1. ?Kɛ e se kɛ “ndɛ nanwlɛ’n,” ngue ndɛ yɛ e waan é kán-ɔn?

“?WAFA sɛ yɛ a sili ndɛ nanwlɛ’n niɔn?” “?Ɔ si nin ɔ nin yɛ be kleli wɔ ndɛ nanwlɛ’n niɔn?” “?A si ndɛ nanwlɛ’n i afuɛ nɲɛ yɛ?” Atrɛkpa’n, sran wie w’a usa ɔ sɔ le. Annzɛ ɔ bɔbɔ yɛ a fali kosan sɔ mun usali sran uflɛ-ɔ. ?Sanngɛ kɛ e se kɛ “ndɛ nanwlɛ’n,” ngue ndɛ yɛ e waan é kán-ɔn? Kpɛ sunman’n e waan é kán ninnge nga e lafi be su’n, nin wafa nga e su Ɲanmiɛn’n, ɔ nin wafa nga e di mɛn’n, be ndɛ. Be nga be si “ndɛ nanwlɛ’n” be si like nga Biblu’n kle’n, kpɛkun be nanti Biblu’n nun afɔtuɛ’m be su. I sɔ’n ti’n, be lafiman ato ndɛ nga Ɲanmiɛn sulɛ wafawafa nga be timan su’n be kle’n, be su kun. Yɛ kannzɛ be o Satan i mɛn tɛ nga nun’n, sanngɛ be di aklunjuɛ.—Zan 8:32.

2. ?Kɛ nga Zan 13:34, 35 fa kan’n sa’n, like klikli ng’ɔ kwla yo maan sran kun kwla kunndɛ kɛ ɔ́ sí ndɛ nanwlɛ’n yɛle benin?

² ?Like klikli ng’ɔ kwla yo maan sran kun kwla kunndɛ kɛ ɔ́ sí ndɛ nanwlɛ’n yɛle benin? Atrɛkpa’n, Zoova i sufuɛ’m be ayeliɛ kpa’n niɔn. (1 Piɛ. 2:12) Annzɛ be sran klolɛ’n niɔn. Sran wie’m be liɛ’n kpɛ klikli nga be trannin aɲia kun bo’n, be fali be ɲin be sieli i sran klolɛ sɔ’n su trali ndɛ nga be kɛnnin i cenje’n su lɔ’n. I sɔ’n kusu boman e nuan, afin Zezi seli kɛ like nga bé fá síe i sɔnnzɔnfuɛ’m be nzɔliɛ’n yɛle be wiengu klolɛ’n. (An kanngan Zan 13:34, 35 nun.) Klolɛ mɔ e klo e wun’n, yɛ be fa sie i nzɔliɛ kɛ e ti Zoova i sufuɛ kpa-ɔ. Sanngɛ sɛ e waan é láfi Ɲanmiɛn su kpa trá laa’n, ɔ fata kɛ e yo ninnge uflɛ wie mun ekun.

3. ?Sɛ e Ɲanmiɛn sulafilɛ’n taka klolɛ mɔ e klo e niaan mun’n i ngunmin su’n, ngue sa yɛ ɔ kwla ju-ɔ?

