E si kɛ, kɛ be yoli Zezi i batɛmun afuɛ 29 nun’n yɛ ɔ kacili Ɲanmiɛn ɲrun jranfuɛ dan-ɔn. ?Ngue yɛ ɔ kle sɔ-ɔ? Kɛ be yoli Zezi i batɛmun’n, i sɔ’n kle kɛ i klun klo su’n sɛ é kwlá sé’n ɔ fɛli i wun sieli i tɛ yiwlɛ’n su naan be fɛ i yi tɛ. Tɛ yiwlɛ sɔ’n yɛle Ɲanmiɛn i ‘klun sa’n.’ (Gal. 1:4; Ebr. 10:5-10) Laa’n, tɛ yiwlɛ’n ti Ɲanmiɛn i sua’n i lika cinnjin kpa kun. I sɔ’n ti’n, e kwla se kɛ kɛ be yoli Zezi i batɛmun’n yɛ be kplannin Ɲanmiɛn i sua kpakpafuɛ ng’ɔ o nglo lɔ’n niɔn. Ɲanmiɛn i sua sɔ’n yɛle ajalɛ kwlaa nga Ɲanmiɛn jran Zezi i tɛ ng’ɔ yili’n su fali be naan y’a kwla su i kɛ ng’ɔ nin i fata’n sa’n.—Mat. 3:16, 17; Ebr. 5:4-6.

Kɛ be kplannin Ɲanmiɛn i sua kpakpafuɛ sɔ’n kusu’n, ɔ fata kɛ Ɲanmiɛn ɲrun jranfuɛ dan kun di nun junman. Ɔ maan Zoova ‘fɛli i wawɛ’n mannin [Zezi], yɛ ɔ mɛnnin i tinmin’ naan ɔ yo Ɲanmiɛn ɲrun jranfuɛ dan sɔ’n. (Yol. 10:37, 38; Mar. 1:9-11) ?Sanngɛ ngue yɛ ɔ kle kɛ be sieli Zezi Ɲanmiɛn ɲrun jranfuɛ dan ka naan w’a wu naan i sin’n b’a cɛn i-ɔ? Sɛ e waan é tɛ́ kosan sɔ’n su’n, maan e fa e ɲin e sie i Aarɔn nin be nga be yoli Ɲanmiɛn ɲrun jranfuɛ dan wie’n be su.

Mmla nga Zoova fa mannin Moizi’n se kɛ Ɲanmiɛn ɲrun jranfuɛ dan’n i ngunmin cɛ yɛ ɔ kwla wlu tannin sua’n i sua ba ngunmin kun m’ɔ ti Ɲanmiɛn liɛ klonglo’n i nun-ɔn. I sin’n kɛ be kplannin Ɲanmiɛn i sua’n, mmla’n se kɛ Ɲanmiɛn ɲrun jranfuɛ dan’n i ngunmin cɛ yɛ ɔ kwla wlu sua sɔ’n i sua ba ngunmin kun m’ɔ ti Ɲanmiɛn liɛ klonglo’n i nun-ɔn. Be fali tannin dan kun be jali Sua ba m’ɔ ti Ɲanmiɛn liɛ klonglo’n nin Sua ba ngunmin kun m’ɔ ti Ɲanmiɛn liɛ klonglo’n be afiɛn. Sa tɛ’n i ti srɛlɛ cɛn dan’n nun ngunmin cɛ yɛ Ɲanmiɛn ɲrun jranfuɛ dan’n ɔ wlu Sua ba sɔ’n i nun-ɔn. (Ebr. 9:1-3, 6, 7) Kusu be dun mmua sieli Aarɔn nin be nga be sinnin i ja nun’n be Ɲanmiɛn ɲrun jranfuɛ dan ka naan b’a wlu Sua ba sɔ’n nun. I wafa kunngba’n ɔ fata kɛ be sie Zezi Ɲanmiɛn ɲrun jranfuɛ dan ka naan w’a wu. I liɛ’n ɔ́ kwlá “sin tannin m’ɔ kpɛ Ɲanmiɛn i sua’n nun’n m’ɔ yɛle i wunnɛn’n i sin lɔ.” (Ebr. 10:20) I sɔ’n ti yɛ kɛ akoto Pɔlu kán Zezi i ndɛ’n, ɔ seli kɛ ɔ ti ‘Ɲanmiɛn ɲrun jranfuɛ dan’n’ niɔn. Asa ekun’n, ɔ seli kɛ “ɔ wluli tannin sua kun nun. Tannin sua sɔ’n ti dan, ɔ ti kpa tra tannin sua onga mun.” Tannin sua sɔ’n “nán sran yɛ ɔ kplannin-ɔn.” Kpɛkun ɔ seli kɛ “ɲanmiɛn su lɔ yɛ ɔ ɔli-ɔ.”—Ebr. 9:11, 24.

