Aniaan bian Jaki nin i yi Mari-Linin be boli blɛ kwlaa nun Ɲanmiɛn junman dilɛ’n i bo afuɛ 1988 nun. Sran’m be sieli i nzɔliɛ kɛ be like yolɛ yoman ya naan kɛ be man be junman’n be sisiman be bo naan b’a di. I sɔ’n ti’n, be mannin be junman fanunfanun. I wie yɛle kɛ be ko dili junman nvle nga be flɛ be kɛ Guadelupu’n nin Giyanin i bue nga be kan blɔfuɛ lɔ’n, be nun. Betɛli ng’ɔ o Aflansi lɔ’n, yɛ ɔ nian nvle nɲɔn sɔ’m be junman’n su-ɔ. Maan e usa aniaan bian’n nin i yi’n be kosan wie mun.

?Ngue ti yɛ amun kacili blɛ kwlaa nun Ɲanmiɛn junman difuɛ-ɔ?

Mari-Linin: N ɲinnin nvle nga be flɛ i kɛ Guadelupu’n su lɔ. Min kaan nun’n, kpɛ sunman e nin min manmin e kɔ jasin fɛ bolɛ. Min manmin klo jasin fɛ bolɛ’n, i kpa. N kusu n klo sran mun kpa. Ɔ maan afuɛ 1985 nun’n, kɛ n wieli suklu di’n, w’a cɛman n kacili atin bofuɛ.

Jaki: N ɲinnin aniaan nga be di Ɲanmiɛn junman blɛ kwlaa nun’n, be afiɛn. Aniaan sɔ’m be klo jasin fɛ bolɛ’n i kpa. Ɔ maan kɛ be yaci suklu ba’m be nun’n, n kaci cɛn kunngun atin bofuɛ. Ɔ ju wie’n, Fue nin Mɔnnɛn cɛn’n, e fa loto e kɔ kan atin bofuɛ’m be o lɔ’n. Kpɛkun e nin be e bo jasin fɛ’n likawlɛ. Blɛ sɔ’n nun’n, e bo jasin fɛ’n nglɛmun lele dɔ kun wie su lɛ. I sin’n, e kɔ jenvie nuan e ko yiyi e ɲin su kan. Nanwlɛ, e dili aklunjuɛ kpa blɛ sɔ’n nun.

Afuɛ 1988 nun’n, e nin Mari-Linin e jali. Kɛ e jali’n w’a cɛman n seli i kɛ: ‘Dɔ nga su’n, e sa timan mianwa. ?Yɛ sɛ e bo jasin fɛ’n i kpa tra laa nin?’ Ɔ maan n ma kacili atin bofuɛ kɛ Mari-Linin sa. Kɛ ɔ dili afuɛ kun’n, e trannin atin bofuɛ’m be suklu’n i bo. Kɛ suklu’n wieli’n, be waan e ko di ngunmin kun atin bolɛ junman’n. E dili junman fanunfanun Guadelupu lɔ. I sin’n, be seli e kɛ e ko di junman Giyanin i bue nga be kan blɔfuɛ lɔ’n, i su.

?Ngue yɛ ɔ ukali amun naan amun a kwla di junman fanunfanun nga be fa mannin amun’n niɔn?

Mari-Linin: Aniaan nga be o Giyanin i bue nga be kan blɔfuɛ lɔ’n i betɛli nun’n, be si kɛ Biblu’n nun ndɛ mma nga e klo i kpa’n yɛle Ezai 6:8. I sɔ’n ti’n, kɛ be flɛ e telefɔnun’n, ɔ ju wie’n be usa e kɛ: “?Amun wla kpɛn Biblu’n nun ndɛ mma nga amun klo i kpa’n, i su?” Kɛ be usa e sɔ’n, e wun i wlɛ kɛ be su wa se e kɛ e wɔ lika uflɛ. Ɔ maan e kusu e tɛ be su kɛ: “E yɛ e o yɛ, amun sunman e.”

 Kɛ be man e junman uflɛ’n, e fa sunnzunman laa liɛ nga e di’n. Afin e si kɛ e kwla di aklunjuɛ junman uflɛ nga be fa mannin e’n i dilɛ’n nun. I sɔ’n ti’n, e mian e ɲin e si aniaan nga be tran kan e su wa kɔ lɔ’n be kpa.

