Be wuli min afuɛ 1954 nun Etazinin lɔ nvle nga be flɛ i kɛ Minesota’n i klɔ kun mɔ be flɛ i kɛ Sɛn Pɔlu’n su. Min si nin min nin be timan aɲanbeunfuɛ kusu be timan yalɛfuɛ. Yɛ e kwlaa e ti Katoliki. Min yɛ n ti ba nnun nga be wuli be’n, be nɲɔn su’n niɔn. Min bakan nun’n, n ɔli Katoliki’m be suklu kun nun. I kpa bɔbɔ’n, n yoli be nga kɛ bé yó asɔnun’n be uka plɛti mun’n, be nun kun. Sanngɛ n siman Biblu’n nun ndɛ kpanngban. N lafi su kɛ Ɲanmiɛn yɛ ɔ yili like kwlaa-ɔ. Sanngɛ n lafiman su kɛ asɔnun Katoliki’n kwla uka min naan m’an su i kpa.

Kɛ n boli jɔlɛ difuɛ’m be suklu’n i dilɛ bo m’ɔ dili afuɛ kun’n, Zoova i Lalofuɛ bian kun nin i yi be bali e awlo lɔ. Kɛ bé bá’n, nn n o lɛ ń kpú ninnge. Ɔ maan be seli min amanniɛn su kɛ sɛ ɔ yo’n be ko ba. Kɛ be sali be sin’n, n usali be kosan nɲɔn. N usali be kɛ: “?Ngue ti yɛ sran tɛtɛ’m be di ye be tra sran kpa mun-ɔn? ?Yɛ ngue yɛ sran kun kwla yo naan w’a di aklunjuɛ-ɔ?” I sin’n, be fali fluwa La vérité qui conduit à la vie éternelle ɔ nin La Bible. Traduction du monde nouveau be mannin min. Biblu’n sɔ’n i ɲin ti ble nɲanɲa. Ɔ maan kɛ a wun i sa cɛ, saan á fá ɔ ɲin síe su. N kplinnin su kɛ be wa kle min Biblu’n nun like. Like nga n suannin’n  ti’n, n wunnin ninnge sunman be wlɛ. Kɛ n wunnin i wlɛ kɛ Ɲanmiɛn i Famiɛn Diwlɛ’n ti awa kun naan ɔ́ wá síe asiɛ’n, i sɔ’n yoli min fɛ kpa. N wunnin i wlɛ ekun kɛ klɔ sran’m be kwlá sieman sran mun kɛ ng’ɔ nin i fata’n sa. Afin siefuɛ sɔ’m be bu sran’m be lufle, yɛ be kle be ɲrɛnnɛn.

Kɛ e wluli afuɛ 1982 nun’n, w’a cɛman n fali min wun mannin Zoova. I sin’n afuɛ kunngba sɔ’n nun’n, be yoli min batɛmun nvle kun aɲia’n nga be flɛ i kɛ “La vérité du Royaume” i bo. E yoli aɲia sɔ’n sua dan kpa kun nun Sɛn Pɔlu lɔ. I lemɔcuɛ ng’ɔ́ sú i su’n, be boli e ta suklu lɔ. Ɔktɔblu anglo’n i bo bolɛ nun’n, be seli min kɛ n ɲɛnnin i naan n kwla di sran’m be ti kplilɛ junman’n siɛn’n.

Nvle kun aɲia sɔ’n i bo lɔ’n, n sili aniaan bian kun mɔ be flɛ i kɛ Maiki Risaasɔnun’n. Ɔ di junman Betɛli ng’ɔ o Bluklinin lɔ’n i nun. Ɔ seli min kɛ siɛn’n aniaan nga be kpli Zoova i Lalofuɛ’m be ti’n, be le be biolo kun Betɛli lɔ. Kɛ ɔ kannin sɔ’n, min wla kpɛnnin Etiopi bian’n i ndɛ ng’ɔ kannin m’ɔ o Sa Nga Be Yoli’n 8:36 nun’n, i su. Kpɛkun n usali min wun kɛ: ‘?Ngue ti yɛ n ko diman junman biolo sɔ’n nun wie-ɔ?’ Ɔ maan n klɛklɛli fluwa nga be nga be waan bé kó dí junman Betɛli lɔ’n be klɛklɛ su’n i su kpɛkun n fa ɔli.

