Sa nga bé wá jú e ɲrun lɔ’n be su ndɛ nanwlɛ’n
?Amun a usa amun wun le kɛ e ɲrun lɔ’n yó sɛ? Biblu’n kan sa wie m’ɔ cɛ kan’n bé wá jú’n, be ndɛ. Sa sɔ’m be ti’n sran’m bé wá ɲán be ti.
Zezi kannin sa nga bé wá jú mɔ bé klé kɛ ‘Ɲanmiɛn Sielɛ’n w’a mantan koko’n’ be ndɛ. (Liki 21:31) Sa sɔ’m be nun wie yɛle alɛ’n, nin asiɛ m’ɔ keje’n, nin awe’n, nin tukpacɛ m’ɔ sa ndɛndɛ’n. Andɛ’n e wun i wlɛ weiin kɛ sa sɔ’m be ju sakpa.—Liki 21:10-17.
Biblu’n kle kɛ sran’m be famiɛn dilɛ blɛ kasiɛn nun’n, sran’m be nzuɛn’n yó tɛ kpa. Sɛ amun kanngan 2 Timote 3:1-5 nun’n, amún wún i sɔ liɛ’n weiin. Kɛ e wun kɛ sran’m be yi ayeliɛ tɛtɛ sɔ’m be nglo andɛ’n, e wun i wlɛ kɛ ndɛ nga Biblu’n kannin’n yɛ ɔ su kpɛn su-ɔ.
?Ngue yɛ ndɛ sɔ’n kle e-ɔ? Ndɛ sɔ’n kle kɛ Ɲanmiɛn su wa yo sa sroesroe kun asiɛ wunmuan’n su. Yɛ sa sɔ’n ti’n, sran’m be liɛ wá yó ye. (Liki 21:36) Biblu’n kan ninnge ɲɛnmɛnɲɛnmɛn nga Ɲanmiɛn wá yó be asiɛ’n su’n, be ndɛ. Maan e kan ninnge sɔ’m be nun wie’m be ndɛ.
SRAN’M BÉ WÁ ƝÁN AWA KPA KUN
“Be mɛnnin i kwlalɛ, nin aɲrunɲan, nin famiɛn diwlɛ kun naan sran wafawafa kwlaa, nin nvlenvle mun, nin sran mɔ be aniɛn’n ti fanunfanun’n, be kwlaa be su i. I kwlalɛ liɛ’n wo lɛ tititi, ɔ su wieman le. Yɛ i famiɛn diwlɛ’n su nunnunman le.”—DANIƐLI 7:14.
Like nga ndɛ sɔ’n kle e’n: Kɛ Zezi wá dí famiɛn’n, sran’m be kwlakwla bé ɲán su ye.
SRAN’M BE SU TƆMAN TUKPACƐ KUN
“Sran fi su seman kɛ: ‘N kpinndinman.’”—EZAI 33:24.
Like nga ndɛ sɔ’n kle e’n: E su tɔman tukpacɛ kun le. Yɛ e su wuman kun. Ɔ maan é trán nguan nun tititi.
SRAN’M BÉ DÍ FƆUNDI
“Ɔ yo maan alɛ kunlɛ’n wie asiɛ wunmuan’n su.”—JUE MUN 46:10.
Like nga ndɛ sɔ’n kle e’n: Sran’m be su kunman alɛ kun. Yɛ ɲrɛnnɛn wafawafa kwlaa wíe.
SRAN KPA’M BÉ WÁ TRÁN ASIƐ’N SU
“Be su wunman klunwifuɛ’m be kun. […] Asiɛ’n yó wɛtɛɛfuɛ’m be liɛ.”—JUE MUN 37:10, 11.
Like nga ndɛ sɔ’n kle e’n: Klunwifuɛ’m be kwlaa bé núnnún. Be nga be ɲin yi Ɲanmiɛn’n, be ngunmin cɛ yɛ bé trán asiɛ’n su-ɔ.
ASIƐ WUNMUAN’N WÁ KÁCI LIKA KLANMAN
“Bé kplán sua mun yɛ bé trán be nun, bé tá viɲin mun yɛ bé dí be su mma mun.”—EZAI 65:21, 22.
Like nga ndɛ sɔ’n kle e’n: Asiɛ’n wá káci lika klanman kpa. Ɲanmiɛn wá tɛ́ srɛlɛ nga e srɛ i kɛ maan i klun sa’n kpɛn su “asiɛ’n su” wa’n su.—Matie 6:10.
Ninnge wie mɔ be kwla yo ɔ fɛ ekun'n
KOSAN MƆ BIBLU’N TƐ BE SU’N
?Ngue yɛ Ɲanmiɛn Sielɛ’n wá yó-ɔ?
Nian like nga kɛ Ɲanmiɛn Sielɛ’n wá síe asiɛ wunmuan’n ɔ́ wá yó’n.
