Sran ng’ɔ trɛ i awlɛn’n, ɔ yo ninnge wie mun. Yɛle kɛ:

• Ɔ kwla tran minndɛ.

• Ɔ si i wun su nian.

• Sɛ be mɛn i junman naan i dilɛ yomɛn i fɛ bɔbɔ’n, ɔ miɛn i ɲin di.

• I wiengu’m be ndɛ lo i.

Bakan ng’ɔ si i awlɛn tra’n, ɔ kwla jran sa sunman ɲrun kekle. I wie yɛle kɛ sɛ i konvi sɔ like kun naan ɔ si kɛ like sɔ’n timan kpa’n, ɔ su yoman. Sanngɛ bakan ng’ɔ simɛn i awlɛn tra’n...

• i awlɛn’n kwla yo fufu.

• i wla guaman ase.

• ɔ kwla nɔn siklɛti annzɛ nzan annzɛ drɔgi.

• ɔ diman like kpa.

Fluwa sifuɛ wie’m be wunnin i kɛ be nga be bakan nun’n be suannin be awlɛn tralɛ’n, kɛ be ɲin’n tukpacɛ sunman to fuan be. Be kokoman sika ti ngboko, kpɛkun be nanti mmla’m be su. Be flɛ bla kun kɛ Anzela. Ɔ kle fluwa inivɛsite kun nun. Ɔ seli kɛ: “Nanwlɛ, awlɛn tralɛ’n ti kpa.”

Maan amun se amun wa’n i kɛ cɛcɛ yɛ amun jran su kpa.

NDƐ NGA BIBLU’N KAN’N: “Sɛ amun se kɛ ‘Ɛɛn’ maan ɔ ka su. Sɛ amun se kɛ ‘Cɛcɛ’ kusu’n maan ɔ ka su.”—Matie 5:37.

Wie liɛ’n, kɛ bakan kun waan i si nin i nin be yo like kun be mɛn i’n, annzɛ kusu be mɛn i atin kɛ ɔ yo like kun’n, ɔ sun. Ɔ kwla yo sɔ awlo lɔ annzɛ nzra nun bɔbɔ. Sɛ siɛ nin niɛn’m be lo be wun be man be mma mun’n, i sɔ’n ká ba’m be nun.

Sanngɛ sɛ be se be mma’m be kɛ ‘cɛcɛ’ naan be jran su’n, ba’m bé wún i wlɛ kɛ nán cɛn ngba yɛ be kwla ɲan like nga be klo’n niɔn. Be flɛ dɔɔtrɔ bian kun kɛ Davidi Wɔlsi. I waan: “Like nga e sieli i nzɔliɛ’n yɛle kɛ be nga be bakan nun’n be wunnin i sɔ liɛ’n i wlɛ’n, kɛ be ɲin’n like nga be le i’n ɔ ju be. Nán e yo naan e mma’m be bu i kɛ be  kwla ɲan like kwlaa nga be klo’n. Sɛ e yo sɔ’n, ɔ su yoman be ye.” *

Sɛ amun kplinman su kɛ amun wa’n yo like kwlaa ng’ɔ klo’n, i sɔ’n úkɛ i. Yɛle kɛ sɛ ɔ ju wie naan i wiengu’m be su i bo kɛ ɔ nɔn drɔgi annzɛ sɛ i bɔbɔ i konvi sɔ bla nin bian kunndɛlɛ sukusuku annzɛ ayeliɛ tɛtɛ uflɛ wie’n, ɔ́ kwlá trɛ́ i awlɛn.

Amun yo naan an mma’m be si kɛ ajalɛ kwlaa le i agualiɛ.

NDƐ NGA BIBLU’N KAN’N: “Like nga sran kun lua’n yɛ ɔ ti-ɔ.”—Galasifuɛ Mun 6:7.

Maan amun mma’m be wun i wlɛ kɛ ajalɛ kwlaa nga be fa’n, ɔ le i agualiɛ. Sɛ ba’m b’a nianman be wun su ninnge wie’m be nun’n, i bo’n kwla gua tɛ. I wie yɛle kɛ sɛ amun wa’n fa ya ndɛndɛ’n, i wiengu’m be su faman be wun be mɛntɛnmɛn i. Sanngɛ sɛ be klɔklɔ i naan ɔ trɛ i awlɛn’n, sran’m bé kló i sa kpɛkun bé fá be wun bé mɛ́ntɛn i. Amun uka ba mun naan be wun i wlɛ kɛ sɛ sa wie nun’n be tra be awlɛn’n, bé ɲán su ye dan.

Amun uka an mma mun naan be wun ninnge nga be ti cinnjin’n be wlɛ.

NDƐ NGA BIBLU’N KAN’N: “Amun wun ninnge nga be ti cinnjin kpa’n be wlɛ.”—Filipufuɛ Mun 1:10.

Sran ng’ɔ trɛ i awlɛn’n ɔ yoman sa tɛ. Kpɛkun ɔ miɛn i ɲin yo ninnge wie mun. Kannzɛ ninnge sɔ’m be yolɛ’n yomɛn i fɛ’n, sanngɛ kɛ mɔ ninnge sɔ’m be ti cinnjin’n ti’n, ɔ trɛ i awlɛn yo be. Maan amun uka ba mun naan be wun ninnge nga be ti cinnjin’n be wlɛ. Kpɛkun maan be dun mmua be yo be ka naan b’a yo like uflɛ. I wie yɛle kɛ sɛ ɔ fata kɛ be di junman wie’n, maan be di ka naan b’a ɔ ngowa kanlɛ.

Amun kle amun mma’m be ajalɛ.

NDƐ NGA BIBLU’N KAN’N: “N yoli i sɔ’n n kleli amun naan kɛ nga n fa yoli’n sa’n, amun kusu amun yo sɔ wie.”—Zan 13:15.

Kɛ amun klun jɔman’n, like nga amun yo’n amun mma’m be sie i nzɔliɛ. Blɛ sɔ nun’n sɛ amun tra amun awlɛn’n, ba’m bé wún i kɛ awlɛn tralɛ’n ti kpa. ?Kɛ amun wa’n yo like tɛ wie’n, wie liɛ’n ngue yɛ amun yo-ɔ? ?Amun fa ya be yo i like yaya annzɛ amun tra amun awlɛn?