1-2. (1) ?Ngue ti yɛ e kwla se kɛ Aamagedɔn’n ti ndɛ fɛ-ɔ? (2) ?Like suanlɛ nga nun’n kosan benin mun yɛ é wá tɛ́ be su-ɔ?

ATRƐKPA’N, amun a ti i le kɛ sran’m be waan Aamagedɔn ti alɛ dan kpa kun mɔ sran’m bé wá dí-ɔ. Annzɛ kusu ɔ ti like wie mɔ sran’m bé wá yó naan asiɛ’n su tranlɛ’n wa yoman ye kun-ɔn. Sanngɛ Aamagedɔn’n i su ndɛ nga Biblu’n kan’n nin sran’m be liɛ’n, ɔ timan kun. Biblu’n i ndɛ liɛ ng’ɔ kan’n, ɔ ti ndɛ fɛ. (Ngl. 1:3) Afin Aamagedɔn alɛ’n ti’n, sran’m bé wá ɲán be ti. ?Ngue ti yɛ e se sɔ-ɔ?

² Biblu’n kle weiin kɛ Aamagedɔn alɛ’n nun’n klɔ sran’m be famiɛn diwlɛ kwlaa ɔ́ núnnún kpɛkun sran’m bé ɲán be ti. Alɛ sɔ’n nun’n, bé núnnún klunwifuɛ mun yɛ sran kpa’m bé fíte nun. Ɔ maan asiɛ’n su saciman kun. (Ngl. 11:18) Kɛ ɔ ko yo naan y’a kwla wun ndɛ kwlaa sɔ’m be wlɛ kpa’n, maan e fa e ɲin e sie i kosan nnan nga’m be su: ?Ngue yɛle Aamagedɔn’n? ?Sa benin mun yɛ bé wá jú ka naan w’a bo i bo-ɔ? ?Ngue yɛ e kwla yo naan y’a tran be nga bé ɲán be ti’n be nun wie-ɔ? ?Kɛ Aamagedɔn’n mántan koko’n ngue yɛ e kwla yo naan y’a kpɔciman Ɲanmiɛn-ɔn?

3. (1) ?Aamagedɔn’n i bo’n yɛle benin? (2) ?Wafa sɛ yɛ Sa Nglo Yilɛ 16:14, 16 kle kɛ Aamagedɔn timan lika jrɛiin sa-ɔ?

³ An kanngan Sa Nglo Yilɛ 16:14, 16 nun. Be kannin Aamagedɔn’n i ndɛ kpɛ kunngba Biblu’n nun, yɛ ɔ fin Ebre nun ndɛ mma kun mɔ i bo’n yɛle ‘Megido oka’n’. (Ngl. 16:16; jnd.) Megido sɔ’n ti laa Izraɛli lɔ klɔ kun. (Zoz. 17:11) Sanngɛ kɛ Biblu’n kan Aamagedɔn ndɛ’n, nán lika jrɛiin kun ndɛ yɛ ɔ kan-ɔn. Sɛ é kwla sé’n, ɔ ti sa ng’ɔ́ wá sú asiɛ’n su famiɛn mun nin be  sonja’m be bo naan be nin Ɲanmiɛn be kun’n, i nzɔliɛ. (Ngl. 16:14) Sanngɛ like suanlɛ nga nun’n, kɛ é wá kán “Aamagedɔn” ndɛ’n, é fá kán alɛ nga Ɲanmiɛn nin asiɛ’n su famiɛn’m bé wá kún’n, i ndɛ wie. ?Sanngɛ wafa sɛ yɛ e si kɛ Aamagedɔn’n ti nzɔliɛ like-ɔ? Like nsan ti-ɔ. I klikli’n yɛle kɛ ɔ leman oka kun m’ɔ be flɛ i kɛ Megido andɛ-ɔ. I nɲɔn su’n yɛle kɛ Megido i wun lɛ lika’n ti kaan. Ɔ maan “famiɛn nga be o asiɛ wunmuan’n su’n” nin be sonja mun nin be alɛ kunlɛ ninnge’m be kwlá sɔnman lɔ. I nsan su’n yɛle kɛ, kɛ nga é wá wún i like suanlɛ nga nun sa’n, kɛ “famiɛn nga be o asiɛ wunmuan’n su’n” bé wá fá alɛ wlá Ɲanmiɛn i sufuɛ’m be sin’n yɛ Aamagedɔn alɛ’n w’a bo i bo-ɔ. Kusu nn Ɲanmiɛn i sufuɛ’m be tranman lika kunngba’n nun.

