Sran ng’ɔ kɛn i wun ase’n, i ɲin yi sran yɛ ɔ tumɛn i wun. Kpɛkun ɔ bumɛn i kɛ i kpa trɛ i wiengu mun. Sran ng’ɔ kɛn i wun ase’n i wiengu’m be ndɛ lo i, yɛ ɔ kplin su kɛ sran uflɛ kle i like.

Sran wie’m be bu i kɛ sran ng’ɔ kɛn i wun ase’n ɔ ti srongble. Sanngɛ i sɔ’n timan nanwlɛ. Sran ng’ɔ ti wun ase kanfuɛ’n kɛ ɔ yo like m’ɔ timan su’n ɔ di i nanwlɛ, yɛ ɔ si kɛ ɔ kwlaman like kwlaa yo.

• Sran ng’ɔ kɛn i wun ase’n, ɔ nin i wiengu’m be tran klanman. Fluwa kun seli kɛ: “Be nga be kan be wun ase’n be ɲan janvuɛ ndɛndɛ. Be nin sran kwlaa tran klanman, yɛ sran’m be klo be sa.”

• Sɛ dɔ nga su ba’m be kan be wun ase’n, bé ɲán su ye. Sɛ ba’m be suan be wun ase kanlɛ’n bé ɲán su ye dan. I wie yɛle kɛ sɛ be ɲin naan be kɔ junman kunndɛlɛ’n, i sɔ’n úka be kpa. Be flɛ dɔɔtrɔ bian kun kɛ Leɔnnaadi Sasi. Ɔ seli kɛ: “Sɛ gbanflɛn kun annzɛ talua kun lafi i wun su dan’n, sɛ ɔ kɔ junman kunndɛlɛ’n i ɲanlɛ kwla yo kekle i sa nun. Sanngɛ sɛ ɔ ti wun ase kanfuɛ’n, sɛ ɔ kɔ junman kunndɛlɛ naan junman su kpɛn’n kan ndɛ wie’n, ɔ́ síe i su i nuan bo kpa. Ɔ maan i junman ɲanlɛ su yoman kekle dan i sa nun.” *

Amun uka be naan b’a yoman be wun dandan.

NDƐ NGA BIBLU’N KAN’N: “Sɛ sran kun bu i wun kɛ ɔ ti sran dan’n, kusu nn ɔ timan sɔ’n, ɔ su lɛkɛ i bɔbɔ i wun.”—Galasifuɛ Mun 6:3.

• Nán amun kan ato ndɛ wie’m be kle ba mun. Wie liɛ’n, siɛ nin niɛn wie’m be se be mma’m be kɛ: “A kwla yo like kwlaa nga a klo’n,” annzɛ “like kwlaa nga a klo kɛ á yó’n, yó.” Kɛ be kan sɔ’n be bu i kɛ be su wla be mma’m be fanngan. Sanngɛ i sɔ’n timan be fanngan wlalɛ, ɔ ti be ti nun sacilɛ. Afin sran kun sa’n, ɔ kwlá yoman like kwlaa ng’ɔ klo kɛ ɔ́ yó’n. Maan amun mma’m be fa be ɲin be sie i like nga be kwla yo’n su naan be mian be ɲin be yo. Sɛ be yo sɔ’n i bo gúa kpa trá kɛ be bu like nga be kwlá yoman’n i akunndan’n.

• Nán amun yi ba’m be ayɛ tratra su. Sɛ ba’m be yo like wie naan amun waan amún yó be mo’n, amun jran like nga be yoli’n su yo be mo. Sɛ amun a yoman sɔ naan an yi be ayɛ tratra su’n, bé tú be wun.

• Nán an man ba’m be atin naan be wɔ ɛntɛnɛti su ngboko. Kpɛ sunman’n, sran’m be blɔ ninnge nga  be yoli’n ɛntɛnɛti su. Wie liɛ kusu be kan ninnge nga be le i’n, ɔ nin junman nga be di’n, be ndɛ lɔ wie. I sɔ’nti be wun tulɛ ayeliɛ.

• Amun kle ba’m be nanwlɛ dilɛ. Sɛ amun mma’m be yo like tɛ wie’n, amun uka be naan be wun kɛ like nga be yoli’n ti tɛ. Kpɛkun amun uka be naan be di i nanwlɛ.

Amun kle amun mma’m be kɛ be si ye.

NDƐ NGA BIBLU’N KAN’N: “Amun kle kɛ amun si ye.”—Kolɔsufuɛ Mun 3:15.

• Amun kle amun mma’m be kɛ be si ninnge nga Ɲanmiɛn yili be’n, be su ye. Ɔ fata kɛ ba’m be wun i wlɛ kɛ ninnge kwlaa nga Ɲanmiɛn yili be’n, be ti yɛ e kwla tran nguan nun-ɔn. Sɛ e kunndɛ kɛ é ká nguan nun’n, ɔ fata kɛ e lo wunmiɛn, e nɔn nzue yɛ e di like. Maan amun kan ninnge sɔ’m be ndɛ kle ba mun naan be si ninnge nga Ɲanmiɛn yili be’n, be su ye.

• Amun se amun mma’m be kɛ be bu sran sran. Amun uka ba mun naan be wun i wlɛ kɛ saan sran wie’m bé sí ninnge wie’m bé yó trá be. Ɔ maan sɛ sran kun si like wie yo tra be’n, nán maan be fa be ɲin ci i. Sanngɛ maan be yi i ayɛ. I kpa bɔbɔ’n be kwla se i kɛ ɔ kle be like sɔ’n i yolɛ wie.

• Amun se amun mma’m be kɛ be yo sran kwla. Sɛ sran wie yoli like wie mannin be’n, maan be yo i kwla. Sɛ be yo sɔ’n, i sɔ’n klé kɛ be si ye. Kpɛkun i sɔ’n úka be naan b’a kan be wun ase.

Amun kle amun mma’m be kɛ be yo like man sran.

NDƐ NGA BIBLU’N KAN’N: “An yo wun ase kanfuɛ naan an bu amun wiengu mun kɛ be ti kpa tra amun. I sɔ yolɛ’n nun’n, nán an bu amun ninnge liɛ’m be ngunmin be akunndan, sanngɛ an bu amun wiengu’m be liɛ’m be akunndan wie.”—Filipufuɛ Mun 2:3, 4.

• Amun man amun mma’m be junman awlo lɔ. Sɛ amun manman amun mma’m be junman awlo lɔ’n, bé bú be wun sran dan. Sɛ amun man be junman kusu’n, maan be di ka naan b’a ɔ ngowa kanlɛ. Amun uka amun mma mun naan be wun i wlɛ kɛ sɛ be di awlo nun junman wie mun’n sran uflɛ ɲán su ye, sran’m bé klun jɔ́, kpɛkun bé ɲin yí be.

• Maan ba’m be suan sran ukalɛ. Kɛ ba’m be uka sran mun’n, kɛ be ɲin’n be yo sran kpa. I sɔ’n ti’n, amun uka amun mma mun naan be sie be nga be mian ukalɛ wun’n be nzɔliɛ. Kpɛkun like trele nga be kwla yo fa uka sran sɔ mun’n, amun nin be koko i su yalɛ. Amun wla be fanngan kɛ be uka sran sɔ mun. Sɛ be yoli sɔ kusu’n, amun yo be mo.