Ajulisu mannzin’m be kwla ɲan ta a nin ɔ janvuɛ mun amun nantilɛ’n su

Andɛ’n ajulisu mannzin’m be ti’n, sɛ sran nɲɔn be nunman likawlɛ’n, be kwla koko yalɛ. Kannzɛ be afiɛn ti nun dan kpa bɔbɔ’n, sanngɛ be kwla wun be wun be koko yalɛ. I sɔ’n kle weiin kɛ ajulisu mannzin’m be yo e ye kpa. I ti’n, sran wie’m be sin be lika naan be nin be janvuɛ’m b’a koko yalɛ naan be afiɛn w’a mantan kpa.

Sanngɛ kɛ ɔ́ kɔ́ i ɲrun’n:

be janvuɛ’m be ndɛ w’a loman be kpa kun.
be wun wa yoli be kɛ be yoman like kpa kun sa.
be wa buli be ngunmin be wun akunndan.

LIKE NG’Ɔ FATA KƐ A WUN I WLƐ’N

Ɔ CƐMAN NAAN Ɔ WIENGU’M BE NDƐ W’A LOMAN Ɔ KUN

Sɛ e waan é klé e wiengu’m be kɛ be ndɛ lo e’n, ɔ fata kɛ e bu be akunndan titi. Sanngɛ sɛ dɔ kwlaa su e su klɛ mesazi annzɛ e o ɛntɛnɛti su’n, e su kwlá yomɛn i sɔ liɛ’n.

Sɛ a nin sran kaka amun klɛ amun wiengu mesazi naan ɔ janvuɛ kpa wie klɛ wɔ mesazi’n, a su ɲanman blɛ tɛmɛn i su. Afin kɛ mɔ sran kaka b’a blɛ wɔ mesazi’n ti’n, á kúnndɛ kɛ á tɛ́ be kwlaa be su. Ɔ maan sɛ ɔ janvuɛ sɔ’n kunndɛ kɛ a ukɛ i’n, a su kwlá ukɛmɛn i.

BU KOSAN NGA I AKUNNDAN: ?Kɛ a nin ɔ janvuɛ mun amún klɛ́ amun wiengu mesazi’n, wafa sɛ yɛ a kwla kle be kɛ ‘be ndɛ lo wɔ sakpa-ɔ’?—1 PIƐLI 3:8.

Ɔ KWLA YO Ɔ KƐ A YOMAN LIKE KPA KUN SA

Fluwa sifuɛ wie’m be sieli i nzɔliɛ kɛ be nga be di dɔ kaka ɛntɛnɛti su’n, be wunman be wun fɛ. Asa ekun’n, be waan sɛ sran kun kɔ ɛntɛnɛti su ko nian foto nin ninnge uflɛ nga i wiengu’m be sieli be lɔ’n, kasiɛn su’n ɔ kwla yo i kɛ “ɔ sacili i blɛ’n naan w’a yoman like kpa kun sa.”

Asa ekun’n, sɛ sran kun kɔ ɛntɛnɛti su naan ɔ ko nian foto nga i wiengu’m be sie be lɔ’n, ɔ kwla fɛ i wun sunnzun be. Kpɛkun ɔ kwla bu i kɛ be kpa trɛ i. Afin kɛ ɔ́ wá wún be foto mun’n, ɔ́ bú i kɛ be di mɛn kpa naan i liɛ’n ɔ siman like nga be flɛ i mɛn dilɛ’n.

BU KOSAN NGA I AKUNNDAN: ?Kɛ a kɔ ɛntɛnɛti su’n, ngue yɛ a kwla yo naan w’a faman ɔ wun w’a sunnzunman ɔ wiengu mun-ɔn?—GALASIFUƐ MUN 6:4.

A KWLA BU Ɔ NGUNMIN Ɔ WUN AKUNNDAN

Suklu klefuɛ kun sieli i nzɔliɛ kɛ i suklu ba’m be nun sunman be tra be nga be kwla ɲan like be sa nun’n be janvuɛ. Ɔ maan be nga be kwlá yoman be ye’n, be traman be janvuɛ. Be ɲrun’n, be janvuɛ sɔ’m be ti kɛ pɔɔtablu mɔ kɛ ɔ sa mian’n a fa flɛ, sanngɛ kɛ a ko wie flɛ’n nn w’a yi i lɛ’n sa.

BU KOSAN NGA I AKUNNDAN: ?Ninnge nga a sie be ɛntɛnɛti su’n, be kle kɛ a ti sran m’ɔ fɛ i wun sunnzun i wiengu mun annzɛ a ti sran m’ɔ bu i ngunmin i wun akunndan-ɔn?—GALASIFUƐ MUN 5:26.

LIKE NGA A KWLA YO’N

NIAN Ɔ WUN SU AJULISU MANNZIN’M BE LIKA

Kɛ á fá ajulisu mannzin mun dí junman’n, nian ɔ wun su. I liɛ’n, a nin ɔ janvuɛ mun amún kókó yalɛ klanman kpɛkun amun afiɛn mántan kpa.

BIBLU’N NUN AFƆTUƐ: ‘Sran ng’ɔ klo sran’n, ɔ bumɛn i ngunmin i wun akunndan.’—1 KORƐNTIFUƐ MUN 13:4, 5.

Sie ajalɛ nga a kunndɛ kɛ á nánti su’n be nzɔliɛ annzɛ klɛ ɔ bɔbɔ ɔ liɛ.

E nin sran mun é kókó yalɛ trele. (N su kaman mesazi klɛlɛ su ngunmin.)
Sɛ e nin sran kun e su ijɔ’n, ń síe min pɔɔtablu’n mmua annzɛ ń tó i amunle.
Ń kpɛ́ blɛ nga n di i ɛntɛnɛti su’n i sin.
Sɛ e nin sran kun e su ijɔ’n, ń síe min su kpa i nuan bo.
Sɛ sa kekle wie o min janvuɛ kun su’n, ń flɛ́ i.

AN TINNGE!