4. ?Ngue ti yɛ kɛ Zoova kán i alɛ dan kasiɛn’n i ndɛ’n ɔ kannin Megido lika’n i ndɛ-ɔ?

⁴ ?Ngue ti yɛ kɛ Zoova kán i alɛ dan kasiɛn’n i ndɛ’n ɔ kannin Megido lika’n i ndɛ-ɔ? Lalafuɛ nun’n, sran’m be kunnin alɛ kpanngban Megido nin Zizreɛli lika’n nun. Alɛ sɔ’m be nun wie’m be nun’n Zoova ukɛli i nvle nunfuɛ’m maan be kwlali be kpɔfuɛ mun. I wie yɛle alɛ nga Baraki nin Kanaanfuɛ’m be famiɛn Sizɛra be kunnin’n. Alɛ sɔ’n nun’n, Ɲanmiɛn fali ‘Megido nzue’n’ yoli naan Izraɛlifuɛ’m b’a kwla kwla be kpɔfuɛ mun. I sin’n, Baraki nin Debora be toli jue kun fa lali Zoova i ase. Jue sɔ’n nun’n be seli kɛ: “Nzraama’m be fin Nyanmiɛn su lɔ be nin Sizɛra be wa kunnin. Kizɔn nzue ba’n bɔ nán andɛ sa yɛ ɔ sonji’n, ɔ fali be ɔli.”—Jɔl. 5:19-21.

5. ?Ngbaciɛ benin yɛ ɔ o alɛ nga Baraki kunnin’n, ɔ nin Aamagedɔn alɛ’n be afiɛn-ɔn?

⁵ Jue nga Baraki nin Debora be toli’n i awieliɛ lɔ’n be seli kɛ: “Anannganman, maan ɔ kpɔfuɛ’m be wu sa tititi! Sanngɛ maan be nga be klo wɔ’n be yo kɛ wia bɔ w’a man su m’ɔ su bo kpa’n sa.” (Jɔl. 5:31) Aamagedɔn alɛ’n nun’n, Ɲanmiɛn wá núnnún i kpɔfuɛ mun kpɛkun be nga be klo i’n bé ɲán be ti. Sanngɛ ngbaciɛ dan kpa o alɛ nga Baraki kunnin’n ɔ nin Aamagedɔn alɛ’n be afin. Yɛle kɛ Aamagedɔn alɛ’n nun liɛ’n, Ɲanmiɛn i sufuɛ’m be su kunman alɛ. I kpa bɔbɔ’n be su wunman alɛ kunlɛ ninnge be sa nun. Blɛ sɔ’n nun’n like nga bé wá yó’n yɛle kɛ bé gúa be wla ase, yɛ bé láfi Zoova nin i alɛ kunfuɛ’m be su. Ɔ maan bé ɲán wunmiɛn.​—Eza. 30:15; Ngl. 19:11-15.

6. ?Ninnge benin wie mun yɛ Aamagedɔn alɛ’n nun’n, Zoova kwla fa nunnun i kpɔfuɛ mun-ɔn?

⁶ ?Aamagedɔn alɛ’n nun’n, ngue yɛ Ɲanmiɛn wá fá núnnún i kpɔfuɛ mun-ɔn? Ɔ kwla fa ninnge sunman. I wie yɛle nzraama mɔ kɛ nzue tɔ’n be gua’n, nin asiɛ’n m’ɔ keje’n, ɔ nin ɲanmiɛn m’ɔ kpa sin piapiapia’n. (Zɔb 38:22, 23; Eze. 38:19-22) Ɔ kwla yo maan i kpɔfuɛ’m be ngunminngunmin be kpɛ be ɲin be kun be wun. (2 Nyo. 20:17, 22, 23) Annzɛ ɔ kwla se i anzi’m be kɛ be kun i kpɔfuɛ mun. (Eza. 37:36) E siman like trele nga Zoova wá fá núnnún i kpɔfuɛ mun. Sanngɛ nga e si i’n, yɛle kɛ ɔ́ kwlá be. Blɛ sɔ’n nun’n, sran kpa’m bé ɲán be ti.​—Nya. 3:25, 26.

