LAA’N, aniaan kpanngban mɔ be tuli be nvle’n nun be ɔli sika kunndɛlɛ nvle uflɛ nun’n, be sali be sin be nvle’n nun ekun. Kɛ mɔ be klo Zoova nin be wiengu mun ti’n, be ɔli lika nga be mian jasin bofuɛ’m be wun lɔ’n i nun. (Mat. 22:37-39) ?Kɛ ɔ ko yo naan b’a kwla yo i sɔ like’n, ngue yɛ be kpɔcili i-ɔ? ?Yɛ wafa sɛ yɛ Zoova yrali be su-ɔ? Kɛ ɔ ko yo naan y’a kwla wun i wlɛ’n, maan e fa e ɲin e sie i nvle kun mɔ be flɛ i kɛ Kamerunun’n i su.

Be flɛ aniaan bian kun kɛ Onezimun. Afuɛ 1998 nun’n, ɔ jasoli i nvle mɔ be flɛ i kɛ Kamerunun’n i su ɔli nvle uflɛ nun. Aniaan bian sɔ’n trannin nvle uflɛ nun afuɛ lele 14. Cɛn kun’n, aɲia kun bo’n ɔ tili jasin fɛ bolɛ’n i su sunnzun ase kun mɔ aniaan kun fali’n. Aniaan bian sɔ’n seli kɛ: “Wienun-ɔn, janvuɛ nɲɔn b’a ɔ jue tralɛ lika fanunfanun nun. Kpɛkun kun tra jue kpanngban trɛ i janvuɛ kun’n. ?Kɛ amun niɛn i sa’n, ngue yɛ sran ng’ɔ traman jue kaka’n ɔ́ yó-ɔ? ?Ɔ su kɔmɛn i janvuɛ m’ɔ tra jue kaka’n, i wun lɔ?”

Aniaan bian’n i sunnzun ase sɔ’n ti’n, aniaan bian Onezimun kunndɛli kɛ ɔ́ sɛ́ i sin Kamerunun lɔ ekun naan ɔ́ kó úka aniaan nga be o lɔ’n. Afin lɔ’n sran kpanngban be kunndɛ kɛ bé súan Biblu’n nun like. Sanngɛ srɛ kun i. Afin ɔ usɛli i wun kɛ ɔ́ kwlá trán Kamerunun lɔ ekun’n. Afin ɔ jasoli lɔ w’a cɛ. Kɛ ɔ ko yo naan w’a wun i wlɛ sɛ ɔ kwla tran Kamerunun lɔ ekun’n, ɔ ɔli lɔ ko dili anglo nsiɛn. Kpɛkun afuɛ 2012 nun’n, ɔ sɛli i sin ko trannin lɔ mlɔnmlɔn siɛn’n.

Onezimun seli kɛ: “N ma suannin awunyɛyɛ nun tranlɛ ekun. Kpɛkun n suannin wafa nga sran’m be yo ninnge mun’n. Asa ekun’n, bia nga be o Ɲanmiɛn Sielɛ Sua’m be nun’n be su tranlɛ yoman fɛ mlɔnmlɔn, sanngɛ n miannin min ɲin n trannin be su. Kɛ n fa min ɲin sie i ndɛ nga be kɛn i aɲia bo lɔ’n i su’n min wla fi bia kpakpa nga n trannin be su laa’n, be su.”

Afuɛ 2013 nun’n, Onezimun jali Zeradinin. Zeradinin trannin Aflansi lɔ afuɛ ngwlan ka naan w’a sɛ i sin Kamerunun lɔ ekun. ?Kɛ mɔ Zoova i junman’n dilɛ’n yoli be cinnjin trali like kwlaa ti’n, wafa sɛ yɛ ɔ yrali be su-ɔ? Onezimun seli kɛ: “E trannin Ɲanmiɛn Sielɛ’n i jasin bofuɛ’m be suklu’n i bo kpɛkun e ko dili junman Betɛli lɔ. Kɛ ɔ dili afuɛ kun’n, be yoli e asɔnun nun Biblu’n nun like suanfuɛ 20 be batɛmun. Siɛn’n, n wun i wlɛ kɛ lika nga n kwla tra “jue” kaka lɛ’n i nun yɛ n wo-ɔ.” Yɛle kɛ n kwla uka sran kpanngban naan b’a kaci Zezi i sɔnnzɔnfuɛ. (Mar. 1:17, 18) Zeradinin seli kɛ: “Zoova yrali min su dan. M’an bumɛn i le kɛ ɔ́ yrá min su sɔ.”