³ Ɔ fataman kɛ e Ɲanmiɛn sulafilɛ’n ɔ taka klolɛ mɔ e klo e niaan mun’n i ngunmin su. ?Ngue ti-ɔ? Afin sɛ e Ɲanmiɛn sulafilɛ’n taka klolɛ sɔ’n i ngunmin su’n, ɔ cɛman naan y’a yaci Ɲanmiɛn su lafilɛ. I wie yɛle kɛ sɛ aniaan wie yo sa tɛ dan wie’n,  i sɔ’n kwla yo maan e yaci Zoova i sulɛ. Aniaan sɔ’n kwla yo asɔnun kpɛnngbɛn annzɛ atin bofuɛ bɔbɔ. Asa ekun’n, sɛ aniaan kun wɔ e safle’n annzɛ kusu sɛ aniaan kun m’ɔ nin Ɲanmiɛn b’a bu’n se kɛ like nga e lafi su’n timan nanwlɛ’n, i sɔ’n kwla yo maan e yaci Zoova i sulɛ wie. I kwlaa sɔ’n ti’n, sɛ e kunndɛ kɛ é láfi Zoova su kpa trá laa’n, ɔ fata kɛ e Ɲanmiɛn sulafilɛ’n taka wafa nga e nin Zoova e afiɛn’n mantan’n i su. I yo, akunndan nga e bu i Zoova nin e niaan’m be su’n ɔ kwla yo maan e lafi Zoova su wie. Sanngɛ ɔ ti cinnjin kpa kɛ e suan Biblu’n nun like kpa yɛ e kunndɛ like nga e suan’n i su ndɛ wie mun ekun e fluwa’m be nun. Sɛ e yo sɔ’n, é wún Biblu’n nun ndɛ’n i wlɛ kpa. Kpɛkun é láfi su kɛ ndɛ ng’ɔ kɛn i Zoova su’n ti nanwlɛ.—Rɔm. 12:2.

4. ?Kɛ nga Matie 13:3-6, 20, 21 fa kan’n sa’n, kɛ sa tɔ sran wie’m be su’n ngue yɛ be yo-ɔ?

⁴ Zezi seli kɛ sran wie’m bé wá sɔ́ ndɛ nanwlɛ’n nun “aklunjuɛ su.” Sanngɛ kɛ sa wá tɔ́ be su’n, be su lafiman Ɲanmiɛn su kun. (An kanngan Matie 13:3-6, 20, 21 nun.) Atrɛkpa’n b’a wunmɛn i wlɛ kɛ sa kwla tɔ be nga be ti Zezi i sɔnnzɔnfuɛ’n be su wie. (Mat. 16:24) Annzɛ kusu be buli i kɛ be nga be su Ɲanmiɛn’n, sa su tɔman be su le naan Ɲanmiɛn yrá be su titi. Sanngɛ mɛn tɛ nga nun’n, saan sa’m bé tɔ́ e su. Ɔ ju wie’n, e su sa’m be kacikaci yɛ i sɔ’n kwla yo maan e su diman aklunjuɛ kɛ laa’n sa kun.—Jue. 6:7; Aku. 9:11.

5. ?Ngue yɛ ɔ kle kɛ e niaan kpanngban kpa be lafi su kɛ be o nanwlɛ’n i atin’n su-ɔ?

⁵ E niaan kpanngban kpa be kle kɛ be lafi su kɛ be o nanwlɛ’n i atin’n su. ?Ngue ti yɛ e se sɔ-ɔ? Afin kannzɛ bɔbɔ aniaan kun yo be like wie naan w’a yoman be fɛ annzɛ kusu ɔ yo sa tɛ dan wie’n, sanngɛ be yaciman Zoova i su lafilɛ. (Jue. 119:165) Ɔ maan blɛ kwlaa nga sa tɔ be su’n, be Ɲanmiɛn sulafilɛ’n kpɔnzɔman sanngɛ ɔ yo dan tra laa’n. (Zak. 1:2-4) ?Ngue yɛ e kwla yo naan y’a lafi Ɲanmiɛn su kɛ be sa wie-ɔ?

6. ?Ngue su yɛ Klisifuɛ klikli’m be Ɲanmiɛn sulafilɛ’n takali-ɔ?

