LIKE SUANLƐ 46
Maan e nian e Ɲanmiɛn sulafilɛ’n m’ɔ ti kɛ ɲrɛn sa’n i lika kpa
“Maan Ɲanmiɛn su mɔ amun lafi’n, ɔ yo kɛ ɲrɛn dan wie sa amun sa nun.”—EFƐ. 6:16.
JUE 119 Ɔ fata kɛ e lafi Ɲanmiɛn su
I SU FITILƐ *
1-2. (1) ?Kɛ nga Efɛzifuɛ Mun 6:16 fa kan’n sa’n, ngue ti yɛ ɔ fata kɛ Ɲanmiɛn su mɔ e lafi’n, ɔ yo kɛ ɲrɛn dan wie sa e sa nun-ɔn? (2) ?Kosan benin mun yɛ é wá tɛ́ be su like suanlɛ nga nun-ɔn?
?WAFA nga amun lafi Ɲanmiɛn su dɔ nga su’n, ɔ ti kɛ “ɲrɛn dan wie” sa yɛ ɔ o amun sa nun-ɔn? (An kanngan Efɛzifuɛ Mun 6:16 nun.) E lafi su kɛ, kɛ wafa nga amun lafi Ɲanmiɛn su’n ti sɔ-ɔ. Sɛ sonja kun i ɲrɛn’n ti dan’n, ɔ kwla sɛsɛ i wunnɛn’n i dan lika. I wafa kunngba’n, sɛ e lafi Ɲanmiɛn su kpa’n, é kpálo mɛn tɛ nga nun ninnge tɛtɛ sunman. Ninnge sɔ’m be nun wie mun yɛle bla nin bian kunndɛlɛ sukusuku nin i wunsu ɲannzuɛn sa mun, nin nzaje sa mun yɛ ninnge kwlaa nga Ɲanmiɛn kpɔ be mun.
2 E si kɛ kɛ mɔ e o “mɛn’n i awieliɛ blɛ nun’n” ti’n, ninnge wie’m be ti’n, Ɲanmiɛn sulafilɛ’n kwla yo kekle man e. (2 Tim. 3:1) ?Ɔ maan ngue yɛ ɔ kwla uka e naan y’a wun i wlɛ sɛ e lafi Ɲanmiɛn su kpa annzɛ e lafimɛn i su kpa-ɔ? ?Yɛ é yó sɛ yo naan y’a lafi Ɲanmiɛn su kpa? É wá tɛ́ kosan sɔ’m be su like suanlɛ nga nun.
MAAN E NIAN E ƝANMIƐN SULAFILƐ’N M’Ɔ TI KƐ ƝRƐN SA’N I LIKA KPA
Kɛ sonja’m be fin alɛ kunlɛ be ba’n, be siesie be ɲrɛn’m be ye. (An nian ndɛ kpɔlɛ 3 nun.)
3. (1) ?Wafa sɛ yɛ sonja’m be nian be ɲrɛn’m be lika-ɔ? (2) ?Ngue ti-ɔ?
3 Lalafuɛ nun’n, sonja’m be fa nnɛn kplo be kata be ɲrɛn’n i wun. Yɛ kɛ ɔ ko yo naan kplo’n w’a saciman naan blalɛ’n kusu w’a diman annganblalɛ’n, be fa ngo be kpakpa be wun. Sɛ sonja kun nían naan i ɲrɛn’n i lika kun w’a saci’n, ɔ siesie i ye ndɛndɛ kwlaa naan b’a ɔ alɛ kunlɛ. ?Ngue ti yɛ e kwla fa sunnzun ase sɔ’n e kan Ɲanmiɛn sulafilɛ’n i ndɛ-ɔ?
4. (1) ?Ngue ti yɛ ɔ fata kɛ e nian e Ɲanmiɛn sulafilɛ’n m’ɔ ti kɛ ɲrɛn sa’n i lika kpa-ɔ? (2) ?Wafa sɛ yɛ e kwla yo i sɔ-ɔ?
