1. ?Kɛ nga Matie 24:9 fa kan’n sa’n, ngue ti yɛ kɛ sran’m be kpɔ e’n i sɔ’n boman e nuan-ɔn?

WAFA nga Zoova yili e’n ti’n, e kwla klo sran yɛ e kunndɛ kɛ be klo e wie. Ɔ maan kɛ sran kun kpɔ e’n, ɔ yo e ya yɛ wie liɛ bɔbɔ’n e klun titi e. I wie yɛle aniaan bla kun mɔ be flɛ i kɛ Zɔɔzina’n i liɛ’n. Ɔ tran Abloki lɔ. Ɔ seli kɛ: “Zoova mɔ n su i’n ti’n min manmin kpɔ min. Kɛ ɔ́ yó sɔ’n nn n le afuɛ 14. I sɔ’n boli min wla dan yɛ n ma buli i kɛ n timan sran kpa.” * Be flɛ aniaan bian kun kɛ Danilo. Ɔ seli kɛ: “Zoova i Lalofuɛ mɔ n ti ti’n sonja’m be boli min, be kpɛli min nzowa yɛ be seli min kɛ bé kún min. I sɔ’n ti’n min akunndan’n sanngannin, yɛ m’an buman min wun sran kun.” Kɛ sran’m be kpɔ e’n, ɔ yo e ya dan. Sanngɛ i sɔ’n boman e nuan afin Zezi dun mmua seli kɛ sran’m bé wá kpɔ́ e.—An kanngan Matie 24:9 nun.

2-3. ?Ngue ti yɛ sran’m be kpɔ Zezi i sɔnnzɔnfuɛ mun-ɔn?

² Like nga ti yɛ mɛn nunfuɛ’m be kpɔ Zezi i sɔnnzɔnfuɛ mun’n yɛle kɛ, kɛ Zezi sa’n be kusu be “timan mɛn’n nunfuɛ.” (Zan 15:17-19) Ɔ maan kannzɛ e ɲin yi mɛn siefuɛ mun’n, sanngɛ e manmanman be. E yoman politiki yɛ e manmanman drapo. Zoova kunngba cɛ yɛ e su i-ɔ. Yɛ e kle kɛ i kunngba cɛ yɛ ɔ le atin sie klɔ sran mun-ɔn. Sanngɛ Satan nin i “osu” nunfuɛ’m be liɛ’n be waan Ɲanmiɛn lemɛn i sɔ atin’n. (Bob. 3:1-5, 15) Kpɛkun e kan kle sran’m be kɛ Ɲanmiɛn i Famiɛn Dilɛ’n kunngba cɛ yɛ ɔ kwla siesie sran’m be su sa mun-ɔn. Asa ekun’n, e se be kɛ ɔ ka kan’n ɔ́ wá núnnún be kwlaa nga be tɛnndɛn i ɲrun’n. (Dan. 2:44; Ngl. 19:19-21) Jasin sɔ’n ti be nga be ti wun ase kanfuɛ’n be ndɛ fɛ. Sanngɛ ɔ ti klunwifuɛ’m be ndɛ ya.—Jue. 37:10, 11.

 ³ Like kun ekun nga ti yɛ mɛn nunfuɛ’m be kpɔ e’n, yɛle kɛ e nanti Ɲanmiɛn i mmla’m be su. Kusu like nga Ɲanmiɛn bu i like kpa’n, mɛn nunfuɛ’m be bu i like tɛ. Yɛ like nga Ɲanmiɛn bu i like tɛ’n, mɛn nunfuɛ’m be bu i like kpa. I wie yɛle kɛ andɛ’n, sran’m be bu i kɛ sɛ sran kun kunndɛ bla nin bian sukusuku naan ɔ yo i wunsu ɲannzuɛn sa mun’n, i sɔ’n timan tɛ. Kusu nn i sɔ ninnge tɛtɛ’m be yolɛ’n ti yɛ Ɲanmiɛn nunnunnin Sodɔmun nin Gomɔru klɔ mun’n niɔn. (Zid. 7) Kɛ mɔ e nanti ndɛ nga Biblu’n kɛn i ninnge sɔ’m be su’n ti’n, sran kpanngban be yo e finfin yɛ be waan e like yolɛ yo ya.—1 Piɛ. 4:3, 4.

4. ?Kɛ sran’m be kpɔ e’n, nzuɛn benin mun yɛ be kwla uka e naan y’a jran kekle-ɔ?