Blɛ nga be trali aenguɛ uflɛ’n, ɔ nin blɛ nga be boli i su dilɛ bo’n be ti kun. ?Ngue ti-ɔ? Kɛ ɔ ko yo naan b’a kwla tra aenguɛ uflɛ’n, ɔ fata kɛ Zezi yo ninnge nsan. Be nun klikli ng’ɔ dun mmua yoli’n yɛle kɛ kɛ ɔli ɲanmiɛn su’n ɔ fali e ti tɛ m’ɔ yili’n kleli Ɲanmiɛn. Asa ekun’n, ɔ fata kɛ ɔ yo ninnge nsan kunngba sɔ mun naan b’a bo aenguɛ uflɛ’n i su dilɛ bo. ?Ninnge sɔ mun yɛle benin?

Like klikli’n, ɔ fata kɛ Zezi wɔ Zoova ɲrun. I sin’n, ɔ fata kɛ ɔ fa tɛ ng’ɔ yili’n kle Zoova. Kpɛkun i kasiɛn su’n, ɔ fata kɛ Zoova sɔ tɛ sɔ’n nun klanman. Sɛ ninnge nsan sɔ’m be ti w’a yiaman’n, be kwlá diman aenguɛ uflɛ’n su.

Biblu’n w’a kanman blɛ trele nga i nun yɛ Zoova sɔli tɛ nga Zezi yili’n nun’n, i ndɛ. Ɔ maan e kwlá kleman blɛ trele nga be trali aenguɛ uflɛ’n mɔ be boli i su dilɛ bo’n. Sanngɛ e si kɛ kɛ ɔ ka cɛn ba 10 bé dí Pantekɔtu’n yɛ Zezi ɔli ɲanmiɛn su-ɔ. (Yol. 1:3) Ɔ maan e kwla se kɛ blɛ kpe kan sɔ’n nun yɛ ɔ fali tɛ ng’ɔ yili’n kleli Zoova-ɔ. Kɛ ɔ yoli sɔ’n Zoova sɔli nun. (Ebr. 9:12) Sa ng’ɔ juli afuɛ 33 nun Pantekɔtu nun’n kle weiin kɛ cɛn sɔ’n nun yɛ be trali aenguɛ uflɛ’n niɔn. (Yol. 2:1-4, 32, 33) Ɔ maan e kwla se kɛ blɛ sɔ’n nun yɛ be trali aenguɛ uflɛ’n niɔn. Kpɛkun blɛ kunngba sɔ’n nun yɛ be boli i su dilɛ bo-ɔ.

Sɛ e waan é bó i kpɔlɛ’n, é sé kɛ kɛ Zoova sɔli Zezi i tɛ ng’ɔ yili nun’n yɛ ɔ nin be nga kpali be sieli be ngunmin’n be trali aenguɛ uflɛ’n niɔn. Asa ekun’n, Zezi m’ɔ ti Ɲanmiɛn ɲrun jranfuɛ dan mɔ i kunngba’n ɔ ti aenguɛ uflɛ’n i nun jranfuɛ’n ti yɛ be boli i su dilɛ bo-ɔ.—Ebr. 7:25; 8:1-3, 6; 9:13-15.