4 Lalafuɛ nun’n, sonja’m be nian be ɲrɛn’m be lika kpa. I wafa kunngba’n, ɔ fata kɛ e kusu e nian e Ɲanmiɛn sulafilɛ’n m’ɔ ti kɛ ɲrɛn sa’n i lika wie. Afin sɛ é kwlá sé’n, e mɔ e ti Klisifuɛ’n e nin aolia nun sran tɛtɛ mun e su kun alɛ. Ɔ maan sɛ e niɛn i lika’n, e nin be é kwlá kún. (Efɛ. 6:10-12) Sran fi kwlá nianman e Ɲanmiɛn sulafilɛ’n m’ɔ ti kɛ ɲrɛn sa’n i lika manman e. ?Ɔ maan kwlaa naan sa wie w’a tɔ e su’n, é yó sɛ naan y’a wun i wlɛ kɛ wafa nga e lafi Ɲanmiɛn su’n ɔ kwla yo maan e jran kekle? Like klikli ng’ɔ fata kɛ e yo’n, yɛle kɛ e srɛ Ɲanmiɛn naan ɔ uka e. I sin’n, ɔ fata kɛ e suan Ɲanmiɛn Ndɛ’n nun like naan e si wafa nga Ɲanmiɛn bu e’n. (Ebr. 4:12) Biblu’n se kɛ: “Nán lafi ɔ bɔbɔ wɔ akunndan liɛ’n su. Anannganman i su yɛ lafi-ɔ.” (Nya. 3:5, 6) I sɔ’n ti’n, maan e bu ajalɛ nga e fali be le nɲɔn nun’n, be akunndan kan e nian. Atrɛkpa’n, sika ndɛ’n yoli kekle kpa e su. Yɛ blɛ sɔ nun’n, e buli ndɛ nga Zoova kannin m’ɔ o Ebre Mun 13:5 nun’n i su akunndan. Ndɛ mma sɔ’n waan: “N su yiman wɔ ase le, yɛ n su yaciman wɔ le.” I sɔ’n ti’n, e lafili su kɛ Zoova súan e bo titi. Sɛ i sɔ yɛ e yoli i sakpa’n, nn e nian e Ɲanmiɛn sulafilɛ’n m’ɔ ti kɛ ɲrɛn sa’n i lika kpa.
5. ?Sɛ e bu wafa nga e lafi Ɲanmiɛn su’n i akunndan kpa’n, ngue yɛ e kwla sie i nzɔliɛ-ɔ?
5 Sɛ e bu wafa nga e lafi Ɲanmiɛn su’n i akunndan kpa’n, atrɛkpa’n é síe sa wie’m be nzɔliɛ. Yɛ i sɔ’n bó e nuan bɔbɔ. I wie yɛle kɛ e kwla sie i nzɔliɛ kɛ ngokɔɛ’n annzɛ ato ndɛ wie mun annzɛ e sa sin m’ɔ bubuli e ti’n, e lafiman Ɲanmiɛn su kpa kun kɛ laa’n sa. ?Sɛ i sɔ sa’n ju e su’n é yó sɛ naan y’a lafi Ɲanmiɛn su kpa ekun naan cɛn uflɛ liɛ’n, nzue flɔlɔ w’a wluman e bo?
MAAN E NIAN E WUN SU NGOKƆƐ’N, NIN ATO NDƐ MUN, YƐ E SA SIN M’Ɔ KWLA BUBU E’N BE LIKA
6. ?Sa nga e kwla koko be ti’n, be nun wie mun yɛle benin?
