?Ngue ti yɛ kɛ ɔ ka kan Zezi wú’n, ɔ boli ndɛ ng’ɔ o Jue Mun 22:2 nun’n su-ɔ?

Kɛ ɔ ka kan Zezi wú’n yɛ ɔ kannin ndɛ ng’ɔ o Matie 27:46 nun’n niɔn. Ɔ seli kɛ: “?Min Ɲanmiɛn, min Ɲanmiɛn, ngue ti yɛ a yili min ase-ɔ?” I lɛ nun’n, ɔ yiali ndɛ nga Davidi kannin m’ɔ o Jue Mun 22:2 nun’n i nuan. (Mar. 15:34) Nán kɛ Zezi bu i kɛ Ɲanmiɛn i klun jɔmɛn i wun kun annzɛ ɔ lafiman Ɲanmiɛn su kun ti yɛ ɔ seli sɔ-ɔ. Zezi wunnin like nga ti yɛ ɔ fata kɛ ɔ wu’n i wlɛ kpa. I kpa bɔbɔ’n, ɔ kunndɛli kpa kɛ ɔ́ yó sɔ. (Mat. 16:21; 20:28) Asa ekun’n, ɔ si kɛ blɛ nga bé wá kún i’n i nun’n, Zoova su ‘sɛsɛmɛn i’ kun. (Zɔb 1:10) Like nga ti yɛ Zoova w’a sasaman Zezi kun’n, yɛle kɛ Zoova waan ɔ́ mɛ́n i atin naan ɔ kle kɛ kannzɛ bɔbɔ i nguan’n wo wie nuan’n sanngɛ ɔ kwla nanti seiin titi.—Mar. 14:35, 36.

?Sɛ ɔ ti sɔ’n niɔn, ngue ti yɛ Zezi boli ndɛ sɔ m’ɔ o Jue Mun fluwa’n nun’n i su-ɔ? E kwlá tɛman su trele sa. Sanngɛ kɔlɛ’n ɔ le like nga ti yɛ ɔ kannin ndɛ sɔ’n. Ɔ maan é wá kɛ́n i ndɛ. *

Kɛ Zezi kannin ndɛ sɔ’n, atrɛkpa’n i waan ɔ́ klé kɛ Zoova su demɛn i. Ɔ fataman kɛ Zoova uka Zezi e ti kpɔlɛ tɛ’n i yilɛ nun. Afin ɔ fata kɛ “ɔ si like nga be flɛ i wie’n sran’m be kwlaa be dunman nun.”—Ebr. 2:9.

Kɛ Zezi boli ndɛ sɔ’n su’n, atrɛkpa’n i waan ɔ́ fá sran’m be ɲin síe i Jue Mun 22 i nun ndɛ wunmuan’n su. Zezi blɛ su’n, Zifu’m be suan  Jue Mun fluwa’n i nun ndɛ’n lele ɔ ka be klun. Ɔ maan kɛ be bo Jue Mun fluwa’n i nun ndɛ kun su’n, be wla ka lɛ kpɛn i nun ndɛ onga’n su. Atrɛkpa’n, kɛ mɔ Zezi si sɔ’n i ti yɛ ɔ boli ndɛ sɔ’n su-ɔ. Ɔ yoli sɔ naan i sɔnnzɔnfuɛ nga be ti Zifu’n, be wla kpɛn i wie’n i su ndɛ nga be kannin m’ɔ o Jue Mun 22 nun’n i su. (Jue. 22:8, 9, 16, 17, 19, 25) Asa’n, jue sɔ’n i awieliɛ lɔ’n be manman Zoova yɛ be se kɛ i yɛ ɔ́ wá síe asiɛ’n sufuɛ’m be kwlaa-ɔ.—Jue. 22:28-32.

Kɛ Zezi boli Davidi i ndɛ sɔ’n su’n, atrɛkpa’n i waan ɔ́ klé kɛ w’a yoman sa tɛ fi. Kwlaa naan b’a kun Zezi’n, Zifu’m be jɔlɛ difuɛ dandan’m b’a dimɛn i jɔlɛ kɛ ng’ɔ nin i fata’n sa. Yɛ be tɔnnin i suɛn kɛ w’a saci Ɲanmiɛn dunman. (Mat. 26:65, 66) Kɛ be trali Zezi’n, kɔnguɛ afiɛn be ka lɛ be yiali be dili i jɔlɛ. Kusu kɛ bé dí i jɔlɛ’n, b’a nianman mmla’n su. (Mat. 26:59; Mar. 14:56-59) Ɔ maan kɛ Zezi kannin ndɛ sɔ’n, ɔ ti kɛ ɔ su se kɛ: “?Min Ɲanmiɛn, min Ɲanmiɛn, sɛ m’an yoman sa’n niɔn ngue ti yɛ a yili min ase-ɔ?” Ndɛ sɔ’n kle kɛ w’a yoman sa tɛ fi m’ɔ nin kunlɛ fata-ɔ.