7-8. (1) ?Kɛ nga 1 Tesalonikifuɛ Mun 5:1-6 fa kan’n sa’n, ngue ndɛ yɛ sran’m bé wá kán-ɔn? (2) ?Yɛ ngue ti yɛ ndɛ sɔ’n ti tɛ kpa-ɔ?

⁷ Kwlaa naan “Zoova i cɛn’n” w’a ju’n sran’m bé sé kɛ “e su di fɔundi, srɛ kunman e kun.” (An kanngan 1 Tesalonikifuɛ Mun 5:1-6 nun.) ‘Zoova i cɛn’ nga 1 Tesalonikifuɛ 5:2 kɛn i ndɛ’n i kunngba’n yɛle “ɲrɛnnɛn dan’n.” (Ngl. 7:14) ?Kɛ ɲrɛnnɛn dan’n wá bó i bo’n, wafa sɛ yɛ é sí sɔ-ɔ? Biblu’n se kɛ sran’m bé wá kán ndɛ kun. Kɛ be ko kan ndɛ sɔ’n cɛ’n, nn ɲrɛnnɛn dan’n w’a bo i bo.

⁸ Ndɛ nga sran’m bé wá kán yɛle kɛ “e su di fɔundi, srɛ kunman e kun.” ?Ngue ti  yɛ mɛn siefuɛ’m bé wá kán ndɛ sɔ’n niɔn? ?Ɲanmiɛn sulɛ wafa nga be timan su’n be su kpɛnngbɛn’m be nin mɛn siefuɛ’m be bo wá yó kun yɛ bé kɛ́n i sɔ’n ndɛ’n niɔn? Ɔ kwla yo sɔ-ɔ. Sanngɛ i kwlaa yoli-o ndɛ nga bé wá kɛ́n i lɛ’n, ɔ fin mmusu mun. Yɛ ɔ ti ndɛ tɛ dan. Afin kɛ bé wá sé sɔ’n sran’m bé wá bú i kɛ b’a ɲan be ti sakpa, kusu nn ɲrɛnnɛn dan kpa kun su wa tɔ be su. Yɛle kɛ “bé ká lɛ bé núnnún be kpɛ kunngba, kɛ nga ba wulɛ aklunya tɔ wunnzɛfuɛ su’n sa.” ?Yɛ Zoova i sufuɛ’m be li? Kɛ mɔ be siman cɛn trele nga ɲrɛnnɛn dan’n bó i bo ti’n, atrɛkpa’n ɔ́ fú be nun. Sanngɛ kɛ mɔ be siesieli be wun w’a cɛ kpa’n ti’n, be wla su tɔman blo.

9. ?Zoova wá núnnún Satan i mɛn’n kpɛ kunngba? An yiyi nun.

⁹ Zoova su nunnunman Satan i mɛn’n i kpɛ kunngba kɛ ng’ɔ fa yoli i Noe blɛ su’n sa. Sanngɛ i nunnunlɛ’n yó fa nɲɔn. I klikli nun’n, ɔ́ núnnún Babilɔnin klɔ dan’n mɔ yɛle Ɲanmiɛn sulɛ wafawafa nga be timan su’n. Kpɛkun Aamagedɔn alɛ’n nun’n, ɔ́ núnnún politiki annuanzɛ mun, ɔ nin sonja mun, yɛ aata dilɛ annuanzɛ mun. Siɛn’n maan e fa e ɲin e sie i sa cinnjin nɲɔn sɔ’m be su kpa.

10. ?Kɛ nga Sa Nglo Yilɛ 17:1, 6; 18:24 be fa kan’n sa’n, ngue ti yɛ Zoova wá núnnún tekle bla dan’n niɔn?

¹⁰ Ɲanmiɛn Ndɛ’n waan bé wá dí “tekle bla dan’n” i jɔlɛ. (An kanngan Sa Nglo Yilɛ 17:1, 6; 18:24 nun.) Tekle bla sɔ’n i kunngba’n yɛ be flɛ i Babilɔnin klɔ dan’n niɔn. Tekle bla dan’n yo maan sran’m be yo Ɲanmiɛn i dunman’n i finfin. Ɔ buali Ɲanmiɛn su ato. Kpɛkun ɔ nin asiɛ’n su famiɛn’m be trali aenguɛ. I lɛ nun’n ɔ boli tekle. Asa ekun’n, ɔ miɛnmiɛn i sran mun kpɛkun ɔ le be sa nun sika’n. Ɔ kunnin sran kpanngban. Ɲanmiɛn i sufuɛ’m be o nun wie bɔbɔ. (Ngl. 19:2) ?Wafa sɛ yɛ Ɲanmiɛn wá núnnún tekle bla sɔ’n niɔn?