6 Sa wie’m be o lɛ’n, sɛ e koko be ti’n ɔ ti su. I wie yɛle kɛ sɛ e kunndɛ kɛ e nin Zoova yɛ Zezi e afiɛn mantan ti yɛ e koko’n, ɔ timan tɛ. (1 Kor. 7:32) Sɛ kusu e yoli sa tɛ wie naan e koko wafa nga e nin Zoova e afiɛn kwla sɛ ekun’n i ti’n, ɔ ti kpa wie. (Jue. 38:19) Asa ekun’n, sɛ e kunndɛ kɛ e nin e yi annzɛ e wun e afiɛn mantan kpa’n, annzɛ e kunndɛ kɛ é nían e awlofuɛ mun nin e niaan Klisifuɛ’m be lika ti yɛ e koko’n, ɔ ti su. (1 Kor. 7:33; 2 Kor. 11:28)
7. ?Kɛ nga Nyanndra Mun 29:25 fa kan’n sa’n, ngue ti yɛ ɔ fataman kɛ e sro sran-ɔn?
7 Sɛ e koko ngboko’n, e su lafiman Ɲanmiɛn su kpa kun. I wie yɛle kɛ e kwla koko like nga é dí’n, nin tralɛ nga é wlá’n, be ti dan. (Mat. 6:31, 32) Sɛ e yo sɔ’n, é fá e ɲin é síe i aɲanbeun ninnge’m be kunndɛlɛ’n su kpɛkun é yó sika klofuɛ. Sɛ i sɔ sa’n ju kusu’n, e su lafiman Zoova su kpa kun kpɛkun e su sumɛn i kpa kun. (Mar. 4:19; 1 Tim. 6:10) Asa ekun’n, wafa nga sran’m be bu e’n ti’n, e kwla koko wie. Kpɛkun e kwla koko finfin nga sran’m be yo e’n nin yalɛ nga be kle e’n be ti. Sɛ e yo sɔ’n, e su kokoman e nin Zoova e afiɛn m’ɔ kwla saci’n i ti kun. Sɛ e kunndɛ kɛ é jrán sa sɔ’m be ɲrun kekle’n, ɔ fata kɛ e srɛ Zoova naan ɔ yo maan e lafi i su kpa yɛ ɔ wla e yakpa.—An kanngan Nyanndra Mun 29:25 nun; Lik. 17:5.
(An nian ndɛ kpɔlɛ 8 nun.) *
8. ?Sɛ be kan ato ndɛ wie kle e’n ngue yɛ é yó-ɔ?
8 Satan m’ɔ ti “ato buafuɛ’m be si’n” ɔ yo maan be ng’ɔ sie be’n, be bua Zoova nin e niaan’m be su ato. (Zan 8:44) I wie yɛle kɛ be nga be nin Ɲanmiɛn b’a bu’n, be kan e su ato ndɛ wie mun ɛntɛnɛti su, annzɛ televiziɔn nun annzɛ zronali nun annzɛ fluwa uflɛ nun. Be ato ndɛ sɔ’m be o Satan i “ta mma m’ɔ sɔ be nuan to’n,” be nun wie. (Efɛ. 6:16) ?Sɛ sran wie waan ɔ́ kɛ́n i sɔ ato ndɛ’n wie klé e’n, ngue yɛ é yó-ɔ? E su sieman e su i nuan bo mlɔnmlɔn. Afin e lafi Zoova nin e niaan’m be su. Kpɛkun e nin be nga be nin Ɲanmiɛn b’a bu’n, e kokoman yalɛ mlɔnmlɔn. I kunngba’n, e kunndɛman kɛ é mán sran wie annzɛ like wie i atin naan ɔ yo maan e nin sran sɔ mun e koko yalɛ. Annzɛ kusu e kunndɛman kɛ e bɔbɔ é fá ajalɛ kɛ e nin be é kókó yalɛ.
9. ?Sɛ e sa sin bubu e’n, sa benin wie mun yɛ be kwla ju e su-ɔ?
