Be flɛ bian kun kɛ Pɔlu. Ɔ seli kɛ: “Cɛn kun’n, kɛ e nin min niaan bian kun mɔ e nin i e ti ngawangawa’n é tú’n, n trɛli i kɔmin’n n miɛnnin i fii. Min waan ń kún i.”

Be flɛ bian kun kɛ Maako. Ɔ seli kɛ: “Awlo lɔ’n, ɔ cɛman naan m’an fa ya. Kɛ n ko fa ya’n like kwlaa nga n sa tɔ su’n, i bia-o, i ba’m be ngowa kanlɛ ninnge mun-o, n bubu be kwlaa.”

E nun sunman e timan kɛ sran nɲɔn nga e kannin be ndɛ lɛ’n be sa. Sanngɛ ɔ ju wie’n, e siman e wun su nian. Like nga ti yɛ ɔ ti sɔ’n, yɛle kɛ fɔ o e kwlakwla e nun. Afin e ti Adan i mma mun. (Rɔm. 5:12) Sran wie’m be ti kɛ Pɔlu nin Maako be sa. Kɛ ɔ ko yo naan b’a nian be wun su’n, ɔ ti kekle man be. Wie’m be liɛ’n, be kwlá yaciman ninnge nga be kun be srɛ’n annzɛ be bubu be sa sin’n be akunndan bulɛ. Wie mun ekun be kwlá traman be awlɛn ninnge kɛ bla nin bian kunndɛlɛ sukusuku nin nzan nɔnlɛ ngboko’n nin drɔgi nɔnlɛ sa’n be nun.

Sɛ e nianman akunndan nga e bu’n, nin ninnge nga e ɲin o be sin’n, ɔ nin ninnge nga e yo be’n be su kpa’n, e kwla wun e ɲrun. Sanngɛ e kwla yo like kun naan i sɔ sa’n w’a juman e su. Like sɔ’n yɛle e wun su nianlɛ’n. Kɛ ɔ ko yo naan y’a kwla yo i sɔ’n, maan e fa e ɲin e sie i kosan nsan nga’m be su. ?Kɛ be se kɛ sran kun niɛn i wun su’n, i bo’n yɛle benin? ?Ngue ti yɛ nzuɛn sɔ’n ti cinnjin-ɔn? ?Wafa sɛ yɛ e kwla yi nzuɛn sɔ m’ɔ o ‘nzuɛn nga Ɲanmiɛn wawɛ maan klɔ sran yi i nglo’n’ nun’n, i nglo-ɔ? (Gal. 5:22, 23) I sin’n é wá kán like nga e kwla yo naan y’a si e wun su nian blɛ wie nun’n, i ndɛ.

Sran ng’ɔ niɛn i wun su’n, ɔ tɔtɔman ninnge’m be su yoman be sa. Ɔ miɛn i ɲin naan w’a kanman ndɛ wie annzɛ w’a yoman like wie m’ɔ su yoman Ɲanmiɛn i fɛ-ɔ.

Be wun su nianlɛ nun’n, Zezi kle e ajalɛ kpa. Biblu’n se kɛ: “Kɛ be kpɛli i nzowa’n, w’a kpɛman be wie. Kɛ bé klé i ɲrɛnnɛn’n, w’a seman kɛ ɔ́ wá klé be wie. Sanngɛ ɔ fɛli i wun wlali Sran ng’ɔ di jɔlɛ nanwlɛ su’n i sa nun.” (1 Piɛ. 2:23) I nun m’ɔ o waka’n su mɔ i kpɔfuɛ’m bé yó i finfin’n, ɔ trɛli i awlɛn. (Mat. 27:39-44) Asa ekun’n, kɛ Zifu’m be Ɲanmiɛn sulɛ wafawafa’m be su kpɛnngbɛn’m be kunndɛli kɛ bé jrán ndɛ ng’ɔ kan’n su bé trɛ́ i’n, blɛ sɔ’n nun’n ɔ sili i wun su nian. (Mat. 22:15-22) Asa ekun’n, kɛ Zifu wie’m be fali ya mɔ be totoli i wun yɔbuɛ’n, ɔ sili i wun su nian wie. Like nga be yoli i’n, w’a yiman w’a manman be. Sanngɛ “Zezi fiali, kpɛkun ɔ fin Ɲanmiɛn i sua’n nun fiteli.”​—Zan 8:57-59.