⁴ ?Kɛ sran’m be kpɔ e mɔ be kpɛ e nzowa’n, ngue yɛ ɔ kwla uka e naan y’a jran kekle-ɔ? Blɛ sɔ’n nun’n, ɔ fata kɛ e lafi su tankaan kpa kɛ Zoova úka e. Maan e Ɲanmiɛn sulafilɛ’n yo kɛ ɲrɛn sa. ‘I liɛ’n, klunwifuɛ’n i ta mma m’ɔ sɔ be nuan to’n, é fá núan be.’ (Efɛ. 6:16) Sanngɛ ɔ fataman kɛ e ka Ɲanmiɛn sulafilɛ’n ngunmin su. Ɔ fata kɛ e yi Ɲanmiɛn nin sran klolɛ’n i nglo wie. Afin sran ng’ɔ klo sran’n “ɔ faman ya ndɛndɛ.” Asa ekun’n, sa kwlaa sɔn i nun yɛ ɔ trɛ i awlɛn sa kwlaa nun. (1 Kor. 13:4-7, 13) Siɛn’n, é wá wún wafa nga Zoova i klolɛ’n nin aniaan’m be klolɛ’n nin e kpɔfuɛ mun bɔbɔ be klolɛ’n kwla uka e naan y’a jran kpɔlɛ mɔ be kpɔ e’n i ɲrun kekle’n.

5. ?Kɛ mɔ Zezi klo i Si’n ti’n ngue yɛ ɔ kwla yoli-ɔ?

⁵ Kɔnguɛ kasiɛn ka naan b’a kun Zezi’n, ɔ seli i sɔnnzɔnfuɛ kpa’m be kɛ: “N klo Siɛ’n ti’n, like nga Siɛ’n seli min kɛ n yo’n, yɛ n nian su n yo-ɔ.” (Zan 14:31) Kɛ mɔ Zezi klo Zoova ti’n, ɔ kwla jrannin sa kekle kwlaa nga be tɔli i su’n be ɲrun kekle. E kusu sɛ e klo Zoova’n, é kwlá jrán kekle wie.

6. ?Kɛ nga Rɔmunfuɛ Mun 5:3-5 be fa kan’n sa’n, kɛ mɛn nunfuɛ’m be kpɔ Zoova i sufuɛ mun’n wafa sɛ yɛ be wun yo be-ɔ?

⁶ Kɛ ɔ fɛ i laa lele andɛ’n, Zoova i klolɛ’n ukɛli i sufuɛ mun naan b’a kwla jran yalɛ klelɛ’n i ɲrun kekle. I wie yɛle kɛ kɛ Zifu’m be jɔlɛ difuɛ dandan’m be seli akoto’m be kɛ nán be bo jasin fɛ’n kun’n, Ɲanmiɛn klolɛ’n ti’n be ɲin yili ‘Ɲanmiɛn m’ɔ ti be siefuɛ’n trali klɔ sran mun.’ (Yol. 5:29; 1 Zan 5:3) Andɛ kusu’n, kɛ mɛn siefuɛ’m be kle aniaan’m be yalɛ’n Ɲanmiɛn klolɛ’n ti’n be jran kekle. Kɛ mɛn nunfuɛ’m be kpɔ e’n, i sɔ’n bubuman e sa sin. I kpa bɔbɔ’n ɔ yo e fɛ.—Yol. 5:41; an kanngan Rɔmunfuɛ Mun 5:3-5 nun.

7. ?Kɛ e awlofuɛ’m be kle e yalɛ’n ngue yɛ ɔ fata kɛ e yo-ɔ?

⁷ Kɛ e awlofuɛ’m be kle e yalɛ’n, i sɔ’n kwla yo kekle kpa man e. Kɛ be sie i nzɔliɛ kɛ e kunndɛ kɛ é sú Zoova wie’n, be nun wie’m be kwla bu i kɛ be su wa laka e. Yɛ wie’m be bu i kɛ e ti w’a saci. (An nian Marki 3:21 nun.) Ɔ maan be kwla kle e yalɛ tɛtɛ kpa. I sɔ’n kusu boman e nuan, afin Zezi seli kɛ: “Sran kun i bɔbɔ i awlo’n nunfuɛ mun yɛ bé wá yó i kpɔfuɛ-ɔ.” (Mat. 10:36) Kannzɛ e osufuɛ’m be yo e tɛ sɛ’n, sanngɛ e liɛ’n e su yoman be tɛ wie. Afin kɛ e klo Zoova’n e klo sran wie. (Mat. 22:37-39) Sanngɛ nán kɛ e klo be ti yɛ é fɔ́n Zoova i mmla mun-ɔn.

