1. ?Ngue ti yɛ andɛ’n sran kpanngban be akunndan’n w’a sanngan-ɔn?

ANDƐ’N, be diman be nga be tɔn be wun suɛn kɛ be ti Klisifuɛ’n be yalɛ. I sɔ’n ti’n, sran kpanngban be akunndan’n w’a sanngan. Yɛ be usa be wun kɛ: “?Ɲanmiɛn i klun jɔ Ɲanmiɛn sulɛ wafa’m be kwlaa be su? ?Annzɛ be nun kunngba cɛ yɛ i klun jɔ su-ɔ?” Sanngɛ e mɔ e ti Zoova i Lalofuɛ’n, ɔ fata kɛ e tinuntinun e usa e wun kɛ: “?N lafi su kpa kɛ like nga Zoova i Lalofuɛ’m be kle’n ti nanwlɛ? ?Yɛ n lafi su kpa kɛ be Ɲanmiɛn sulɛ wafa’n i kunngba cɛ yɛ Zoova i klun jɔ su-ɔ?” Maan e fa e ɲin e sie i like nga e kwla yo naan y’a wun i sɔ liɛ’n i wlɛ’n, i su.

2. ?Ngue yɛ Pɔlu yoli naan w’a lafi su kpa kɛ ɔ o nanwlɛ’n i atin’n su-ɔ? (1 Tesalonikifuɛ Mun 1:5)

² Akoto Pɔlu lafili su kpa kɛ ɔ o nanwlɛ’n i atin’n su. (An kanngan 1 Tesalonikifuɛ Mun 1:5 nun.) Nán wafa nga i wun yo i’n, i su yɛ ɔ jrannin naan w’a lafi su-ɔ. Sanngɛ ɔ boli i ɲin ase suannin Ɲanmiɛn Ndɛ’n i nun like kpa. Afin ɔ lafi su kɛ “ndɛ kwlaa ng’ɔ o Ɲanmiɛn Ndɛ’n nun’n, Ɲanmiɛn yɛ maan be klɛli-ɔ.” (2 Tim. 3:16) ?Kɛ ɔ suannin Ɲanmiɛn Ndɛ’n i nun like’n, ngue yɛ ɔ wunnin i wlɛ-ɔ? Ɔ wunnin ninnge wie mɔ be kle weiin kɛ Zezi yɛ ɔ ti Mesi mɔ be seli kɛ ɔ́ bá’n niɔn. Zifu’m be Ɲanmiɛn sulɛ wafa’m be su kpɛnngbɛn’m be ɲinfu b’a faman be ɲin b’a siemɛn i ninnge sɔ’m be su. Asa’n, be sili be wue nun kɛ be yɛ be su Ɲanmiɛn kpa-ɔ. Kusu nn be ayeliɛ’n kleman sɔ. (Tit. 1:16) Pɔlu w’a yoman kɛ be sa. Kɛ ɔ́ súan Ɲanmiɛn Ndɛ’n i nun like’n, w’a faman ndɛ wie su w’a yaciman wie lɛ. Sanngɛ ɔ nantili “Ɲanmiɛn i afɔtuɛ’m be kwlaa” be su, yɛ ɔ boli su kleli sran mun.—Yol. 20:27.

3. ?Ɔ ti cinnjin kɛ e si kosan’m be kwlaa be su tɛlɛ’n naan y’a wun i wlɛ kɛ e o nanwlɛ atin’n su? (An nian kuku nga be flɛ i kɛ “ Ninnge nga Zoova yo be’n nin akunndan ng’ɔ bu be’n be sɔnnin dan” i nun wie.)