9 Sɛ e sa sin bubu e’n, e su lafiman Ɲanmiɛn su kpa kun. E si kɛ blɛ wie nun’n, sa nga be o su’n be ti’n e sa sin bubu e. Kusu e kwlá yoman kɛ sa nunman e su sa. Yɛ i sɔ yolɛ’n kusu timan ngwlɛlɛ ayeliɛ. Sanngɛ ɔ fataman kɛ e bu e su sa’m be akunndan sa trilili. Afin sɛ e yo sɔ’n e ɲin kpá like kpa nga Zoova seli kɛ ɔ́ fá man e’n su. (Ngl. 21:3, 4) Kpɛkun i sɔ’n kwla yo maan e yaci Zoova i sulɛ bɔbɔ. (Nya. 24:10) Kusu ɔ fataman kɛ i sɔ sa’n ju e su kaan sa.
10. ?Ngue like yɛ fluwa nga aniaan bla kun klɛli’n, ɔ kle e-ɔ?
10 Aniaan bla kun tran Etazinin. Yɛ ɔ niɛn i wun’n m’ɔ ti tukpacifuɛ’n i lika. Cɛn kun’n, ɔ klɛli Anuannzɛ’n i fluwa kannin like ng’ɔ ukɛ i naan w’a kwla lafi Ɲanmiɛn su’n i ndɛ. Fluwa nun’n ɔ seli kɛ: “Sa ng’ɔ o e su’n ti’n ɔ ju wie’n, e wla bo e wun yɛ e sa sin bubu e. Sanngɛ e lafi like nga e wla o su’n, i su titi. Kɛ n bu like kwlaa nga Zoova yo man e naan y’a lafi i su kpa naan e sa sin w’a bubuman e i akunndan’n, ɔ yo min fɛ dan. Nanwlɛ e sa mian afɔtuɛ sɔ mun nin fɔnvɔlɛ ndɛ sɔ’m be wun kpa. Afin ndɛ sɔ’m be uka e naan y’a su Zoova kpa titi. Kpɛkun be yo naan y’a jran sa kwlaa nga Satan kunndɛ ɔ́ fá búbú e sa sin’n, be ɲrun kekle.” Ndɛ nga aniaan bla’n kannin’n kle kɛ e kwla jran like kwlaa ng’ɔ kwla bubu e sa sin’n be ɲrun kekle. ?Wafa sɛ? Yɛle kɛ, kɛ sa’m be tɔ e su’n maan e se e wun kɛ Satan yɛ ɔ su sa e nian-ɔn. Asa ekun’n maan e lafi su kɛ Zoova súan e bo titi. Yɛ e si like kwlaa ng’ɔ fa man e naan y’a kwla su i kpa’n i su ye.
Maan e nian e Ɲanmiɛn sulafilɛ’n m’ɔ ti kɛ ɲrɛn sa’n i lika. (An nian ndɛ kpɔlɛ 11 nun.) *
11. ?Sɛ e waan é wún i wlɛ kɛ e lafi Ɲanmiɛn su kpa’n, kosan benin mun yɛ e kwla fa usa e wun-ɔn?
11 ?Amun sieli i nzɔliɛ kɛ ɔ fata kɛ amun lafi Ɲanmiɛn su kpa tra laa’n? ?Anglo nga be sinnin lɛ’n be nun’n, amun yoli like kwlaa nga amun kwla yo naan amun a kokoman like wie ti ngboko? ?Amun miannin amun ɲin naan amun nin be nga be nin Ɲanmiɛn b’a bu’n b’a kokoman yalɛ? ?Annzɛ amun miannin amun ɲin naan amun a sieman amun su be ato ndɛ nga be kan be sin’n be bo? ?Amun jrannin sa wie ɲrun kekle maan amun sa sin w’a bubuman amun? Sɛ i sɔ yɛ amun yoli’n nn amun lafi Ɲanmiɛn su tankaan kpa. Sanngɛ ɔ fata kɛ e nian e wun su Satan i lika. Afin ɔ le ninnge uflɛ wie m’ɔ kwla fa be laka e naan e yaci Zoova i sulɛ-ɔ. Maan e kɛn i ninnge sɔ’m be nun kun i ndɛ.