Jaki: Laa’n, kɛ be se e kɛ e wɔ lika uflɛ’n, aniaan wie’m be bubu e sa sin. Afin be kunndɛman kɛ e wɔ. Sanngɛ kɛ e jasoli Guadelupu klɔ’n su’n, aniaan bian kun fali ndɛ nga Zezi kannin m’ɔ o Matie 13:38 nun’n, kpɛnnin e wla. Zezi seli kɛ: “Fie’n yɛle mɛn’n.” Ɔ maan kɛ be man e junman uflɛ’n, e se e wun kɛ lika kwlaa nga be fa e be kɔ lɛ’n, fie kunngba’n i su junman yɛ e su kɔ i dilɛ-ɔ. I kpa bɔbɔ’n, like ng’ɔ ti cinnjin’n yɛle sran nga é wá kó tó be lɔ’n.

Kɛ e ko ju lika nga be seli e kɛ e wɔ lɔ’n nun’n, e fa e ɲin e sie like nga sran’m be yo naan b’a kwla di aklunjuɛ’n i su. Ɔ maan wafa nga sran’m be yo ninnge mun’n, i su yɛ e nian e yo e liɛ mun-ɔn. Kannzɛ be aliɛ nga be di’n ɔ nin e liɛ’n timan kun’n, sanngɛ like nga be di’n, i wie yɛ e di-ɔ. Like nga be nɔn’n, i wie yɛ e nɔn-ɔn. Kpɛkun e yo ninnge wie mun naan y’a tɔman tukpacɛ. Ɔ maan kɛ be man e junman uflɛ’n, e mian e ɲin e kan junman sɔ’n i su ndɛ kpa.

Mari-Linin: Kɛ e kɔ klɔ kun su’n, aniaan nga be o lɔ’n, be kle e ninnge wie’m be yolɛ. Kɛ e ɔli Giyanin i bue nga be kan blɔfuɛ lɔ’n su’n, sa ng’ɔ juli’n min wla w’a fiman su. I uflɛ nun’n nzue tɔman aɔwi. Ɔ maan n se min wun kɛ sɛ nzue’n kpɛ’n, nn y’a wɔ jasin fɛ bolɛ. Sanngɛ aniaan bla kun usali min kɛ: “?E kwla ko bo jasin fɛ’n?” I sɔ’n boli min nuan ti’n, n usɛli i kɛ: “?É yó sɛ́ naan y’a wɔ?” Ɔ tɛli min su kɛ: “É kɔ́ kpanngɔ su. Ɔ maan fa ɔ katawia’n.” I sɔ’n ti’n, n ma suannin wafa nga n kwla fa n sa kun n tra katawia nun, kpɛkun n fa min sa uflɛ n fu kpanngɔ’n i yolɛ. Sɛ ɔ ti kɛ m’an suɛnmɛn i sɔ yolɛ’n, nn m’an kwlá boman jasin fɛ’n nzue blɛ nun.

Be seli amun kɛ amun wɔ lika kɔe 15 nun. ?Ɔ maan ngue ndɛ yɛ amun kwla kan kle aniaan nga be se be sɔ wie’n niɔn?

Mari-Linin: Klɔ uflɛ su tranlɛ leman ba. I sɔ’n ti’n, kɛ a kɔ klɔ kun su’n, ɔ fata kɛ a kunndɛ sua kpa kun tran nun. I liɛ’n kɛ a kɔ jasin bolɛ lele mɔ a sa ɔ sin’n, ɔ wla gúa ase.

Jaki: Ɔ ju wie’n, n kan sua nga e tran nun’n i ayre. Ɔ maan sɛ aniaan nga be o betɛli lɔ’n, be si kɛ e su cɛman klɔ kun su dan’n, ɔ ju wie’n kɛ bé dí aɔwi’n be se min kɛ: “Jaki, andɛ liɛ’n nán bowɛ kan amun sua’n i ayre.”

Ajalɛ tulɛ ti’n, Mari-Linin wa sili trɔ wla kpa. Ɔ fa ninnge mun siesie i buati wie’m be nun. Kpɛkun ɔ klɛklɛ be su. Ɔ klɛ kun su kɛ “wunnzinlɛ ninnge mun,” uflɛ su’n “bɛ mun,” kun ekun su’n “aliɛ tɔnlɛ ninnge mun” annzɛ ninnge uflɛ wie mun ekun. I sɔ’n ti’n, kɛ e kɔ sua uflɛ nun’n, e si lika trele nga é síe  buati mun’n. Asa’n, ɔ klɛ buati kun nun ninnge mun fluwa su. Ɔ maan e fɛman lele naan y’a wun e ninnge mun.