Be flɛ aniaan bla kun kɛ Ziditi. Ɔ jasoli i nvle’n nun ko trannin Etazinin lɔ. Sanngɛ ɔ kunndɛli kɛ ɔ́ bó jasin fɛ’n i kpa trá laa’n. Ɔ seli kɛ: “Blɛ kwlaa nga n kɔ Kamerunun’n kɛ ń sá min sin’n, n sun. Like nga ti yɛ n sun’n yɛle kɛ n su wa yaci be kwlaa nga n kle be Biblu’n nun like’n n kɔ.” Sanngɛ Ziditi sisili i bo kan ka naan w’a fa ajalɛ kɛ ɔ́ kó trán  Kamerunun lɔ mlɔnmlɔn. Afin nvle ng’ɔ o nun’n, junman ng’ɔ di’n ɔ ɲan nun sika kpa. Ɔ maan ɔ kwla niɛn i si m’ɔ kpinndinman m’ɔ o Kamerunun lɔ’n i lika. Sanngɛ Ziditi lafili Zoova su. Ɔ maan ɔ sɛli i sin ko trannin Kamerunun lɔ mlɔnmlɔn. Ɔ dili i nanwlɛ kɛ ninnge nga i nun m’ɔ o Etazinin lɔ’n ɔ ɲan be’n, ɔ ɲanman be kun. Sanngɛ ɔ srɛli Zoova kɛ ɔ ukɛ i naan Kamerunun lɔ tranlɛ’n si i wun. Like ng’ɔ ukɛli i ekun’n, yɛle kɛ akpasua sunianfuɛ’n nin i yi’n be wlɛli i fanngan kpa.

Kɛ Ziditi bu blɛ m’ɔ sɛli i sin Kamerunun lɔ’n i akunndan’n, ɔ seli kɛ: “Kɛ ɔ́ dí afuɛ nsan’n, nn m’an uka sran nnan b’a yo be batɛmun.” I sin’n, Ziditi wa kacili Ngunmin atin bofuɛ. Andɛ’n, ɔ nin i wun m’ɔ suan Samun Kasitɛli be di akpasua sunianlɛ junman’n. ?Yɛ Ziditi i baba’n nin? ?Wafa sɛ yɛ ɔ kwla niɛnnin i lika-ɔ? Ziditi nin i osufuɛ’m be wunnin dɔɔtrɔ kun nvle uflɛ nun m’ɔ kwla niɛn i baba i lika-ɔ. Ɲanmiɛn sa, kɛ dɔɔtrɔ sɔ’m be yoli i baba i opele’n i bo guali kpa.

Be flɛ aniaan bian kun kɛ Viktɔɔ. Ɔ jasoli i nvle’n nun ko trannin Kanada lɔ. Cɛn kun’n, ɔ kanngannin Sasafuɛ Tranwlɛ’n i nun ndɛ kun m’ɔ kan suklu dan dilɛ’n i ndɛ’n i nun. Ɔ maan ɔ kacili akunndan ng’ɔ bu i suklu dan dilɛ’n su’n. I sɔ’n ti’n, w’a ɔman Inivɛsite kun. Sanngɛ ɔ ɔli suklu kun mɔ i nun’n be kwla ukɛ i naan w’a suan junman kun dilɛ’n. Ɔ seli kɛ: “Kɛ n yoli sɔ’n w’a cɛman, n ɲannin junman. Ɔ maan n kwla yoli like nga min awlɛn o su’n. Yɛle kɛ n kacili atin bofuɛ.” I sin’n, Viktɔɔ wa jali Karolinin. Kpɛkun be ɔli Kamerunun lɔ. Kɛ be juli lɔ’n, be ɔli Betɛli lɔ niannianlɛ. Lɔ’n aniaan’m be wlali be fanngan kɛ be bla Kamerunun be wa bo jasin fɛ’n. Viktɔɔ seli kɛ: “E sɔli be ndɛ’n nun klanman. Afin blɛ sɔ’n nun’n, like fi tanndanman e ɲrun. I kpa bɔbɔ’n, kɛ mɔ e kpɔcili e sa nun ninnge wie mun ti’n, e kwla yo like nga aniaan’m be kɛnnin i ndɛ lɛ’n.” Kannzɛ bɔbɔ Karolinin i wun sanndimɛn i kpa’n, sanngɛ be fali ajalɛ kɛ bé kó trán Kamerunun lɔ mlɔnmlɔn.

