1. ?Afuɛ 95 nun’n, sa benin mun yɛ be juli akoto Zan su-ɔ?

AFUƐ 95 nun’n nanwlɛ, sa nga be o akoto Zan su’n be timan aɔwi. Yɛle kɛ w’a yo oke kpɛkun ɔ o bisua lika mɔ nzue bo sin yiɛ i’n, mɔ be flɛ i kɛ Patimɔsu’n i su. Yɛ atrɛkpa akoto’m be nun’n, i ngunmin yɛ ɔ te o nguan nun-ɔn. (Ngl. 1:9) Asa ekun’n, ɔ si kɛ be nga be nin Ɲanmiɛn b’a bu’n bé wá kán ato ndɛ wie mun klé Klisifuɛ mun naan be bubu be wun nun. Ɔ maan ɔ yo Zan i kɛ ɔ cɛ kan’n, sran’m be su suman Ɲanmiɛn kɛ ng’ɔ nin i fata sa’n kun.​—Zid. 4; Ngl. 2:15, 20; 3:1, 17.

2. ?Kɛ nga Sa Nglo Yilɛ 7:9-14 fa kan’n sa’n, ngue yɛ Zan wunnin i aolia nun-ɔn? (An nian foto ng’ɔ o fluwa’n i bui’n su’n.)

² Kannzɛ sa nga be o Zan su’n be sɔnnin’n, sanngɛ Ɲanmiɛn maan ɔ wunnin aolia nun like kun. Yɛle kɛ aolia nun’n, anzi kun seli i wiengu anzi nnan be kɛ be tra asiɛ’n su aunmuan nnan’m be nun lele naan be wie Ɲanmiɛn i sran’m be ngban su nzɔliɛ sie. (Ngl. 7:1-3) Ɲanmiɛn i sran sɔ’m be ti sran 144.000, yɛ be nin Zezi bé kó dí famiɛn ɲanmiɛn su lɔ. (Lik. 12:32; Ngl. 7:4) I sin’n, Zan kannin sran akpasua uflɛ ndɛ. Sran sɔ’m be sɔnnin dan ti’n, Zan seli kɛ: “Kɛ n niannin lɔ ekun’n, n wunnin sran kpanngban kpa. Sran fi kwlá kaman be. Be fin nvlenvle’n kwlaa nun nin akpasua kwlaa su. Sran wafawafa kwlaa o be nun, yɛ be kan aniɛn wafawafa kwlaa. Be jinjin famiɛn bia’n nin Bua ba’n be ɲrun lɛ.” (An kanngan Sa Nglo Yilɛ 7:9-14 nun.) Kɛ Zan wunnin sran kpanngban kpa sɔ mɔ be su su Ɲanmiɛn kɛ ng’ɔ nin i fata’n sa’n, e si kɛ i sɔ’n yoli i fɛ dan.

3. (1) ?Ngue ti yɛ like nga Zan wunnin i aolia nun’n ti’n, e kwla lafi Ɲanmiɛn su kpa-ɔ? (2) ?Ngue yɛ é wá kɛ́n i ndɛ like suanlɛ nga nun-ɔn?

³ E kwla lafi su kɛ aolia nun like nga Zan wunnin i’n yoli maan ɔ lafili Ɲanmiɛn su kpa trali laa’n. Yɛ kusu aolia nun like sɔ’n ti’n, é wá láfi Ɲanmiɛn su tankaan kpa wie. Afin e blɛ liɛ nga su yɛ like nga Zan wunnin i’n, ɔ su kpɛn su-ɔ. Like nga ti yɛ e se sɔ’n, yɛle kɛ dɔ nga su’n sran miliɔn kpanngban kpa be su  Zoova. Yɛ be kwlaa sɔ’m be lafi su kɛ bé fín ɲrɛnnɛn dan’n nun bé fíte naan bé ɲán nguan m’ɔ leman awieliɛ’n asiɛ’n su wa. Like suanlɛ nga nun’n, é wá kán wafa nga Zoova yoli maan e wunnin sran kpanngban kpa sɔ’m be su ndɛ’n i wlɛ i afuɛ 80 tra su yɛ’n, i ndɛ. Kpɛkun é wá fá e ɲin é síe i sran akpasua sɔ’n i su ndɛ cinnjin nɲɔn be su. I klikli’n yɛle kɛ be sɔnnin kpa yɛ i nɲɔn su’n yɛle kɛ be fin nvlenvle kwlaa nun. Ndɛ cinnjin sɔ’m be nun yiyilɛ’n wá yó maan be nga be kunndɛ kɛ bé trán sran akpasua sɔ’m be nun’n, bé láfi Ɲanmiɛn su kpa.