Kɛ Zezi kannin Davidi i ndɛ’n wie’n, atrɛkpa’n i waan ɔ́ klé kɛ sɛ Davidi wunnin i ɲrun’n nán kɛ Ɲanmiɛn i klun jɔmɛn i wun ti-ɔ. Kosan nga David usali’n kleman kɛ ɔ lafiman Ɲanmiɛn su kun. Afin kɛ ɔ usali kosan sɔ’n wieli’n, ɔ seli kɛ ɔ lafi su kɛ Zoova kwla de i sufuɛ mun naan ɔ́ yó maan i liɛ yó ye. (Jue. 22:24, 25, 28) I wafa kunngba’n, sɛ Zezi m’ɔ ti “Davidi i Wa’n” ɔ wunnin ɲrɛnnɛn waka’n su’n, nán kɛ Zoova i klun jɔmɛn i wun ti-ɔ.—Mat. 21:9.

Atrɛkpa’n Zezi waan ɔ́ klé kɛ, kɛ Zoova yili i sa i su naan w’a kle kɛ ɔ kwla nanti seiin titi’n, i sɔ’n boli i wla dan. I bo bolɛ nun’n, Zoova w’a sunnzunman kɛ i Wa’n wun ɲrɛnnɛn naan ɔ wu. Kɛ Adan nin Ɛvu be yoli ɲin kekle i su’n yɛ ɔ wa fali ajalɛ sɔ’n niɔn. Zezi w’a yoman sa tɛ fi. Sanngɛ ɔ fata kɛ ɔ wun ɲrɛnnɛn naan ɔ wu naan w’a kwla kpɛ akplowa nga Satan kpɛli i ba’n i nun. Asa’n ɔ yoli sɔ naan w’a kwla yi e ti kpɔlɛ tɛ’n wie. (Mar. 8:31; 1 Piɛ. 2:21-24) Kusu kɛ ɔ ko yo naan i sɔ’n w’a yo ye’n, ɔ fata kɛ Zoova yi i sa i su kan. Kpɛ klikli nga Zoova yó sɔ Zezi i lika’n yɛ ɔ o lɛ-ɔ.

Atrɛkpa’n, Zezi waan ɔ́ fɛ́ i sɔnnzɔnfuɛ’m be ɲin síe i like nga ti yɛ Zoova kplinnin su kɛ be kle i ɲrɛnnɛn naan be kun i’n i su. * Zezi si kɛ sɛ i sɔnnzɔnfuɛ’m be bu i kɛ ɔ ti sa tɛ yofuɛ ti yɛ be kunnin i’n, ɔ cɛman naan be nun kpanngban b’a lafimɛn i su kun. (1 Kor. 1:23) Sanngɛ sɛ be fa be ɲin sie i like nga ti yɛ be kunnin i’n i su’n, bé wún i wlɛ kɛ ɔ ti be Defuɛ naan ɔ timan sa tɛ yofuɛ.—Gal. 3:13, 14.

Kannzɛ e kwlá diman like nga ti yɛ Zezi kannin ndɛ sɔ’n i nanwlɛ trele sa’n, sanngɛ nga e si i’n yɛle kɛ ndɛ sɔ’n kle kɛ Zezi wunnin i wlɛ kɛ ɔ su yo Zoova i klun sa. Afin kɛ ɔ kannin ndɛ sɔ’n, i sin’n ɔ seli kɛ: “I kwlaa i ti w’a yia!” (Zan 19:30; Lik. 22:37) Kɛ Zoova yili i sa Zezi su’n, i sɔ’n yoli maan Zezi kwla yoli like nga ti yɛ ɔ sunmɛnnin i asiɛ’n su wa’n. Asa ekun’n, i sɔ’n yoli maan Zezi i su ‘ndɛ kwlaa nga be klɛli i Moizi i Mmla’n nun’n, ɔ nin i su ndɛ nga Ɲanmiɛn nuan ijɔfuɛ’m be klɛli’n, ɔ nin i su ndɛ nga be klɛli i Jue fluwa’n nun’n, be kwlaa be kpɛnnin su.’—Lik. 24:44.