Kɛ ɔ ko yo naan Viktɔɔ nin Karolinin b’a kwla uka be nga Ɲanmiɛn ndɛ’n lo be’n, be kacili titi atin bofuɛ. Kɛ mɔ be siesieli sika’n ti’n kɛ bé bó atin bolɛ junman’n bo’n, w’a yoman cinnjin kɛ be di junman. I sin’n, be wa dili junman Kanada lɔ anglo nɲɔn kun. I sɔ’n yoli maan be kwla sali be sin Kamerunun lɔ yɛ be dili be atin bolɛ junman’n titi. ?Kɛ be yoli sɔ’n, i su ye benin yɛ be ɲɛnnin i-ɔ? Be trannin Ɲanmiɛn Sielɛ’n i jasin bofuɛ’m be suklu’n i bo kpɛkun be kacili Ngunmin atin bofuɛ. Dɔ nga su’n, be o be nga be kplan Ɲanmiɛn Sulɛ Sua’m be nun wie. Viktɔɔ seli kɛ: “Kɛ mɔ e kpɔcili e sa nun ninnge mun ti’n, siɛn’n ɔ fata kɛ e lafi Zoova su. I kusu niannin e lika.”

Be flɛ aniaan bian kun kɛ Alɛn. Laa’n, ɔ kɔ Ale- maɲin lɔ’n inivɛsite kun nun. Afuɛ 2002 nun’n, ɔ kanngannin fluwa nɲa kun mɔ be flɛ i kɛ Gbanflɛn nin talua mun: ?Ngue yɛ amún fá nguan mɔ amun le i’n yó ɔ? i nun. Ndɛ ng’ɔ kanngannin nun’n ti’n, ɔ fɛli i ɲin sieli i ninnge uflɛ wie’m be yolɛ’n su. Ɔ maan afuɛ 2006 nun’n, ɔ trannin “École de formation ministérielle” i bo. I sin’n, be seli i kɛ ɔ ko bo jasin fɛ’n Kamerunun lɔ. Lɔ kusu yɛ be wuli i-ɔ.

Kɛ ɔ juli Kamerunun lɔ’n ɔ ɲannin junman kun. Junman sɔ’n fɛmɛn i blɛ’n ngba’n. I sin’n, ɔ wa ɲannin junman kun mɔ be ɲan nun sika kpa’n. Sanngɛ i klun jɔman. Afin ɔ se i wun kɛ junman sɔ’n kwla yo maan ɔ su kwlá boman jasin fɛ’n i kpa. Ɔ maan kɛ be seli i kɛ ɔ kaci Ngunmin atin bofuɛ’n, ɔ kplinnin su ndɛndɛ kpa. Blɛ sɔ’n nun’n, i junman su kpɛn’n seli i kɛ ɔ́ úkɛ i sika’n su, sanngɛ w’a kplinman su. Ɔ kacili Ngunmin atin bofuɛ. I sin’n, Alɛn wa jali Sefanin m’ɔ trannin Aflansi lɔ afuɛ kpanngban’n. ?Kɛ Sefanin sɛli i sin ko trannin Kamerunun lɔ’n, sa benin wie mun yɛ be tɔli i su-ɔ?

 Sefanin seli kɛ: “N tɔli tukpacɛ kpɛ sunman yɛ kɛ n di aliɛ wie mun’n ɔ yoman min kpa. Sanngɛ n ɲannin ayre kpa kun. Ɔ maan min wun fali min feke.” Sefanin nin i wun be ɲin mɔ be miannin’n w’a yoman ngbɛn. Alɛn seli kɛ: “Cɛn kun’n, e ko boli jasin fɛ’n klɔ kun mɔ be flɛ i kɛ Kate’n su lɔ. Klɔ sɔ’n wo mmua kpa. Kɛ e juli lɔ’n, e wunnin sran kpanngban kpa mɔ be kunndɛ kɛ bé súan Biblu’n nun like-ɔ. I sin’n, n kleli be nun wie’m be like telefɔnun nun. Kpɛkun be yoli be nun nɲɔn be batɛmun yɛ be boli aɲia’m be yolɛ bo klɔ’n sɔ’n su.” Sefanin seli ekun kɛ: “Kɛ a uka sran kun lele m’ɔ fɛ i wun man Zoova mɔ be yo i batɛmun’n, aklunjuɛ nga a di’n be kanman. Kɛ e bo jasin fɛ wa’n, e di aklunjuɛ dan.” Andɛ’n, Alɛn nin i yi Sefanin be di akpasua sunianlɛ junman’n.

