Sanngɛ e sieli i nzɔliɛ kɛ be nga be fa ajulisu mannzin’m be suan like ngboko’n, kɛ ɔ́ kɔ́ i ɲrun’n:

• sɛ be su kanngan ndɛ kun nun’n, be kwlá faman be ɲin be siemɛn i like nga be su suan’n su kpa.

• be kwlá faman be ɲin be siemɛn i like kunngba su.

• kɛ be ngunmin be wo’n be ɲrun yo be koun ndɛndɛ.

KANNGANLƐ’N KWLA YO KEKLE Ɔ SA NUN

Be nga be fa ajulisu mannzin’m be di junman dan’n, be kwlá traman be awlɛn be kannganman fluwa wunmuan kun nun. I sɔ’n ti’n, be flafla su. Afin be kunndɛ kɛ bé wún ndɛ cinnjin ng’ɔ o nun’n i wlɛ ndɛndɛ.

Sɛ sran kun su kanngan fluwa kun nun naan ɔ kunndɛ kɛ ɔ́ wún kosan wie i su tɛlɛ ndɛndɛ’n, ɔ kwla flafla ndɛ’n su. Sanngɛ sɛ ɔ kunndɛ kɛ ɔ́ wún i wlɛ kpa’n, ɔ fata kɛ ɔ guɛ i wla ase kanngan nun blɛblɛblɛ.

BU KOSAN NGA I AKUNNDAN: ?A kwla tra ɔ awlɛn kanngan ndɛ kpɔlɛ tɛnndɛn’m be nun? ?Sɛ a gua ɔ wla ase kanngan fluwa kun nun’n, a bu i kɛ á wún ndɛ’n i wlɛ kpa? ?Ngue ti yɛ a bu i sɔ-ɔ?​—NYANNDRA MUN 18:15.

A SU KWLÁ FAMAN Ɔ ƝIN SIEMƐN I LIKE KUNNGBA SU

Sran wie’m be fa ajulisu mannzin’m be yo ninnge kaka blɛ kunngba’n nun. I wie yɛle kɛ sɛ be su suan fluwa’n, be kunngba’n be klɛ be janvuɛ’m be mesazi. Kusu kɛ sran kun fɛ i ɲin sie i like kaka su’n, kasiɛn su’n ninnge ng’ɔ yo be’n be nun wie fi yoman kpa.

Sɛ e su yo like kun’n, kɛ ɔ ko yo naan y’a fa e ɲin y’a sie i like sɔ’n su lele y’a guɛ i ti nin i bo’n, ɔ timan pɔpɔ. Sanngɛ sɛ e mian e ɲin e yo sɔ’n, é ɲán su ye. Talua kun m’ɔ suan Grasi’n sieli i sɔ liɛ’n i nzɔliɛ wie. Ɔ seli kɛ: “Kɛ a fa ɔ ɲin sie i like kunngba su’n, a fɔnman dan kpɛkun ɔ wla gua ase. N sieli i nzɔliɛ kɛ, kɛ n yo like kaka blɛ kunngba’n nun’n, i bo’n guaman kpa. Sanngɛ kɛ n fa min ɲin sie i like kunngba su’n, n yo like sɔ’n i kpa.”

BU KOSAN NGA I AKUNNDAN: ?Ajulisu mannzin’m be ti’n, a kwlá faman ɔ ɲin siemɛn i like kunngba su? ?Kɛ a suan like’n, ɔ wla fi su ndɛndɛ?​—NYANNDRA MUN 17:24.

KƐ Ɔ NGUNMIN A WO’N Ɔ ƝRUN KWLA YO Ɔ KOUN NDƐNDƐ

Kɛ sran wie’m be ngunmin be wo’n, be wunman be wun fɛ mlɔnmlɔn. I ti’n, be fa ajulisu mannzin’m be di junman naan be ɲrun w’a yoman be koun. Sa kunngba’n wo bla kun m’ɔ suan Olivia’n i su wie. I waan: “Sɛ n di miniti 15 naan m’an nianman min pɔɔtablu annzɛ min tablɛti’n nun annzɛ m’an nianman televiziɔn’n, min ɲrun yo min koun.”

Kusu nn kɛ sran kun i ngunmin wo’n, yɛ ɔ kwla bu akunndan kpa-ɔ. Asa’n, ɔ kwla suan ninnge uflɛ. I bakan-o, i kpɛnngbɛn-o, kɛ be ngunmin be wo’n be kwla ɲan su ye kpa.

BU KOSAN NGA I AKUNNDAN: ?Kɛ ɔ ngunmin a wo’n, ngue yɛ a kwla yo i blɛ sɔ’n nun m’ɔ́ yó ɔ ye-ɔ?​—1 TIMOTE 4:15.

BU LIKE NGA A FA AJULISU MANNZIN MUN YO’N I AKUNNDAN

?Wafa sɛ yɛ a kwla fa ajulisu mannzin mun suan like kpa tra laa’n niɔn? ?Ngue yɛ a kwla yo naan kɛ á súan like’n ajulisu mannzin’m b’a kleman ɔ yalɛ-ɔ?