BIBLU’N kan Ɲanmiɛn i sufuɛ kpanngban mɔ be kannin wafa nga be wun yoli be’n i ndɛ’n, be ndɛ. Sran sɔ’m be “ti sran kɛ e sa.” (Zak. 5:17) Be nun kun yɛle akoto Pɔlu. Ɔ kannin wafa nga i wun yoli i’n, i ndɛ Rɔmunfuɛ Mun 7:21-24 nun. Ɔ seli kɛ: “Kɛ min waan ń yó sa kpa’n, sa tɛ’n jin min bue. [...] Ee! Nian kɛ n yo annvɔ-ɔ!” Kɛ e kanngan ndɛ sɔ’n nun’n e wun i wlɛ. Afin ɔ ti sran kɛ e ye sa. Ɔ maan ɔ ju wie’n, kɛ fɔ m’ɔ o e nun’n kle e yalɛ’n, e sa sin bubuman e. Afin e si kɛ akoto Pɔlu m’ɔ suli Ɲanmiɛn kpa’n i wun yoli i sɔ wie.

Sanngɛ nán wafa nga Pɔlu i wun yoli i’n i ngunmin i ndɛ yɛ ɔ kannin-ɔn. Galasifuɛ Mun ndɛ tre 2 i ndɛ mma 20 nun’n, ɔ seli kɛ ɔ lafi su kpa kɛ Zezi ‘klo i’ naan ‘i ti’n ɔ fɛli i wun mannin.’ ?Kɛ akoto Pɔlu sa’n e kusu e lafi su kɛ Zezi klo e wie? Atrɛkpa’n nán cɛn ngba yɛ e bu i sɔ-ɔ.

Sɛ sa tɛ wie mɔ e yoli be laa ti’n e te bu e wun fɔ’n, e su kwlá wunmɛn i wlɛ kɛ Zoova klo e naan ɔ yacili e wun sa’n kwlaa cɛli e. Asa ekun’n, e su bumɛn i kɛ tɛ mɔ Zoova maan Zezi fɛli i wun yili’n, ɔ ti e liɛ wie. ?Sanngɛ Zezi kunndɛ kɛ i sɔ yɛ e bu e ti kpɔlɛ tɛ’n niɔn? ?Ngue yɛ ɔ kwla uka e naan y’a bu i kɛ Zezi fɛli i wun kpɔli e ti wie-ɔ? É wá tɛ́ kosan sɔ’m be su.

Zezi kunndɛ kɛ e bu e ti kpɔlɛ tɛ’n i like cinnjin kpa. ?Ngue ti yɛ e se sɔ-ɔ? Maan e bu sa nga Liki 23:39-43 kɛn i ndɛ’n, i akunndan kan e nian. Be boboli bian kun waka kun su Zezi i bue kun lɛ. Bian’n dili i nanwlɛ kɛ ɔ yoli sa tɛtɛ wie mun. E si kɛ like nga bian yoli’n, i tɛ liɛ’n be kanman. Afin blɛ sɔ’n nun, be nga be yo sa tɛtɛ dan’n be yɛ be bobo be waka su-ɔ. Kɛ mɔ bian’n i wla boli i wun dan’n ti’n, ɔ srɛli Zezi kɛ: “Sɛ a ju ɔ Famiɛn diwlɛ’n nun lɔ’n, maan ɔ wla kpɛn min su.”

?Ngue yɛ Zezi yoli-ɔ? Ɔ kpɛli i ti’n wun niannin bian’n i ɲrun nun. Kɛ mɔ b’a bobo i waka’n su’n ti’n, e si kɛ i sɔ yolɛ’n w’a yoman pɔpɔ. Ɔ nin i sɔ ngba’n, Zezi srili puɛɛ kpɛkun ɔ kannin ndɛ kun fa guali bian’n i awlɛn su nzue. Ɔ seli i kɛ: “Nanwlɛ, andɛ ń kán klé wɔ kɛ e nin wɔ é trán Mɛn klanman’n nun lɔ.” Atrɛkpa’n, Zezi kwla se i ngbɛn kɛ ‘Sran wa’n bali kɛ [...] ɔ́ fɛ́ i nguan’n mán naan ɔ́ kpɔ́ sran kpanngban be ti.” (Mat. 20:28) Sanngɛ wafa nga Zezi kannin ndɛ’n kleli bian’n, ɔ kle kɛ bian’n kwla ɲan e ti kpɔlɛ tɛ’n i su yɛ wie. Wafa nga Zezi nin bian sɔ’n be kokoli yalɛ’n, ɔ yoli kɛ sran kun nin i janvuɛ sa. Afin kɛ Zezi kán ndɛ’n ɔ seli kɛ “e” nin “wɔ”. Kpɛkun ɔ seli i kɛ ɔ́ trán mɛn klanman nun lɔ wie.

Nanwlɛ, Zezi kunndɛ kpa kɛ bian’n wun i wlɛ kɛ ɔ kwla ɲan e ti kpɔlɛ tɛ m’ɔ su wa yi’n, i su ye wie. Sa tɛ yofuɛ sɔ’n w’a ɲanman atin w’a suman Ɲanmiɛn, sanngɛ Zezi waan ɔ kwla ɲan e ti kpɔlɛ tɛ’n i su ye wie. Sɛ ɔ ti sɔ’n, nn e kwla lafi su kɛ ɔ́ sí be nga be ti Ɲanmiɛn i sufuɛ kpa’n be aunnvuɛ. ?Sanngɛ ngue yɛ ɔ kwla uka e naan y’a wun i wlɛ kɛ kannzɛ bɔbɔ e yoli sa tɛ wie laa’n, e kwla ɲan e ti kpɔlɛ tɛ’n i su ye wie-ɔ?