MAAN E NIAN E WUN SU AƝANBEUN NINNGE’M BE KUNNDƐLƐ’N I LIKA
12. ?Sɛ e klo aɲanbeun ninnge mun dan’n sa benin yɛ ɔ kwla ju e su-ɔ?
12 Sɛ e klo aɲanbeun ninnge mun dan’n, é kpɔ́nzɔ Zoova i sulɛ’n nun. Akoto Pɔlu seli kɛ: “Sran ng’ɔ di sonja junman’n ɔ fɛmɛn i wun wlɛmɛn i aata dilɛ’n nun, afin ɔ kunndɛ kɛ sran ng’ɔ fɛli i wlali sonja junman’n nun’n i klun jɔ i wun.” (2 Tim. 2:4) Ndɛ sɔ’n kle kɛ laa’n, be kplinman su kɛ Rɔmun lɔ sonja’m be fa be wun be wlɛ i aata dilɛ nun mlɔnmlɔn. ?Sɛ sonja kun w’a nantiman ajalɛ sɔ’n su’n, ngue sa yɛ ɔ kwla ju-ɔ?
13. ?Ngue ti yɛ ɔ fataman kɛ sonja’m be fa be wun be wlɛ i aata dilɛ’n nun-ɔn?
13 Maan e bu sa nga i akunndan kan e nian. Nglɛmun’n, sonja wie’m b’a fa be tokofi mun yɛ be su kpinngbin be wun. Bé nían-ɔn, be wiengu kun nunman lɛ. Kannzu w’a ɔ aliɛ atɛ yolɛ gua bo lɔ. Nnɔsua nun’n, sonja’m be siesie be alɛ kunlɛ ninnge’m be ye kpɛkun be si be tokofi mun. Kɛ ɔ́ yó sɔ’n nn be wiengu kun’n su tɔn aliɛ ng’ɔ́ kó yó i atɛ cɛn uflɛ’n. Sanngɛ nglɛmun kun’n, be kpɔfuɛ’m be wa fuli be nun. ?Kɛ amun niɛn i sa’n, sonja benin yɛ ɔ kwla kun alɛ’n i kpa mɔ i su kpɛn’n i klun jɔ́ i wun-ɔn? ?Sɛ ɔ ti kɛ amun kun alɛ sɔ’n wie’n, nn sonja benin yɛ amún kúnndɛ kɛ ɔ jran amun wun lɛ-ɔ? ?Ng’ɔ fɛli i blɛ siesieli i wun’n annzɛ ng’ɔ ɔli aata dilɛ’n?
14. ?Kɛ mɔ e ti Klisi i sonja’n ti’n ngue yɛ ɔ ti e cinnjin-ɔn?
14 E ti kɛ sonja mun sa. Yɛ like ng’ɔ ti e cinnjin’n, yɛle kɛ Zoova nin Zezi mɔ be ti e su kpɛn’n, be klun jɔ e wun. I sɔ’n ti e cinnjin tra like kwlaa nga e kwla ɲɛn i Satan i mɛn tɛ nga nun’n. I sɔ’n ti’n, e fa e blɛ’n nin e wunmiɛn’n kwlaa e su Zoova. Kɛ e yo sɔ’n ɔ ti kɛ e su nian e Ɲanmiɛn sulafilɛ’n m’ɔ ti kɛ ɲrɛn sa’n i lika kpa.
15. (1) ?Ngue ndɛ yɛ Pɔlu kannin-ɔn? (2) ?Ngue ti-ɔ?