11. (1) ?Ngue yɛ ‘nnɛn ɔkwlɛ bioun’n’ ti i nzɔliɛ-ɔ? (2) ?Yɛ wafa sɛ yɛ Zoova wá fɛ́ i núnnún tekle bla dan’n niɔn?

¹¹ Zoova wá yó maan “nnɛn ɔkwlɛ bioun i wɛ blu’m” be wá núnnún “tekle bla dan’n.”  Nnɛn sɔ’n ti nvlenvle’m be anuannzɛ’n i nzɔliɛ. Yɛ i wɛ blu’m be ti asiɛ’n su famiɛn nga be suan anuannzɛ sɔ’n i bo’n be nzɔliɛ. Ɔ maan kɛ Ɲanmiɛn i blɛ liɛ’n wá jú’n famiɛn sɔ’m “bé dé i wun ninnge mun, ɔ maan i wun ká kplɛn.” Yɛle kɛ bé dé i ninnge kpakpa ng’ɔ le be mun kpɛkun bé yí i nglo sran kwlaa ɲrun kɛ i klun yo wi. (Ngl. 17:3, 16) I nunnunlɛ sɔ’n ɔ́ wá yó ndɛndɛ dan ti’n, ɔ́ wá yó be nga be suɛn i bo’n be kɛ cɛn kunngba yɛ be nunnunnin i sa-ɔ. I sɔ’n bó be nuan dan. Afin ɔ di i nuan se kɛ: “N ti famiɛn bla, yɛ n ti famiɛn bia’n su. N timan angbeti. Ɔ maan n su boman awuyomo le.”—Ngl. 18:7, 8.

12. (1) ?Ngue yɛ Zoova su kplinman su kɛ asiɛ’n su famiɛn’m be yo-ɔ? (2) ?Yɛ ngue ti-ɔ?

¹² Zoova su kplinman su kɛ asiɛ’n su famiɛn’m be nunnun i sufuɛ mun. Afin Zoova i dunman’n wo be su, yɛ kɛ ɔ seli be kɛ be fin Babilɔnin klɔ dan’n nun be fite’n, be fiteli. (Yol. 15:16, 17; Ngl. 18:4) Kpɛkun be ukali sran sunman naan be kusu be fin Babilɔnin klɔ dan’n nun be fite wie. I sɔ’n ti’n, kɛ ɲrɛnnɛn wá tɔ́ Babilɔnin klɔ dan’n su’n, ɔ su tɔman Zoova i sufuɛ’m be su wie. Kɛ Zoova wá núnnún Babilɔnin klɔ dan’n, ɔ́ sɛ́sɛ́ i sufuɛ mun. Sanngɛ ɔ fata kɛ i sufuɛ’m be lafi i su tankaan kpa naan b’a kwla jran sa ng’ɔ wá tɔ́ be su’n, i ɲrun kekle.

13. (1) ?Ngue yɛle Gɔgu? (2) ?Kɛ nga Ezekiɛl 38:2, 8, 9 fa kan’n sa’n, ngue yɛ ɔ́ wá yó maan Gɔgu kpɛ́n nzɔliɛ lika nga be flɛ i kɛ Aamagedɔn’n nun-ɔn?

¹³ Gɔgu wá fá alɛ wlá Ɲanmiɛn i sufuɛ’m be sin. (An kanngan Ezekiɛl 38:2, 8, 9 nun.) Kɛ Zoova wá núnnún Ɲanmiɛn sulɛ wafawafa nga be timan su’n, Zoova i sufuɛ’m be ngunmin cɛ yɛ bé ká lɛ-ɔ. I sɔ’n wá yó Satan i ya dan. Wafa ng’ɔ́ wá yí i ya dan sɔ’n i nglo’n, yɛle kɛ ɔ́ wá kán ato ndɛ wie mun. Yɛ ato ndɛ sɔ’m be ti’n, asiɛ’n su famiɛn’m be bo yó kun bé fá alɛ wlá Zoova i sufuɛ’m be sin. (Ngl. 16:13, 14) Famiɛn sɔ’m be annuanzɛ nga bé wá dí’n yɛ be flɛ i kɛ Gɔgu m’ɔ fin Magɔgu’n niɔn. Kɛ famiɛn sɔ’m bé wá fá alɛ wlá Ɲanmiɛn i sufuɛ’m be sin’n, i lɛ nun yɛ Aamagedɔn alɛ’n ɔ́ bó i bo-ɔ.​—Ngl. 16:16.

