ nanwlɛ, Biblu’n nun like suanlɛ’n kwla yo wɔ fɛ. I klikli nun’n kɛ á súan like’n, nán cɛ dan. Kɛ ɔ́ kɔ́ i ɲrun’n, a kwla uka dɔ nga a fa suan like’n su. Kpɛkun kɛ á súan like’n, maan ɔ ɲin tran ninnge nga ti yɛ a suan like’n be su. Be nun cinnjin kpafuɛ’n yɛle kɛ ɔ fata kɛ a nin Zoova amun afiɛn mantan kpa titi. Sanngɛ kɛ á súan like’n, a kwla kunndɛ kosan kun mɔ sran kun usali wɔ’n i su tɛlɛ’n. Asa ekun’n sɛ sa wie o ɔ su’n, a kwla kunndɛ i su ndɛ wie mun e fluwa’m be nun.

13. (1) ?Ajalɛ benin yɛ gbanflɛn annzɛ talua kun kwla fa naan w’a kan Ɲanmiɛn ndɛ’n w’a kle i wiengu mun suklu lɔ-ɔ? (2) ?Wafa sɛ yɛ a kwla nanti ndɛ ng’ɔ o Kolɔsufuɛ Mun 4:6 nun’n su-ɔ?

¹³ Sɛ a ti suklu ba’n, atrɛkpa’n a sieli i nzɔliɛ kɛ ɔ wiengu suklu ba’m be di be awuliɛ cɛn’n. Yɛ a kunndɛ kɛ á yíyí awuliɛ cɛn dilɛ sɔ’n i su ndɛ nga Biblu’n kan’n nun klé bé. Sanngɛ a bumɛn i kɛ á kwlá yó i sɔ liɛ’n. Sɛ ɔ ti sɔ’n, suan Biblu’n nun like. I sɔ yolɛ nun’n, a kwla fa ɔ ɲin sie i ndɛ nɲɔn su: (1) Like nga ti yɛ Ɲanmiɛn kloman be awuliɛ cɛn’n i dilɛ’n, yɛ (2) wafa nga a kwla fa Biblu’n a yiyi ndɛ sɔ’n nun kpa kle be’n. (Mat. 14:6-11; 1 Piɛ. 3:15) Dun mmua usa ɔ wun kɛ: ‘?Ngue ti yɛ min wiengu suklu ba’m be bu i kɛ ɔ fata kɛ be di awuliɛ cɛn’n niɔn?’ Kpɛkun, kunndɛ ndɛ sɔ’n i su like kpa e fluwa’m be nun. Sɛ a yo sɔ’n, like nga a lafi su’n i nun yiyilɛ su yoman kekle ɔ sa nun dan. Sran kpanngban be se kɛ, kɛ mɔ sran’m be di be awuliɛ cɛn’n, i ti yɛ be kusu be yo sɔ wie-ɔ. Ɔ maan sɛ a kunndɛ awuliɛ cɛn dilɛ’n i su ndɛ wie mun e fluwa’m be nun’n, á wún ndɛ wie m’ɔ kwla uka be nga be kunndɛ kɛ bé sí ninnge sɔ’m be su ndɛ nanwlɛ’n.—An kanngan Kolɔsufuɛ Mun 4:6 nun.

14-16. (1) ?Sɛ a siman Biblu’n nun fluwa kun i su ndɛ kpanngban’n, ngue yɛ a kwla yo-ɔ? (2) ?Wafa sɛ yɛ Biblu’n nun ndɛ mma nga be boli be su wa’n, be kwla uka ɔ naan w’a wun Amɔs fluwa’n i nun ndɛ’n i wlɛ kpa-ɔ? (An nian kuku nga be flɛ i kɛ “ A kwla wun i wlɛ kɛ Biblu’n nun ndɛ’n ti nanwlɛ” i nun wie.)

¹⁴ Wienun-ɔn, e aɲia’m be nun kun bo’n, ɔ fata kɛ e fa e ɲin e sie i fluwa 12 nga be o Daniɛl fluwa’n nin Matie fluwa’n be afiɛn’n nun’n, be nun kun su. ?Sɛ a siman fluwa sɔ’n i nun ndɛ’n i kpa’n, ngue yɛ ɔ fata kɛ a yo-ɔ? Like klikli’n ng’ɔ fata kɛ a yo’n, yɛle kɛ mian ɔ ɲin naan si sran ng’ɔ klɛli fluwa sɔ’n i kpa. ?I lɛ nun’n, ngue yɛ a kwla yo-ɔ?