15 ?Ngue ti yɛ ɔ fata kɛ e nian e wun su titi-ɔ? Akoto Pɔlu seli kɛ: ‘Be nga b’a fua kpa kɛ bé ɲán be wun’n, be su lafiman Ɲanmiɛn su kun.’ (1 Tim. 6:9, 10) Ndɛ sɔ’n kle kɛ sɛ y’a nianman e wun kpa’n, aɲanbeun ninnge’m be kunndɛlɛ’n ti’n, e ɲin kwla kpa Ɲanmiɛn sulɛ’n su. Ɔ maan e konvi kwla “sɔ ninnge finfin nin ninnge tɛtɛ” mun. Nán e wla fi su kɛ Satan fa ninnge sɔ mun laka e naan e yaci Zoova i su lafilɛ.
16. ?Kɛ e kanngan Marki 10:17-22 nun’n, kosan benin mun yɛ e kwla fa usa e wun-ɔn?
16 Wienun-ɔn, e le sika kaka kpa. Kpɛkun e waan é tótó ninnge wie mun. Sanngɛ atrɛkpa’n e ja nun lɛ’n, e sa mianman ninnge sɔ’m be wun. ?Ɔ nin i sɔ ngba’n, e kwla usa e wun kɛ sɛ e toto be’n, i sɔ’n ti tɛ? I sɔ’n timan tɛ. Sanngɛ maan e bu kosan nga’m be akunndan. ?Kannzɛ bɔbɔ e le sika e to like kun’n, sanngɛ é ɲán blɛ nin wunmiɛn é nían like sɔ’n i lika? ?Ninnge’m be totolɛ sɔ’n kusu su yoman naan y’a klo aɲanbeun ninnge mun yɛ ɔ o lɛ-ɔ? ?Sɛ i sɔ sa’n ju kusu’n, e su yoman kɛ gbanflɛn aɲanbeunfuɛ nga w’a kplinman su kɛ ɔ́ sú Zezi su naan ɔ́ dí Ɲanmiɛn junman’n i kpa trá laa’n i sa? (An kanngan Marki 10:17-22 nun.) Nanwlɛ sɛ e faman aɲanbeun ninnge’m be kunndɛlɛ’n e ciciman e ti naan e fa e ɲin e sie i Ɲanmiɛn sulɛ’n su kpa’n, é ɲán su ye dan.
MAAN E NIAN E ƝANMIƐN SULAFILƐ’N M’Ɔ TI KƐ ƝRƐN SA’N I LIKA KPA
17. ?Ngue yɛ ɔ fataman kɛ e wla fi su-ɔ?
17 Nán e wla fi su le kɛ e o alɛ nun. Ɔ maan ɔ fata kɛ e siesie e wun naan cɛn kwlakwla’n y’a kwla kun alɛ sɔ’n. (Ngl. 12:17) Asa ekun’n, nán aniaan mun yɛ bé wá nían e Ɲanmiɛn sulafilɛ’n m’ɔ ti kɛ ɲrɛn sa’n i lika mán e-ɔ. Ɔ fata kɛ e bɔbɔ e mian e ɲin naan e Ɲanmiɛn sulafilɛ’n i bo’n wla ase kpa.
18. ?Ngue ti yɛ lalafuɛ nun’n sonja’m be nian be ɲrɛn’n su kpa-ɔ?
18 Lalafuɛ nun’n, kɛ bé kún alɛ mɔ sonja kun kle kɛ ɔ ti yakpafuɛ’n, be mɛn i sasu. Sanngɛ sɛ sonja kun fín alɛ kunlɛ bá naan i ɲrɛn’n nunmɛn i sa nun’n, i sɔ’n ti ɲannzuɛn dan. Rɔmun lɔ fluwa sifuɛ kun seli kɛ: “Sɛ sonja kun i ɲrɛn’n mlin i sa nun alɛ kunwlɛ lɔ’n, i ɲin gúa ase tɛtɛ kpa.” I sɔ’n ti yɛ kɛ sonja’m bé kún alɛ’n be nian be ɲrɛn’n su kpa’n niɔn.