8-9. ?Ngue yɛ ɔ ukali aniaan bla kun naan w’a kwla jran kekle-ɔ?

⁸ Aniaan bla Zɔɔzina mɔ e dun mmua kɛnnin i ndɛ’n, ɔ jrannin yalɛ nga i manmin kleli i’n i ɲrun kekle. Ɔ seli kɛ: “I bo bolɛ nun’n, Zoova i Lalofuɛ’m be kle e nin min manmin e Biblu’n nun like. Sanngɛ kɛ ɔ dili anglo nsiɛn mɔ min waan ń kɔ́ aɲia’m be bo’n, min manmin wa boli min ɲrun tanndanlɛ bo. N ma wunnin i wlɛ kɛ ɔ nin be nga be nin Ɲanmiɛn b’a bu’n be nanti. Yɛ ndɛ nga sran sɔ’m be kan’n, i su yɛ ɔ jran kan ndɛ kle min-ɔn. Kpɛkun ɔ kpɛ min nzowa, ɔ tra min  timuɛn’n cuɛn i taan, ɔ mian min kɔmin yɛ ɔ gua min fluwa’m be blo. Kɛ n ɲannin afuɛ 15 be yoli min batɛmun. Sanngɛ min manmin w’a yaciman min yalɛ klelɛ. Ɔ fali min ɔli lika kun mɔ be fa talua nga be nɔn drɔgi annzɛ be yo sa sukusuku’m be kɔ lɔ’n, i nun. Nanwlɛ, kɛ sran kun m’ɔ fata kɛ ɔ klo wɔ yɛ ɔ nian ɔ lika’n, i yɛ ɔ tanndan ɔ ɲrun’n i sɔ’n timan pɔpɔ.”

⁹ ?Ngue yɛ ɔ ukali Zɔɔzina naan w’a kwla jran kekle-ɔ? Ɔ seli kɛ: “Kɛ min manmin bó min yalɛ klelɛ bo’n, nn m’an wie Biblu’n wunmuan’n i nun kanngan. Ɔ maan n lafi su kɛ like nga Zoova i Lalofuɛ’m be kle min’n, ɔ ti nanwlɛ yɛ e nin Zoova e afiɛn mantan kpa. N srɛli Zoova kpɛ sunman yɛ i kusu tieli min srɛlɛ’n. Cɛn kun’n, aniaan bla kun yiali min i awlo lɔ kɛ e ko suan Biblu’n nun like. Blɛ sɔ’n nun’n, aniaan’m be wlali min fanngan kpa. Be nin min trannin kɛ be awlo nunfuɛ sa. N wunnin i wlɛ weiin kɛ kannzɛ be nga be tanndan e ɲrun’n be ti sɛ ti sɛ’n, sanngɛ Zoova fanngan nun’n e kwla jran kekle.”

10. ?Ngue yɛ e kwla lafi su kɛ Zoova yó i titi-ɔ?

¹⁰ Akoto Pɔlu seli kɛ like fi kwlá yoman naan “Ɲanmiɛn w’a kloman e kun. E Min Klisi Zezi yili klolɛ sɔ’n i nglo wie.” (Rɔm. 8:38, 39) Kannzɛ bɔbɔ blɛ wie nun’n afɛ o e su’n, sanngɛ Zoova su yiman e ase le. Ɔ́ mán e wunmiɛn titi. Yɛ kɛ nga e fa wunnin i Zɔɔzina liɛ nun sa’n, Zoova sín aniaan’m be lika úka e.

11. ?Wafa sɛ yɛ klolɛ nga Zezi kɛnnin i ndɛ Zan 15:12, 13 nun’n, ɔ ukɛli i sɔnnzɔnfuɛ mun-ɔn? An fa sa kun be yiyi nun.