³ Sran wie’m be waan ɔ fata kɛ be nga be su Ɲanmiɛn kpa’n be si kosan’m be kwlaa be su tɛlɛ’n. Kosan nga Biblu’n w’a tɛman be su bɔbɔ’n, ɔ fata kɛ be si be su tɛlɛ’n wie. ?Sanngɛ i sɔ’n kwla yo ye? Maan e fa e ɲin e sie i Pɔlu su kan ekun.  Ɔ wlɛli i niaan Klisifuɛ’m be fanngan kɛ be “bu like kwlaa i akunndan” be nian sɛ ɔ ti nanwlɛ-o. Sanngɛ i bɔbɔ dili i nanwlɛ kɛ ninnge kaka o lɛ m’ɔ wunman be wlɛ-ɔ. (1 Tes. 5:21) I kpa bɔbɔ’n, ɔ seli kɛ “nán sa ngba yɛ e si i-ɔ.” Kpɛkun ɔ kan guali su kɛ “e wunman ninnge’m be wlɛ kpa. Ɔ ti kɛ e su nian niannun mɔ i ɲin ti trusii’n i nun sa.” (1 Kor. 13:9, 12) Ɔ maan Pɔlu w’a wunman ninnge ngba wlɛ. E kusu nán ninnge ngba yɛ e wun be wlɛ-ɔ. Sanngɛ Pɔlu wunnin Zoova i su ndɛ nanwlɛ’n i nun ndɛ cinnjin kpa’m be wlɛ. Yɛ ninnge sɔ’m be kwla ukɛli i naan w’a lafi su kpa kɛ ɔ o nanwlɛ atin’n su.

4. (1) ?Sɛ e waan é láfi su kpa kɛ e o nanwlɛ’n i atin’n su’n, ngue yɛ e kwla yo-ɔ? (2) ?Ngue yɛ é wá kɛ́n i ndɛ like suanlɛ nga nun-ɔn?

⁴ Like kun mɔ e kwla yo naan y’a lafi su kpa kɛ e o nanwlɛ atin’n su’n, yɛle kɛ e fa wafa nga Zezi suli Ɲanmiɛn’n e sunnzun wafa nga Zoova i Lalofuɛ’m be su Ɲanmiɛn andɛ’n e nian. Like suanlɛ nga nun’n, é wá wún i kɛ (1) Klisifuɛ kpa’m be su Ɲanmiɛn kunngba cɛ, (2) be bu Ɲanmiɛn i dunman’n i like cinnjin, (3) be klo ndɛ nanwlɛ’n, yɛ (4) be klo be wun tankaan kpa.

5. (1) ?Ɲanmiɛn sulɛ’n i su ajalɛ benin yɛ Zezi kleli e-ɔ? (2) ?Wafa sɛ yɛ e kwla nanti ajalɛ sɔ’n su-ɔ?

⁵ Kɛ mɔ Zezi klo Zoova dan’n ti’n, ɔ suli i kunngba cɛ. I nun m’ɔ o ɲanmiɛn su lɔ’n, ɔ nin kɛ ɔ bali asiɛ’n su wa’n, i kunngba cɛ yɛ ɔ suli i-ɔ. (Lik. 4:8) Yɛ ɔ seli i sɔnnzɔnfuɛ’m be kɛ be yo sɔ wie. Zezi nin i sɔnnzɔnfuɛ’m be nun wie fi w’a faman waka sran annzɛ i wunsu like wie w’a fa suman Ɲanmiɛn. Kɛ mɔ Zoova ti aolia nun sran’n ti’n, sran fi kwlá yoman like wie m’ɔ́ fɛ́ i-ɔ. (Eza. 46:5) Sanngɛ andɛ’n, be nga be tɔn be wun suɛn kɛ be ti Klisifuɛ’n be sɛ waka annzɛ like uflɛ be fa yo be nga be flɛ be kɛ sɛsɛfuɛ’n be wunsu. Kpɛkun be koto be bo. ?Ɲanmiɛn i  klun kwla jɔ like nga be yo’n su? Mmla Blu nga Zoova fa mannin Izraɛlifuɛ mun’n i nun’n, mmla nɲɔn su’n se kɛ: “Nán an yo amuɛn fi, nán yo like wie fi m’ɔ fa nglo lɔ like, annzɛ asiɛ’n su wa like [...]. Nán koto be bo.” (Tul. 20:4, 5) Mmla’n ti weiin. Be kwlaa nga be kunndɛ kɛ bé sú Ɲanmiɛn kpa’n, ɔ fataman kɛ be fa waka sran annzɛ i wunsu like wie be sɛnngɛn i sulɛ’n nun.