4. (1) ?Biblu’n nun ndɛ benin yɛ be nga be tɔn be wun suɛn kɛ be ti Klisifuɛ’n b’a wunmɛn i wlɛ-ɔ? (2) ?Ngue ti yɛ e kwla se kɛ Zoova i Lalofuɛ mun nin sran sɔ’m be timan kun-ɔn?

⁴ Be nga be tɔn be wun suɛn kɛ be ti Klisifuɛ’n, be kleman sran’m be kɛ Biblu’n waan cɛn wie lele’n, be nga be ɲin yi Ɲanmiɛn’n bé ɲán nguan m’ɔ leman awieliɛ’n asiɛ’n su wa. (2 Kor. 4:3, 4) Like nga be kle sran mun’n yɛle kɛ, kɛ sran kpa’m be wu’n be kɔ ɲanmiɛn su. Ndɛ nga be kan’n nin ndɛ nga Zoova i Lalofuɛ’m be kɛnnin i afuɛ 1879 Sasafuɛ Tranwlɛ’n nun’n, ɔ timan kun. Be wunnin i wlɛ kɛ Ɲanmiɛn wá yó maan asiɛ’n ɔ́ sɛ́ i sin káci mɛn klanman naan sran miliɔn kpanngban nga be ɲin yi i’n bé trán su tititi. Ɔ maan asiɛ’n su wa yɛ sran sɔ’m bé trán-ɔn, nán ɲanmiɛn su lɔ-ɔ. Sanngɛ ɔ cɛli ka naan Zoova i Lalofuɛ’m b’a wun ndɛ sɔ’n i wlɛ kpa.​—Mat. 6:10.

5. ?Sran 144.000 be su ndɛ benin yɛ Zoova i sufuɛ’m be si i-ɔ?

⁵ Zoova i sufuɛ’m be wunnin i wlɛ kɛ bé wá tó sran wie mun asiɛ’n su wa naan be nin Zezi be ko di famiɛn ɲanmiɛn su lɔ. (Ngl. 14:3) Sran sɔ’m be ti sran 144.000. Yɛ i nun mɔ be o asiɛ’n su wa’n, be miannin be ɲin be suli Ɲanmiɛn kpa. ?Yɛ sran kpanngban kpa nga Ɲanmiɛn Ndɛ’n kan be ndɛ’n be li? ?Akunndan benin yɛ Zoova i sufuɛ’m be buli i be su-ɔ?

6. ?Akunndan benin yɛ Zoova i sufuɛ’m be buli i sran kpanngban kpa’m be su-ɔ?

⁶ Aolia nun’n, Zan wunnin sran kpanngban kpa. Sran sɔ mun “be jinjin famiɛn bia’n nin Bua ba’n be ɲrun lɛ.” (Ngl. 7:9) Ndɛ nga Zan kɛnnin i lɛ’n ti’n, Zoova i sufuɛ’m be buli i kɛ sran kpanngban kpa sɔ’m bé kɔ́ ɲanmiɛn su kɛ sran 144.000 be sa. ?Sɛ ɔ fata kɛ be akpasua nɲɔn sɔ’n be ko tran ɲanmiɛn su lɔ’n, nn ngue ti yɛ be timan kun-ɔn? Zoova i sufuɛ’m be buli i kɛ sran kpanngban kpa sɔ’m be yɛle Klisifuɛ nga i nun mɔ be o asiɛ’n su wa’n b’a suman Ɲanmiɛn kpa’n. Be miannin be ɲin be nantili Ɲanmiɛn i mmla’m be su sɔ, sanngɛ be nun wie’m b’a jasoman be nga be tɔn be wun suɛn kɛ be ti Klisifuɛ’n be afiɛn. I sɔ’n ti’n, Zoova i sufuɛ’m be seli be wun kɛ, kɛ mɔ sran sɔ’m b’a suman Ɲanmiɛn kpa’n ti’n be nin famiɛn dilɛ fataman. I sɔ’n ti yɛ b’a manman be atin kɛ be tran famiɛn bia’n su mɔ be jinjin i ɲrun lɛ’n niɔn.