¹¹ Kɔnguɛ kasiɛn ka naan b’a kun Zezi’n, ɔ kpɛnnin i sɔnnzɔnfuɛ’m be wla kɛ be klo be wiengu. (An kanngan Zan 15:12, 13 nun.) Ɔ si kɛ sɛ be klo be wun tankaan kpa’n, be bo yó kun titi yɛ bé kwlá jrán kpɔlɛ mɔ mɛn nunfuɛ’m bé wá kpɔ́ be’n i ɲrun kekle. Maan e fa e ɲin e sie i aniaan nga be o Tesaloniki lɔ’n be su ndɛ’n su. Kɛ be takali lɔ asɔnun’n yɛ be kpɔfuɛ’m be boli be yalɛ klelɛ bo-ɔ. Ɔ nin i sɔ ngba’n, aniaan’m b’a yaciman Ɲanmiɛn sulɛ yɛ be kloli be wiengu titi. (1 Tes. 1:3, 6, 7) Pɔlu wlali be fanngan kɛ be klo be wiengu titi. I kpa bɔbɔ’n ɔ seli be kɛ ‘be yo i sɔ tra su.’ (1 Tes. 4:9, 10) Afin klolɛ sɔ’n ti’n, bé kwlá fɔ́nvɔ be nga be akunndan w’a sanngan’n yɛ bé kwlá súan be nga be leman wunmiɛn’n be bo. (1 Tes. 5:14) Aniaan sɔ’m be nantili Pɔlu i afɔtuɛ’m be su. Afin kɛ i afuɛ nuan yiali m’ɔ́ klɛ́ be fluwa nɲɔn su’n, ɔ seli be kɛ:  “Amun klo amun wiengu kpa tra laa’n.” (2 Tes. 1:3-5) Kɛ mɔ be kloli be wun ti’n, be kwla jrannin yalɛ klelɛ’n nin sa uflɛ ekun be ɲrun kekle.

12. ?Kɛ alɛ tɔli nvle kun nun’n, wafa sɛ yɛ lɔ aniaan’m be yili be wiengu klolɛ’n i nglo-ɔ?

¹² Maan e kan aniaan bian Danilo mɔ e dun mmua kɛnnin i ndɛ’n, ɔ nin i yi’n be ndɛ kan ekun. Kɛ alɛ tɔli be nvle’n nun’n, b’a yaciman aɲia’m be bo kɔlɛ nin jasin fɛ bolɛ. Yɛ aliɛ kan nga be le i’n be nin aniaan’m be cɛ nun. Cɛn kun’n, sonja’m be bali be awlo lɛ. Aniaan bian Danilo seli kɛ: “Be waan n se kɛ n timan Zoova i Lalofuɛ kun. Sanngɛ m’an kplinman su. I sɔ’n ti’n be boli min, yɛ be fali tui be sieli min ti’n su kɛ bé kún min. Kwlaa naan b’a ɔ’n be seli e kɛ bé bá ekun naan sɛ be ba’n, be nin min yi’n bé lá kekle nun. Kɛ ɔ yoli sɔ’n, ndɛndɛ kpa aniaan’m be fali e wlɛli i alie kun nun naan e wɔ klɔ uflɛ su. E wla su fiman klolɛ nga aniaan’m be yili i nglo e lika’n i su le. Kɛ e juli klɔ sɔ’n su’n, aniaan nga be o lɔ’n be mannin e aliɛ yɛ be ukali min maan n ɲannin junman nin sua. I sɔ’n ti’n e kwla sikeli aniaan uflɛ nga alɛ’n ti’n be wanndili’n.” Ndɛ sɔ’n kle kɛ sɛ e klo aniaan mun’n, blɛ kekle nun’n é kwlá jrán kekle.

13. ?Kɛ sran’m be kpɔ e’n, wafa sɛ yɛ Zoova kwla fɛ i wawɛ’n uka e naan y’a su i titi-ɔ?