Kɛ m’ɔ Zezi mannin Pɔlu i atin kɛ ɔ bo jasin fɛ’n ti’n, ɔ wunnin i wlɛ kɛ e ti kpɔlɛ tɛ’n ti  i liɛ wie. Like nga ti yɛ e se sɔ’n, Pɔlu bɔbɔ kɛnnin i ndɛ. Ɔ seli kɛ: “Ń lá e Min Klisi Zezi m’ɔ mannin min wunmiɛn’n i ase. Afin ɔ buli min nanwlɛfuɛ ti’n, ɔ fali junman kun wlali min sa nun, kusu nn laa’n, n kannin Ɲanmiɛn i wun ndɛ tɛ, n kleli i sufuɛ’m be yalɛ, yɛ n tuli min wun.” (1 Timote 1:12-14) Ndɛ sɔ’n kle kɛ junman mɔ Zezi fa mannin Pɔlu ti’n, Pɔlu wunnin i wlɛ kɛ Zezi si i aunnvuɛ, ɔ klo i yɛ ɔ lafi i su. E kusu Zezi klo e wie. Afin ɔ fali jasin fɛ bolɛ junman’n wlali e tinuntinun e sa nun kɛ e di. (Mat. 28:19, 20) Junman nga Zezi fa mannin e ti’n, e si kɛ ɔ fɛli i wun kpɔli e ti wie.

Be flɛ aniaan bian kun kɛ Albɛɛ. Kɛ be tuli i asɔnun’n nun’n, ɔ dili afuɛ 34 ka naan w’a sɛ i sin Zoova wun. Ɔ seli kɛ: “Sa tɛtɛ nga n yoli be laa’n be sinsin min nyin su. Sanngɛ kɛ n kɔ jasin fɛ bolɛ’n, min wun yo min kɛ akoto Pɔlu liɛ’n sa. Afin n wun i wlɛ kɛ Zezi yɛ ɔ mannin min junman sɔ’n niɔn. I sɔ’n yo maan n di aklunjuɛ kpɛkun n buman min wun fɔ, yɛ n fa min wla n guɛ i like kpa kun su.”—Jue. 51:5.

Be flɛ aniaan bian kun kɛ Alannin. Kwlaa naan w’a su Zoova’n, i like yolɛ yo ya kpɛkun ɔ yoli sa tɛtɛ sunman. Ɔ seli kɛ: “N te bu sa tɛtɛ kwlaa nga n yoli sran mun’n, i akunndan. Ɔ ju wie’n, min wla bo min wun. Sanngɛ kɛ n wun i kɛ min mɔ n ti sa tɛ yofuɛ’n, Zoova man min atin kɛ n ko bo jasin fɛ’n n kle sran mun’n, n siman wie se. Kɛ sran’m be sɔ jasin fɛ’n nun klanman’n, n wun i wlɛ kɛ Zoova ti kpa naan ɔ klo sran. Afin n wun i wlɛ kɛ Zoova sin min lika uka be nga be yoli sa tɛtɛ laa kɛ min sa’n.”

Kɛ e bo jasin fɛ’n, e yo ninnge kpakpa mun kpɛkun e akunndan’n yo kpa. I lɛ nun’n e wun i wlɛ kɛ Zezi si e aunnvuɛ, ɔ klo e yɛ ɔ lafi e su. I sɔ’n yo e fɛ dan.

Kwlaa naan b’a nunnun Satan i mɛn tɛ nga’n, sa tɛtɛ nga e yoli be laa’n ti’n e klun akunndan’n kwla bu e fɔ. ?Sɛ e wun yo e sɔ’n, ngue yɛ ɔ kwla uka e naan y’a jran kekle-ɔ?

Be flɛ bla kun kɛ Zannin. I talua nun’n, ɔ dili i sa nɲɔn nun. Yɛle kɛ, kɛ ɔ nin i si nin i nin ɔ nin aniaan’m be o’n, ɔ yo i wun kɛ ɔ ti sran kpa sa. Sanngɛ kɛ i ngunmin o’n, like ng’ɔ nin i yolɛ fataman’n yɛ ɔ yo-ɔ. Blɛ wie nun’n, i akunndan’n buli i fɔ. Ɔ seli kɛ : “Kɛ n wun i kɛ ‘Ɲanmiɛn ti dan tra e klun akunndan’n,’ ɔ yo min fɛ dan.” (1 Zan 3:19, 20) E kusu kɛ e wun kɛ Zoova nin Zezi be wun i wlɛ kɛ fɔ m’ɔ o e nun ti’n, e kwlá yoman ninnge mun kɛ ɔ nin i fata sa’n, i sɔ’n gua e awlɛn su nzue wie. Asa ekun’n, nán e wla fi su le kɛ sa tɛ yofuɛ’m be ti yɛ Zezi fɛli i wun mannin-ɔn.—1 Tim. 1:15.

Kɛ e bu wafa nga Zezi nin sran’m be trannin’n i akunndan’n, mɔ e mian e ɲin e bo jasin fɛ’n, e lafi su kɛ e ti kpɔlɛ tɛ’n ti e liɛ wie. Sɛ e yo sɔ’n, é kán ndɛ kunngba nga Pɔlu kannin’n wie. Ɔ seli kɛ: “Ɔ kloli min, yɛ min ti’n ɔ fɛli i wun mannin.”