Mari-Linin: Kɛ mɔ e siesie e wun kpa ti’n, kɛ e ju lika kun’n e cɛman lele naan y’a bo jasin fɛ’n i bolɛ bo.

?Wafa sɛ yɛ amun siesieli amun wun naan amun a kwla ‘di Ɲanmiɛn junman’n naan amun a guɛguɛ i bo-ɔ’?​—2 Tim. 4:5.

Mari-Linin: Kisie cɛn kwlaa e lo wunmiɛn kpɛkun e siesie e wun. Sanngɛ kɛ ɔ fɛ i Jɔlɛ cɛn lele m’ɔ́ fá jú Mɔnnɛn cɛn’n, e bo jasin fɛ’n.

Jaki: Anglo kwlaa nun’n, ɔ le dɔ trele kun m’ɔ fata kɛ e di-ɔ. Sanngɛ nɛ́n i sɔ’n su yɛ e fa e ɲin e sie-ɔ. Jasin fɛ bolɛ’n yɛ ɔ ti e cinnjin-ɔn. Ɔ maan kɛ e fin e sua’n nun e fite’n, e bo jasin fɛ’n lele e fa sa e sin awlo. Be kwlaa nga e nin be e yia’n, e bo jasin fɛ’n e kle be.

Mari-Linin: Kɛ é kɔ́ e ɲin su yiyilɛ bɔbɔ’n, e fa fluwa nɲa wie mun e tra nun. Wie liɛ’n, e seman sran’m be kɛ e ti Zoova i Lalofuɛ bɔbɔ, sanngɛ be ba kpɛkun be se e kɛ e man be fluwa. I sɔ’n fin wafa nga e wlawla e wun’n, ɔ nin wafa nga e yo ninnge mun’n. Sran’m be fa be ɲin be sie i ninnge sɔ’m be su kpa.

Jaki: E bo jasin fɛ’n e kle e mantanfuɛ mun wie. I wie yɛle kɛ e nin be e tran klanman. Ɔ ju wie’n, n isa be wla mun n fa guɛ i wla guawlɛ nun kpɛkun n ko guɛ i blo, annzɛ n cuancuan be awlo’m be ɲrun. E mantanfuɛ’m be fa be ɲin be sie i sɔ’n su. Ɔ maan ɔ ju wie’n, be nun wie’m be usa e kɛ: “?Amun kwla man min Biblu kun?”

Ɔ jue wie’n, amun ko bo jasin fɛ’n lika nga be boman jasin fɛ lɔ titi’n i nun. ?Amun kwla bo sa kun m’ɔ juli amun su blɛ sɔ’n nun’n i su?

Jaki: Giyanin nvle nun klɔ wie’m be su kɔlɛ ti kekle. Ɔ ju wie’n klɔ nga e waan é kɔ́ su’n, ɔ nin kan e tran lɛ’n, be afiɛn’n ti nun kilo 600. Yɛ akpɔ’n timan kpa mlɔnmlɔn. Ɔ maan e di lemɔcuɛ kun ka naan y’a ju lɔ. Le kun’n, e ɔli klɔ kun mɔ be flɛ i kɛ Sɛnti Eli’n, i su lɔ. Klɔ sɔ’n wo bo’n i afiɛn lɔ. Nanwlɛ, e wla su fiman cɛn sɔ’n su le. E cɛli kpa naan y’a ju lɔ. I klikli nun’n, e fuli loto kun nun. I sin’n, e ko fuli nzue ɲin su alie kun nun. Be nga be tran klɔ sɔ’n su’n, be ti sika ɔkwlɛ kunndɛfuɛ. Ɔ maan kɛ e man be fluwa’n, be nun wie’m be man e sika ɔkwlɛ kpɔlɛ kanngan wie mun, be fa suan e junman’n i bo. Nnɔsua kwlaa e bo video wie mun. Yɛ sran kpanngban be bɛ i nianlɛ.

Mari-Linin: Cɛn kun’n, be seli Jaki kɛ ɔ ko ijɔ e Wla Kpɛnlɛ aɲia kun bo klɔ nga be flɛ i kɛ Kamopi’n i su. Kɛ é kɔ́ klɔ sɔ’n su lɔ’n, e fuli nzue ɲin su alie kun nun. E sinnin nzue ba nga be flɛ i kɛ Oyapɔki’n su yɛ e ɔli. Nanwlɛ, lɔ kɔlɛ’n yoli e fɛ kpa.