⁶ Klisifuɛ klikli’m be Ɲanmiɛn sulafilɛ’n takali Biblu’n nun ndɛ nga be si i’n, ɔ nin ninnge kwlaa nga Zezi kleli be’n, be su. Ninnge sɔ mun yɛle “ndɛ nanwlɛ m’ɔ o jasin fɛ’n nun’n.” (Gal. 2:5) Ndɛ nanwlɛ sɔ’n yɛle like kwlaa nga Klisifuɛ’m be lafi su’n. I wie yɛle tɛ nga Zezi fɛli i wun yili’n, ɔ nin cɛnlɛ mɔ Ɲanmiɛn cɛnnin i’n be su ndɛ mɔ e si i’n. Akoto Pɔlu lafili su kpa kɛ ndɛ kwlaa sɔ’m be ti nanwlɛ. ?Ngue ti yɛ e se sɔ-ɔ? Afin ɔ fali Ɲanmiɛn Ndɛ’n kleli kɛ “ɔ fata kɛ Klisi’n wun ɲrɛnnɛn naan be cɛn i.” (Yol. 17:2, 3) Klisifuɛ klikli’m be fali ndɛ sɔ’m be su, kpɛkun be lafili su kɛ Ɲanmiɛn wawɛ’n kwla uka be naan b’a wun Ɲanmiɛn Ndɛ’n i wlɛ kpa. Be kunndɛli ndɛ kwlaa sɔ’m be su like kpa naan bé nían sɛ be taka Ɲanmiɛn Ndɛ’n su sakpa-o. (Yol. 17:11, 12; Ebr. 5:14) Klisifuɛ sɔ’m be Ɲanmiɛn sulafilɛ’n takaman wafa nga be wun yo be’n, ɔ nin aklunjuɛ nga kɛ be nin be niaan’m be yia’n be di’n, be ngunmin su. Sanngɛ ɔ takali ‘Ɲanmiɛn m’ɔ be si i kpa tra laa’n’ i su.—Kol. 1:9, 10.

7. ?Sɛ e lafi ndɛ nanwlɛ ng’ɔ o Biblu’n nun’n su’n, ngue yɛ é yó-ɔ?

⁷ Ndɛ nanwlɛ ng’ɔ o Biblu’n nun’n kaciman. (Jue. 119:160) I wie yɛle kɛ, kɛ aniaan kun lo e ngasi’n annzɛ ɔ yo sa tɛ dan wie’n, ndɛ nanwlɛ’n kaciman. Asa ekun’n kɛ sa kekle wie o e su’n, ndɛ nanwlɛ’n kaciman wie. Ɔ maan ɔ fata kɛ e si Biblu’n nun ndɛ’n i kpa naan e lafi su kɛ like ng’ɔ kle’n ti nanwlɛ. E kwla fa e Ɲanmiɛn sulafilɛ’n e sunnzun mmeli’n i blalɛ’n. Sɛ aunmuan’n kpɛ jenvie’n su kekle kpa’n, blalɛ sɔ’n tra mmeli’n i ase. I wafa kunngba’n, sɛ e Ɲanmiɛn sulafilɛ’n taka ndɛ nanwlɛ ng’ɔ o Biblu’n nun’n su’n, blɛ kekle nun’n é jrán kekle. ?Ngue yɛ e kwla yo naan y’a lafi su kɛ e o nanwlɛ’n i atin’n su-ɔ?

8. ?Kɛ nga 2 Timote 3:14, 15 fa kan’n sa’n, ngue yɛ ɔ ukali Timote naan w’a lafi su kɛ ndɛ nga be kleli i’n ti nanwlɛ-ɔ?

⁸ Timote lafili su kɛ like nga be kleli i’n ti nanwlɛ. ?Ngue ti-ɔ? (An kanngan 2 Timote 3:14, 15 nun.) Timote i manmin nin i nannan bla’n yɛ be dun mmua boli i ‘Ɲanmiɛn ndɛ’n’ klelɛ bo-ɔ. Sanngɛ e si kɛ i bɔbɔ fali blɛ suannin Ɲanmiɛn ndɛ sɔ’n i nun like kpa. I sɔ’n ti’n, ɔ “lafili su ” kɛ ɔ ti nanwlɛ. I sin’n, Timote nin i manmin nin i nannan bla’n be wa tili ndɛ nga Klisifuɛ’m be kan’n. E si kpa kɛ klolɛ mɔ Zezi i sɔnnzɔnfuɛ’m be klo be wiengu’n, ɔ yoli Timote i ɲɛnmɛn. Ɔ maan ɔ kunndɛli kpa kɛ ɔ nin be yó ninnge wie mun likawlɛ. Asa ekun’n, ɔ kunndɛli kɛ ɔ́ úka be. (Fp. 2:19, 20) Timote i Ɲanmiɛn sulafilɛ’n takaman sran klolɛ’n i ngunmin su, sanngɛ ɔ takali like nga Biblu’n kle’n su wie. Afin ɔ si kɛ ndɛ kwlaa sɔ’m be ti nanwlɛ. I sɔ’n ti’n, ɔ kunndɛli kɛ ɔ́ káci Ɲanmiɛn i janvuɛ. Ɔ maan e kusu ɔ fata kɛ e suan Biblu’n nun like kpa yɛ e lafi like kwlaa ng’ɔ kle e Zoova su’n i su.

