Cɛcɛ. Afin Biblu’n i lika wie fi kɛnmɛn i sɔ ndɛ. Yɛ laa fluwa wie fi seman sɔ kusu.

Wafa nga be kacili ndɛ mma sɔ’n Biblu sunman nun’n ti’n, sran sunman be bu i kɛ Pɔlu blɛ su’n be yo Klisifuɛ wie’m be batɛmun be nga be wuli’n be ti. I wie yɛle kɛ Biblu wie’m be nun’n, be klɛli i kɛ: “?Siɛn’n, sɛ sran wu-ɔ ɔ su cɛnman mlɔnmlɔn’n, nn be bɔ be yo batɛmun be bɔ be wuli’n be ti’n, bé yó i sɛ?”

Maan e fa e ɲin e sie i ndɛ nga be nga be suan Biblu’n su like’n be nun nɲɔn be kannin’n i su. Be flɛ kun kɛ Glegori Lɔkuwudu. Ɔ seli kɛ Biblu’n i lika wie fi kɛnmɛn i kɛ be yoli sran wie’m be batɛmun be nga be wuli’n be ti. Yɛ fluwa nga be kan laa sa’m be ndɛ’n, be nun wie fi kɛnmɛn i sɔ ndɛ’n kusu. Be flɛ kun ekun kɛ Gɔɔdɔnin Donaldi. I kusu seli kɛ Biblu’n i lika wie fi annzɛ lalafuɛ fluwa wie fi kɛnmɛn i sɔ batɛmun liɛ’n i ndɛ. Asa ekun’n, be kɛnmɛn i sɔ ndɛ Biblu’n i bue nga Klisifuɛ’m be klɛli i Glɛki nun’n i lika fi nun. Kpɛkun like fi kleman kɛ Klisifuɛ klikli’m be yoli i sɔ like. Asa kusu’n, kɛ akoto’m be wuli’n asɔnun nga sran’m be wa kpɛli be ba’n be nun’n b’a yomɛn i sɔ batɛmun liɛ’n.

Biblu’n se kɛ ɔ fata kɛ Zezi i sɔnnzɔnfuɛ’m be ‘yo maan nvlenvle’m be kwlaa be nunfuɛ’m be kaci i sɔnnzɔnfuɛ, [...] naan be yo be batɛmun. Yɛ Like kwlaa ng’ɔ seli be kɛ be yo’n, be kle be naan be kusu be nian su be yo wie.’ (Mat. 28:19, 20) I sɔ’n kle kɛ kwlaa naan b’a yo sran kun i batɛmun’n ɔ fata kɛ ɔ suan Zoova nin i Wa’n be su like. Ɔ lafi be su yɛ i ɲin yi be. Kusu sran ng’ɔ w’a wu’n ɔ kwlá yoman ninnge sɔ mun. Asa’n sran ng’ɔ o nguan nun’n ɔ kwlá yoman ninnge sɔ mun manman sran kun m’ɔ w’a wu’n.—Aku. 9:4-5, 10; Zan 4:1; 1 Kor. 1:14-16.

?Ɔ maan ndɛ trele benin yɛ Pɔlu waan ɔ́ kán-ɔn?

Korɛnti lɔ Klisifuɛ wie’m be lafiman su kɛ be nga be wuli’n bé cɛ́n. (1 Kor. 15:12) I sɔ’n ti’n Pɔlu kleli be kɛ akunndan nga be bu’n timan su. ?Wafa sɛ yɛ ɔ yoli sɔ-ɔ? Ɔ seli be kɛ ‘cɛn kwlaa’n ɔ o wie nuan.’ Sanngɛ ɔ lafi su kpa kɛ sɛ ɔ wu’n bé cɛ́n i kɛ Zezi liɛ’n sa naan ɔ ko tran ɲanmiɛn su lɔ.—1 Kor. 15:30-32, 42-44.

Ɔ fata kɛ be nga be kpali be sieli be ngunmin mɔ be o Korɛnti lɔ’n be wun i wlɛ kɛ aliɛ ba kwlaa nun’n, sa kwla tɔ be su yɛ bé wú ka naan Ɲanmiɛn w’a cɛn be. I sɔ’n ti’n, kɛ ‘be yoli be batɛmun mɔ be nin Klisi Zezi be kacili sran wunmuan’n’ i sɔ’n kle kɛ ‘be yoli be batɛmun naan be wu kɛ i sa wie.’ (Rɔm. 6:3) I sɔ’n kle kɛ, kɛ Zezi sa’n sa kekle tɔ́ be su yɛ bé wú kɛ i sa wie. Sanngɛ i sin’n bé cɛ́n be naan be ko tran ɲanmiɛn su lɔ.

Kɛ be yoli Zezi i batɛmun m’ɔ dili afuɛ nɲɔn tra su’n ɔ seli i akoto’m be kɛ: “Batɛmun nga be su yo min’n, bé wá yó amun wie.” (Mar. 10:38, 39) Zezi su se be kɛ, kɛ m’ɔ nin Ɲanmiɛn be nanti klanman’n ti’n sran’m bé kún i. Ɔ maan Pɔlu seli kɛ be nga be kpali be sieli be ngunmin’n be nin Zezi ‘bé fɛ́ likawlɛ naan bé ɲán ɲrun likawlɛ.’ (Rɔm. 8:16, 17; 2 Kor. 4:17) I sɔ’n kle kɛ be nga be kpali be sieli be ngunmin’n bé wú wie kpɛkun bé cɛ́n be naan be wɔ ɲanmiɛn su.

Ɔ maan ndɛ trele nga Pɔlu waan ɔ́ kán’n yɛle kɛ: “?Sɛ w’a yoman sɔ’n, ngue yɛ be nga be su yo be batɛmun kɛ be wu’n, bé yó-ɔ? ?Sɛ be nga be wuli’n be su cɛnman mlɔnmlɔn’n, ngue ti yɛ be su yo be batɛmun kɛ be wu-ɔ?”