Jaki: Nzue ba’n i lika nga yɛbuɛyɛbuɛ’m be o lɛ’n, ɔ sonji ndɛndɛ. Ɔ maan i kpɛlɛ ti kekle. Nanwlɛ, kɛ e fite nzue ba’n i lika kɛ ngalɛ sa’n be su’n, ɔ yo ɲɛnmɛn dan. Ɔ maan ɔ fata kɛ sran ng’ɔ fa alie sin i sɔ nzue su’n, ɔ si i nun cisan kpa. Sanngɛ nzue sɔ’n i kpɛlɛ yoli e fɛ. Zoova i Lalofuɛ nga be o lika sɔ’n nun lɔ’n, be ti sran 6 cɛ. Sanngɛ sran kɔe 50 be trannin e Wla Kpɛnlɛ aɲia’n i bo. Sran sɔ’m be nun wie’m be ti Amerɛndiɛn.

Mari-Linin: Sɛ gbanflɛn nin talua’m be fa ajalɛ kɛ bé dí Zoova i junman’n i kpa trá laa’n, bé dí aklunjuɛ kɛ e sa wie. Sanngɛ ɔ fata kɛ sa kwlaa nun’n, be lafi Zoova su tankaan kpa. Kpɛ sunman’n, e wunnin i kɛ Zoova ukali e e junman’n i dilɛ’n nun.

Amun suannin aniɛn kaka. ?Be suanlɛ’n yoli pɔpɔ?

Jaki: Nanwlɛ, w’a yoman pɔpɔ. Kɛ ɔ ko yo naan m’an kwla bo jasin fɛ’n, yɛ m’an kwla uka aniaan mun’n, i ti yɛ n suannin aniɛn sɔ mun-ɔn. N tinngɛli Sasafuɛ Tranwlɛ’n i nun like suanlɛ’n Sranantɔngo nun. * Kusu nn be nin-a seman min le kɛ n kanngan Biblu nun aniɛn sɔ’n nun aɲia wie fi bo. Kɛ aɲia’n wieli’n, n usali aniaan bian kun sɛ aniaan’m be wunnin ndɛ nga n kannin’n, i wlɛ-o. Ɔ tɛli min su kɛ: “Nán ndɛ nga a kannin’n i ngba yɛ e wunnin i wlɛ-ɔ. Sanngɛ ɔ junman’n dili kpa.” Ba kanngan’m be ukali min kpa. Kɛ ń íjɔ mɔ n fɔn’n, be kan kle min. Sanngɛ kpɛnngbɛn’m be liɛ’n, be kanman. Gbanflɛn nin talua’m be kusu be ukali min wie kpa.

Mari-Linin: E jasin bowlɛ kun nun’n, n kle be nga be kan blɔfuɛ annzɛ Pɔɔtigɛ annzɛ Sranantɔngo’n be Biblu’n nun like. Aniaan bla kun seli min kɛ sɛ n kɔ sran’m be like klelɛ’n, n dun mmua n bo i bo be nga be kan aniɛn nga n simɛn i kan kpa’n, be su, yɛ n guɛ i bo be nga be kan aniɛn nga n si i kan kpa’n be su. I klikli nun’n, m’an wunman ndɛ ng’ɔ kannin’n  i wlɛ. I sin yɛ n ma wunnin i wlɛ kɛ i afɔtuɛ ng’ɔ mannin min’n, ɔ ti kpa-ɔ.

Cɛn kun’n, n ɔli sran kun m’ɔ kan Sranantɔngo’n i like klelɛ. Kɛ n wieli sran sɔ’n i like kle’n, n ɔli sran kun m’ɔ kan Pɔɔtigɛ’n i like klelɛ wie. Kɛ e boli i bo’n, aniaan bla nga e nin i ɔli’n ɔ seli min kɛ: “Mari-Linin, ɔ yo n kɛ w’a fɔn sa.” Kɛ ɔ kannin sɔ’n, n wunnin i wlɛ kɛ n o lɛ ń kán Sranantɔngo ń klé bla’n. Kusu ɔ timan aniɛn sɔ’n, Pɔɔtigɛ yɛ ɔ ti-ɔ.

Aniaan nga amun nin be dili junman likawlɛ’n be kloli amun sa dan. ?Ngue yɛ amun yoli naan amun nin aniaan’m b’a tra janvuɛ-ɔ?

