?Ngue ti yɛ sran’m be kunndɛ kɛ bé trán nguan nun titi-ɔ? Afin Ɲanmiɛn Ndɛ’n kle kɛ Ɲanmiɛn w’a boman e kɛ e wu. (Akunndanfuɛ’n 3:11) Asa ekun’n ɔ se kɛ “Ɲanmiɛn ti klolɛ.” (1 Zan 4:8) Kɛ mɔ Ɲanmiɛn klo e ti’n, sɛ ɔ ti kɛ e su tranman nguan titi’n, nn w’a faman e ɲin w’a siemɛn i sɔ’n su.

Ndɛ sɔ’n kle kɛ wie’n timan e janvuɛ sanngɛ ɔ ti ‘e kpɔfuɛ.’ (1 Korɛntifuɛ Mun 15:26) Sran wie’m be cɛman naan b’a wu. Wie’m be kusu be cɛ kan naan b’a wu. Sanngɛ i kwlaa yoli-o saan é wú cɛn kun. I sɔ’n ti’n, kɛ sran sunman be bu i kɛ cɛn kun bé wú’n, srɛ kun be. ?Cɛn kun sran’m be su wuman kun? ?I sɔ’n kwla yo ye sakpa?

Sɛ be se amun kɛ Ɲanmiɛn w’a yiman sran kɛ ɔ wu’n, atrɛkpa’n, i sɔ’n kwla bo amun nuan. Biblu’n nun fluwa kun mɔ be flɛ i kɛ Bo bolɛ’n, ɔ kle kɛ kɛ Ɲanmiɛn yili sran mun’n, ɔ kunndɛli kɛ be tran asiɛ’n su tititi. Afin kɛ ɔ yili asiɛ’n, ɔ fali ninnge kwlaa nga sran kwla ɲɛn i naan w’a tran nguan titi’n fa sieli su. Kpɛkun ɔ yili Adan yɛ ɔ fɛli i sieli lika sɔ’n nun. Be flɛ lika sɔ’n kɛ Edɛnin fie. I sin’n, “Nyanmiɛn niannin ninnge ng’ɔ yoli’n be kwlaa, ɔ wunnin kɛ ɔ yoli kpa dan.”​—Bo Bolɛ 1:26, 31.

Ɲanmiɛn boli Adan kɛ i bɔbɔ sa. Ɔ maan fɔ kaan sa nunmɛn i nun. (Mmla’n 32:4) Adan i yi Ɛvu kusu kɛ Ɲanmiɛn yili i’n, fɔ nunmɛn i nun wie.  Kpɛkun Zoova seli be kɛ: “An trɛ, an sɔn kpa, an yi asiɛ’n, an sie i. Jenvie’n nun jue mun nin anunman bɔ be tu sin nglo lɔ’n mun, ɔ nin nnɛn nga be wlan asiɛ’n su’n, amun sie be kwlakwla.”​—Bo Bolɛ 1:28.

Kɛ ɔ ko yo naan asiɛ’n w’a yi kɛ nga Ɲanmiɛn fa sunnzunnin sa’n, ɔ fata Adan nin Ɛvu be wu ba naan be mma’m be wu be mma liɛ mun lele naan asiɛ’n yi. I sɔ yolɛ’n kusu fá blɛ. (Ezai 45:18) ?Sɛ ɔ ti kɛ Ɲanmiɛn w’a boman Adan nin Ɛvu kɛ be tran nguan nun titi’n, nn ngue ti yɛ ɔ fali junman sɔ’n mannin be-ɔ?

Asa ekun’n, Ɲanmiɛn seli Adan kɛ ɔ sie nnɛn’m be kwlakwla yɛ ɔ tɔn be tinuntinun be dunman. (Bo Bolɛ 2:19) Junman sɔ’n i dilɛ nun’n, ɔ fata kɛ ɔ suan wafa nga nnɛn’m be yo ninnge mun’n i su like naan ɔ si be kpa naan w’a kwla tɔn be dunman naan w’a nian be lika. I sɔ’n yolɛ kusu ɔ́ fá blɛ kaka kpa.

Junman fanunfanun nga Ɲanmiɛn fa mannin Adan nin Ɛvu’n, ɔ kle kɛ w’a boman be kɛ be di le nɲɔn kun cɛ, sanngɛ ɔ boli be kɛ be cɛ kpa. Biblu’n kle kɛ Adan cɛli nguan nun kusu.

Biblu’n kan sran sunman mɔ be cɛli nguan nun be trali andɛ sran mun’n be ndɛ. I waan: “Adam dili afuɛ ya ngwlan nin afuɛ ablasan yɛ ɔ wuli-ɔ.” Kpɛkun ɔ kan sran 6 ekun mɔ be dili afuɛ 900 tra su naan b’a wun’n, be ndɛ wie. Be yɛle Sɛti, nin Enɔsu, nin Kenan, nin Zerɛdi, nin Mɛtisela, ɔ nin Nowe. Sran sɔ’m be trannin nguan nun ka naan anannganman su nzue’n w’a tɔ. Nowe dili afuɛ 600 ka naan nzue’n w’a tɔ. (Bo Bolɛ 5:5-27; 7:6; 9:29) ?Ngue ti yɛ sran sɔ’m be kwla cɛli sɔ-ɔ?

Like nga ti yɛ sran sɔ’m be cɛli dan sɔ’n yɛle kɛ blɛ sɔ’n nun nn fɔ’n wluli sran’m be nun ɔ nin-a cɛman. Ɔ maan be yoman kpɛnngbɛn ndɛndɛ yɛ tukpacɛ kleman be yalɛ dan. ?Ngue ti yɛ sɛ sran’m be waan bé trán nguan nun titi’n, ɔ fataman kɛ fɔ tran be nun-ɔn? ?Ngue yɛ Ɲanmiɛn wá yó naan sran’m b’a wuman kun-ɔn? Kwlaa naan y’a tɛ kosan sɔ’m be su’n, é wá kán like nga ti yɛ sran’m be yo kpɛnngbɛn kpɛkun be wu’n, i ndɛ.