9. ?Like cinnjin nsan benin yɛ ɔ fata kɛ e lafi su-ɔ?

⁹ Kɛ ɔ ko yo naan y’a si kɛ like nga e lafi su’n ti nanwlɛ’n, ɔ fata kɛ e yo ninnge wie mun. Sanngɛ maan e fa e ɲin e sie i be nun nsan su. I klikli’n yɛle kɛ maan e lafi su kɛ Ɲanmiɛn Zoova yɛ ɔ ti like kwlaa Yifuɛ-ɔ. (Tul. 3:14, 15; Ebr. 3:4; Ngl. 4:11) I nɲɔn su’n, ɔ fata kɛ e si ninnge nga be kle weiin kɛ Biblu’n ti Ɲanmiɛn i nuan ndɛ sakpasakpa’n. (2 Tim. 3:16, 17) Yɛ i nsan su’n, ɔ fata kɛ e si kɛ Ɲanmiɛn le i sufuɛ mun asiɛ’n su wa naan be yɛle Zoova i Lalofuɛ mun. Asa ekun’n, ɔ fata kɛ e wun i wlɛ kɛ Klisi yɛ ɔ ti be su kpɛn-ɔn. (Eza. 43:10-12; Zan 14:6; Yol. 15:14) Ɔ timan cinnjin kɛ e si Biblu’n nun ndɛ wunmuan’n naan y’a lafi su kɛ ndɛ sɔ’m be ti nanwlɛ. Like ng’ɔ fata kɛ ɔ yo e cinnjin’n yɛle kɛ maan e fa ‘ngwlɛlɛ nga e si i’n’ e yo naan y’a wun i wlɛ kɛ e o nanwlɛ’n i atin’n su.—Rɔm. 12:1.

10. ?Kɛ e ko si ndɛ nanwlɛ’n, ngue yɛ ɔ fata kɛ e yo i ekun-ɔn?

¹⁰ Kɛ e bɔbɔ e ko wun i wlɛ kɛ Biblu’n nin Ɲanmiɛn ɔ nin i sufuɛ’m be su ndɛ nga e si  be’n be ti nanwlɛ’n, ɔ fata kɛ e fa Ɲanmiɛn Ndɛ’n e uka e wiengu mun naan be kusu be lafi ndɛ sɔ’m be su wie. ?Ngue ti-ɔ? Afin kɛ mɔ e ti Klisi i sɔnnzɔnfuɛ’n ti’n, ɔ fata kɛ e kan ndɛ nanwlɛ mɔ e si i’n i ndɛ e kle be nga be kunndɛ kɛ bé tíe e ndɛ’n. * (1 Tim. 4:16) Kɛ e uka sran mun mɔ be lafi su kɛ like nga Biblu’n kle’n ti nanwlɛ’n, e kusu e lafi ndɛ sɔ’m be su kpa tra laa’n.

11. ?Sran’m be like klelɛ nun’n, ajalɛ benin yɛ Pɔlu kle e-ɔ?