Kɛ n kacili Zoova i Lalofuɛ’n, w’a yoman min si nin min nin be fɛ. Min si usali min sɛ junman nga ń kó dí i Betɛli lɔ’n kwla yo maan n ɲan sran’m be ti kplilɛ junman’n i su ye-o. N seli i kɛ min klun klo su yɛ min waan ń kó dí junman Betɛli lɔ-ɔ. Asa ekun’n, n seli i kɛ Betɛli lɔ’n bé mán min sika kan naan n fa nian min wun lika.

Kɛ mɔ n dun mmua boli sran’m be ti kplilɛ junman’n i dilɛ bo lika kun nun ti’n, m’an kaman lɛ m’an ɔman Betɛli. Ɔ maan afuɛ 1984 nun yɛ n boli Betɛli ng’ɔ o Bluklinin lɔ’n i nun junman dilɛ bo-ɔ. Kɛ n juli Betɛli lɔ’n, be seli min kɛ n ko di junman Zoova i Lalofuɛ’m be ti kplilɛ biolo’n nun. Sa nga be wa juli’n be ti’n, n wunnin i wlɛ kɛ kɛ n dun mmua n dili sran’m be ti kplilɛ junman’n ka naan m’an wɔ Betɛli’n, i sɔ’n yoli kpa dan.

Sua dan nga be flɛ i kɛ Sitanle’n, ɔ o klɔ nga be flɛ i kɛ Jɛɛze Siti’n su. Jɛɛze Siti’n ti nvle nga be flɛ i kɛ Niu Jɛɛze’n i klɔ kun. Afuɛ 1983 Novanblu nun yɛ Zoova i Lalofuɛ’m be toli sua sɔ’n niɔn. Aniaan’m be ko wunnin awa’n i janunfuɛ’m be wun naan be man be atin naan be siesie sua’n i nun kolan nin nzue sinwlɛ’m be ye. Kɛ aniaan’m be ko wunnin be wun’n, be seli be kɛ be kunndɛ kɛ bé fá sua sɔ’n bé yó be aɲia dandan mun. Sanngɛ ndɛ kun o lɛ. Yɛle kɛ Jɛɛze Siti klɔ’n i su mmla kun se kɛ lika nga sran’m be yia be su Ɲanmiɛn lɛ’n, ɔ fata kɛ be kplɛn i kan sran’m be tran lɛ’n ngunmin. Kusu nn sua dan nga be flɛ i kɛ Sitanle’n, ɔ o kan sran’m be di junman nin aata lɛ’n. Ɔ maan  awa’n i janunfuɛ’m b’a manman aniaan’m be atin. I sin’n, aniaan’m be ko wunnin be wun ekun. Sanngɛ ngbɛn-ɔn.

Lemɔcuɛ klikli nga n dili i Betɛli lɔ’n i nun’n, anuannzɛ’n fali ndɛ sɔ’n ɔli jɔlɛ difuɛ’m be ja su. Kɛ mɔ n dili sran’m be ti kplilɛ junman’n Sɛn Pɔlu m’ɔ o Minesota’n lɔ afuɛ nɲɔn ti’n, n si like ng’ɔ fata kɛ be yo i blɛ sɔ’n nun’n. Be nga be kpli e ti wie’n, be nun kun seli kɛ laa’n be yoli ninnge wie mun Sitanle sua sɔ’n nun. I wie yɛle kɛ sran’m be ko niannin flimun lɔ yɛ jue tofuɛ wie’m be ko toli jue lɔ. ?Ɔ maan sɛ be yoli ninnge sɔ’m be lɔ’n, nn ngue ti yɛ be waan be kplinman su kɛ e yo aɲia lɔ-ɔ? Jɔlɛ difuɛ’m be fali be ɲin be sieli i sa sɔ’n su kpa yɛ be wunnin i wlɛ kɛ, kɛ awa’n i janunfuɛ nga be o Jɛɛze Siti lɔ’n be waan be manman e atin kɛ e yo e aɲia mun sua sɔ’n nun’n, i lɛ nun’n b’a diman e ndɛ’n i kpa. I sɔ’n ti’n, jɔlɛ difuɛ’m be seli awa’n i janunfuɛ sɔ’m be kɛ be man e atin. Kɛ ɔ fɛ i lɛ’n, wafa nga anuannzɛ’n sin jɔlɛ difuɛ’m be lika yo maan Zoova i junman’n kɔ i ɲrun’n mɔ Zoova yra su’n, n ma wunnin i kpa. Ɔ maan kɛ n o be nga be di i junman’n be nun wie’n, n si’a wie se.