?E kwla nian Zezi i ajalɛ’n su? E kwla se kɛ ɛɛn. Akoto Piɛli seli kɛ: “Klisi bɔbɔ wunnin ɲrɛnnɛn. Ɔ kleli amun atin naan an nian su be nanti sɛsɛsɛ.” (1 Piɛ. 2:21) Kannzɛ fɔ o e nun’n, sanngɛ e kwla nian Zezi i ajalɛ’n su. Yɛle kɛ e kwla si e wun su nian. ?Ngue ti yɛ ɔ ti cinnjin kɛ e yi nzuɛn sɔ’n i nglo-ɔ?

Sɛ e kunndɛ kɛ Zoova i klun jɔ e wun’n, ɔ fata kɛ e nian e wun su. Kannzɛ e su Zoova w’a cɛ’n, sanngɛ sɛ e nianman ndɛ nga e kan’n annzɛ ninnge nga e yo be’n be su’n, ɔ cɛman naan e nin i e afiɛn w’a saci.

Maan e fa e ɲin e sie i Moizi su. Ɲanmiɛn Ndɛ’n se kɛ ɔ “ti sran kun b’ɔ ti wun ase kanfuɛ dan, asiɛ nga su wa sran fi to-mɛn i wun ase kanlɛ’n nun.” (Kal. 12:3) Ɔ trɛli i awlɛn Izraɛlifuɛ’m be wun afuɛ kpanngban. Sanngɛ cɛn kun’n, w’a kwlá niɛnmɛn i wun su. Kɛ nzue ti’n Izraɛlifuɛ’m be plɛnnin i su’n ɔ fali ya kpɛkun ɔ ijɔli be. Ɔ seli kɛ: “Amun sie amun su, nyin keklefuɛ mun! ?E kwla yo maan nzue fin yɛbuɛ nga nun fíte man amun?”​—Kal. 20:2-11.

Cɛn sɔ’n nun’n, Moizi w’a kwlá niɛnmɛn i wun su. Yɛle kɛ w’a seman kɛ Zoova ti yɛ maan be ɲannin nzue’n niɔn. (Jue. 106:32, 33) I sɔ’n ti’n, Zoova w’a kplinman su kɛ ɔ wlu mɛn ng’ɔ seli kɛ ɔ́ fá mán be’n i nun wie. (Kal. 20:12) E kwla se kɛ lele nin i kɛ Moizi fá wú’n, like ng’ɔ yoli’n ɔ yoli i nsisɔ.​—Mml. 3:23-27.

?Ngue yɛ ndɛ sɔ’n kle e-ɔ? Kannzɛ bɔbɔ e su Zoova w’a cɛ’n, sanngɛ sɛ sran wie be e awlɛn’n, ɔ fataman kɛ e kan ndɛ ya su e kle i. Annzɛ kusu sɛ ɔ fata kɛ e tu sran kun i fɔ’n, sanngɛ maan e kan ndɛ aɲinyiɛ su e kle i. (Efɛ. 4:32; Kol. 3:12) Nanwlɛ, e si kɛ kɛ é yó kpɛnngbɛn é kɔ́’n, ɔ ju wie’n e awlɛn tralɛ kwla yo kekle. Sanngɛ nán e wla fi Moizi i ndɛ’n su. Yɛle kɛ e kunndɛman kɛ e nin Zoova e afiɛn saci, afin y’a kwlá nianman e wun su. ?Sanngɛ wafa sɛ yɛ e kwla yi nzuɛn sɔ’n i nglo-ɔ?

Maan e srɛ Ɲanmiɛn naan ɔ fɛ i wawɛ’n man e. ?Ngue ti-ɔ? Afin be wun su nianlɛ’n, ɔ o nzuɛn nga Ɲanmiɛn wawɛ maan klɔ sran yi i nglo’n i nun wie. Asa ekun’n, Zoova fɛ i wawɛ’n man be nga be srɛ i’n. (Lik. 11:13) Zoova kwla fɛ i wawɛ’n uka e naan y’a kwla nian e wun su. (Fp. 4:13) Kpɛkun ɔ kwla fɛ i wawɛ’n uka e naan y’a yi nzuɛn uflɛ wie mun ekun be nglo. Nzuɛn sɔ’n be nun kun yɛle klolɛ’n. Sɛ e yi klolɛ’n i nglo’n, e wun su nianlɛ’n yó pɔpɔ.​—1 Kor. 13:5.