7. (1) ?Wan mun yɛ Zoova i sufuɛ’m be buli i kɛ bé wá trán asiɛ’n su wa Zezi i famiɛn dilɛ blɛ’n nun-ɔn? (2) ?Be nga be wuli ka naan Zezi w’a ba asiɛ’n su wa’n be su akunndan benin yɛ Zoova i sufuɛ’m be buli-ɔ?

⁷ ?Sɛ ɔ ti sɔ sakpa’n, nn wan mun bé trán asiɛ’n su wa-ɔ? Zoova i sufuɛ’m be buli i kɛ kɛ sran kpanngban kpa nin sran 144.000 be ti ko yia ɲanmiɛn su lɔ’n, sran miliɔn kpanngban kpa ekun bé wá trán asiɛ’n su wa. Yɛ kɛ Klisi wá dí famiɛn’n, bé wá ɲán suyralɛ kpanngban. Zoova i sufuɛ’m be buli i ekun kɛ ka naan Klisi w’a bo i famiɛn dilɛ’n i bo’n, sran sɔ’m be su suman Ɲanmiɛn, naan blɛ mɔ Klisi wá dí famiɛn’n i nun’n, bé wá klé be like naan be su Zoova. Blɛ sɔ’n nun’n, be nga bé wá fá Ɲanmiɛn i mmla’m be su’n, bé ɲán nguan m’ɔ leman awieliɛ’n asiɛ’n su wa. Kpɛkun be nga be su faman su’n bé núnnún be. Atrɛkpa Zoova i sufuɛ’m be buli i ekun kɛ, kɛ Zezi wá dí famiɛn’n bé wá síe sran sɔ’m be nun wie’m be “kpɛnngbɛn.” Ɲanmiɛn i sufuɛ  nga be wuli ka naan Zezi w’a ba asiɛ’n su’n, atrɛkpa be o kpɛnngbɛn sɔ’m be nun wie. Yɛ kɛ Klisi i famiɛn dilɛ blɛ’n ko wie’n Ɲanmiɛn wá fá be kɔ́ ɲanmiɛn su.​—Jue. 45:16.

8. ?Sran akpasua nɲɛ yɛ Zoova i sufuɛ’m be buli i kɛ i klun sa’n kpɛ́n su be lika-ɔ?

⁸ Blɛ wie nun’n, Zoova i sufuɛ’m be buli i kɛ sran’m be ti akpasua nsan. I klikli’n yɛle sran 144.000 nga be nin Zezi bé kó dí famiɛn ɲanmiɛn su lɔ’n. I nɲɔn su’n yɛle Klisifuɛ kpanngban kpa nga b’a suman Zoova kpa mɔ be mannin be atin kɛ be jran Zezi i famiɛn bia’n i ɲrun lɛ’n. Yɛ i nsan su’n yɛle sran miliɔn kpanngban nga Zezi i famiɛn dilɛ blɛ nun’n * bé klé be like naan be tran asiɛ’n su wa’n. Sanngɛ i sin’n, Zoova ukali be maan be kwla wunnin ndɛ kwlaa sɔ’m be wlɛ kpa.​—Nya. 4:18.

9. (1) ?Wafa sɛ yɛ sran kpanngban kpa’m be kwla kle kɛ ‘be jinjin famiɛn bia’n nin Bua ba’n be ɲrun lɛ-ɔ’? (2) ?Ngue ti yɛ e kwla se kɛ wafa nga be yiyili Sa Nglo Yilɛ 7:9 nun’n ɔ ti su-ɔ?