Aniaan bla kun miɛn i ɲin kanngan Biblu’n nun, ɔ kɔ aɲia’m be bo yɛ ɔ bo jasin fɛ’n titi. I lɛ nun’n, ɔ kle kɛ ɔ niɛn i Ɲanmiɛn sulafilɛ’n m’ɔ ti kɛ ɲrɛn sa’n i lika kpa. (An nian ndɛ kpɔlɛ 19 nun.)
19. ?Ngue yɛ ɔ fata kɛ e yo naan y’a nian e Ɲanmiɛn sulafilɛ’n m’ɔ ti kɛ ɲrɛn sa’n i lika-ɔ?
19 Sɛ e waan é nían e Ɲanmiɛn sulafilɛ’n m’ɔ ti kɛ ɲrɛn sa’n i lika’n, ɔ fata kɛ e yo ninnge wie mun. I wie yɛle asɔnun aɲia’m be bo kɔlɛ titi’n nin jasin fɛ bolɛ’n. (Ebr. 10:23-25) Asa ekun’n, maan e kanngan Ɲanmiɛn Ndɛ’n nun cɛn kwlakwla yɛ e srɛ Ɲanmiɛn kɛ ɔ uka e naan e nanti i nun ndɛ’n su titi sa kwlaa nun. (2 Tim. 3:16, 17) Sɛ e yo sɔ’n ninnge kwlaa nga Satan yi be kɛ ɔ́ fá kún e’n, ɔ́ yó ngbɛn. (Eza. 54:17) Afin e Ɲanmiɛn sulafilɛ’n m’ɔ ti kɛ ɲrɛn sa’n ɔ́ sásá e. Yɛ i sɔ’n yó maan e nin aniaan mun e bo yó kun é sú Zoova likawlɛ. Kpɛkun é jrán sa kwlaa nga be tɔ e su aliɛ ba kwlaa nun’n, be ɲrun kekle. Sanngɛ like ng’ɔ ti cinnjin kpafuɛ’n yɛle kɛ, kɛ Zezi wá kwlá Satan nin i minniɛn mun’n, é trán be nga bé ɲán be ti’n, be nun wie.—Ngl. 17:14; 20:10.
JUE 118 ‘Man e awlɛn maan e lafi Ɲanmiɛn su kpa’
^ ndɛ kpɔlɛ 5 Sonja’m be fa be ɲrɛn’n be sasa be wun naan sa wie w’a ɲanman be. Sanngɛ kɛ ɔ ko yo naan i sɔ liɛ’n w’a yo ye’n, ɔ fata kɛ be niɛn i lika kpa. E kwla fa Ɲanmiɛn sulafilɛ’n e sunnzun ɲrɛn dan kun. Ɔ maan, sɛ e lafi Ɲanmiɛn su kpa’n, i sɔ liɛ’n sásá e kɛ ɲrɛn dan wie sa. Like suanlɛ nga nun’n, é wá kán like nga e kwla yo naan y’a wun i wlɛ sɛ e lafi Ɲanmiɛn su kpa-o annzɛ e lafimɛn i su kpa-o, i ndɛ.
^ ndɛ kpɔlɛ 58 FOTO NIN DESƐN’M BE SU NDƐ’N: Kɛ awlobo kun nunfuɛ mɔ be ti Zoova i Lalofuɛ’n bé nían televiziɔn’n, be wunnin i kɛ be nga be nin Ɲanmiɛn b’a bu’n be su kan Zoova i Lalofuɛ’m be su ato ndɛ wie mun. Ɔ maan be ka lɛ nuannin televiziɔn’n.
^ ndɛ kpɔlɛ 60 FOTO NIN DESƐN’M BE SU NDƐ’N: I sin’n kɛ bé sú Ɲanmiɛn awlo lɔ’n, siɛ’n fali be ɲin sieli i Biblu’n nun ndɛ mma kun m’ɔ kwla wla be fanngan naan b’a lafi Ɲanmiɛn su kpa’n su.
