1-2. ?Kɛ nga Jue Mun 34:9 fa kan’n sa’n, ngue yɛ e kwla yo naan y’a wun kɛ Zoova ti kpa dan-ɔn?

WIENUN-ƆN, sran kun w’a man wɔ aliɛ kun mɔ a nin-a dimɛn i le’n kɛ a di. Kɛ mɔ a nin-a diman wie le ti’n, atrɛkpa’n á níɛn i siin annzɛ á fá fúanfúan ɔ bue nían sɛ ɔ bɔn fannin-o. Annzɛ á úsa wafa nga be tɔnnin aliɛ sɔ’n annzɛ á úsa sran mun sɛ ɔ yo fɛ-o. Sanngɛ sɛ ɔ bɔbɔ w’a diman kan w’a nianman’n, a su kwlá wunmɛn i wlɛ sɛ ɔ yo fɛ annzɛ ɔ yoman fɛ-o.

² I wafa kunngba’n, kɛ e kanngan Biblu’n nin e fluwa’m be nun’n, e wun i wlɛ kɛ Zoova ti kpa dan. Asa ekun’n, kɛ aniaan’m bé kán ninnge kpakpa nga Zoova fa mannin be’n be ndɛ’n, e wun i wlɛ kɛ Zoova ti kpa dan wie. Sanngɛ sɛ e bɔbɔ e kunndɛ kɛ é wún i wlɛ kɛ Zoova ti kpa dan’n, ɔ fata kɛ e sɛ i e nian. (An kanngan Jue Mun 34:9 nun.) Maan e fa sa kun e kan wafa nga e kwla yo sɔ’n i ndɛ. Wienun-ɔn, aniaan kun kunndɛ kɛ ɔ́ káci atin bofuɛ. Kɛ ɔ ko yo naan w’a yo sɔ’n ɔ fata kɛ ɔ kpɔci ninnge wie mun. Ɔ si kɛ Zezi waan sɛ e fa Ɲanmiɛn i sulɛ’n e sie i like kwlaa ɲrun’n, Zoova fá ninnge nga e sa mian be wun’n mán e. Sanngɛ i bɔbɔ nin-a yoman sɔ wie le. (Mat. 6:33) Kɛ m’ɔ lafi ndɛ nga Zezi kannin’n su ti’n, ɔ yoli i sika’n i cɛcɛ kpɛkun ɔ siesieli i blɛ’n i wafa uflɛ. Ɔ maan ɔ kwla kacili atin bofuɛ. Kɛ ɔ yoli sɔ’n, ɔ wunnin i kɛ Zoova niɛnnin i lika sakpa. Kɛ m’ɔ sali Zoova niannin’n ti’n, ɔ wunnin i kɛ “ɔ ti kpa dan.”

3. ?Kɛ nga Jue Mun 31:20 fa kan’n sa’n, wan mun yɛ Zoova yra be su kpa’n niɔn?

³ Zoova “ti kpa man sran’m be kwlakwla.” Ɔ yo be nga be simɛn i bɔbɔ’n be ye. (Jue. 145:9; Mat. 5:45) Sanngɛ be nga be klo i mɔ be tu be klun be su i’n yɛ ɔ yra be su kpa’n niɔn. (An kanngan Jue Mun 31:20 nun.) Maan e kan ninnge kpakpa nga Zoova yo man e’n be nun wie’m be ndɛ.

4. ?Wafa sɛ yɛ Zoova yo be nga be fa be wun be mɛntɛn i’n be ye-ɔ?

 ⁴ Kɛ e nanti Zoova i mmla’m be su’n, e ɲan su ye. Kɛ e suɛnnin i su like mɔ e boli i sulɛ bo’n, ɔ ukali e maan e yacili ninnge tɛtɛ’m be yolɛ nin be akunndan bulɛ. (Kol. 1:21) Asa ekun’n, kɛ e fali e wun mɛnnin i mɔ be yoli e batɛmun’n, e ɲannin su ye dan ekun. Yɛle kɛ e akunndan’n w’a buman e fɔ kun yɛ e nin i e trali janvuɛ.​—1 Piɛ. 3:21.

5. ?Jasin fɛ’n i bolɛ nun’n wafa sɛ yɛ Zoova kle e kɛ ɔ ti kpa dan-ɔn?