¹³ Zezi seli i sɔnnzɔnfuɛ’m be kɛ be klo be kpɔfuɛ mun. (Mat. 5:44, 45) Nanwlɛ, i sɔ yolɛ’n timan pɔpɔ. Sanngɛ Ɲanmiɛn wawɛ’n i fanngan nun’n i sɔ’n kwla yo ye. Afin nzuɛn nga Ɲanmiɛn wawɛ’n yo maan klɔ sran yi i nglo’n i wie yɛle Ɲanmiɛn nin sran klolɛ nin awlɛn tralɛ nin klun ufue yolɛ nin wɛtɛɛ yolɛ ɔ nin be wun su nianlɛ. (Gal. 5:22, 23) Kɛ sran’m be kpɔ e’n, nzuɛn sɔ’m be kwla uka e naan y’a jran kekle. Kɛ sran wie’m be sie i nzɔliɛ kɛ be wun annzɛ be yi annzɛ be mma mun annzɛ be mantanfuɛ’m be yi nzuɛn sɔ’m be nglo’n, be yaci Zoova i sufuɛ’m be ɲrun tanndanlɛ. Yɛ be nun wie mun bɔbɔ be kaci e niaan. Ɔ maan sɛ Zoova mɔ e su i’n ti’n sran’m be kpɔ e naan be klolɛ yo kekle e sa nun’n, maan e srɛ Zoova kɛ ɔ fɛ i wawɛ’n man e. (Lik. 11:13) Yɛ maan e lafi su kɛ, kɛ e nanti ndɛ nga Ɲanmiɛn kan’n su’n i bo’n gua kpa titi.—Nya. 3:5-7.

14-15. ?Kɛ Yasiminnin i wun’n kleli i yalɛ’n, wafa sɛ yɛ ndɛ ng’ɔ o Rɔmunfuɛ Mun 12:17-21 nun’n ɔ ukɛli i naan w’a kwla jran kekle-ɔ?

¹⁴ Maan e fa e ɲin e sie i aniaan bla kun mɔ be flɛ i kɛ Yasiminnin’n i su. Kɛ ɔ kacili Zoova  i Lalofuɛ’n, i wun’n buli i kɛ nn b’a lɛkɛ i. Yɛ ɔ kunndɛli kɛ ɔ́ yó naan ɔ yaci Ɲanmiɛn sulɛ. Ɔ maan ɔ kpɛ i nzowa yɛ ɔ ko wunnin i yi’n i osufuɛ’m be wun naan be wa kan wie be kle i. Asa ekun’n, ɔ ko wunnin Ɲanmiɛn sulɛ wafa kun i su kpɛnngbɛn kun wun wie. I kpa bɔbɔ’n ɔ ɔli amuinfuɛ kun sin naan ɔ wa wlɛnwlɛn i. Be seli aniaan bla’n kɛ i dunman nun ti’n, i awlo’n sáci. Wie liɛ’n, i wun’n kɔ aɲia’m be bo ko kpɛ aniaan’m be nzowa. I kwlaa ngalɛ’n ti’n, ɔ ju wie’n Yasiminnin sun sunlɛ kpa.

¹⁵ Sanngɛ kɛ Yasiminnin kɔ aɲia’m be bo’n aniaan’m be fɔnvɔ i yɛ be wlɛ i fanngan. Asɔnun kpɛnngbɛn’m be seli i kɛ ɔ nanti ndɛ ng’ɔ o Rɔmunfuɛ Mun 12:17-21 nun’n su. (An kanngan nun.) Yasiminnin seli kɛ: “Ndɛ sɔ’n i su nantilɛ’n timan pɔpɔ mlɔnmlɔn. Sanngɛ n srɛli Zoova kɛ ɔ uka min, yɛ n miannin min ɲin n nantili ndɛ sɔ’n su. Ɔ maan kɛ min wun’n i ɲinfu fa aunɲan guɛ i gbo’n nun’n, n isa. Kɛ ɔ kpɛ min nzowa’n, n tɛmɛn i su. Yɛ sɛ ɔ tɔ tukpacɛ’n, n niɛn i lika.”

16-17. ?Ngue yɛ Yasiminnin i su ndɛ’n kle e-ɔ?

¹⁶ Kɛ Yasiminnin yili klolɛ’n i nglo i wun’n i lika’n, i bo’n guali klanman. Ɔ seli kɛ: “Min wun’n wa lafili min su kpa trali laa’n. Afin ɔ si kɛ sa kwlaa nun’n n di nanwlɛ. Siɛn’n kɛ n kan like nga n lafi su’n i ndɛ n kle i’n, ɔ sie i su. Ɔ kplinnin su kɛ e siesie e afiɛn naan e awlo’n nun tɔ fɔun. Asa ekun’n, ɔ wla min fanngan kɛ n wɔ aɲia’m be bo. Siɛn’n, e nin min wun’n e afiɛn sɛ yɛ e di aklunjuɛ. Ń srɛ́ Zoova kɛ ɔ kan min wun’n i awlɛn naan ɔ kaci i sufuɛ wie.”