⁹ Afuɛ 1935 nun’n, Zoova i Lalofuɛ’m be wa wunnin sran kpanngban kpa nga Zan wunnin be aolia nun’n be su ndɛ’n i wlɛ kpa. Kɛ Zan seli kɛ sran kpanngban sɔ’m ‘be jinjin famiɛn bia’n nin Bua ba’n be ɲrun lɛ’n’ Zoova i Lalofuɛ’m be wunnin i wlɛ kɛ ndɛ kanlɛ-ɔ, naan i sɔ’n su juman sakpasakpa. Afin kannzɛ bɔbɔ be o asiɛ’n su wa’n, sanngɛ be kwla kle kɛ be ‘jinjin famiɛn bia’n’ i ɲrun lɛ. Yɛle kɛ be si kɛ Zoova yɛ ɔ le atin sie nglo nin asiɛ’n niɔn. Kpɛkun be lo be wun be mɛn i naan ɔ sie be. (Eza. 66:1) Asa ekun’n, be lafi tɛ mɔ Zezi fɛli i wun yili’n su. Matie ndɛ tre 25 i mma 31 nin 32 nun’n, be seli kɛ “bé yíayía nvlenvle’m be kwlaa be nunfuɛ mun” Zezi i famiɛn bia m’ɔ ti ɲanɲanɲan’n i ɲrun lɛ. Klunwifuɛ’m be o sran sɔ’m be nun wie. Ndɛ sɔ’n kle kɛ nvlenvle sɔ’m be nunman ɲanmiɛn su lɔ, sanngɛ be o asiɛ’n su wa. Nanwlɛ, wafa nga be yiyili ndɛ sɔ’n nun afuɛ 1935 nun’n ti’n, e wun ndɛ sɔ’n i wlɛ kpa siɛn’n. Ɔ maan e wun like nga ti yɛ Biblu’n w’a seman kɛ be fali sran kpanngban kpa sɔ’m be ɔli ɲanmiɛn su’n i wlɛ weiin. Sanngɛ ɔ seli kɛ sran akpasua kunngba cɛ yɛ bé ɲán nguan m’ɔ leman awieliɛ’n ɲanmiɛn su lɔ-ɔ. Sran sɔ mun yɛle sran 144.000 mɔ be nin Zezi “bé dí famiɛn” kpɛkun “bé síe asiɛ’n.”​—Ngl. 5:10.

10. ?Ngue ti yɛ ɔ fata kɛ sran kpanngban kpa’m be suan Zoova i su like naan be su i kwlaa naan Zezi w’a bo i famiɛn dilɛ bo-ɔ?

¹⁰ Kɛ ɔ fɛ i afuɛ 1935 nun’n, Zoova i Lalofuɛ’m be wunnin i wlɛ weiin kɛ sran kpanngban kpa nga Zan wunnin be aolia nun’n, be yɛle Klisifuɛ nga be miannin be ɲin be nantili Zoova i mmla’m be su’n. Yɛ sran kpanngban sɔ’m bé wá trán asiɛ’n su wa tititi. Sanngɛ kɛ ɔ ko yo naan b’a kwla fin ɲrɛnnɛn dan’n nun b’a fite’n, ɔ fata kɛ be suan Zoova i su like naan be su i kwlaa naan Zezi w’a bo i famiɛn’n i dilɛ bo. Asa ekun’n, ɔ fata kɛ be lafi Ɲanmiɛn su tankaan kpa naan b’a “kwla fin sa kwlaa sɔ m’ɔ fata kɛ be ju’n be nun b’a fite.”​—Lik. 21:34-36.

11. ?Ngue ti yɛ Ɲanmiɛn i sufuɛ’m be buli i kɛ kɛ Zezi ko wie i famiɛn’n i di’n sran wie’m bé kɔ́ ɲanmiɛn su-ɔ?

