Wie’n kun e ngba
MAAN e se kɛ e su niaan jue tofuɛ kun mɔ i dunman’n fuli dan mɔ e klo i kpa kusu’n, i su video kun. Video’n i bo bolɛ nun’n, be kle jue tofuɛ sɔ’n i kaan nun ɔ su suan jue tolɛ. I sin’n, w’a si jue to kpa. Ɔ maan siɛn’n, ɔ tu ajalɛ kɔ nvlenvle’m be nun ko to jue. Kɛ bé klé i ekun’n, w’a yo oke. I agualiɛ su’n w’a wu.
Sa nga video kɛnnin i ndɛ lɛ’n, ɔ juli sakpasakpa. Video sɔ’n i nun ndɛ’n kle weiin kɛ kannzɛ sran kun ti jue tofuɛ-o, annzɛ ɔ ti fluwa sifuɛ-o, annzɛ ɔ si like wie yo-o, annzɛ kusu maan i dunman’n fu-o, saan ɔ́ wú cɛn kun. E si kɛ i nun mɔ sran sɔ’n o nguan nun’n, ɔ yoli ninnge kpanngban. Sanngɛ sɛ ɔ ti kɛ sran’m be yoman oke yɛ be wuman sa’n, nn like nga sran sɔ’n yó’n, saan ɔ́ trá ngalɛ’n.
Kɛ e bu i akunndan kɛ kannzɛ maan e yo sɛ e yo sɛ saan é wú cɛn kun’n, nanwlɛ i sɔ’n bo e wla. (Akunndanfuɛ’n 9:4-5) Kannzɛ e mian e ɲin e yo like kwlaa nga e kwla yo naan y’a yoman kpɛnngbɛn naan y’a wuman’n, sanngɛ i kwlaa sɔ’n yó ngbɛn. Afin asidan wie annzɛ tukpacɛ wie kwla kpɛ e nguan’n i sin. I sɔ’n ti’n Biblu’n se kɛ e ti kɛ ‘bɔlɛ ufue m’ɔ cɛman nn w’a titi’n sa.’—Zaki 4:14.
Kɛ mɔ e wie cɛn’n kwla fu e nun’n ti’n, sran wie’m be liɛ’n be waan “maan e di like, yɛ e nɔn nzan, afin ainman é wú.” (1 Korɛntifuɛ Mun 15:32) Like nga ti yɛ be se sɔ’n, yɛle kɛ be siman cɛn nga bé wú’n, yɛ be leman like kpa kun sa mɔ be kwla fa be wla be gua su-ɔ. Kɛ e awlɛn su sran wie kpɛ co wu’n, e kwla usa e wun kɛ: ‘?Kɛ e ko wu’n nn e liɛ w’a wie?’ ?Nin yɛ e kwla wun kosan sɔ’n i su tɛlɛ’n niɔn?
Andɛ’n, sran sunman be bu i kɛ siansifuɛ mun yɛ be kwla tɛ kosan sɔ’n su-ɔ. Afin siansifuɛ sɔ’m be nun wie’m b’a wun ninnge wie mun mɔ be kwla uka sran mun naan b’a cɛ nguan nun-ɔn. Yɛ wie’m be kusu be di junman kekle kpa naan bé wún like nga sran’m be kwla yo naan b’a cɛ nguan nun b’a tra laa’n. Kannzɛ maan be mian be ɲin sɛ, sanngɛ é úsa e wun titi kɛ: ?Ngue ti yɛ e yo kpɛnngbɛn mɔ e wu-ɔ? ?Cɛn kun’n, e su wuman kun? ?Kɛ e ko wu’n nn e liɛ w’a wie? Fluwa nga nun’n, é wá tɛ́ kosan sɔ’m be su.