¹¹ I nun nga akoto Pɔlu klé sran’m be like’n, “ɔ jrannin Moizi i Mmla’n nin Ɲanmiɛn nuan ijɔfuɛ’m be ndɛ’n su kannin Zezi i ndɛ weinwein kleli be.” (Yol. 28:23) ?Kɛ é klé sran’m be ndɛ nanwlɛ’n, wafa sɛ yɛ e kwla nian Pɔlu i ajalɛ’n su-ɔ? Ɔ fataman kɛ e kan ndɛ nga Biblu’n kan’n i ngunmin i ndɛ e kle be. Sanngɛ ɔ fata kɛ e uka be naan be bɔbɔ be suan Biblu’n nun like naan be bu like nga be suan’n i su akunndan. I liɛ’n, bé fá be wun bé mántan Zoova. E kunndɛman kɛ kɛ mɔ sran’m be ɲin yi e’n, i ti yɛ be fa ndɛ nanwlɛ’n su-ɔ. Nga e kunndɛ’n yɛle kɛ be bɔbɔ be suan like kpa, yɛ be wun i wlɛ kɛ like nga be suɛn i Ɲanmiɛn su’n ti nanwlɛ.

12-13. ?Wafa sɛ yɛ siɛ nin niɛn’m be kwla uka be mma mun naan b’a ka nanwlɛ’n i atin’n su-ɔ?

¹² Siɛ nin niɛn mun, e si kɛ amun kunndɛ kɛ amun mma’m be ka nanwlɛ’n i atin’n su. Atrɛkpa’n amun kwla bu i kɛ sɛ be le janvuɛ kpa asɔnun’n nun’n, i sɔ’n úka be naan b’a lafi Ɲanmiɛn su kpa. Sanngɛ sɛ amun kunndɛ kɛ amun mma’m be lafi su kɛ ndɛ nga Biblu’n kan’n ti nanwlɛ’n, ɔ fataman kɛ be ka janvuɛ tralɛ’n ngunmin su. Ɔ fata kɛ be nin Ɲanmiɛn be afiɛn’n mantan kpa, yɛ be wun i wlɛ kɛ like nga Biblu’n kle’n ɔ ti nanwlɛ.

¹³ Sɛ siɛ nin niɛn’m be kunndɛ kɛ bé úka be mma mun naan be si Ɲanmiɛn i su ndɛ nanwlɛ’n, ɔ fata kɛ be bɔbɔ be suan Biblu’n nun like kpa. Ɔ fata kɛ be fa blɛ be bu like nga be suan’n i su akunndan kpa. I liɛ’n, be mma’m bé nían be ajalɛ’n su. Asa ekun’n, ɔ fata kɛ be uka be mma mun naan be si ninnge nga e fa suan Biblu’n nun like’n be nun junman di kɛ nga be fa uka be nga be kle be Biblu’n nun like’n sa. Sɛ be yo sɔ’n, bé úka be mma mun naan b’a klo Zoova. Asa ekun’n, bé yó maan be mma’m bé láfi su kɛ “junman difuɛ nanwlɛfuɛ m’ɔ si ngwlɛlɛ’n” i lika yɛ Ɲanmiɛn sin uka e naan y’a wun Biblu’n nun ndɛ’n i wlɛ-ɔ. (Mat. 24:45-47) Siɛ nin niɛn mun, ɔ fataman kɛ kɛ amún klé amun mma’m be like’n amun ka Biblu’n nun ndɛ nanwlɛ nga be wlɛ wunlɛ ti pɔpɔ’n be klelɛ’n i ngunmin su. Sanngɛ amun uka be naan be lafi Ɲanmiɛn su kpa. Yɛle kɛ amun fa “Ɲanmiɛn i ninnge nga be bo ti kploun’n” be kle be wie. I sɔ yolɛ nun’n,  nán amun wla fi ba’m be afuɛ’n nin like nga be kwlɛ i yo’n be su.—1 Kor. 2:10.

14. ?Ngue ti yɛ ɔ fata kɛ e suan ndɛ nga Ɲanmiɛn nuan ijɔfuɛ’m be kannin’n i su like-ɔ? (An nian kuku nga be flɛ i kɛ “ ?A kwla yiyi Ɲanmiɛn nuan ijɔfuɛ’m be ndɛ nga’m be nun?” i nun.)