⁵ Jasin fɛ’n i bolɛ nun kusu’n, e wun i wlɛ kɛ Zoova ti kpa dan. I wie yɛle kɛ e nun wie’m be sa ɲan. Ɔ maan i nun mɔ be nin-a kaciman Zoova i Lalofuɛ’n, be lafiman su kɛ cɛn kun’n bé kwlá bóbó sran’m be anuan bé kán Ɲanmiɛn ndɛ klé be. Sanngɛ andɛ’n Zoova fanngan nun’n be yo sɔ. I kpa bɔbɔ’n be di aklunjɔɛ i sɔ yolɛ’n nun. Asa ekun’n, Zoova ukali be sa wie’m be nun ekun. I wie yɛle kɛ kɛ bé bó jasin fɛ’n mɔ sran’m be tanndan be ɲrun’n, ɔ yo maan be klun titiman be. Kpɛkun sɛ be su yiyi ndɛ wie nun bé klé sran kun m’ɔ klo Ɲanmiɛn ndɛ’n naan be wla fili ndɛ mma kun su’n, ɔ yo maan be wla kpɛn su. Asa’n sɛ lika nga be bo jasin fɛ’n lɛ’n sran’m be ndɛ nunman Ɲanmiɛn ndɛ nun’n, ɔ wla be fanngan naan b’a bo jasin fɛ’n titi.​—Zer. 20:7-9.

6. ?Wafa sɛ ekun yɛ Zoova kle kɛ ɔ ti kpa dan-ɔn?

⁶ Wafa nga Zoova kle e kɛ ɔ ti kpa dan’n i kun ekun yɛle kɛ ɔ kle e jasin fɛ’n i bolɛ. (Zan 6:45) I wie yɛle kɛ lemɔcuɛ afiɛn aɲia’n i bo’n, be yi wafa nga e nin sran mun e kwla koko yalɛ’n i nglo be kle e. Kpɛkun be wla e fanngan kɛ e nian su e bo jasin fɛ’n. Kɛ be kle e ajalɛ uflɛuflɛ kun’n, i bo bolɛ nun’n e kwla sisi e bo ka naan y’a nanti su. Sanngɛ kɛ e mian e ɲin e nanti su’n, e wun i wlɛ kɛ ajalɛ sɔ’n ti kpa dan. Asa’n aɲia kanngan nin aɲia dandan’m be bo’n, ɔ ju wie’n be se e kɛ e bo jasin fɛ’n i wafa wie mɔ e nin-a yoman wie le-ɔ. I lɛ nun’n, e kwla sisi e bo ka naan y’a nanti ndɛ sɔ’n su. Sanngɛ kɛ e mian e ɲin e yo sɔ’n, e wun i kɛ Zoova yra su. Kannzɛ e su sa’m be ti sɛ ti sɛ’n, sanngɛ kɛ e lafi Zoova su mɔ e tu e klun e di i junman’n, ɔ yra e su. Siɛn’n, maan e kan wafa ng’ɔ yo sɔ’n be nun wie’m be ndɛ. I sin’n é wá kán ninnge wie mɔ e kwla yo be naan y’a di Zoova i junman’n i kpa ekun’n be ndɛ wie.

7. ?Sɛ e di Zoova i junman’n i kpa tra laa’n, wafa sɛ yɛ i bo’n gúa-ɔ?