Jaki: Nyanndra Mun 11:25 se kɛ: “Sran nga bɔ i klun ti ufue’n, ɔ nyɛn i klun-ufue sɔ’n i su nvasuɛ.” Ɔ maan kɛ e wiengu’m be sa mian’n, e sisiman e bo naan y’a ti be wun ɲanman nun. Kɛ e kɔ Ɲanmiɛn Sielɛ Sua’n i ye siesielɛ’n, aniaan bian wie’m be se min kɛ: “Yaci junman ngalɛ’n lɛ, jasin bofuɛ’m bé wá dí.” Kɛ be se sɔ’n n se be kɛ: “N ti jasin bofuɛ wie. Ɔ maan sɛ be yɛ ɔ fata kɛ be di i sɔ junman’n, nn min bɔbɔ n kwla di.” Ɔ ju wie’n, e fa blɛ e yo e bɔbɔ e ninnge mun. Sanngɛ e fa blɛ e uka e wiengu mun wie.

Mari-Linin: E mian e ɲin e yi i nglo kɛ e wiengu’m be ndɛ lo e. Wie liɛ’n sɛ aniaan’m be kunndɛ kɛ sran nian be mma’m be su annzɛ ɔ ko fa be suklu lɔ bla awlo’n, e siesie e blɛ’n i wafa uflɛ naan y’a kwla ti be wun ɲanman nun. I sɔ mɔ e yoli ti’n, e nin be e afiɛn wa mantannin kpa. Afin be si kɛ sɛ be sa mian’n e su sisiman e bo naan y’a uka be.

?Kɛ amun ko boli jasin fɛ’n lika nga be mian jasin bofuɛ’m be wun lɔ nun’n, wafa sɛ yɛ Zoova yrali amun su-ɔ?

Jaki: Blɛ kwlaa nun Ɲanmiɛn junman dilɛ’n mannin e aklunjuɛ. Junman sɔ’n ti’n, e wunnin ninnge nga Zoova yili be’n, be nun sunman. I sɔ’n yoli e fɛ kpa. Kannzɛ sa kekle wie’m be tɔli e su’n, sanngɛ e wla guali ase. Afin e si kɛ lika kwlaa nga é kɔ́ lɔ’n, aniaan’m bé súan e bo.

Min gbanflɛn nun’n, kɛ mɔ min waan n diman sonja ti’n, be wlali min bisua Giyanin i bue nga be kan blɔfuɛ lɔ’n i su. I sɔ’n ti’n, m’an bumɛn i le kɛ cɛn kun’n ń sá min sin klɔ sɔ’n su ń kó dí Ngaliɛ dilɛ junman’n naan bé mán min atin kɛ n wɔ bisua lɔ n ko bo jasin fɛ’n. Nanwlɛ, kɛ Zoova waan ɔ́ yrá ɔ su’n, i sɔ’n bobo ɔ su.

Mari-Linin: Kɛ n tu n klun n uka sran mun’n, n di su aklunjuɛ dan. Nanwlɛ, kɛ Zoova fa min di junman’n, i sɔ’n yo min fɛ dan. Asa’n e nin min wun e afiɛn mantan kpa. Ɔ maan blɛ wie nun’n, Jaki usa min kɛ: “Yɛ sɛ e yia aniaan bian kun nin i yi mɔ be sa sin w’a bubu be’n, e awlo wa nin?” Ɔ ju wie’n, n tɛ i su kɛ: “Akunndan kunngba’n yɛ n buli-ɔ.” I sɔ’n kle kɛ ɔ ju wie’n, e nɲɔn’n e bu like kunngba’n i akunndan.

Jaki: Koko nun wa’n, be seli min kɛ kansɛli o min wun. Kannzɛ Mari-Linin kunndɛman kɛ n kɛn i sɔ ndɛ n kle i’n, sanngɛ ɔ ju wie’n, n se i kɛ: “Min yi, sɛ n wu ainman’n, n si kɛ be su seman kɛ ‘n yoli oke, naan n cɛli kpa.’ Sanngɛ kɛ ń wú lɛ’n, min klun ti jɔwa. Afin n si kɛ n tuli min klun n dili Zoova i junman’n kpa.”​—Bo Bolɛ 25:8.

Mari-Linin: Zoova fali junman wie mɔ y’a bumɛn i le kɛ e kwla di’n mannin e. Yɛ i dunman nun’n e yoli ninnge wie mɔ e siman kɛ e kwla yo be’n. Nanwlɛ, Zoova maan e kwla yoli ninnge kpakpa mun. Lika kwlaa nga Zoova i anuannzɛ’n se e kɛ e wɔ lɔ’n, é kɔ́. Afin e lafi su kɛ Zoova nin e o nun titi yɛ ɔ́ súan e bo blɛ kwlaa nun.