¹⁴ Ɲanmiɛn nuan ijɔfuɛ’m be ndɛ nga be kannin’n be ti cinnjin kpa. Afin be kwla uka e naan y’a lafi Ɲanmiɛn su kpa y’a tra laa’n. ?Ɲanmiɛn nuan ijɔfuɛ’m be ndɛ nga be kannin’n, beninfuɛ’n yɛ ɔ ukali wɔ naan w’a lafi Ɲanmiɛn su kpa-ɔ? Atrɛkpa’n, á sé kɛ ‘mɛn’n i awieliɛ blɛ’n’ i su ndɛ nga be kannin’n niɔn. (2 Tim. 3:1-5; Mat. 24:3, 7) ?Sanngɛ Ɲanmiɛn nuan ijɔfuɛ’m be ndɛ nga be kannin mɔ b’a dun mmua b’a kpɛn su’n, beninfuɛ’n yɛ ɔ yo maan a lafi su kɛ i onga’m bé kpɛ́n su wie-ɔ? ?Wafa nga ndɛ ng’ɔ o Daniɛl ndɛ tre 2 nin 11 be nun’n be kpɛnnin su annzɛ be su kpɛn su’n, sɛ be se ɔ kɛ a yiyi nun’n, á kwlá yíyí nun? * Kɛ ɔ Ɲanmiɛn sulafilɛ’n taka like nga Biblu’n kle’n su’n, like fi kwlá yoman naan w’a kpɔnzɔ. Maan e fa e ɲin e sie i wafa nga Alɛ Dan Nɲɔn Su’n nun’n be kleli e niaan nga be o Alemaɲin lɔ’n be yalɛ’n, i su. Kannzɛ bɔbɔ blɛ sɔ’n nun’n, b’a wunman mɛn’n i awieliɛ blɛ’n i su ndɛ nga Ɲanmiɛn nuan ijɔfuɛ’m be kannin’n i wlɛ kpa’n, sanngɛ be lafili Ɲanmiɛn Ndɛ’n su kpa.

15-17. ?Kɛ Itilɛ nin i sran’m be kleli aniaan’m be yalɛ’n, wafa sɛ yɛ Biblu’n nun like suanlɛ’n ukali be-ɔ?

¹⁵ I nun mɔ Itilɛ yɛ ɔ sie Alemaɲin nvle’n, be wlali e niaan’m be nun kpanngban kpa be bisua. Blɛ sɔ’n nun’n, Itilɛ nin i sonja’m be su kpɛn ng’ɔ suan Ɛnirisi Imlɛɛ’n be kpɔli Zoova i Lalofuɛ’m be kpa. Aniaan bla kun seli kɛ cɛn kun’n, Imlɛɛ seli be kɛ: “Amun Ɲanmiɛn Zoova’n, ɲanmiɛn su lɔ yɛ ɔ sie-ɔ. Sanngɛ asiɛ’n su wa’n, e bɔbɔ yɛ e sie-ɔ. Ɔ maan amun Zoova Lalofuɛ mun nin e bɔbɔ’n, é wá wún sran akpasua ng’ɔ́ ká lɛ’n.” ?Blɛ sɔ’n nun’n, ngue yɛ ɔ ukali Zoova i sufuɛ mun naan b’a nanti seiin titi-ɔ?

¹⁶ Aniaan sɔ’m be si kɛ Ɲanmiɛn i Famiɛn Dilɛ’n boli i bo afuɛ 1914 nun. Ɔ maan yalɛ nga be kleli be’n, w’a boman be nuan. Asa ekun’n, be lafili su kɛ sɛ Ɲanmiɛn waan ɔ́ yó like kun’n, awa wie fi kwlá yoman naan i  klun sa’n w’a kpɛnman su. I sɔ’n ti’n, be si kɛ Itilɛ kwlá yoman naan Ɲanmiɛn i sulɛ kpafuɛ’n nunnun. Annzɛ ɔ kwlá sieman awa kun mɔ i kwlalɛ’n trá Ɲanmiɛn i Famiɛn Dilɛ’n liɛ’n niɔn. Ɔ maan aniaan’m be lafili su kɛ ɔ́ cɛ́-ɔ, ɔ́ cɛ́ ngbɛn Itilɛ i sielɛ’n, ɔ́ wíe.