14. ?Ngue yɛ Gɔgu wá wún i wlɛ-ɔ?

 ¹⁴ Blɛ mɔ Gɔgu wá fá alɛ wlá Ɲanmiɛn i sufuɛ’m be sin’n, ɔ́ wá láfi i sonja mɔ be ti sran’n be su. (2 Nyo. 32:8) Sanngɛ e liɛ’n é láfi Zoova su. I sɔ’n ti’n, asiɛ’n su famiɛn’m bé wá bú i kɛ e ti sinnglinfuɛ. ?Ngue ti yɛ bé wá bú i kɛ e ti sinnglinfuɛ-ɔ? Afin Babilɔnin klɔ dan’n m’ɔ le tinmin kpa’n be ɲanmiɛn nga be lafi i su’n, w’a kwlá deman be ‘nnɛn ɔkwlɛ bioun’n’ nin i “wɛ blu’m” be sa nun. (Ngl. 17:16) I sɔ’n ti’n, Gɔgu wá bú i kɛ Ɲanmiɛn i sufuɛ’m bé núnnúnlɛ’n ɔ́ yó pɔpɔ. Ɔ maan ɔ́ wá káta be su kɛ ‘aosin m’ɔ w’a kata mɛn’n su’n sa.’ (Eze. 38:16) Sanngɛ bé wá wún i wlɛ kɛ b’a tɔ aya kun nun. Ɔ maan kɛ Ezipti Famiɛn’n i liɛ’n sa’n, Gɔgu wá wún i wlɛ kɛ ɔ nin Zoova bɔbɔ yɛ be su kun-ɔn.​—Tul. 14:1-4; Eze. 38:3, 4, 18, 21-23.

15. ?Aamagedɔn alɛ’n nun’n, ngue yɛ Zezi wá yó-ɔ?

¹⁵ Zezi nin i sonja’m bé wá kún Ɲanmiɛn i sufuɛ’m be ti alɛ.Yɛle kɛ bé núnnún asiɛ’n su famiɛn mun nin be sonja mun. (Ngl. 19:11, 14, 15) ?Aamagedɔn alɛ’n nun’n ngue yɛ bé wá fá yó Satan m’ɔ suli asiɛ’n su famiɛn’m be bo maan be fali alɛ wlali Zoova i sufuɛ’m be sin’n niɔn? Zezi wá cí Satan nin i mmusu mun, kpɛkun ɔ́ fá be yí i kunman dan mɔ be simɛn i bo’n i nun, yɛ bé ká lɔ lele afuɛ akpi.​—Ngl. 20:1-3.

16. (1) ?Wafa sɛ yɛ e kwla kle kɛ e si Ɲanmiɛn-ɔn? (2) ?Aamagedɔn alɛ’n nun’n, be nga be si Zoova’n be liɛ yó sɛ?

¹⁶ Sɛ e si ndɛ nanwlɛ’n w’a cɛ-o annzɛ ɔ nin-a cɛman-o, sɛ Aamagedɔn alɛ’n nun’n e waan é fíte nun’n ɔ fata kɛ e ‘si Ɲanmiɛn’ kpɛkun e fa e ‘Min Zezi i jasin fɛ’n su.’ (2 Tes. 1:7-9) Kɛ be se kɛ be si Ɲanmiɛn’n i bo’n yɛle kɛ be si ninnge ng’ɔ klo be’n, nin ninnge ng’ɔ kloman be’n, ɔ nin i mmla mun. Asa ekun’n, be klo i yɛ be nanti ndɛ kwlaa ng’ɔ kan kle e’n su, kpɛkun be su i kunngba cɛ. (1 Zan 2:3-5; 5:3) Sɛ e kle kɛ e si Ɲanmiɛn’n i kusu ɔ́ klé kɛ ɔ si e wie. Yɛle kɛ i klun jɔ́ e wun. Ɔ maan Aamagedɔn alɛ’n nun’n é ɲán e ti.​—1 Kor. 8:3.