⁷ Be nin Zoova be afiɛn mantan kpa ekun. Maan e kan aniaan bian kun m’ɔ suan Samiɛli’n, * i ndɛ kan. Ɔ ti asɔnun kpɛnngbɛn yɛ ɔ nin i yi be tran Kolɔnbi. Ɔ nin i yi be ti atin bofuɛ, sanngɛ be kunndɛli kɛ bé kɔ́ asɔnun bo kun mɔ i nunfuɛ’m be mian jasin bofuɛ’m be wun lɔ’n i nun. Kɛ ɔ ko yo naan b’a kwla yo sɔ’n, ɔ fata kɛ be kpɔci ninnge wie mun. Aniaan bian’n seli kɛ: “E nantili ndɛ ng’ɔ o Matie 6:33 nun’n su, yɛ e yacili ninnge nga e sa mianman be wun’n be tolɛ. Sanngɛ like nga i yolɛ yoli kekle e sa nun’n yɛle e sua’n i nun tulɛ’n. E kplannin e sua’n kɛ nga e bɔbɔ e fa klo’n sa yɛ e fali e bɔbɔ e sika yɛ e fa kplannin-ɔn. Y’a usaman bosia yɛ e fa kplannin-ɔn.” Kɛ aniaan’n nin i yi’n be ɔli asɔnun bo uflɛ sɔ’n nun’n, be wunnin i wlɛ kɛ b’a mianman sika wun dan. Aniaan bian’n seli ekun kɛ: “Zoova boli e ɲrun atin yɛ ɔ tɛli e srɛlɛ’m be su. Nanwlɛ, wafa ng’ɔ niannin e lika’n, ɔ yoli i liɛ ngunmin kun. Ɔ maan e wunnin i wlɛ kɛ ɔ klo e dan naan i klun jɔ e wun.” Ɔ kusu sɛ a di Zoova i junman’n i kpa tra laa’n, amun afiɛn mántan kpa yɛ ɔ́ nían ɔ lika.​—Jue. 18:26.

8. ?Ngue yɛ aniaan bian Ivanin nin i yi’n be su ndɛ’n kle e-ɔ?

 ⁸ Be di aklunjɔɛ Zoova i junman’n i dilɛ’n nun. Maan e kan aniaan bian kun m’ɔ suan Ivanin’n i ndɛ kan. Ɔ nin i yi Viktoria be ti atin bofuɛ yɛ be tran Kiigizistan. Be kpɔcili ninnge wie mun naan sɛ anuannzɛ’n mian sran wun lika kun’n b’a kwla wɔ. Sɛ ɔ ti Ɲanmiɛn sulɛ sua’m be kplanlɛ bɔbɔ-o, bé kɔ́. Aniaan bian Ivanin seli kɛ: “E tuli e klun e dili junman kwlaa nga be fa mannin e’n. Kɛ e di junman lele mɔ aliɛ ko san’n, y’a fɛ kpa sanngɛ e klun jɔ. Afin e si kɛ e tuli e klun e dili Zoova i junman’n. Asa ekun’n, e nin aniaan kaka e trali janvuɛ yɛ e yoli ninnge kpanngban. I kwlaa sɔ’n mannin e aklunjɔɛ.”​—Mar. 10:29, 30.

9. (1) ?Ngue yɛ aniaan bla kun yoli naan w’a di Zoova i junman’n i kpa w’a tra laa-ɔ? (2) ?Wafa sɛ yɛ i bo’n guali-ɔ?

⁹ Kannzɛ sa kekle o e su’n, sanngɛ e kwla di aklunjɔɛ Zoova i junman’n i dilɛ nun. I wie yɛle aniaan bla kun m’ɔ suan Mirɛyi’n i liɛ’n. W’a yo kpɛnngbɛn yɛ ɔ tran sran ble mɛn’n nun. Laa’n ɔ di dɔɔtrɔ junman sanngɛ kɛ ɔ fali antrɛti’n ɔ kacili atin bofuɛ. Tukpacɛ wie ti’n i kpɔlɛkpɔlɛ’m be nun yo i ya. Ɔ maan nantilɛ’n ti kekle i sa nun. I sɔ’n ti’n, kɛ ɔ bo jasin fɛ awloawlo’m be nun’n, dɔ kunngba cɛ yɛ ɔ kwla di-ɔ. Sanngɛ kɛ ɔ fa kakaklolo bo jasin fɛ’n, ɔ kwla cɛ kan. I sɔ m’ɔ yo’n ti’n ɔ kle sran kaka be Biblu’n nun like. Ɔ kle wie’m be like telefɔnun nun. ?Ngue ti yɛ aniaan bla’n kunndɛli kɛ ɔ́ tú i klun dí Zoova i junman’n i kpa ekun-ɔn? I bɔbɔ tɛli su kɛ: “N klo Zoova nin Zezi Klisi be dan. Yɛ n srɛ Zoova titi kɛ ɔ uka min naan n yo min liɛ nga n kwlɛ i yo’n.”​—Mat. 22:36, 37.

