Levifuɛ nga be timan Ɲanmiɛn ɲrun jranfuɛ’n, be le be junman liɛ nga be di’n. I wie yɛle kɛ be nun wie’m be di gladi. Yɛ gladi difuɛ sɔ’m be le be su kpɛn kun. Be flɛ zifu bian kun kɛ Filo. Ɔ ti fluwa klɛfuɛ. Ɔ kannin junman nga gladi difuɛ’m be di’n i ndɛ. Ɔ seli kɛ: “Be nun wie’m be nian Ɲanmiɛn i sua’n i anuan’m be su. Yɛ wie mun ekun be nian Ɲanmiɛn i sua m’ɔ ti i liɛ klonglo’n, i anuan’m be su. Afin be kunndɛman kɛ sran m’ɔ leman atin wluman lɔ’n, ɔ wlu lɔ. Wie mun ekun be nantinanti bo sin yia Ɲanmiɛn i sua’n, kɔnguɛ nin wia nun. Yɛ junman sɔ’n i dilɛ nun’n, be kacikaci be wiengu.”

Zifu’m be jɔlɛ difuɛ dandan’m be kwla se gladi difuɛ sɔ’m be kɛ be yo ninnge wie mun man be. Gladi difuɛ sɔ’m be ngunmin cɛ yɛ Rɔmunfuɛ’m be kplin su kɛ be ɲan alɛ kunlɛ ninnge-ɔ.

Be flɛ bian kun kɛ Zoakimun Zeremin. Ɔ ti Biblu’n nun ndɛ’n i su like suanfuɛ. Ɔ seli kɛ kɛ sonja’m be trali Zezi’n, ɔ usali be kɛ cɛn kwlaa n kleli like Ɲanmiɛn i sua’n nun lɔ, yɛ ngue ti yɛ amun a traman min-ɔn. (Mat. 26:55) Sɛ ɔ ti kɛ gladi difuɛ sɔ’m be nunman sonja sɔ’m be nun wie’n nn Zezi w’a seman be sɔ. Bian sɔ’n bu i kɛ Ɲanmiɛn i sua’n nun gladi difuɛ mun yɛ be sunmannin be blɛ wie nun kɛ be ko tra Zezi mɔ b’a trɛmɛn i’n niɔn. (Zan 7:32, 45, 46) Blɛ wie nun’n, Zifu’m be jɔlɛ difuɛ dandan’m be sunmannin Ɲanmiɛn i sua’n nun gladi difuɛ’m be su kpɛn’n, ɔ nin gladi difuɛ wie mun naan be ko tra Zezi i akoto mun. Atrɛkpa’n, gladi difuɛ sɔ mun yɛ be ko trali akoto Pɔlu Ɲanmiɛn i sua’n nun lɔ fiteli’n niɔn.​—Yol. 4:1-3; 5:17-27; 21:27-30.