CƐN kun’n, kɛ talua nɲɔn bé wlánwlán Filipinin lɔ klɔ nga be flɛ i kɛ Bagio’n nun’n, be wunnin aniaan wie mun mɔ be su fa kakaklolo bé bó jasin fɛ’n. Sanngɛ b’a mantanman be lɔ. Aniaan bla kun m’ɔ suan Elɛnin m’ɔ o kakaklolo’n i wun lɛ wie’n ɔ niannin be kpɛkun ɔ srili puɛɛ. Be kusu be niannin Elɛnin wie yɛ be ɔli. Sanngɛ be wla w’a finman srilɛ mɔ aniaan bla’n srili’n su.

I sin’n, kɛ talua nɲɔn sɔ’m be fali loto mɔ bé kɔ́ awlo’n, be wunnin Ɲanmiɛn Sielɛ Sua kun mɔ be klɛli jw.org su’n. Be wla kpɛnnin su kɛ fluwa mma kunngba sɔ’n yɛ be wunnin i kakaklolo’n su’n niɔn. Be sran nɲɔn’n be jrali kpɛkun be ko niannin aɲia’m be siesielɛ nga be klɛli be m’ɔ o Ɲanmiɛn Sielɛ Sua’n i ɲrun lɛ’n.

Talua nɲɔn sɔ’m be ɔli aɲia kun bo. Kɛ be wluli Ɲanmiɛn Sielɛ Sua’n nun lɔ mɔ be wunnin aniaan bla Elɛnin’n, be nuan boli be wun. Be wunnin i wlɛ kɛ aniaan bla sɔ’n yɛ be wunnin i kakaklolo’n i wun lɛ m’ɔ su sri’n niɔn. Elɛnin seli kɛ: “Kɛ n wunnin i kɛ be su ba min wun lɛ’n, min klun titili min kan. N buli i kɛ nn m’an yo like tɛ wie.” Sanngɛ talua nɲɔn sɔ’m be seli Elɛnin kɛ be wunnin i kakaklolo kun i wun lɛ. Kɛ ɔ yoli sɔ’n sa ng’ɔ juli’n, be yiyili nun be kleli i wie.

Kɛ talua nɲɔn sɔ’m be trannin aɲia’n i bo’n, ɔ yoli be fɛ kpa. Aniaan’m be wun yoli be fɛ. Kɛ aɲia’n wieli mɔ aniaan’m bé yó Ɲanmiɛn Sielɛ Sua’n nun yɛinyɛin’n, be waan bé úka be. Kɛ é sé yɛ’n, be nun kun tranman Filipinin lɔ kun. Sanngɛ kun ng’ɔ kali lɛ’n, ɔ tran aɲia’m be bo. Yɛ aniaan’m b’a bo i Biblu’n nun like klelɛ bo bɔbɔ. I kwlaa sɔ’n kwla yoli ye, afin aniaan bla’n srili.