¹⁷ Yasiminnin i su ndɛ’n kle kɛ sran ng’ɔ klo sran’n ‘sa kwlaa sɔn i nun, i wla o like kwlaa su yɛ ɔ trɛ i awlɛn sa kwlaa nun.’ (1 Kor. 13:4, 7) Kɛ sran’m be kpɔ e’n, ɔ kpɛ awlɛn sanngɛ sɛ e klo be’n é kwlá be. Yɛle kɛ klolɛ mɔ e klo be’n ti’n be kwla kaci be nzuɛn’n, yɛ be kwla yaci e ɲrun tanndanlɛ. Asa ekun’n, Zoova i klun jɔ́ e wun. Sanngɛ sɛ e yoli i lele naan e kpɔfuɛ’m be yaciman e yalɛ klelɛ’n, e kwla di aklunjuɛ. ?Wafa sɛ?

18. ?Ngue ti yɛ kɛ sran’m be kpɔ e’n e klun jɔ-ɔ?

¹⁸ Zezi seli kɛ: ‘Kɛ sran’m be kpɔ amun’n, [...] amun liɛ su ti ye.’ (Lik. 6:22) Ndɛ nga Zezi kannin’n kleman kɛ e klo kɛ sran’m be kpɔ e annzɛ Ɲanmiɛn su mɔ e lafi’n ti’n be kle e yalɛ. ?Yɛ nn ngue ti yɛ kɛ be kpɔ e’n e kwla di aklunjuɛ-ɔ? Like nsan ti-ɔ. I klikli’n yɛle kɛ  kɛ be kpɔ e mɔ e jran kekle’n, Ɲanmiɛn i klun jɔ e wun. (1 Piɛ. 4:13, 14) I nɲɔn su’n yɛle kɛ ɔ yo maan e lafi Ɲanmiɛn su kpa tra laa’n. (1 Piɛ. 1:7) Yɛ i nsan su’n yɛle kɛ é ɲɛ́n i nuan like. Yɛle kɛ Ɲanmiɛn mán e nguan m’ɔ leman awieliɛ’n.—Rɔm. 2:6, 7.

19. ?Ngue ti yɛ kannzɛ be boli akoto mun’n sanngɛ be klun jɔli-ɔ?

¹⁹ Kɛ Ɲanmiɛn cɛnnin Zezi’n, w’a cɛman i akoto’m be wunnin aklunjuɛ ng’ɔ kɛnnin i ndɛ’n i wlɛ. Cɛn kun’n, be kpɔfuɛ’m be boli be nin ngble yɛ be seli be kɛ nán be bo jasin fɛ’n kun. Ɔ nin i sɔ ngba’n be klun jɔli. ?Ngue ti-ɔ? Afin ‘Zezi dunman nun ti’n, be yoli be finfin. Yɛ i sɔ’n yoli be cenjele like.’ (Yol. 5:40-42) Kɛ mɔ be klo be Min’n dan’n ti’n, b’a sroman be kpɔfuɛ mun. Wafa nga be yili klolɛ sɔ’n i nglo’n yɛle kɛ be boli jasin fɛ’n yɛ “b’a yacimɛn i sɔ yolɛ.” Andɛ’n, kannzɛ kekle o aniaan kpanngban be su’n, sanngɛ be te su Zoova juejue su. Afin be si kɛ Zoova i wla su fiman junman nga be di mɛn i’n, ɔ nin klolɛ nga be fa klo i dunman’n be su le.—Ebr. 6:10.

20. ?Ndɛ benin yɛ é wá yíyí nun like suanlɛ nga i sin liɛ’n nun-ɔn?

²⁰ Kɛ mɛn tɛ nga nin-a wieman’n, mɛn nunfuɛ’m be su yaciman e kpɔlɛ. (Zan 15:19) Sanngɛ ɔ fataman kɛ srɛ kun e. Afin Zoova ‘wlá e fanngan, yɛ ɔ́ sásá e klunwifuɛ’n i lika.’ Like suanlɛ nga i sin liɛ’n nun’n é wá yíyí ndɛ sɔ’n nun. (2 Tes. 3:3) I sɔ’n ti’n, maan e klo Zoova, e klo aniaan mun yɛ e klo e kpɔfuɛ mun wie. Sɛ e yo sɔ’n, e bo yó kun titi yɛ é láfi Ɲanmiɛn su tankaan kpa. Asa ekun’n, i sɔ’n mánmán Zoova yɛ é klé kɛ klolɛ’n ɔ kwla kpɔlɛ’n.