Aniaan’m be wa wlali be wun ase kpa be siesieli sua’n i ye. Ɔ maan afuɛ 1985 Sɛptanblu i le 8 su’n, be kwla yoli aniaan nga be trannin Galaadi suklu’n i kpɛ 79 su’n i bo’n be aɲia sua sɔ’n nun. Kɛ aniaan’m be boli sua’n i ye siesielɛ bo’n, w’a diman afuɛ kun yɛ be yoli aɲia sɔ’n niɔn. Kɛ n o aniaan nga be kpli Zoova i sufuɛ’m be ti’n be nun’n, i sɔ’n yo min fɛ dan. Sran’m be ti kplilɛ junman nga n dili ka naan m’an wɔ Betɛli’n, w’a manman min aklunjuɛ kɛ Betɛli liɛ’n sa. N siman kɛ Zoova wá fá min dí junman uflɛ wie mun ekun bɔbɔ.

Afuɛ 1980 nin 1990 be afiɛn’n nun’n, sɛ Zoova i Lalofuɛ kun waan i ayre yolɛ nun’n nán be mɛn i mmoja’n, blɛ sunman’n dɔɔtrɔ’m be diman ndɛ ng’ɔ kan’n su. Asa’n, jɔlɛ difuɛ’m be kplinman su kɛ bla nga b’a wunnzɛ’n be se kɛ nán be man be mmoja. Like ti’n yɛle kɛ be waan sɛ b’a manman wunnzɛfuɛ’n i mmoja’n, ɔ kwla wu. Kpɛkun ba’n ká aika.

Afuɛ 1988 Desanblu i le 29 su’n, aniaan bla Denizi Nikolo wuli ba yasua kun. Kɛ ɔ wuli ba wieli’n, mmoja tuli i dan. I sɔ’n ti’n, dɔɔtrɔ’m be waan bé wlɛ́ i nun mmoja. Aniaan bla Nikolo w’a kplinman su. Kɛ lika cɛnnin’n, dɔɔtrɔ’m be ko wunnin jɔlɛ difuɛ kun wun naan ɔ man be atin naan be wla aniaan bla’n i nun mmoja. Jɔlɛ difuɛ sɔ’n mannin be atin. Kusu nn w’a usaman aniaan bla Nikolo nin i wun’n be sa. I kpa bɔbɔ’n, w’a kan kleman be kɛ ɔ mannin dɔɔtrɔ’m be atin kɛ be man aniaan bla’n i mmoja.

Ya cɛn m’ɔ ti Desanblu i le 30 su’n, dɔɔtrɔ’m be wlali aniaan bla’n i nun mmoja. Kusu nn i wun’n nin be osufuɛ wie mɔ be o aniaan bla’n i wun lɛ’n be seli be kɛ nán be yo sɔ. I nnɔsua nun’n, polisie’m be wa trali aniaan bla’n i osufuɛ wie mun nin asɔnun kpɛnngbɛn kun annzɛ nɲɔn ɔli.  Be waan kɛ dɔɔtrɔ’m be ɔli aniaan bla’n i nun mmoja wlalɛ’n, be tanndannin be ɲrun. Fue cɛn nglɛmun m’ɔ ti Desanblu i le 31 su’n, be kannin be tralɛ sɔ’n i ndɛ Niyɔki lɔ zronali nin televiziɔn nin aladio’m be nun. Kpɛkun be kannin be ndɛ klɔ nga be mantan Niyɔki lɛ’n be su wie.

Kisie cɛn nglɛmun’n, e nin jɔlɛ difuɛ dandan’m be nun kun m’ɔ suan Miltɔnun Molɛnin’n e kokoli yalɛ. N yiyili ndɛ’n nun n kleli i kpɛkun n seli i kɛ jɔlɛ difuɛ ng’ɔ mannin atin kɛ be man aniaan bla’n i mmoja’n, w’a faman blɛ w’a tieman like nga ti yɛ e kloman kɛ be man e mmoja’n. Kɛ ɔ yoli sɔ’n, Molɛnin seli min kɛ nnɔsua wia nun’n n blɛ i biolo lɔ naan e koko ndɛ sɔ’n i su yalɛ kpa ekun naan e wun mmla nga be nin sa sɔ’n be kɔ likawlɛ’n. E nin aniaan bian Blimle m’ɔ nian e junman’n su Betɛli lɔ’n yɛ e ɔli jɔlɛ difuɛ Molɛnin i biolo lɔ nnɔsua nun-ɔn. Jɔlɛ difuɛ’n yiali bian ng’ɔ kpli dɔɔtrɔ’n i ti’n wie. E yalɛ kokolɛ’n kpili kpa. I sɔ’n ti’n, aniaan bian Blimle klɛli ndɛ kun i tablɛti’n su fa kleli min. Ɔ seli min kɛ: “Gua ɔ wla ase kan.” Aniaan bian’n i afɔtuɛ sɔ’n yoli min ye. Afin kɛ mɔ ndɛ’n yo min ya dan’n ti’n, kɛ ɔ ko yo naan bian ng’ɔ kpli dɔɔtrɔ’n i ti’n w’a wun i wlɛ kɛ i ndɛ yoman fɛ’n, n kpaloli ndɛ kwlaa ng’ɔ kannin’n.

