Sran kpanngban be si kɛ laa Ezipti lɔ’n ndɛma yɛ be fa yi fluwa-ɔ. Glɛki mun nin Rɔmunfuɛ’m be kusu be fa yi fluwa wie. * Sanngɛ sran kpanngban be siman kɛ lalafuɛ nun’n be fa ndɛma be fa yo nzue ɲin su alie wie.

I afuɛ 2.500 tra su yɛ Ɲanmiɛn nuan ijɔfuɛ Ezai seli kɛ be nga be tran “Etiopi mɛn’n i nzue ba’m be sin lɔ’n,” be sunmannin sran wie mun. Kɛ bé kɔ́’n, be fuli “nzue’n ɲin su alie mɔ be fa ndɛma” be yoli’n be nun. I kpa bɔbɔ’n, afuɛ kpanngban kpa ka naan Ezai w’a se sɔ’n, Zɔbu seli kɛ anunman ɲin’n kɔ ndɛndɛ kɛ “mmeli mɔ be fali ndɛma be yoli’n sa.”—Eza. 18:1, 2; Zɔb 9:26.

Biblu’n kle kɛ laa’n, sran’m be fa ndɛma be yo nzue ɲin su alie. Ɔ maan be nga be suan nun like’n be lafi su kɛ sɛ sran’m be fufu asiɛ’n be kunndɛ laa ninnge mun’n, bé wún ninnge wie mɔ be kle kɛ laa’n sran’m be fa ndɛ mma be yo nzue ɲin su alie sakpa’n. Afin Biblu’n fin Ɲanmiɛn. (2 Tim. 3:16) ?Kɛ be yoli sɔ kusu’n ngue yɛ be wunnin i-ɔ? Be wunnin ninnge wie mɔ be kle kɛ laa Ezipti lɔ’n, be fa ndɛma be yo nzue ɲin su alie’n.

Ezipti lɔ ndia wie’m be nun’n desɛn wie’m be o talɛ’m be wun. Desɛn sɔ’m be kle wafa nga sran’m be fa ndɛma be yo nzue ɲin su alie mun’n. Kɛ sran’m be ko kpɛ ndɛma’n be cici kwlekwle. Kpɛkun kɛ bé fá yó alie’n be fa ndɛma’m be cici be wiengu su yɛ be sisi su naan ɔ jran cinnjin. Ndɛma waka’m be timan kukluku. Ɔ maan kɛ be fa sasa su’n be mantan su kpan yɛ aunmuan wluman be afiɛn. Fluwa kun m’ɔ kan ninnge nga be yo be Ezipti lɔ laa’n be ndɛ’n, ɔ seli kɛ alie nga be fa ndɛma be yo’n i tɛnndɛn nun kwla ju mɛtri 17. Ɔ maan be kwla fa alie kanlɛ waka 10 annzɛ 12 be sie i fama su nin bɛ su.

Laa Ezipti lɔ’n be diman ndɛma’n i yialɛ Nili nzue’n i nvɛnwunnvɛnwun lɛ. Asa ekun’n, sɛ be waan bé fá yó alie’n i yolɛ yoman ya. Kannzɛ bɔbɔ kɛ ɔ́ kɔ́ i ɲrun’n sran’m be wa fali waka be yoli alie dandan mun’n, sanngɛ jue trafuɛ mun ɔ nin koniɛn difuɛ’m be fali alie kanngan nga ndɛma yɛ be fa yoli’n be dili junman titi.

Sran’m be fuli alie nga ndɛma yɛ be fa yoli’n be nun cɛli kpa. Be flɛ Klisifuɛ klikli’m be blɛ su bian kun Plitaki. Ɔ ti fluwa klɛfuɛ. Ɔ seli kɛ i blɛ su sran wie’m be fuli alie sɔ’m be nun wie.