Be wuli min afuɛ 1983 nun. Kɛ bé wú min’n, n ti juejue. Sanngɛ kɛ n ɲannin afuɛ blu’n, min kplo’n nun wunmuan’n wa boli min ya yolɛ bo. Kɛ ɔ dili afuɛ kɔe nɲɔn’n, cɛn kun nglɛmun mɔ ń tínnge’n, n kwlaman min wun kan kun. Min waan ń mán min ja’m be su. Sanngɛ n yoli lele ngbɛn. Kɛ ɔ fɛ i lɛ’n, m’an kwlá nantiman kun. Tukpacɛ sɔ’n ti’n, m’an ɲinman kun. Andɛ’n, kɛ be wun min’n, n ti kaan kɛ bakan wie sa.

Kɛ tukpacɛ’n boli i bo’n, n dili anglo kaka sua’n nun, n fiteman. Blɛ sɔ’n nun’n, Zoova i Lalofuɛ nɲɔn be bali e awlo lɛ. Titi’n, kɛ sran’m be ba e awlo lɛ’n, n fia. Sanngɛ cɛn sɔ’n nun liɛ’n, n kplinnin su kɛ min nin bla sɔ mun é kókó yalɛ. Kɛ bé kán Mɛn klanman’n i ndɛ bé klé min’n, min wla kpɛnnin ndɛ kun mɔ i nun mɔ n le afuɛ nnun’n, n tili’n su. Blɛ sɔ’n nun’n, bian kun m’ɔ ti Ngaliɛ difuɛ’n, ɔ ba e klɔ lɛ kpɛ kun anglo kun nun. Be flɛ i kɛ Zetro. Bian sɔ’n tran nvle nga be flɛ i kɛ Surinamun’n i su. Kɛ ɔ ba’n, ɔ nin min baba be suan Biblu’n nun like. Bian sɔ’n klo min sa kpa. N kusu n klo i sa wie. Asa ekun’n, min nannan yasua’n annzɛ min nannan bla’n be fali min ɔli Zoova i Lalofuɛ’m be aɲia nga be yo be e klɔ lɛ’n, be bo. Ɔ maan kɛ Zoova i Lalofuɛ nga be bali e awlo lɛ’n be nun kun m’ɔ suan Floransi’n, ɔ seli min kɛ ɔ́ klé min Biblu’n nun like’n n kplinnin su.

Floransi sɛli i sin wa niannin min osu. Kɛ ɔ́ bá’n, ɔ nin i wun m’ɔ suan Zistisi’n yɛ be bali-ɔ. Kpɛkun be boli min Biblu’n nun like klelɛ bo. Kɛ be sieli i nzɔliɛ kɛ n siman kanngan’n, be kleli min kannganlɛ. Kɛ ɔ cɛli kan’n, n ma sili kanngan. Cɛn kun’n, aniaan bian’n nin i yi’n be seli min kɛ be waan be ko bo jasin fɛ’n Surinamun lɔ. Kɛ be ɔli’n, m’an ɲanman sran w’a kleman min Biblu’n nun like kun. Sanngɛ Zoova i wla w’a fiman min su le.

Kɛ i osu lali nun kan’n, aniaan bian kun m’ɔ suan Flɔidi’n m’ɔ ti atin bofuɛ’n, ɔ bali Oreala lɛ. Kɛ ɔ́ bó jasin fɛ’n awloawlo’m be nun’n, ɔ ko fiteli min su. Kɛ ɔ seli min kɛ ɔ kunndɛ kɛ ɔ́ klé min Biblu’n nun like’n, n srili puɛɛ. Kpɛkun ɔ usali min kɛ: ?Ngue ti yɛ a sri-ɔ? N seli i kɛ n suannin fluwa ?Ngue like yɛ Ɲanmiɛn Kpli kunndɛ kɛ e yo ɔ? i nun like laa. Kpɛkun n boli fluwa “La connaissance qui mène à la vie éternelle” i nun like suanlɛ bo. * N kannin like nga ti yɛ n yacili like suanlɛ’n, i ndɛ n kleli i. Ɔ maan Flɔidi wa boli min Biblu’n nun like klelɛ bo fluwa “Connaissance” nun ekun. Ɔ kleli min like lele e wieli fluwa’n i nun like suan. I sin’n, be fɛ ɔli lika uflɛ. Ɔ maan m’an ɲanman sran w’a kleman min Biblu’n nun like kun.

 Afuɛ 2004 nun’n, be seli aniaan bian Granvili nin aniaan bian Zozie be kɛ be ko di Ngunmin atin bolɛ junman Oreala lɔ. Kɛ bé bó jasin fɛ’n, be kusu be ko fiteli min su. Kɛ be usali min sɛ n kunndɛ kɛ ń súan Biblu’n nun like’n, n srili ekun. N seli be kɛ be kle min like fluwa “Connaissance” nun ekun. Min waan ń nían, sɛ ndɛ nga bé wá kán klé min’n, ɔ nin ndɛ nga be nga be kleli min Biblu’n nun like laa’n be kannin’n, ɔ ti kun-o. Granvili seli min kɛ be yo aɲia e klɔ’n su lɛ. Blɛ sɔ’n nun’n, nn m’an di afuɛ blu awlo lɛ n fiteman. Sanngɛ n kunndɛli kɛ ń trán aɲia sɔ’m be bo. Ɔ maan Granvili bali e awlo lɛ, kpɛkun ɔ fali min bubuwafuɛ’m be bia kun nun yɛ e ɔli aɲia bo-ɔ.