6. ?Wan’m be ajalɛ’n su yɛ Zoova i Lalofuɛ’m be nian-ɔn?

⁶ Be nga be suan laa sa’m be su like’n, be waan Klisifuɛ klikli’m be suli Ɲanmiɛn kunngba cɛ. Fluwa kun seli kɛ waka sran nin i wunsu like nga sran’m be fa sie be Ɲanmiɛn sulɛ lika’m be nun’n, “be ti tete like” Klisifuɛ klikli’m be ɲrun. Andɛ’n, Zoova i Lalofuɛ’m be nian Klisifuɛ klikli’m be ajalɛ kpa sɔ’n su. Yɛle kɛ kɛ bé sú Ɲanmiɛn’n, be kotoman “sɛsɛfuɛ mun” annzɛ anzi’m be waka sran wie fi bo. Asa ekun’n, be srɛman Zezi. Kpɛkun be manmanman drapo yɛ be yoman like uflɛ fi m’ɔ kle kɛ be klo be nvle’n dan-ɔn. Kannzɛ sran’m be mian be kɛ be yo ninnge sɔ mun’n, sanngɛ b’a fua kpa kɛ bé nánti ndɛ yɛ mɔ Zezi kannin’n su. Ɔ seli kɛ: “Zoova m’ɔ ti ɔ Ɲanmiɛn’n yɛ ɔ fata kɛ a koto i bo-ɔ, yɛ i kunngba cɛ yɛ ɔ fata kɛ a su i-ɔ.”—Mat. 4:10.

7. ?Ngbaciɛ benin yɛ ɔ o Zoova i Lalofuɛ mun nin Ɲanmiɛn sulɛ wafa’m be afiɛn-ɔn?

⁷ Andɛ’n, sran’m be klo Ɲanmiɛn sulɛ wafa’m be su kpɛnngbɛn nga be nuan nun yo fɛ’n, be ndɛ’n i tielɛ kpa. Kpɛnngbɛn sɔ’m be wun yo sran’m be fɛ dan ti’n, be manman be. Yɛ wie liɛ bɔbɔ’n, sɛ é kwlá sé’n be sɔ be. Sran sɔ’m be tu kpuu be kɔ be asɔnun’m be nun. Be to be fluwa mun, yɛ be man be sika kaka be fa suan be anuannzɛ’m be bo. Asa ekun’n, be fa ndɛ kwlaa nga kpɛnngbɛn sɔ’m be kan’n su. Yɛ kɛ be wun be sa’n, be wun ɲrɛnɲrɛn be kɛ b’a wun Zezi bɔbɔ sa. Sanngɛ e mɔ e ti Zoova i sufuɛ mun e liɛ’n, e yoman sɔ. Kannzɛ e ɲin yi be nga be dun e ɲrun mmua’n, sanngɛ e manmanman be. Afin e nanti ndɛ yɛ mɔ Zezi kannin’n su. Ɔ seli kɛ: “Amun kwlaa amun ti niaan.” (Mat. 23:8-10) I kpa bɔbɔ’n, e manmanman sran fi. I politikifuɛ-o, i Ɲanmiɛn sulɛ wafa’m be su kpɛnngbɛn-o, e manmanman be nun wie fi. Kpɛkun e suanman be bo. Asa ekun’n, e yoman politiki yɛ e faman e wun wlaman mɛn’n nun ninnge’m be nun. I kwlaa sɔ’n kle weiin kɛ ngbaciɛ o Zoova i Lalofuɛ mun nin Ɲanmiɛn sulɛ wafa’m be afiɛn.—Zan 18:36.