17. ?Ke be se kɛ e fa e “Min Zezi i jasin fɛ’n” su’n i bo’n yɛle benin?

 ¹⁷ E “Min Zezi i jasin fɛ’n” yɛle ndɛ nanwlɛ kwlaa nga Zezi kleli be mɔ be o Biblu’n nun’n. Ɔ maan sɛ e waan é fá e Min Zezi i jasin fɛ’n su’n, maan e nanti ndɛ nanwlɛ nga Zezi kleli’n su. Asa ekun’n, e fa Zoova i sulɛ’n e sie i like kwlaa ɲrun. Yɛle kɛ e nanti i mmla’m be su yɛ e bo i Famiɛn dilɛ’n i jasin fɛ’n. (Mat. 6:33; 24:14) Kpɛkun e uka Klisi i niaan mun naan be di junman cinnjin nga be fa mannin be’n.​—Mat. 25:31-40.

18. ?Wafa sɛ yɛ Klisi i niaan’m bé wá yó be nga be flɛ be kɛ bua wie mun’n, be mo-ɔ?

¹⁸ Ɔ cɛ kan’n be nga be kpali be sieli be ngunmin’n, bé wá yó be nga be flɛ be ‘bua wie mun’n’ be mo. Afin be suannin be bo. I ti’n be kwla dili be junman’n. (Zan 10:16) ?Wafa sɛ yɛ bé wá yó be mo-ɔ? Yɛle kɛ kwlaa naan Aamagedɔn alɛ’n w’a bo i bo’n, be nga be kpali be sieli be ngunmin’n be kwlaa bé ti yía ɲanmiɛn su lɔ. Kpɛkun be nin Zezi nin i sonja’m be bo wá yó kun bé núnnún Gɔgu yɛ bé dé “sran kpanngban kpa.” (Ngl. 2:26, 27; 7:9, 10) Nanwlɛ, sran kpanngban kpa sɔ’m be klun wá jɔ́ dan. Afin ukalɛ nga be ukali be nga be kpali be sieli be ngunmin’n, w’a yoman ngbɛn.

19-20. ?Kannzɛ sa kekle o e su’n, wafa sɛ yɛ e kwla jran kekle-ɔ?

¹⁹ Mɛn’n i awieliɛ blɛ nga nun’n, sa nga be tɔ Zoova i sufuɛ’m be su’n, be diman be yalɛ. Sanngɛ ɔ nin i sɔ’n ngba’n be jran sa sɔ’m be ɲrun kekle aklunjuɛ su. (Zak. 1:2-4) Like ng’ɔ uka be kpa’n yɛle kɛ be srɛ Ɲanmiɛn titi. (Lik. 21:36) Be suan Biblu’n nun like cɛn kwlakwla yɛ be bu su akunndan. Asa ekun’n, be suan Ɲanmiɛn nuan ijɔfuɛ’m be ndɛ nga be kannin’n mɔ be su kpɛn su e blɛ liɛ nga nun’n, be su like wie. (Jue. 77:13) Sɛ e yo ninnge kwlaa sɔ mun naan e mian e ɲin e bo jasin fɛ’n juejue su’n, é láfi Zoova su kpa. Kpɛkun é láfi ninnge ng’ɔ seli kɛ ɔ́ yó be’n, be su kpa wie.

²⁰ Kɛ bé wá núnnún Babilɔnin klɔ dan’n, yɛ kɛ Aamagedɔn alɛ’n wá wíe’n, aklunjuɛ nga é wá dí’n, maan e bu i akunndan kan e nian. Asa ekun’n, kɛ Zoova i dunman’n wá yó sanwun mɔ sran kwlakwla bé wá sí kɛ ɔ le atin sie nglo nin asiɛ’n, e aklunjuɛ’n yó dan. (Eze. 38:23) I kwlaa sɔ’n ti’n, be nga be si Ɲanmiɛn mɔ be ɲin yi i Wa’n, mɔ kɛ sa tɔ be su’n be jran kekle’n, Aamagedɔn’n ti be ndɛ fɛ.​—Mat. 24:13.