10. ?Kɛ nga 1 Piɛli 5:10 fa kan’n sa’n, ngue yɛ Zoova yo man be nga be tu be klun be di i junman’n niɔn?

¹⁰ Zoova kle be like kpa ekun. Aniaan bian kun m’ɔ suan Kevɛn’n wunnin i kɛ ndɛ sɔ’n ti nanwlɛ. Aniaan bian’n ti atin bofuɛ yɛ ɔ tran nvle nga be flɛ i kɛ Morisi’n nun. Kɛ ɔ sili ndɛ nanwlɛ’n, w’a ɔman inivɛsite kun. Yɛ kɛ be yoli i batɛmun’n, ɔ kacili titi atin bofuɛ. Ɔ seli kɛ: “N kunndɛli kɛ ń nánti ndɛ nga Ɲanmiɛn nuan ijɔfuɛ Ezai kannin’n su. Ɔ seli Zoova kɛ: ‘Min-ɔn, sunman min.’” (Eza. 6:8) Aniaan bian Kevɛn nin aniaan’m be kplannin Ɲanmiɛn sulɛ sua kpanngban. Asa’n, ɔ ukali aniaan wie mun naan b’a kaci e fluwa mun be klɔ aniɛn’n nun. Aniaan bian’n seli ekun kɛ: “Kɛ ɔ ko yo naan m’an kwla di junman sɔ’m be kpa’n, be kleli min like.” Like nga be kleli aniaan bian’n w’a ukɛmɛn i junman sɔ’m be dilɛ nun ngunmin. I bɔbɔ seli kɛ: “Like nga be kleli min’n ti’n, n wunnin i wlɛ kɛ n kwlá yoman ninnge ngba. Asa’n, ɔ ukali min naan m’an yi nzuɛn kpakpa wie’m be nglo. Yɛ n kwla di Zoova i junman’n i kpa kpɛkun n kwla uka aniaan’m be kpa wie.” (An kanngan 1 Piɛli 5:10 nun.) Atrɛkpa’n, ɔ kusu a kwla fa ajalɛ wie mun naan Zoova w’a kle wɔ like kpa ekun.

11. (1) ?Ngue yɛ Kore di Sidi lɔ aniaan bla wie’m be yoli-ɔ? (2) ?Wafa sɛ yɛ i bo’n guali-ɔ? (An nian foto ng’ɔ o fluwa’n i bui’n su’n.)

¹¹ Kannzɛ e su Zoova w’a cɛ bɔbɔ’n, sanngɛ sɛ e kunndɛ kɛ é dí i junman wie mun’n, ɔ́ klé e like naan y’a kwla di junman sɔ mun. I wie yɛle aniaan bla wie mɔ be o Kore di Sidi lɔ’n be liɛ’n. Koronavirisi blɛ’n nun’n, be asɔnun’n nun asɔnun kpɛnngbɛn’m be klɛli anuannzɛ’n i fluwa. Fluwa sɔ’n nun’n be seli kɛ: “Laa’n, aniaan wie’m be kwlá boman jasin fɛ’n kɛ nga be fa klo’n sa. Afin be ti tukpacifuɛ. Sanngɛ siɛn’n be bo jasin fɛ’n ɛntɛnɛti su. I kpa bɔbɔ’n, aniaan bla nsan mɔ be le afuɛ 80 tra su’n be suannin wafa nga be kwla fa ɔɔdinatɛli be bo jasin fɛ’n. Ɔ maan siɛn’n be bo jasin fɛ’n cɛn kwlakwla.” (Jue. 92:15, 16) Ɔ kusu sɛ a tu ɔ klun di Zoova i junman’n i kpa’n, á wún i kɛ ɔ ti kpa dan. Maan e kan ninnge wie mɔ be kwla uka wɔ naan w’a yo sɔ’n be ndɛ.

12. ?Ngue yɛ Zoova waan ɔ́ yó mán be nga be lafi i su’n niɔn?