8. ?Ngue yɛ ɔ kle kɛ Zoova kunndɛ kɛ i dunman’n fu-ɔ?

⁸ Cɛn kun’n, Zezi srɛli Ɲanmiɛn seli i kɛ: “Min Si, yo maan ɔ dunman’n fu.” Kɛ ɔ yoli sɔ’n, be tili Zoova i nɛn’n ɲanmiɛn su lɔ. Ɔ seli kɛ ɔ́ wá yó maan i dunman’n fú. (Zan 12:28) I nun mɔ Zezi o asiɛ’n su wa’n, ɔ yoli maan i Si i dunman’n fuli. (Zan 17:26) I sɔ’n ti’n, ɔ fata kɛ i sɔnnzɔnfuɛ mun kusu be yo naan i dunman’n fu wie. Yɛle kɛ be fɛ i dunman’n be fa flɛ i, yɛ be bo i dunman’n be kle sran mun.

9. ?Ngue yɛ Klisifuɛ klikli’m be yoli m’ɔ kle kɛ be bu Ɲanmiɛn i dunman’n i like cinnjin-ɔn?

⁹ Klisifuɛ klikli’m be blɛ su’n, kɛ be takali asɔnun bo klikli mun’n, w’a cɛman Zoova “kpɛli i ɲin be nga be timan Zuifu’n be su lɔ, naan ɔ́ kpá be nun wie mun naan i dunman’n tran be su.” (Yol. 15:14) Klisifuɛ klikli’m be fali Ɲanmiɛn i dunman’n be fa flɛli i. Kpɛkun be yoli maan sran kaka be sili dunman sɔ’n. I wie yɛle kɛ kɛ bé bó jasin fɛ’n annzɛ kɛ bé klɛ́ Biblu’n nun fluwa wie mun’n, be boli Ɲanmiɛn i dunman’n. * I sɔ’n kle weiin kɛ blɛ sɔ nun’n, be yɛ Ɲanmiɛn i dunman’n wo be su-ɔ.—Yol. 2:14, 21.

10. ?Ngue yɛ ɔ kle kɛ Zoova i Lalofuɛ’m be ngunmin cɛ yɛ be bu Ɲanmiɛn i dunman’n i like cinnjin-ɔn?

 ¹⁰ Andɛ’n, Zoova i Lalofuɛ mun yɛ Ɲanmiɛn i dunman’n wo be su-ɔ. ?Ngue ti-ɔ? Amun bɔbɔ amun nian. Andɛ’n, Ɲanmiɛn sulɛ wafa’m be su kpɛnngbɛn’m be yo like kwlaa nga be kwla yo naan sran’m b’a siman kɛ Ɲanmiɛn le dunman’n. I wie yɛle kɛ be yili i dunman’n be Biblu’m be nun. Kpɛkun kɛ bé yó be asɔnun’n, be bomɛn i dunman’n mlɔnmlɔn. * Sanngɛ Zoova i Lalofuɛ’m be liɛ’n, be bo Ɲanmiɛn i dunman’n be kle sran kwlaa. Ɲanmiɛn sulɛ wafa’m be nun wie fi yomɛn i sɔ asiɛ’n wunmuan’n su. I sɔ’n kle kɛ Zoova i Lalofuɛ’m be ngunmin cɛ yɛ be bu Ɲanmiɛn i dunman’n i like cinnjin-ɔn. Yɛ sran fi kwlá simɛn i sɔ liɛ’n i su akplowa. Kɛ e bo Zoova i dunman’n e kle sran mun’n, e kle kɛ e nin Zoova i Lalofuɛ flɛlɛ’n fata sakpa. (Eza. 43:10-12) Asa’n, e yili Biblu Traduction du monde nouveau miliɔn 240 tra su. Ɲanmiɛn i dunman Zoova’n wo Biblu sɔ’n nun kpɛ kaka. Lika nga Biblu wie’m be nun b’a klɛman Ɲanmiɛn i dunman’n, e liɛ’n e klɛli. Afin ɔ fata kɛ Ɲanmiɛn i dunman’n tran Biblu’n i lika sɔ’m be nun. Asa’n, e yi fluwa aniɛn 1.000 tra su nun. Ɲanmiɛn i dunman Zoova’n wo fluwa sɔ’m be nun wie.

