Sran wie’m be sieli i nzɔliɛ kɛ ba kanngan nga be di dɔ kaka ɛntɛnɛti su’n:

• be kwla kaci ajulisu mannzin’m be kanga.

• be kwla kpɛ sran nzowa ɛntɛnɛti su annzɛ be wiengu’m be kwla yo sɔ be lika.

• be kwla fite foto tɛtɛ’m be su.

BE KWLA KACI BE PƆƆTABLU’M BE KANGA

Sran kaka be fa be pɔɔtablu’m be kɔ ɛntɛnɛti su be ko to ze video annzɛ be yo ninnge uflɛ wie mun. Sanngɛ kɛ ɔ́ kɔ́ i ɲrun’n, be nun sunman be kaci ninnge sɔ’m be kanga. I sɔ’n kusu boman e nuan. Afin fluwa kun seli kɛ: “Be nga be yi pɔɔtablu mun’n, be kunndɛ kɛ e fa be di junman blɛ kwlaa nun. I sɔ’n ti’n, be yo maan be nun junman dilɛ yo fɛ kpa.” Asa’n, aata difuɛ wie’m be yi be ninnge’m be nglo ɛntɛnɛti su. Yɛ kɛ e fa e pɔɔtablu mun e kɔ ɛntɛnɛti su mɔ e nian ninnge sɔ mun’n, e yo maan be ɲan sika.

BU KOSAN NGA I AKUNNDAN: ?Ajulisu mannzin’m be ti’n min mma’m be ɲanman be ti be yoman like uflɛ? ?Wafa sɛ yɛ n kwla uka be naan b’a fa be blɛ’n b’a yo ninnge nga be ti cinnjin kpafuɛ mun-ɔn?​—EFƐZIFUƐ MUN 5:15, 16.

BE KWLA KPƐ SRAN NZOWA ƐNTƐNƐTI SU

Sran wie’m be kɔ ɛntɛnɛti su be ko kpɛ sran’m be nzowa annzɛ be kan ndɛ tɛtɛ be kle be.

Like nga ti yɛ be yo sɔ’n, yɛle kɛ be kunndɛ kɛ sran’m be klo be sa annzɛ be fa be ɲin be sie be su. Sran wie mun ekun be liɛ’n, sɛ be kɔ ɛntɛnɛti su naan be wun i kɛ be janvuɛ’m be dili cɛn naan b’a yiaman be wie’n, ɔ yo be ya. Ɔ maan be kpɛ be nzowa ɛntɛnɛti su.

BU KOSAN NGA I AKUNNDAN: ?Min mma’m be kpɛ sran nzowa ɛntɛnɛti su? (Efɛzifuɛ Mun 4:31) ?Sɛ be kɔ ɛntɛnɛti su naan be wun i kɛ be wiengu’m be yoli ninnge wie mun naan b’a yiaman be wie’n, be fa ya ble?

BE KWLA FITE FOTO TƐTƐ’M BE SU

Be diman foto nin video nga be yi bian nin bla nna nga be fa fite nzra nun’n i nglo’n be yalɛ ɛntɛnɛti su. Siɛ nin niɛn wie’m be fa ninnge wie’m be sie i be ajulisu mannzin’m be su naan be mma’m b’a kwlá nianman ninnge tɛtɛ sɔ mun. Sanngɛ wie liɛ’n, ɔ yoman ye.

Ba kanngan wie’m be yi be bo ngbɛn kpɛkun be ci be wun foto be fa man be wiengu mun ɛntɛnɛti su. Nvle wie’m be nun’n, mmla’n tannin i sɔ yolɛ’n afin ɔ ti tɛ kpa. Ɔ maan ba kanngan nga be yo sɔ’n ɔ nin be wiengu nga be niannin be foto mun’n, be tra be kwlaa be wla be bisua.

BU KOSAN NGA I AKUNNDAN: ?Ngue yɛ n kwla yo naan min mma’m b’a cimɛn i sɔ foto mun b’a manman be wiengu mun ɛntɛnɛti su-ɔ? ?Annzɛ ngue yɛ n kwla yo naan b’a niɛnmɛn i sɔ fɔtɔ mun-ɔn?​—EFƐZIFUƐ MUN 5:3, 4.

NIAN Ɔ MMA’M BE SU

Kannzɛ ba kanngan’m be si ajulisu mannzin’m be nun junman di kpa’n, sanngɛ ɔ fata kɛ e nian be su naan sa w’a ɲanman be. Fluwa kun seli kɛ sɛ a fa pɔɔtablu annzɛ i wunsu mannzin wie man ɔ wa wie naan a niɛnmɛn i su’n, ɔ ti kɛ “w’a su i bo w’a yi i nzue nun sa. Kusu nn ɔ siman nzue wɛ.”

Sie ajalɛ nga a kunndɛ kɛ á nánti su’n be nzɔliɛ annzɛ klɛ ɔ bɔbɔ ɔ liɛ.

• Min nin min wa’n, é kókó wafa ng’ɔ kwla fa ajulisu mannzin mun yo like kpa’n i su yalɛ.

• Sɛ min wa’n i wiengu’m be yo like wie naan b’a flɛmɛn i wie’n, ń úkɛ i naan i sa sin w’a bubumɛn i dan.

• Ń yó like kwlaa nga n kwla yo naan min wa’n w’a fiteman ɛntɛnɛti su ninnge tɛtɛ wie’m be su.

• Ɔ ju wie’n, ń nían ninnge nga be o min wa’n i pɔɔtablu’n nun’n.

• Ń klé i dɔ ng’ɔ fata kɛ ɔ fɛ i pɔɔtablu kan ngowa’n.

• Kɛ ba’n kɔ́ lalɛ’n, ń dé pɔɔtablu’n i sa nun.

• É kpɛ́ mmla kun: sɛ e su di like’n, sran fi leman atin faman pɔɔtablu niannianman nun.