Cɛcɛ nɛ́n i sɔ ndɛ yɛ ndɛ mma sɔ’n kan-ɔn. Sanngɛ ɔ kan sran kun mɔ sa sunman tɔ i su sanngɛ ɔ jran kekle’n i ndɛ.

Maan e fa e ɲin e sie i Nyanndra Mun 24:16 i sin ndɛ mma liɛ’n nin i ɲrun ndɛ mma liɛ’n be su e nian. Ndɛ mma sɔ’m be se kɛ: “Nán sua sran kpa’n i nganzua i sua’n ti. Nán de i tranwlɛ’n i sa nun. Afin sran kpa’n, blɛ wie nun ɔ kwla tɔ. Sɛ ɔ tɔ kpɛ nso sɔ bɔbɔ’n, sanngɛ ɔ jaso. Klunwifuɛ’m be liɛ’n, kɛ sa’n ko nyan be’n, wuun i ala! Sɛ ɔ kpɔfuɛ’n tɔ’n, nán ɔ klun jɔ i sɔ’n ti. Yɛ sɛ sa nyɛn i’n, nán ɔ klun jɔ i sɔ’n ti.”—Nya. 24:15-17.

Sran wie’m be bu i kɛ ndɛ mma 16 kan sran kun m’ɔ yo sa tɛ kpɛkun kɛ ɔ kaci i sa’n Ɲanmiɛn yaci cɛ’n i’n, i ndɛ. I sɔ’n ti’n, Ɲanmiɛn sulɛ wafa nga be timan su’n be kpɛnngbɛn nɲɔn m’ɔ be fin Angle’n be seli kɛ “laa nin andɛ’n bɔbɔ’n, be nga be kan Ɲanmiɛn ndɛ’n kɛ bé yíyí ndɛ mma sɔ’n nun’n, ndɛ kunngba’n yɛ be kan-ɔn.” Be seli ekun kɛ “sran kun kwla yo sa tɛ dan kun. Sanngɛ sɛ ɔ klo Ɲanmiɛn naan ɔ kaci i sa’n Ɲanmiɛn kwla yaci sa tɛ ng’ɔ yoli’n cɛ i.” Wafa nga be yiyili ndɛ sɔ’n nun’n kwla yo sran kun m’ɔ kunndɛman kɛ ɔ́ jrán sa tɛ’n i ɲrun kekle’n i fɛ. Afin ɔ kwla bu i kɛ sɛ ɔ yo sa tɛ kunngba’n flan nun’n naan ɔ kpata Ɲanmiɛn’n, ɔ́ yáci cɛ́ i titi.

Sanngɛ nán ndɛ nga ndɛ mma 16 kan’n yɛle ngalɛ’n.

Ebre nun ndɛ mma ng’ɔ o ndɛ mma 16 nin 17 nun mɔ be kacili i Wawle nun kɛ “tɔ” annzɛ “tɔ’n” be kwla fa kan sa fanunfanun ndɛ. Be kwla fa kan tɔlɛ kpakpa’n i ndɛ. I wie yɛle kɛ be fa kan nannin kun m’ɔ tɔ atin nun annzɛ sran kun m’ɔ flo sua kun su tɔ annzɛ kusu yɛbuɛ kun m’ɔ tɔ’n be ndɛ. (Mml. 22:4, 8; Amɔ. 9:9) Sanngɛ be kwla fa kan like uflɛ ndɛ ekun. I wie yɛle kɛ: “Sran nga Anannganman klo i nantilɛ’n, ɔ yo maan i sɔfuɛ’n nyan jranwlɛ. Sɛ ɔ tɔ’n, ɔ kaman asiɛ wun lɛ, afin Anannganman suɛn i bo.”—Jue. 37:23, 24; Nya. 11:5; 13:17; 17:20.

Maan e fa e ɲin e sie i ndɛ nga fluwa sifuɛ kun m’ɔ suan Eduaa Eisi Pluntre kannin’n su. Ɔ seli kɛ Ebre nun ndɛ mma nga be kacili i Wawle nun kɛ “tɔ” be fa kanman “sran kun m’ɔ tɔ sa tɛ yolɛ’n nun’n” i ndɛ le. Fluwa sifuɛ uflɛ kun yiyili ndɛ mma 16 nun ekun seli kɛ: “Sran ng’ɔ kle Ɲanmiɛn i sufuɛ’m be yalɛ’n ɔ su kle i wun yalɛ ngbɛn. Afin be liɛ yó ye. Sanngɛ klunwifuɛ’m be liɛ su yoman ye.”

Ɔ maan e kwla se kɛ Nyanndra Mun 24:16 kanman sa tɛ mɔ sran kun kwla tɔ nun’n i ndɛ. Sanngɛ ɔ kan sa kekleekle nga be kwla tɔ sran kun su kpɛ sunman’n i ndɛ. Satan i mɛn tɛ nga nun’n, tukpacɛ’n nin sa uflɛ wie’m be kwla tɔ sran kpa’m be su. I kpa bɔbɔ’n mɛn siefuɛ wie’m be kwla tanndan be ɲrun tɛtɛ kpa. Sanngɛ be lafi su kɛ Ɲanmiɛn súan be bo yɛ ɔ́ úka be naan b’a kwla jran kekle. I sɔ’n ti’n maan e bu blɛ kwlaa nga ninnge’m be yoli kɛ nga Zoova i sufuɛ’m be fa sunnzunnin sa’n i akunndan. ?Ngue ti yɛ ɔ fata kɛ e yo sɔ-ɔ? Afin i sɔ’n yó maan é láfi su kpa kɛ “be kwlaa nga be tɔ’n, Anannganman suan be bo. Be kwlaa nga b’a cia’n, ɔ tinngɛ be.”—Jue. 41:2-4; 145:14-19.

Kɛ sa tɔ “sran kpa’n” i wiengu’m be su’n, ɔ di- man aklunjuɛ. Sanngɛ like ng’ɔ guɛ i awlɛn su nzue’n yɛle kɛ ɔ “si kɛ be nga be nyin yi Nyanmiɛn’n be liɛ be le muae.”—Aku. 8:11-13; Zɔb 31:3-6; Jue. 27:5, 6.