¹¹ ?Yɛ be nga be seli kɛ bé síe be kpɛnngbɛn asiɛ’n su naan sɛ Zezi wie i famiɛn’n i di’n bé kɔ́ ɲanmiɛn su’n be li? ?Be su ndɛ benin yɛ Zoova i Lalofuɛ’m be wa wunnin i wlɛ-ɔ? Be yiyili ndɛ sɔ’n nun afuɛ 1913 Fevrie 15 Sasafuɛ Tranwlɛ’n angle nun liɛ’n, i nun. Atrɛkpa sran wie’m be usali be wun kɛ: ‘?Ngue ti yɛ be nga laa’n be miannin be ɲin be suli Ɲanmiɛn’n bé ká asiɛ’n su wa kpɛkun be nga b’a sumɛn i kpa’n bé kɔ́ ɲanmiɛn su-ɔ?’ Like nga ti yɛ maan be buli i sɔ’n ɔ taka ndɛ nɲɔn su. I klikli nun’n, be waan sran kpanngban kpa nga Zan wunnin be aolia nun’n bé kɔ́ ɲanmiɛn su. Yɛ i nɲɔn su’n be buli i kɛ sran kpanngban kpa sɔ mun yɛle Klisifuɛ nga i nun mɔ be o asiɛ’n su wa’n b’a suman Ɲanmiɛn kpa’n.

12-13. ?Sɛ é ká asiɛ’n su wa-o annzɛ é kɔ́ ɲanmiɛn su-o, ngue yɛ maan i sɔ’n kwla yo ye-ɔ?

 ¹² Kɛ nga e fa wunnin i sa’n, kɛ ɔ fɛ i afuɛ 1935 nun’n Zoova i Lalofuɛ’m be wunnin i wlɛ kɛ be kwlaa nga bé fín Aamagedɔn alɛ’n nun bé fíte’n, be yɛle sran kpanngban kpa nga Zan wunnin be aolia nun’n. Asiɛ’n su wa yɛ ‘sran sɔ’m bé fín ɲrɛnnɛn dan’n nun’ bé fíte-ɔ. Kpɛkun bé wá kpán kekle kpa bé sé kɛ: “E Ɲanmiɛn m’ɔ ti famiɛn bia’n su’n nin Bua ba’n be ti yɛ y’a ɲan e ti-ɔ.” (Ngl. 7:10, 14) Ɲanmiɛn Ndɛ’n se kɛ be nga bé wá kɔ́ ɲanmiɛn su’n be like liɛ nga bé ɲɛ́n i’n “ɔ ti kpa tra” like nga be nga be suli Ɲanmiɛn kpa laa’n be lafi su kɛ bé ɲɛ́n i’n. (Ebr. 11:40) Ndɛ mɔ be wunnin be wlɛ ti’n, be wa miannin be ɲin be boli jasin fɛ’n naan sran’m be su Zoova naan b’a kwla tran asiɛ’n su tititi.

¹³ Sran kpanngban kpa’m be kusu be klun jɔ like nga bé wá ɲɛ́n i’n, i su. Asa ekun’n be wun i wlɛ kɛ sɛ sran kun kɔ́ ɲanmiɛn su-o annzɛ ɔ́ ká asiɛ’n su wa-o, Zoova yɛ ɔ mɛn i sɔ’n i wun atin-ɔn. Asa kusu’n, be wun i wlɛ kɛ Zoova i aklunye dan’n ti yɛ be kwla ɲɛn i sɔ like’n niɔn. Kɛ Zoova fɛli i wa Zezi Klisi yili e ti tɛ’n, yɛ ɔ yili i aklunye sɔ’n i nglo-ɔ.​—Rɔm. 3:24.

14. ?Kɛ afuɛ 1935 sinnin’n, ngue ti yɛ sran sunman be usali be wun kɛ wafa sɛ yɛ ‘sran kpanngban kpa’ mun be su ndɛ’n kpɛ́n su-ɔ?

¹⁴ Kɛ afuɛ 1935 nun’n Zoova i Lalofuɛ’m be wunnin sran kpanngban kpa’n be su ndɛ’n i wlɛ’n, be nun sunman be usali be wun kɛ: ?Ngue yɛ Ɲanmiɛn wá yó naan ‘sran kpanngban kpa’ sɔ’m b’a sɔn-ɔn? Like nga ti yɛ be usali be wun sɔ’n aniaan bian Ronaldi Paakinin kɛnnin i ndɛ. Kɛ bé wún sran kpanngban kpa’n be su ndɛ’n i wlɛ’n nn ɔ le afuɛ 12. Ɔ seli kɛ: “Blɛ sɔ’n nun’n mɛn wunmuan’n nun’n jasin bofuɛ’m be ti sran kɔe 56.000. Kpɛkun be nun sunman be o be nga be kpali be sieli be ngunmin’n be nun. Ɔ maan sɛ be yi be nga be kpali be sieli be ngunmin’n be sie i bue kun’n, be nga be ka lɛ’n b’a sɔman. Ɔ maan e kwlá seman kɛ be yɛ be ti sran kpanngban kpa sɔ mun-ɔn.”