Be flɛ aniaan bla kun kɛ Zizɛli. Laa’n, ɔ dili dɔɔ- trɔ’m be suklu’n Itali lɔ. Blɛ sɔ’n nun yɛ be yoli i batɛmun-ɔn. Aniaan bian kun nin i yi mɔ be ti Atin bofuɛ’n yɛ be kleli i Biblu’n nun like-ɔ. Kɛ ɔ fɛli i ɲin sieli i wafa nga be yo ninnge mun’n i su, ɔ yoli i ɲɛnmɛn. Ɔ maan ɔ kunndɛli kɛ ɔ́ bó jasin fɛ’n i kpa trá laa. I ti’n kɛ ɔ ka kan ɔ́ wíe suklu’n i dí’n yɛ ɔ kacili titi atin bofuɛ-ɔ.

Zizɛli kunndɛli kɛ ɔ́ sɛ́ i sin Kamerunun lɔ naan ɔ́ kó bó jasin fɛ’n i kpa. Sanngɛ ninnge wie’m be kle i yalɛ. Ɔ seli kɛ: “Sɛ min waan ń kó trán Kamerunun lɔ mlɔnmlɔn’n, be su manman min atin kɛ n tran Itali lɔ kun. Ɔ maan e nin min janvuɛ mun nin min osufuɛ nga be o Itali lɔ’n e su wunman e wun kun kɛ laa sa.” Ɔ nin i sɔ’n ngba’n, afuɛ 2016 Mɛ anglo’n nun’n, ɔ sɛli i sin Kamerunun lɔ mlɔnmlɔn. Kɛ ɔ juli lɔ’n, w’a cɛman ɔ nin Leɔnsu’n be jali. I sin’n, Kamerunun lɔ Betɛli’n seli be kɛ be ko bo jasin fɛ’n klɔ kun mɔ be flɛ i kɛ Ayɔsu’n i su. Afin lɔ’n be mian jasin fɛ bofuɛ’m be wun lɔ kpa.

?Klɔ sɔ’n i su tranlɛ’n yoli sɛ? Zizɛli seli kɛ: “Ɔ ju wie’n kɛ be kpɛ e su kolan’n, ɔ di lemɔcuɛ kaka. Kɛ ɔ ko yo sɔ’n kɛ e pɔɔtablu’m be wu’n, e kwlá fa yoman like fi kun. N ma suannin wafa nga n kwla tɔn like ye su’n. Kpɛkun nnɔsua kɛ be nga be kɔ nzue salɛ’n b’a sɔnman dan’n, e fa bluɛti nin tɔsu yɛ e ko sa e liɛ’n niɔn.” ?Ngue yɛ ɔ ukali Zizɛli nin i wun naan b’a kwla jran kekle-ɔ? Zizɛli seli kɛ: “Zoova fɛli i wawɛ’n suannin e bo. E nin min wun e suannin e wiengu bo. Yɛ e osufuɛ nin e janvuɛ wie’m be wlali e fanngan kpɛkun be blɛli e sika kan.”

?Kɛ Zizɛli sɛli i sin i klɔ’n ɔ dili aklunjuɛ? I bɔbɔ tɛli su seli kɛ: “Ɛɛn, n dili aklunjuɛ dan. I klikli nun’n sa kekle wie’m be ti’n, e sa sin bubuli e kan. Sanngɛ kɛ e kwla jrannin sa sɔ’m be ɲrun kekle’n, e nin min wun e seli e wun kɛ like ng’ɔ fata kɛ e yo’n yɛ e yoli-ɔ. Siɛn’n, e lafi Zoova su kpa yɛ e nin i e afiɛn mantan kpa wie kusu.” Aniaan bian Leɔnsu nin i yi Zizɛli be trannin Ɲanmiɛn Sielɛ’n i jasin bofuɛ’m be suklu’n i bo. Dɔ nga su’n, be ti Ngunmin atin bofuɛ.

Be nga be tra jue’n, kannzɛ lika’n ti sɛ ti sɛ’n, be mian be ɲin be di be junman’n i kpa naan b’a kwla tra jue kaka. I wafa kunngba’n, be nga be sa be sin be nvle’n nun’n kɛ bé kó bó jasin fɛ’n, be kpɔcili ninnge wie mun naan b’a kwla uka be nga be awlɛn’n ti kpa’n mɔ be sɔ Ɲanmiɛn i Famiɛn dilɛ’n i jasin fɛ’n nun’n. E lafi su kɛ Zoova i wla su fiman aniaan sɔ mɔ be miannin be ɲin be dili junman kekle kpa mɔ be yili i nglo kɛ be klo i dunman’n, be su le. (Nee. 5:19; Ebr. 6:10) ?Sɛ a tran nvle uflɛ nun naan be mian jasin bofuɛ’m be wun ɔ klɔ lɔ’n, a kwla ko tran lɔ bo jasin fɛ’n? Sɛ a yo sɔ’n Zoova yrá ɔ su dan.—Nya. 10:22.