¹² Maan e lafi Zoova su. Zoova tali e nda kɛ sɛ e lafi i su naan e tu e klun e su i’n, ɔ́ yrá e su. (Mal. 3:10) Aniaan bla kun m’ɔ suan Fabiola’n ɔ wunnin i kɛ ndɛ sɔ’n ti nanwlɛ. Aniaan bla’n tran Kolɔnbi. Kɛ be yoli i batɛmun cɛ’n, ɔ kunndɛli kɛ ɔ́ káci titi atin bofuɛ. Sanngɛ ɔ le bian nin ba nsan yɛ ɔ fata kɛ ɔ di junman fa suɛn i wun’n i bo. Kɛ ɔ fali antrɛti’n ɔ srɛli Zoova tankaan kpa kɛ ɔ ukɛ i. Aniaan bla’n seli kɛ: “Titi’n kɛ sran kun waan ɔ́ fɛ́ i antrɛti sika’n, ɔ cɛ kpa ka naan awa’n w’a fa mɛn i. Sanngɛ min liɛ su’n ɔ dili anglo kunngba cɛ. Nanwlɛ, i sɔ’n ti abonuan.” Kɛ anglo nɲɔn sinnin’n aniaan bla’n kacili atin bofuɛ. Dɔ nga su’n, ɔ le afuɛ 70 tra su yɛ ɔ ti titi atin bofuɛ i afuɛ 20 tra su yɛ. Ɔ ukali sran mɔcuɛ maan be yoli be batɛmun. Aniaan bla’n seli ekun kɛ: “Ɔ ju wie’n ɔ yo min kɛ n leman wunmiɛn kun sa. Sanngɛ Zoova uka min maan n kwla di min atin bolɛ junman’n titi.”

13-14. ?Ngue yɛ ɔ kwla uka e naan y’a di Zoova i junman’n i kpa ekun-ɔn?

¹³ Maan e nian Zoova i sufuɛ nga be kleli kɛ be lafi i su’n be ajalɛ’n su. Biblu’n kan sran kpanngban mɔ be tuli be klun be dili Zoova i junman’n be ndɛ. Sran sɔ’m be dan lika be dun mmua yoli ninnge wie mun ka naan Zoova w’a yra be su. I wie yɛle kɛ kɛ Abraamun tuli i klɔ’n su m’ɔ ɔli ‘lika kun m’ɔ siman lɔ’n,’ i sin yɛ Zoova yrɛli i su-ɔ. (Ebr. 11:8) Asa ekun’n, kɛ Zakɔbu nin anzi’n be tuli’n, i sin yɛ Zoova yrɛli i su-ɔ. (Bob. 32:24-30)  Kɛ Izraɛlifuɛ’m bé wá wlú mɛn nga Ɲanmiɛn seli kɛ ɔ́ fá mán be’n i nun mɔ be juli Zurdɛn nzue ba’n i nuan lɛ’n, nzue m’ɔ w’a yi dan ti’n be kwlá kpɛman. Sanngɛ kɛ Ɲanmiɛn ɲrun jranfuɛ’m be ja’n kpɛnnin nzue nun cɛ’n, nzue yacili sonjilɛ. Ɔ maan nvlefuɛ’m be kwla kpɛli nzue’n.​—Zoz. 3:14-16.

¹⁴ E blɛ su kusu’n, Zoova i sufuɛ wie’m be tu be klun be di i junman’n wie. Maan e nian be ajalɛ kpa’n su wie. I wie yɛle aniaan bian kun m’ɔ suan Felisi’n i liɛ’n. Ɔ nin i yi Diana be klo aniaan nga be tu be klun be di Zoova i junman’n be su ndɛ’n i nun kannganlɛ kpa. Be kannin aniaan sɔ’m be nun wie’m be ndɛ, ndɛ akpasua ng’ɔ suan “Ils se sont offerts volontairement” * i nun. Aniaan bian’n seli kɛ: “Kɛ e kanngan aniaan sɔ’m be su ndɛ’n nun’n, ɔ yo e kɛ e su nian sran kun m’ɔ su di aliɛ fɛfɛ kpa kun sa. Kɛ a nian sran sɔ’n lelee kpɛkun ɔ konvi sɔ aliɛ sɔ’n i dilɛ wie. I wafa kunngba’n kɛ e wun kɛ aniaan’m be wun kpaja be Zoova i sulɛ nun’n, e kunndɛ kɛ é yó kɛ be sa wie.” I sin’n, aniaan bian Felisi nin i yi be ɔli lika kun mɔ be mian jasin bofuɛ’m be wun lɔ’n i nun. ?W’a kanngan aniaan sɔ’m be su ndɛ’n i nun le? ?Annzɛ w’a nian video nga be flɛ be kɛ Prédication dans des régions isolées : Irlande nin Prédication dans des régions isolées : Australie be le? Ninnge sɔ’m be kwla uka wɔ naan w’a di Zoova i junman’n i kpa ekun.