11. ?Wafa sɛ yɛ Klisifuɛ klikli’m be kleli kɛ be klo ndɛ nanwlɛ’n niɔn?

¹¹ Zezi kleli kɛ ɔ klo ndɛ nanwlɛ’n. Ndɛ nanwlɛ sɔ’n yɛle Ɲanmiɛn nin i klun sa’n be su ndɛ  nanwlɛ’n. Asa’n, i ayeliɛ’n kleli kɛ ɔ si ndɛ nanwlɛ’n, yɛ ɔ yoli maan sran uflɛ sili ndɛ nanwlɛ sɔ’n wie. (Zan 18:37) Klisifuɛ klikli’m be kusu be kleli kɛ be klo ndɛ nanwlɛ’n wie. (Zan 4:23, 24) I kpa bɔbɔ’n, akoto Piɛli flɛli Klisifuɛ sɔ’m be asɔnun’n kɛ “nanwlɛ atin’n.” (2 Piɛ. 2:2) Kɛ mɔ Klisifuɛ klikli’m be kloli ndɛ nanwlɛ’n ti’n, be kpaloli ndɛ kwlaa ng’ɔ nin Ɲanmiɛn Ndɛ’n kɔman likawlɛ’n. I wie yɛle Ɲanmiɛn sulɛ wafa’m be ndɛ nga be kan’n, nin be nannan’m be mmla mun, ɔ nin ndɛ nga be blɛ su sran wie’m be kan’n. (Kol. 2:8) Andɛ kusu’n, Klisifuɛ kpa’m be mian be ɲin “be nanti ndɛ nanwlɛ’n i atin’n su titi.” Yɛle kɛ like nga be lafi su’n ɔ nin like nga be yo’n i kwlaa taka Zoova i nuan Ndɛ’n su.—3 Zan 3, 4.

12. (1) ?Kɛ Anuannzɛ’n i ɲrun dinfuɛ’m be wun i wlɛ kɛ ɔ fata kɛ be yiyi ndɛ wie’m be nun uflɛ’n, ngue yɛ be yo-ɔ? (2) ?Ngue ti yɛ be fɛ i sɔ ajalɛ’n niɔn?