Kɛ e dili dɔ kun’n, jɔlɛ difuɛ Molɛnin seli kɛ sɛ aliɛ cɛn’n, bé dún mmua kán e ndɛ liɛ’n kwlaa naan b’a kan ndɛ uflɛ. Kɛ é fín i biolo’n nun é fíte’n, ɔ seli bian ng’ɔ kpli dɔɔtrɔ’n i ti’n kɛ: “Ainman’n junman dan kpa kun o amun kɔmin su.” Ndɛ sɔ’n kle kɛ ɔ fata kɛ bian’n kan like nga ti yɛ be wlali aniaan bla Nikolo i nun mmoja kekle nun’n. Kɛ ɔ yoli sɔ’n, ɔ yoli min kɛ Zoova bɔbɔ yɛ ɔ su gua min awlɛn su nzue sa-ɔ. Afin n si kɛ sɛ lika cɛn’n, bé dí e ndɛ’n i kpa. Nanwlɛ, kɛ n bu wafa nga Zoova sinnin min lika yoli maan i klun sa’n kpɛnnin su’n i akunndan’n, n si’a wie se.

Kɛ ɔ ko yo naan y’a wun wafa nga e ko kan ndɛ’n, e dili junman lele kɔnguɛ afiɛn. Kɛ mɔ lika nga be di jɔlɛ lɔ’n nin Betɛli nunman mmua’n ti’n, aniaan nga e nin be di junman biolo kunngba’n nun’n be nun sunman be nanti ɔli lɔ. Kɛ jɔlɛ difuɛ nnan’m be tieli ndɛ nga e kannin’n, be seli kɛ be wunman like nga ti yɛ be mannin atin kɛ be wla aniaan bla’n i nun mmoja’n. Ɔ maan jɔlɛ difuɛ dandan’m be seli kɛ aniaan bla Nikolo i ndɛ yo fɛ. I sɔ’n ti’n be kpɛli mmla kun kɛ sɛ be waan bé yó sran kun i ayre’n, ɔ fata kɛ be dun mmua be tie i nuan ndɛ ka. Sɛ b’a yoman sɔ naan be ko fa fluwa jɔlɛ difuɛ’m be sa nun naan be jran su be yo i ayre’n, be kwla ɲan ndɛ.

I sin’n, jɔlɛ difuɛ dandan nga be o Niyɔki lɔ’n be seli kɛ aniaan bla Nikolo le atin se kɛ nán be mɛn i mmoja. Mmoja ndɛ ti’n, e ɔli jɔlɛ difuɛ’m be ja su  kpɛ nnan. Sanngɛ kpɛ klikli nga bé bú e ndɛ klanman mmoja ndɛ’n nun’n, yɛ ɔ o lɛ-ɔ. (An nian kuku nga be flɛ i kɛ “ Ndɛ wie mɔ be nun’n jɔlɛ difuɛ dandan’m be jrannin e sin’n” i nun.) Asa ekun’n, ndɛ uflɛ wie’m be ti’n e nin aniaan wie mun e ɔli jɔlɛ difuɛ’m be ja su ekun. I wie yɛle kɛ kɛ siɛ nin niɛn’m be tranman likawlɛ kun’n sran ng’ɔ fata kɛ ba’m be kɛ i sa nun’n ɔ nin be nga be waan bé yrá’n be su ndɛ liɛ’n. Asa ekun’n, like ng’ɔ fata kɛ be fa sua kun annzɛ asiɛ kun be yo’n be su ndɛ liɛ’n.