15. ?Ngue ti yɛ ɔ fata kɛ e fa e wun e mantan aniaan nga be fa Zoova i sulɛ’n be sie i like kwlaa ɲrun’n niɔn?

¹⁵ Maan e fa e wun e mantan aniaan nga be kwla uka e naan y’a di Zoova i junman’n i kpa ekun’n. Sɛ sran kun nin-a diman aliɛ kun le naan ɔ fɛ i wun mantan be nga be di aliɛ sɔ’n, kɛ ɔ́ kɔ́ i ɲrun’n ɔ kwla di wie. I wafa kunngba’n, sɛ e fa e wun e mantan be nga be fa Zoova i sulɛ’n be sie i like kwlaa ɲrun’n, kɛ ɔ́ cɛ́ kɔ́’n e kusu é kúnndɛ kɛ é dí Zoova i junman wie mun. Aniaan bian kun m’ɔ suan Patriki nin i yi Veroniki be wunnin i kɛ ndɛ sɔ’n ti nanwlɛ. Aniaan bian’n seli kɛ: “E janvuɛ nin e osufuɛ’m be wlali e fanngan titi kɛ e di Zoova i junman uflɛ wie mun e nian. Sanngɛ kɛ e wa fali e wun mantannin aniaan nga be fa Zoova i sulɛ’n be sie i like kwlaa ɲrun’n, yɛ i sɔ yolɛ’n wa yoli e fɛ kpa-ɔ.” Kɛ é sé yɛ’n aniaan bian Patriki nin i yi Veroniki be ti ngunmin atin bofuɛ Sɛɛbi lɔ.

16. ?Kɛ nga Liki 12:16-21 fa kan’n sa’n, ngue ti yɛ ɔ fataman kɛ e sisi e bo naan y’a kpɔci ninnge wie mun-ɔn?

¹⁶ Maan e kpɔci ninnge wie mun naan y’a kwla di Zoova i junman’n i kpa. I yo, ɔ nunman nun kɛ e kpɔci e sa nun ninnge kwlaa ka naan Zoova i klun w’a jɔ e wun. (Aku. 5:19, 20) Sanngɛ sɛ e sa nun ninnge’m be ti’n, e kunndɛman kɛ é dí Zoova i junman wie mun’n, nn e su yo kɛ bian nga Zezi kɛnnin i ndɛ ɲanndra kun nun’n sa. Bian sɔ’n dili junman kekle naan w’a ɲan ninnge kpakpa wie mun. Sanngɛ w’a buman Ɲanmiɛn i akunndan. Ɔ maan i sa nun ninnge’m be yoli i cinnjin trali Ɲanmiɛn. (An kanngan Liki 12:16-21 nun.) Be flɛ aniaan bian kun kɛ Klisian. Ɔ tran Aflansi. Ɔ seli kɛ: “Blɛ wie nun’n, n tuman min klun n diman Zoova i junman’n i kpa. I kpa bɔbɔ’n n nianman min yi’n i lika kɛ ɔ nin i fata’n sa.” I sin’n, aniaan bian’n nin i yi’n be kunndɛli kɛ bé káci atin bofuɛ. Sanngɛ ɔ fata kɛ be yaci be junman’n i dilɛ ka naan b’a kwla yo sɔ. Kɛ be yoli sɔ’n, be wa dili lika su nunnunlɛ junman. Yɛ like kan nga be ɲɛn i’n ɔ ju be. ?Kɛ be fali ajalɛ sɔ’n wafa sɛ yɛ i bo’n guali-ɔ? Aniaan bian’n seli kɛ: “E di aklunjɔɛ jasin fɛ’n i bolɛ nun kpa siɛn’n. Yɛ e kle sran kpanngban be Biblu’n nun like.”