¹⁵ Usa ɔ wun kɛ: ‘?Sran ng’ɔ klɛli fluwa sɔ’n i su ndɛ benin yɛ n si i-ɔ? ?Junman benin yɛ ɔ dili-ɔ?’ Sɛ a si sran sɔ’n i su ndɛ’n, á wún sa nga ti yɛ ɔ klɛli ndɛ wie mun’n, ɔ nin like nga ti yɛ ɔ fali sunnzun ase wie mun’n, i wlɛ. Kɛ á kánngan Biblu’n nun  fluwa kun nun’n, kunndɛ ndɛ nga be kwla uka ɔ naan w’a si sran ng’ɔ klɛli fluwa sɔ’n, i nzuɛn’n.

¹⁶ I sin’n, ɔ fata kɛ a si blɛ nga i nun yɛ be klɛli fluwa sɔ’n. I lɛ nun’n, a kwla nian “Table des livres de la Bible” m’ɔ o La Bible. Traduction du monde nouveau i bue 1764 su’n, i nun. Asa ekun’n, a kwla nian Biblu sɔ’n i bue 1872, nin 1874-1875 su’n, i nun wie. Sɛ fluwa nga a su suan nun like’n, ɔ kan sa nga bé wá jú’n be ndɛ’n, ɔ fata kɛ a nian e fluwa’m be nun naan á wún wafa nga kɛ bé klɛ́ fluwa sɔ’n lika’n fa ti’n, i wlɛ. ?Blɛ sɔ’n nun’n, ayeliɛ tɛ benin yɛ Ɲanmiɛn nuan ijɔfuɛ sɔ’n ɔ kunndɛ kɛ ɔ́ úka sran mun naan be wlɛ i ase-ɔ? ?Wan yɛ ɔ ti Ɲanmiɛn nuan ijɔfuɛ ng’ɔ klɛli fluwa sɔ’n i blɛ sufuɛ-ɔ? Asa ekun’n, sɛ ɔ waan á wún ndɛ ng’ɔ o fluwa sɔ’n nun’n i wlɛ kpa ekun’n, wie liɛ’n ɔ fata kɛ a nian Biblu’n nun ndɛ mma uflɛ wie’m be nun. I wie yɛle kɛ sɛ ɔ waan á sí wafa nga Amɔsu blɛ su’n lika’n fa ti’n, ɔ fata kɛ a nian video nga be flɛ i kɛ “Amɔs fluwa’n i su fitilɛ” m’ɔ o jw.org® su’n. Kusu’n sɛ a klo’n, a kwla nian Zoova i Lalofuɛ’m be like kunndɛlɛ fluwa i ndɛ akpasua nga be flɛ i kɛ “Biblu’n nun ndɛ mma nga be yiyili be nun’n,” Amɔs 1:1 nun.—2 Fam. 14:25-28; 2 Nyo. 26:1-15; Oze 1–2:2; Amɔ. 1:1.

17-18. An kan sa nɲɔn m’ɔ kle kɛ sɛ e fa e ɲin e sie i Biblu’n nun ndɛ’n i ngbɛsungbɛsu’n be su’n, Biblu’n nun like suanlɛ’n yó e fɛ’n i ndɛ.

¹⁷ Kɛ á kánngan Biblu’n nun’n, sɛ a kunndɛ kɛ á wún ndɛ’m be ngbɛsungbɛsu’m be wlɛ’n, ɔ ti kpa dan. Wienun-ɔn, a su kanngan Liki fluwa’n i ndɛ tre 11 m’ɔ kan “Zonasi i nzɔliɛ like liɛ’n” i ndɛ’n, i nun. (Lik. 11:29, 30) Kɛ á kánngan nun’n, nán ɔ ɲin kpa ndɛ sɔ’n su. Ɔ fata kɛ a jran kan naan a usa ɔ wun kɛ: “?‘Zonasi i nzɔliɛ like liɛ’n’ yɛle benin? ?Ń yó sɛ naan m’an wun ndɛ sɔ’n i wlɛ kpa?’ I sin’n, kɔ Watchtower  ɛntɛnɛti su fluwa siewlɛ su naan klɛ “Zonasi i nzɔliɛ like.” Sɛ a yo sɔ’n, á wún Matie 12:39, 40. Zezi kannin kɛ cɛn ba nsan nga Zonasi dili i jue dan’n i klun’n, ɔ ti cɛn ba nsan nga i bɔbɔ ɔ́ dí ndia’n nun’n i nzɔliɛ like. ?Kɛ a wun kɛ cɛn nga Zezi wá dí i ndia nun lɔ’n yɛ ‘Zonasi i nzɔliɛ like’n’ yi i nglo’n, i sɔ’n boman ɔ nuan?