15. ?Wafa sɛ yɛ ‘sran kpanngban kpa’ mun be wa sɔnnin-ɔn?

¹⁵ Kɛ ɔ fɛ i afuɛ 1935 nun’n, be fali ngaliɛ difuɛ kpanngban be ɔli nvlenvle’m be nun. Ɔ maan Zoova i Lalofuɛ’m be su wa ukali blɛblɛblɛ. Kpɛkun afuɛ 1968 nun’n, anuannzɛ’n maan be wa boli fluwa nga be flɛ i kɛ “La vérité qui conduit à la vie éternelle” i nun like suanlɛ bo. Kɛ mɔ fluwa sɔ’n yiyi Biblu’n nun ndɛ’n i nun weinwein ti’n sran kpanngban kpa be bali Zoova i sulɛ. Ɔ maan kɛ ɔ dili afuɛ nnan cɛ’n be yoli sran 500.000 tra su be batɛmun. Asa ekun blɛ kun nun’n, Amlɛnkɛn’m be mɛn’n i nglo lɔ lika nun’n sran sunman be wa yacili Katoliki asɔnun’n i nun kɔlɛ. Blɛ kunngba sɔ’n nun’n, Abloki lɔ nin Sran ble  mɛn’n i nvle wie’m be nun’n, be tanndannin aniaan’m be ɲrun. Ɔ nin i sɔ’n ngba’n, be yoli sran kpanngban kpa be batɛmun. (Eza. 60:22) Koko nun wa kusu’n, anuannzɛ’n yili ninnge kpanngban naan sran’m b’a kwla si like nga Biblu’n kle i sakpasakpa’n. Andɛ’n, e wun i kpa kɛ sran kpanngban sɔ’m b’a tra sran miliɔn mɔcuɛ.

16. ?Ninfan yɛ ‘sran kpanngban kpa’ sɔ’m be fin-ɔn?

¹⁶ Kɛ Zan klɛ́ like ng’ɔ wunnin i aolia nun’n ɔ seli kɛ sran kpanngban sɔ’m “be fin nvlenvle’n kwlaa nun nin akpasua kwlaa su. Sran wafawafa kwlaa o be nun, yɛ be kan aniɛn wafawafa kwlaa.” Ɲanmiɛn nuan ijɔfuɛ Zakari kusu kannin ndɛ kunngba’n. Ɔ seli kɛ: “Blɛ sɔ nun’n, sɛ sran blu be aniɛn’n ti ngunminngunmin’n, bé kó tra Zuif kunngba cenje i wun tralɛ’n i nuan su’n, kpɛkun bé sé i kɛ: ‘E nin amun yɛ é kɔ́-ɔ, afin e tili i kɛ Nyanmiɛn’n wo amun sin.’”​—Zkr. 8:23.

17. ?Ngue yɛ Zoova i Lalofuɛ’m be yo naan b’a kwla uka be nga be fin nvlenvle kwlaa nun mɔ be kan aniɛn wafawafa kwlaa’n niɔn?

¹⁷ Zoova i Lalofuɛ’m be wunnin i wlɛ kɛ sɛ be waan bé yía sran mɔ be kan aniɛn wafawafa kwlaa’n ɔ fata kɛ be bo jasin fɛ’n i aniɛn kpanngban nun. I sɔ’n ti’n, ninnge nga e fa kle sran’m be Biblu’n nun like’n, e kacili be aniɛnaniɛn’m be nun. Kɛ e boli i sɔ yolɛ  bo lele m’ɔ́ fá jú yɛ’n w’a di afuɛ 130 tra su. Ndɛ sɔ’n kle weiin kɛ, Zoova yoli abonuan sa kun e blɛ liɛ nga su. Yɛle kɛ ɔ yoli maan sran kpanngban kpa mɔ be fin nvlenvle kwlaa nun’n b’a bɛ i sulɛ. Kɛ mɔ anuannzɛ’n yoli maan be kwla kacili Biblu’n nin e fluwa mun aniɛn kpanngban nun’n ti’n, kannzɛ bɔbɔ sran sɔ’m be finman nvle kunngba nun’n, sanngɛ be bo yo kun be su Zoova likawlɛ. I sɔ’n ti’n, sran’m be sie i nzɔliɛ kɛ be tu be klun be bo jasin fɛ’n naan be klo be wiengu. I sɔ’n yo maan e lafi Ɲanmiɛn su kpa tra laa’n.​—Mat. 24:14; Zan 13:35.