Kpɛ klikli nga ń wún Denizi’n, nn ɔ nin i wun b’a yra yɛ i kunngba ta ba nsan. Ɔ di junman kan kpɛkun ɔ ti atin bofuɛ. Nanwlɛ aniaan bla’n wunnin i ɲrun dan, sanngɛ ɔ nin i sɔ’n ngba’n ɔ miɛn i ɲin su Zoova kpa titi. Kɛ n wunnin i sɔ’n, ɔ boli min nuan dan. Afuɛ 1992 nun’n, e trannin nvle kun aɲia nga be flɛ i kɛ “Porteurs de lumière” i bo. Blɛ sɔ’n nun yɛ n seli i kɛ n kunndɛ kɛ e nian e wiengu nzuɛn’n niɔn. I afuɛ nuan ng’ɔ́ yía’n yɛ e jali-ɔ. Nanwlɛ, bla nga Zoova mannin min’n ti kpa dan. Afin ɔ fa Zoova sulɛ’n sie i like kwlaa ɲrun. Kpɛkun ɔ ti aɲinsuɛfuɛ. Blɛ nga e nin Denizi e trannin’n yoli min ye dan.—Nya. 31:12.

Kɛ é já’n, nn i mma’m be le afuɛ 11 nin 13 nin 16. Kɛ mɔ min waan ń yó siɛ kpa’n ti’n, n miannin min ɲin n kanngannin e fluwa’m be nun kpɛkun n nantili like kwlaa nga n suannin’n su naan m’an kwla uka be. W’a yoman pɔpɔ sanngɛ kɛ n wun kɛ ba’m be fa min kɛ be si sa mɔ be lafi min su kɛ be janvuɛ kpa wie sa’n, i sɔ’n yo min fɛ dan. Kɛ e mma’m be janvuɛ’m be ba awlo lɛ’n, e sɔ be nun klanman titi. Kɛ be kwlaa be o e wun lɛ’n, i sɔ’n yo e fɛ.

Afuɛ 2013 nun’n, e nin Denizi e tu ko trannin Wisikɔnsi lɔ. Afin e kunndɛ kɛ é nían min si ɔ nin Denizi i si nin i nin mɔ b’a yo oke’n be lika. Like ng’ɔ boli min nuan’n yɛle kɛ anuannzɛ’n w’a seman min kɛ n jran junman nga n di i Betɛli lɔ’n. Be seli min kɛ junman nga n di i laa’n, n kwla di i klɔ sɔ’n su lɔ wie.

Afuɛ 2018 Sɛptanblu nun’n, n sieli i nzɔliɛ kɛ n kpu min konviabo tikatika. Dɔɔtrɔ’n niannin min sanngɛ w’a wunman like ng’ɔ kle min yalɛ’n. I sin’n, dɔɔtrɔ uflɛ seli min kɛ n ko wun dɔɔtrɔ kun m’ɔ di be ndin’m be su junman’n i wun. Afuɛ 2019 Zanvie nun’n, dɔɔtrɔ sɔ’n seli min kɛ n le tukpacɛ tɛ kpa kun naan kɛ ɔ́ wá kɔ́ i ɲrun’n, ɔ́ wá yó tɛtɛ kpa.

I cɛn ba nsan su’n, n ɔli min wun kpinngbinlɛ kan. Kpɛkun n tɔli yɛ min sa kɔmin nun’n buli. Kɛ mɔ min sa w’a tɔ be wun kpinngbinlɛ wafa sɔ’n nun kpa’n ti’n, kɛ n tɔli’n, n wunnin i wlɛ kɛ min ndin’m be diman junman kpa kun kɛ laa’n sa. Wafa nga tukpacɛ’n ɔli i ɲrun ndɛndɛ’n, ɔ boli min nuan. Ɔ yoli maan ijɔlɛ nin min wun kpɛkpɛlɛ nin like mɛnlɛ be wa yoli kekle min sa nun.

Nanwlɛ, sran’m be ti kplilɛ junman nga n dili i Zoova i anuannzɛ’n nun’n, ɔ yoli min fɛ kpa. Asa ekun’n ndɛ nga n klɛli be zronali’m be nun’n, dɔɔtrɔfuɛ mun nin be nga be kpli sran’m be ti’n nin jɔlɛ difuɛ’m be kanngan be nun. Lika sunman nun’n, n yiyili like nga ti yɛ Zoova i Lalofuɛ’m be faman mmoja’n i nun n kleli sran kaka kpa. I kwlaa sɔ’n ti’n, n dili aklunjuɛ dan. Siɛn’n, n kwla kan ndɛ kunngba nga Liki kannin m’ɔ o Liki 17:10 nun’n wie. Yɛle kɛ: ‘N ti junman difuɛ ngbɛn, min nin mo yolɛ fataman. Like ng’ɔ fata kɛ n yo’n, yɛ n yoli-ɔ.’