17. ?Ngue ti yɛ aniaan wie’m be sisi be bo naan b’a bo jasin fɛ’n i wafa uflɛ-ɔ?

 ¹⁷ Maan e bo jasin fɛ’n i wafawafa kwlaa. (Yol. 17:16, 17; 20:20, 21) Be flɛ aniaan bla kun kɛ Sara. Ɔ tran Etazinin yɛ ɔ ti atin bofuɛ. Kɛ koronavirisi bali’n, ɔ fata kɛ ɔ siesie i wun wafa uflɛ naan w’a kwla di i atin bolɛ junman’n titi. I bo bolɛ nun’n, ɔ sisili i bo naan w’a bo jasin fɛ’n telefɔnun nun. Sanngɛ kɛ akpasua sunianfuɛ’n ko niannin be osu’n, ɔ kleli be wafa nga be kwla bo jasin fɛ’n telefɔnun nun’n. I sɔ’n ti’n, aniaan bla’n wa fɛli i wun wlali jasin bolɛ wafa sɔ’n i nun kpa. Ɔ seli kɛ: “I klikli nun’n i sɔ yolɛ’n kunnin min srɛ. Sanngɛ siɛn’n n klo i sɔ yolɛ kpa. Kɛ e bo jasin fɛ’n telefɔnun nun’n, e nin sran kaka e koko yalɛ tra kɛ e bo jasin fɛ’n awloawlo’m be nun’n.”

18. ?Sɛ e waan é dí Ɲanmiɛn i junman wie naan sa wie tanndan e ɲrun’n, ngue yɛ ɔ kwla uka e-ɔ?

¹⁸ Maan e sunnzun kɛ é yó ninnge wie mun yɛ e mian e ɲin e yo be. Sɛ e waan é dí Ɲanmiɛn junman wie naan sa wie tanndan e ɲrun’n, maan e srɛ Ɲanmiɛn. Kpɛkun e bu like nga e kwla yo naan y’a jran sa sɔ’n i ɲrun kekle’n i akunndan. (Nya. 3:21) Be flɛ aniaan bla kun kɛ Sonia. Ɔ ti titi atin bofuɛ yɛ ɔ o asɔnun bo kun mɔ i nunfuɛ’m be kan Romanin’n i nun. Ɔ seli kɛ: “N klɛklɛ ninnge nga n kunndɛ ń yó be’n fluwa su. Kpɛkun n fa fluwa’n n sie i lika kun mɔ n kwla wun i ndɛndɛ’n. Asa’n, n jajali akpɔ nɲɔn be desɛn min tabli’n su. Kun kɔ fama su yɛ kun kɔ bɛ su. Sɛ min waan ń yó like kun’n, n nian akpɔ nɲɔn sɔ mun siin. Kpɛkun n bu akpɔ ng’ɔ fata kɛ n fa su naan m’an yia like nga min waan ń yó’n i nuan’n i akunndan.” Kɛ sa tɔ Sonia su’n ɔ miɛn i ɲin bu akunndan kpa titi. Ɔ seli ekun kɛ: “Kɛ sa tɔ min su’n, sɛ ɔ́ tánndan min ɲrun annzɛ ɔ́ úka min naan m’an yia like nga min waan ń yó’n i nuan’n, ɔ fin wafa nga n bu sa sɔ’n.”

19. ?Ngue yɛ w’a fua kpa kɛ á yó-ɔ?

¹⁹ Zoova man e ninnge kpakpa kpanngban. Sɛ e waan é sí ye’n, ɔ fata kɛ e yo like kwlaa nga e kwla yo naan y’a mɛnmɛn i’n. (Ebr. 13:15) I wie yɛle kɛ maan e tu e klun e di i junman’n i kpa. Sɛ e yo sɔ’n ɔ́ yrá e su. Maan aliɛ ba kwlaa nun’n, e sa Zoova e nian naan e wun kɛ “ɔ ti kpa dan.” Sɛ e yo sɔ’n, é kán ndɛ kunngba nga Zezi kannin’n wie. Ɔ seli kɛ: “Min aliɛ’n yɛle sran ng’ɔ sunmannin min’n i klun sa’n i yolɛ, ɔ nin i junman’n i bo gualɛ.”​—Zan 4:34.