I sin’n, Granvili wlali min fanngan kɛ n klɛ min dunman naan n di Ɲanmiɛn junman dilɛ suklu’n wie. Ɔ seli min kɛ: “A ti tukpacifuɛ sanngɛ a kwla ijɔ. Á íjɔ nzra nun cɛn kun. N lafi su kɛ á yó i sɔ sakpa.” Ndɛ ng’ɔ kannin’n wlali min fanngan dan.

E nin Granvili e wa boli jasin fɛ’n i bolɛ bo. Sanngɛ e klɔ’n nun akpɔ’m be timan kpa. Ɔ maan kɛ ɔ ko yo naan bubuwafuɛ’m be bia’n w’a sin akpɔ sɔ’m be su’n, ɔ ti kekle. I sɔ’n ti’n, n seli Granvili kɛ ń trán bluɛti kun nun naan ɔ su min bo. I sɔ’n yoli min ye kpa. Ɔ maan afuɛ 2005 Avrili anglo’n nun’n, be yoli min batɛmun. W’a cɛman, aniaan’m be seli min kɛ n nian e asɔnun’n nun fluwa’m be su. Be kleli min wafa nga n kwla di junman sɔ’n. Kpɛkun be seli min kɛ, kɛ é yó aɲia’n min yɛ n bo miziki’n niɔn.

Afuɛ 2007 nun’n, min baba floli mmeli kun nun tɔli nzue’n nun. Kɛ ɔ́ tɔ́’n, ɔ tɔli mmeli’n i blalɛ ng’ɔ kpɛ i wun’n i lika. Ɔ maan blalɛ’n kpɛli i tɛtɛ kpa. Kɛ ɔ dili le nɲɔn kun’n, yɛ ɔ wuli-ɔ. Nanwlɛ, min osufuɛ’m be wla boli be wun dan. Blɛ sɔ’n nun’n, Granvili srɛli Ɲanmiɛn mannin e. Ɔ kanngannin Biblu’n nun ndɛ mma wie’m be nun fa wlali e fanngan. Kɛ ɔ dili afuɛ nɲɔn’n, sa yalɛ uflɛ wa ɲannin e. Yɛle kɛ cɛn kun kɔnguɛ’n aniaan bian Granvili i mmeli’n sacili i bo. Ɔ maan ɔ mlɔnnin nzue’n nun. I cɛn ba nɲɔn su yɛ be wunnin i fuɛn’n niɔn.

Kɛ aniaan bian Granvili wuli’n, asɔnunfuɛ’m be ukafuɛ kunngba cɛ yɛ ɔ kali e asɔnun’n nun-ɔn. Nanwlɛ, i wie’n yoli min ya dan. Afin ɔ ti min janvuɛ dan kpa kun. Ɔ ukali min naan min nin Zoova e afiɛn w’a mantan kpa. Kpɛkun ɔ yoli ninnge uflɛ wie mun ekun mannin min. Kɛ ɔ wuli’n, aɲia klikli nga é yó’n i bo’n, be seli min kɛ n kanngan Sasafuɛ Tranwlɛ’n i ndɛ kpɔlɛ’m be nun. Kɛ n kanngannin ndɛ kpɔlɛ nɲɔn nun’n, m’an kwlá traman min awlɛn kun yɛ n boli sunlɛ bo-ɔ. Min waan ń múan min nuan sanngɛ ngbɛn-ɔn. I sɔ’n ti’n, n jrali.

Blɛ kun nun’n, aniaan wie mɔ be fin asɔnun bo uflɛ nun’n, be bali e ukalɛ. Kɛ be bali’n yɛ min wun wa fali min feke kan-ɔn. Asa ekun’n, Betɛli’n sunmannin aniaan bian Kojo kɛ ɔ w’a di Ngunmin atin bolɛ junman’n Oreala lɛ. Like ng’ɔ yoli maan n dili aklunjuɛ ekun’n, yɛle kɛ min manmin nin min sinma yasua’n, be wa boli Biblu’n nun like suanlɛ bo. Kpɛkun be yoli be batɛmun. Afuɛ 2015 Marsi anglo’n nun’n, n ma kacili asɔnunfuɛ’m be ukafuɛ. I sin’n, be seli min kɛ n ijɔ nzra nun. Cɛn sɔ’n nun’n, min wla kpɛnnin ndɛ nga Granvili kan kleli min laa’n, i su. Ɔ seli min kɛ: “Á íjɔ nzra nun cɛn kun. N lafi su kɛ á yó i sɔ sakpa.” Ɔ maan, i sunlɛ-o, i srilɛ-o, i kwlakwla sanngannin nun.

Kɛ ń nían JW televiziɔn’n, be kannin aniaan wie mɔ sa kekle o be su kɛ min sa’n, be ndɛ. Ɔ nin i sɔ ngba’n, be mian be ɲin be bo jasin fɛ’n, yɛ be di aklunjuɛ. N kusu n kwla yo ninnge kpanngban. N kunndɛ kɛ ń tú min klun ń dí Zoova i junman’n. I sɔ’n ti’n, n kacili Titi atin bofuɛ. Afuɛ 2019 Sɛptanblu nglo’n nun’n, sa kun wa fuli min nun. Yɛle kɛ n kacili asɔnun kpɛnngbɛn. E asɔnun’n nun’n, jasin bofuɛ’m be ti 40.

Ń lá aniaan kwlaa nga be kleli min Biblu’n nun like mɔ be ukali min naan m’an kwla su Zoova’n be ase. Sanngɛ sran nga asenna’n i dan lika kɔ i lika’n yɛle Zoova. Afin i wla w’a fiman min su le.