¹² Zoova i Lalofuɛ’m be seman kɛ be yɛ be si ndɛ nanwlɛ’n i ngbɛsungbɛsu’n kwlaa-ɔ. Ɔ juli wie’n, kɛ bé yíyí Biblu’n nun ndɛ wie’m be nun’n annzɛ kɛ bé fá ajalɛ wie mun’n, be fɔnnin. Sanngɛ ɔ fataman kɛ i sɔ’n bo e nuan. Afin Biblu’n bɔbɔ seli kɛ, kɛ afuɛ’m bé sín’n yɛ Ɲanmiɛn i sufuɛ’m bé wún ndɛ nanwlɛ’n i wlɛ kpa-ɔ. (Kol. 1:9, 10) Kɛ lika cɛn’n, wia’n i kpajalɛ’n uka su blɛblɛblɛ lele lika’n kpaja weiin. I wafa kunngba’n, Zoova yi ndɛ nanwlɛ’n i nglo kle i sufuɛ mun blɛblɛblɛ. Ɔ maan ɔ fata kɛ e minndɛ naan y’a wun ndɛ nanwlɛ’n i wlɛ kpa. (Nya. 4:18) Kɛ Anuannzɛ’n i ɲrun dinfuɛ’m be wun i wlɛ kɛ ɔ fata kɛ be yiyi ndɛ wie’m be nun uflɛ’n, be sisiman be bo naan b’a yo sɔ. I yo, ɔ ju wie’n be nga be tɔn be wun suɛn kɛ be ti Klisifuɛ’n be su kpɛnngbɛn’m be kacikaci ninnge wie mun. Afin be kunndɛ kɛ sran’m be klo be sa naan be wɔ be asɔnun’m be nun. Sanngɛ Zoova i Lalofuɛ’m be liɛ’n, like nga ti yɛ be fa ajalɛ uflɛ wie mun’n yɛle kɛ be kunndɛ kɛ be nin Ɲanmiɛn be afiɛn mantan kpa tra laa’n. Kpɛkun be kunndɛ kɛ bé sú Ɲanmiɛn kɛ nga Zezi fa kleli’n sa. (Zak. 4:4) Ɔ maan nán kɛ e kunndɛ kɛ é yó ninnge mun kɛ nga sran’m be fa klo’n sa ti yɛ e fa ajalɛ wie mun-ɔn. Sanngɛ kɛ mɔ e wun Biblu’n nun ndɛ’n i wlɛ kpa’n, i ti-ɔ. I sɔ’n kle weiin kɛ e klo ndɛ nanwlɛ’n sakpa.—1 Tes. 2:3, 4.

13. (1) ?Nzuɛn nga Klisifuɛ klikli’m be yili be nglo’n, be nun cinnjin kpafuɛ’n yɛle benin? (2) ?Ngue yɛ ɔ kle kɛ Zoova i Lalofuɛ’m be klo be wiengu-ɔ?

¹³ Nzuɛn nga Klisifuɛ klikli’m be yili be nglo’n, be nun cinnjin kpafuɛ’n yɛle sran klolɛ’n. Zezi seli i sɔnnzɔnfuɛ’m be kɛ: “Sɛ amun klo amun wiengu’n, yɛ sran kwlaa sí kɛ amun ti min sɔnnzɔnfuɛ-ɔ.” (Zan 13:34, 35) Andɛ’n, Zoova i Lalofuɛ mɔ be o mɛn wunmuan’n nun’n be yi i nglo kɛ be klo be wiengu naan be bo ti kun. Kannzɛ be finwlɛ’n nin wafa nga be yo ninnge’m be timan kun’n, sanngɛ be tran aniaan tranlɛ. Asiɛ’n su wa’n, Ɲanmiɛn sulɛ wafa uflɛ fi yoman sɔ. Kɛ e kɔ asɔnun aɲia mun nin akpasua kun aɲia mun nin nvle kun aɲia’m be bo’n, yɛ e wun i kɛ e klo e wun kpa bɔbɔ’n niɔn. I sɔ’n yo maan e lafi su kpa ekun kɛ e su Ɲanmiɛn kɛ nga i bɔbɔ fa klo’n sa.

14. ?Kɛ nga Kolɔsufuɛ Mun 3:12-14 fa kan’n sa’n, wafa nga e kwla kle kɛ e klo e wiengu mun’n be nun kun yɛle benin?

¹⁴ Ɲanmiɛn Ndɛ’n wla e fanngan kɛ ‘e klo e wiengu tankaan kpa.’ (1 Piɛ. 4:8) Wafa nga e kwla kle kɛ e klo e wiengu mun’n, be nun kun yɛle kɛ sɛ be yo e sa’n maan e yaci e cɛ be. Kpɛkun maan e tra e awlɛn be wun titi. Asa’n, maan e yo be kwlaa be ye. Kannzɛ be nun kun loli e ngasi bɔbɔ’n, sanngɛ maan e yo i ye wie. (An kanngan Kolɔsufuɛ Mun 3:12-14 nun.) Sɛ e yo sɔ’n, sran’m bé wún i wlɛ kɛ e ti Zezi i sɔnnzɔnfuɛ sakpa.