¹⁷ Like nga aniaan’m be lafili su’n kpɛnnin su sakpa. Kɛ ɔ cɛli kan’n, Itilɛ i awa’n tɔli. Yɛ Ɛnirisi Imlɛɛ m’ɔ seli kɛ “asiɛ’n su wa’n e bɔbɔ yɛ e sie’n” ɔ wanndili naan b’a kunmɛn i. Kɛ ɔ́ wánndi’n, ɔ nin aniaan bian kun mɔ be flɛ i kɛ Libke’n be yiali nun. Laa’n, aniaan bian sɔ’n o bisua yɛ Imlɛɛ si kɛ ɔ ti Zoova i Lalofuɛ. Kɛ m’ɔ wun i wlɛ kɛ ndɛ ng’ɔ kannin’n su kpɛnman su ti’n, ɔ usali aniaan bian’n kɛ: “?Biblu’n nun like suanfuɛ, ngue sa yɛ ɔ́ wá jú siɛn’n niɔn?” Aniaan bian Libke yiyili nun kleli i kɛ Zoova i Lalofuɛ’m be si kɛ saan Itilɛ i sielɛ’n wíe naan bé ɲán be ti. Blɛ sɔ’n nun’n, Imlɛɛ m’ɔ kannin ndɛ tɛtɛ sunman kleli Zoova i Lalofuɛ mun’n, w’a ɲanman ndɛ w’a kanman. W’a cɛman yɛ ɔ kunnin i wun-ɔn. ?Ngue yɛ ndɛ sɔ’n kle e-ɔ? Kɛ é súan Biblu’n nun like’n, sɛ e suan Ɲanmiɛn nuan ijɔfuɛ’m be ndɛ nga be kannin’n be su like wie’n, i sɔ’n úka e naan y’a lafi Ɲanmiɛn su kpa y’a tra laa’n. Kpɛkun yalɛ klelɛ blɛ nun’n é jrán kekle.—2 Piɛ. 1:19-21.

18. ?Kɛ nga Zan 6:67, 68 fa kan’n sa’n, ngue ti yɛ ɔ fata kɛ e ‘si ndɛ ng’ɔ ti nanwlɛ’n, yɛ e wun sa wlɛ kpa’ ɔ?

¹⁸ Ɔ fata kɛ e kwlakwla e yi sran klolɛ’n i nglo naan sran’m be sie i nzɔliɛ kɛ e ti Klisifuɛ kpa. Sanngɛ ɔ fata kɛ e ‘si ndɛ ng’ɔ ti nanwlɛ’n, yɛ e wun sa wlɛ kpa’ wie. (Fp. 1:9) Sɛ y’a yoman sɔ’n, ɔ cɛman naan y’a fa “ato like kwlaa nga gblɛfuɛ’m be kle be fa laka sran mun’n su.” Gblɛfuɛ sɔ’m be nun wie mun yɛle be nga be nin Ɲanmiɛn b’a bu’n. (Efɛ. 4:14) Klisifuɛ klikli’m be blɛ su’n kɛ sran sunman be yacili Zezi i su sulɛ’n, akoto Piɛli i ndɛ ng’ɔ kannin’n kle kɛ ɔ lafi su kpa kɛ Zezi i “ndɛ’m be man nguan m’ɔ leman awieliɛ’n.” (An kanngan Zan 6:67, 68 nun.) Kannzɛ bɔbɔ blɛ sɔ’n nun Piɛli siman ndɛ sɔ’n i ngbɛsungbɛsu kwlaa’n, sanngɛ ɔ nantili seiin titi. Afin ɔ wunnin Klisi i su ndɛ nanwlɛ’n i wlɛ kpa. E kusu maan e yo like kwlaa nga e kwla yo naan y’a wun Biblu’n nun ndɛ’n i wlɛ naan y’a lafi su. Sɛ e yo sɔ’n, kannzɛ bɔbɔ sa’m be tɔ e su sɛ’n sanngɛ é jrán kekle. Kpɛkun é úka e wiengu mun naan be lafi Ɲanmiɛn su tankaan kpa.—2 Zan 1, 2.