Maan e kpalo ninnge nga be kwla yo naan y’a kwlá nianman e wun su’n. I wie yɛle kɛ nán e wɔ ɛntɛnɛti i lika nga be yo sa tɛtɛ lɔ’n be su. Yɛ nán e fa ninnge nga be fa e ɲin be sie i ayeliɛ tɛtɛ’m be su’n, e yiyi e ɲin su. (Efɛ. 5:3, 4) Maan  e kpɛ i kpo e se kɛ e kpalo ninnge kwlaa nga be kwla yo naan e konvi sɔ like ng’ɔ ti tɛ’n i yolɛ’n. (Nya. 22:3; 1 Kor. 6:12) I wie yɛle kɛ sɛ sran kun si kɛ bla nin bian kunndɛlɛ sukusuku’n kekle i yalɛ’n, ɔ fataman kɛ ɔ kanngan fluwa nga be kan bla nin bian ndɛ nun’n i nun. Kpɛkun ɔ fataman kɛ ɔ nian flimun nga be kɛn i sɔ ndɛ nun’n.

Atrɛkpa’n afɔtuɛ sɔ’n i su nantilɛ kwla yo kekle. Sanngɛ sɛ e mian e ɲin’n, Zoova mán e wunmiɛn naan y’a kwla nian e wun su. (2 Piɛ. 1:5-8) I liɛ’n, é nían akunndan nga é bú’n, nin ndɛ nga é kán’n, ɔ nin ninnge nga é yó be’n, be su kpa. I sɔ yɛ Pɔlu nin Maako mɔ e kannin be ndɛ’n be yoli-ɔ. Yɛle kɛ be wa sili be wun su nian. Aniaan bian kun liɛ’n kɛ ɔ́ císan loto nun’n ɔ nin wiengu’m be ta ndɛ kan. ?Ngue yɛ ɔ yoli naan w’a kwla si i wun su nian-ɔn? Ɔ seli kɛ: “N srɛli Ɲanmiɛn tankaan kpa cɛn kwlaa. Yɛ n suannin be wun su nianlɛ’n i su like e fluwa’m be nun. Kpɛkun n fali Biblu’n nun ndɛ mma nga be kwla uka min’n n sieli min klun. Kannzɛ n yo sɔ w’a di afuɛ kpanngban’n sanngɛ cɛn kwlakwla n kpɛn min wun wla kɛ sa kwlaa nun’n ɔ fata kɛ n gua min wla ase. Ɔ maan sɛ min waan ń kɔ́ lika’n, n tu min wun bo awlo lɔ ndɛ nun. I liɛ’n n kpliman.”

Blɛ wie nun’n, kɛ ɔ ko yo naan y’a nian e wun su’n ɔ kwla yo kekle. Kɛ i sɔ sa’n ju’n, Zoova i srɛlɛ’n kwla kun e ɲannzuɛn. Sanngɛ blɛ sɔ’n nun yɛ ɔ fata kɛ e mian e ɲin e srɛ Zoova kɛ ɔ uka e-ɔ. Ɔ maan kɛ i sɔ sa’n ju’n, ɔ fata kɛ e ka lɛ e srɛ i. Maan e srɛ i kɛ ɔ yaci e sa tɛ’n cɛ e, yɛ ɔ uka. Kpɛkun e fua kpa kɛ e su yoman like kunngba sɔ’n kun. (Jue. 51:11-13) Sɛ e srɛ Zoova kɛ ɔ si e aunnvuɛ’n, ɔ́ tɛ́ e srɛlɛ’n su. (Jue. 102:18) Akoto Zan kpɛn e wla kɛ Ɲanmiɛn i Wa’n “nunnun e sa tɛ’n kwlaa.” (1 Zan 1:7; 2:1; Jue. 86:5) Nán e wla fi su kɛ Zoova se i sufuɛ’m be kɛ be yaci sa cɛ kpɛ sunman. Ɔ maan e kwla lafi su kɛ ɔ́ yó like kunngba’n e lika wie.​—Mat. 18:21, 22; Kol. 3:13.

Kɛ Moizi w’a simɛn i wun su nian awɛ flɛnnɛn nun lɔ’n, i sɔ’n w’a yoman Zoova i fɛ. Ɔ nin i sɔ ngba’n, Zoova yacili i wun sa’n cɛli i. Ɲanmiɛn Ndɛ’n kannin Moizi i ndɛ seli kɛ ɔ suli Ɲanmiɛn lele guɛli i ti nin i bo naan ɔ fata kɛ e niɛn i ajalɛ’n su. (Mml. 34:10; Ebr. 11:24-28) Zoova w’a kplinman su kɛ Moizi wlu mɛn ng’ɔ seli kɛ ɔ́ fá mán be’n i nun wie. Sanngɛ Zoova wá cɛ́n i naan ɔ tran mɛn klanman’n nun asiɛ’n su wa. E kusu sɛ e mian e ɲin kpa naan e si e wun su nian’n, e kwla lafi su kɛ é ɲán nguan m’ɔ leman awieliɛ’n.​—1 Kor. 9:25.