¹⁸ Maan e bo sa uflɛ su. Liki ndɛ tre klikli’n se kɛ anzi Gabliɛli ko toli Mari, kpɛkun ɔ kannin ba ng’ɔ́ wá wú i’n, i ndɛ kleli i. Ɔ seli Mari kɛ: “Ɔ́ yó sran dan, yɛ bé wá flɛ́ i Ɲanmiɛn m’ɔ o like kwlaa ti su’n i Wa. Ɲanmiɛn Zoova wá fɛ́ i si Davidi i famiɛn bia’n mɛ́n i. Ɔ́ síe Zakɔbu i awlo’n titi. Kpɛkun i Famiɛn dilɛ’n su wieman le.” (Lik. 1:32, 33) Kɛ sran kun kánngan ndɛ sɔ mɔ Gabliɛli kannin’n nun’n, sɛ w’a niɛnmɛn i wun kpa’n, ɔ́ fɛ́ i ɲin síe i ndɛ ɲanman klikli’n m’ɔ se kɛ bé wá flɛ́ Zezi kɛ “Ɲanmiɛn m’ɔ o like kwlaa ti su’n i Wa’n” i ngunmin su. Kusu nn Gabliɛli seli ekun kɛ Zezi wá yó “Famiɛn.” I lɛ nun’n, a kwla usa ɔ wun kɛ: ‘?Kɛ Gabliɛli kán ndɛ sɔ’n, ngue yɛ Mari buli i akunndan-ɔn? ?Ɔ buli i kɛ Gabliɛli su se kɛ Zezi wá sín Famiɛn Erɔdu i osu annzɛ kusu ɔ́ wá káci be nga bé wá sín Erɔdu i ja nun’n, be nun kun naan ɔ́ síe Izraɛli nvle’n? Sɛ Zezi kaci famiɛn’n, Mari m’ɔ wuli i’n, ɔ́ ɲán ɲrun dan, yɛ ɔ nin i wun nin i mma’m bé trán famiɛn’n i awlo lɔ.’ Biblu’n kanman kɛ Mari nin Gabliɛli be kokoli ndɛ kɛ ngalɛ sa’m be su yalɛ. Asa ekun’n, e nin a wunmɛn i Biblu’n nun le kɛ Mari yoli kɛ Zezi i akoto’m be nun nɲɔn be fa yoli’n sa. Akoto sɔ’m be srɛli Zezi kɛ maan be ɲan ɲrun Ɲanmiɛn i famiɛn diwlɛ’n nun lɔ. (Mat. 20:20-23) I sɔ’n kle kɛ Mari ti wun ase kanfuɛ dan.

19-20. ?Kɛ nga Zaki 1:22-25 nin 4:8 be fa kan’n sa’n, ngue ti yɛ e suan Biblu’n nun like-ɔ?

¹⁹ Nán e wla fi su kɛ like cinnjin nga ti yɛ e suan Biblu’n nin e fluwa’m be nun like’n, yɛle kɛ e kunndɛ kɛ é fá e wun mántan Zoova. Asa ekun’n, e kunndɛ kɛ é wún ‘sran wafa nga e ti’n,’ i wlɛ naan é sí ayeliɛ ng’ɔ fata kɛ e wlɛ i ase naan Ɲanmiɛn i klun w’a jɔ e wun’n. (An kanngan Zaki 1:22-25; 4:8 nun.) I sɔ’n ti’n, kwlaa naan y’a bo like suanlɛ bo’n, maan e srɛ Zoova kɛ ɔ fɛ i wawɛ’n man e. Maan e se i kɛ ɔ tike e ɲin naan e ɲan like nga e suan’n i su ye. Yɛle kɛ ɔ uka e naan e wun e ayeliɛ ng’ɔ klo kɛ e wlɛ i ase’n, i wlɛ.

²⁰ Maan e kwlakwla e mian e ɲin naan e nian Ɲanmiɛn i sufuɛ nga jue tofuɛ’n kɛnnin i ndɛ’n i ayeliɛ’n su. I waan:‘I like liɛ ng’ɔ klo i’n yɛle Ɲanmiɛn i mmla’n, ɔ bu i akunndan kɔnguɛ nin wia su. Like kwlaa nga ɔ yo’n, saan ɔ́ yó ye i sa nun.’—Jue. 1:2, 3.