18. (1) ?Kɛ nga Ezai 46:10, 11 fa kan’n sa’n ngue ti yɛ like nga Zoova yo naan ndɛ ng’ɔ kɛnnin i sran kpanngban kpa’m be su w’a kpɛn su’n ɔ boman e nuan-ɔn? (2) ?Ngue ti yɛ kɛ be nga bé wá trán asiɛ’n su wa’n be si kɛ be su kɔman ɲanmiɛn su’n, i sɔ’n yoman be ya-ɔ?

¹⁸ Kɛ e si sran kpanngban kpa nga Zan wunnin be aolia nun’n be su ndɛ nanwlɛ’n, i sɔ’n yo e fɛ dan. Yɛ wafa nga Zoova yoli naan i nuan ndɛ sɔ’n w’a kpɛn su’n, ɔ boman e nuan. (An kanngan Ezai 46:10, 11 nun.) Nanwlɛ, like nga Zoova fa sieli i sran kpanngban kpa sɔ’m be ɲrun ti’n be klun ti jɔwa. Ɔ maan be siman wie se. Kannzɛ be si kɛ nán sran’m be ngba yɛ be nin Zezi bé kó dí famiɛn ɲanmiɛn su’n, sanngɛ i sɔ’n yoman be ya. Ɲanmiɛn ndɛ’n kan Ɲanmiɛn sufuɛ kpanngban kpa m’ɔ fɛli i wawɛ’n kleli be atin’n be ndɛ. Sanngɛ i sɔfuɛ’m be nunman sran 144.000 be nun wie. Sran sɔ’m be nun kun yɛle Zan batɛmun yofuɛ’n. (Mat. 11:11) Kpɛkun kun ekun yɛle Davidi. (Yol. 2:34) Ɲanmiɛn wá cɛ́n sran sɔ mun, ɔ nin sran kpanngban uflɛ wie mun ekun naan be tran mɛn klanman’n nun asiɛ’n su wa. Sran sɔ mun nin sran kpanngban kpa’m be wá ɲán atin bé sú Zoova yɛ bé klé kɛ be suɛn i Sielɛ’n i bo.

19. ?Sɛ e wun sran kpanngban kpa nga Zan wunnin be aolia nun’n be su ndɛ’n i wlɛ kpa’n, ngue yɛ é yó-ɔ?

¹⁹ Andɛ’n kɛ e wun kɛ sran miliɔn kpanngban mɔ be fin nvlenvle kwlaa nun be bo yo kun be su Zoova likawlɛ’n, nanwlɛ i sɔ’n ti abonuan. Awlanmannun’n, be nin-a wunmɛn i sɔ’n wie le. I sɔ’n ti’n, sɛ é kɔ́ ɲanmiɛn su-o annzɛ é trán asiɛ’n su wa-o, ɔ fata kɛ e tu e klun e uka be kwlaa nga e kwla uka be’n naan be tran sran kpanngban kpa mɔ be flɛ be ekun kɛ ‘bua wie mun’n’ be nun. (Zan 10:16) Ɔ cɛ kan’n ɲrɛnnɛn dan’n ɔ́ bó i bo. Yɛ blɛ sɔ’n nun’n Zoova wá núnnún politiki anuannzɛ mun nin Ɲanmiɛn sulɛ wafawafa nga be timan su mun. Afin be dunman nun’n sran’m be wun be ɲrun’n. Kɛ Zoova ko nunnun be ko wie’n, nanwlɛ sran kpanngban kpa’m bé dí aklunjuɛ dan. Afin bé ɲán be ti bé sú Zoova tititi.​—Ngl. 7:14.