15. ?Like uflɛ benin yɛ e yo m’ɔ kle kɛ e su Ɲanmiɛn kɛ Klisifuɛ klikli’m be sa-ɔ?

¹⁵ E yo like kun ekun m’ɔ kle kɛ e su Ɲanmiɛn kɛ Klisifuɛ klikli’m be sa-ɔ. I wie yɛle kɛ e anuannzɛ’n nun ninnge’m be ti siesiewa kɛ nga Klisifuɛ klikli’m be fa yoli’n sa. Kɛ be sa’n, e le akpasua sunianfuɛ mun nin asɔnun kpɛnngbɛn mun ɔ nin asɔnunfuɛ’m be lika nianfuɛ mun. (Fp. 1:1; Tit. 1:5) Asa ekun’n, kɛ be sa’n, e nanti aja’n nin bla nin bian nna’n be su mmla nga Zoova mannin’n su. Kpɛkun e nanti mmoja’n i su ndɛ ng’ɔ kannin’n su wie. Asa’n, sran ng’ɔ kunndɛman kɛ ɔ́ nánti Ɲanmiɛn i mmla’m be su’n, e kplinman su kɛ ɔ tran e afiɛn.—Yol. 15:28, 29; 1 Kor. 5:11-13; 6:9, 10; Ebr. 13:4.

16. ?Ngue yɛ ndɛ ng’ɔ o Efɛzifuɛ Mun 4:4-6 nun’n, ɔ kle e-ɔ?

¹⁶ Zezi seli kɛ sran kpanngban bé wá tɔ́n be wun suɛn kɛ be ti i sɔnnzɔnfuɛ. (Mat. 7:21-23) Asa ekun’n, Ɲanmiɛn Ndɛ’n seli kɛ mɛn’n i awieliɛ blɛ nun’n, sran kpanngban ‘bé wá yó be wun kɛ be ti Ɲanmiɛn sufuɛ sa.’ (2 Tim. 3:1, 5) Sanngɛ Biblu’n kle weiin kɛ Ɲanmiɛn i klun jɔ ‘ndɛ kunngba’ su. Yɛle kɛ Ɲanmiɛn sulɛ wafa kunngba cɛ yɛ i klun jɔ su-ɔ.—An kanngan Efɛzifuɛ Mun 4:4-6 nun.

17. ?Andɛ’n, wan mun yɛ be su Ɲanmiɛn kɛ nga Zezi fa kleli’n sa-ɔ?

¹⁷ ?Andɛ’n, wan mun yɛ be su Ɲanmiɛn kpa-ɔ? Kɛ ɔ ko yo naan y’a tɛ kosan sɔ’n su’n, like suanlɛ nga nun’n e fali e ɲin sieli i ninnge wie’m be su. E kannin Ɲanmiɛn sulɛ’n i su ajalɛ nga Zezi kleli e’n i ndɛ. Kpɛkun e wunnin i kɛ Klisifuɛ klikli’m be niannin ajalɛ sɔ’n su. Asa’n, e wunnin i kɛ Zoova i Lalofuɛ’m be su Ɲanmiɛn kɛ nga Zezi fa kannin’n sa. ?Ɔ maan kɛ amun niɛn i sa’n, wan mun yɛ be su Ɲanmiɛn kpa andɛ-ɔ? I su tɛlɛ’n ti weiin: Zoova i Lalofuɛ mun-ɔn. I sɔ’n ti’n, maan e bu Zoova i Lalofuɛ mɔ e ti’n i cenjele like dan. Afin e si Zoova i su ndɛ nanwlɛ’n, yɛ e si like ng’ɔ sunnzunnin kɛ ɔ́ yó mán klɔ sran mun’n. Maan e kwlakwla e lafi su kpa kɛ e o nanwlɛ’n i atin’n su.