1. ?Kɛ gbanflɛn kun tili nvle kun aɲia nga be yoli i afuɛ 1935 nun’n i bo ndɛ kun’n, wafa sɛ yɛ i wun yoli i-ɔ?

AFUƐ 1926 nun’n, be yoli gbanflɛn kun m’ɔ le afuɛ 18 i batɛmun. Aniaan bian sɔ’n i si nin i nin be ti Zoova i Lalofuɛ. Laa’n, be flɛ Zoova i Lalofuɛ’m be kɛ Biblu’n nun like suanfuɛ mun. Be wuli ba yasua nsan nin ba bla nɲɔn yɛ be ukali be naan be su Zoova yɛ be nian Zezi i ajalɛ’n su. Kɛ nga Biblu’n nun like suanfuɛ’m be fa lafi su sa’n, gbanflɛn sɔ’n lafi su kɛ ɔ́ kɔ́ ɲanmiɛn su wie. Ɔ maan afuɛ nuan kwlaa nun’n ɔ di kpanwun’n kpɛkun ɔ nɔnnin duvɛn’n e Wla kpɛnlɛ aɲia’n i bo. Sanngɛ afuɛ 1935 nun’n, nvle kun aɲia kun bo’n aniaan bian Zozɛfu Ritɛɛfɔdu yiyili ‘sran kpanngban kpa’n’ be su ndɛ’n nun. Be yoli aɲia sɔ’n Etazinin lɔ klɔ nga be flɛ i kɛ Wasitɔnun’n i su. Kɛ gbanflɛn kan sɔ’n tili ndɛ sɔ’n, like nga i wla o su’n kacili. ?Sran Kpanngban kpa’n be su ndɛ benin yɛ Biblu’n nun like suanfuɛ’m be wunnin i wlɛ aɲia sɔ’n i bo-ɔ?

2. ?Biblu’n nun ndɛ benin yɛ aniaan bian Ritɛɛfɔdu yiyili nun-ɔn?

² Aniaan bian Ritɛɛfɔdu i ijɔlɛ sɔ’n nun’n, ɔ yoli maan aniaan’m be wunnin “sran kpanngban kpa’n” nga Sa Nglo Yilɛ 7: 9 kan be ndɛ’n i wlɛ. Laa’n aniaan’m be lafi su kɛ sran sɔ’m bé kɔ́ ɲanmiɛn su wie. Sanngɛ be liɛ’n be nin Zezi be su diman famiɛn. Afin b’a lafiman Ɲanmiɛn su kpa kɛ be nga be kpali be sieli be ngunmin’n be sa. Aniaan bian Ritɛɛfɔdu fali Ɲanmiɛn Ndɛ’n yiyili nun kɛ sran kpanngban kpa’n be su kɔman  ɲanmiɛn su wie naan be yɛ Klisi flɛ be kɛ i bua wie mun’n niɔn. * Sran sɔ’m bé ɲán be ti ‘ɲrɛnnɛn dan’n’ nun yɛ bé trán nguan nun tititi asiɛ’n su wa. (Ngl. 7:14) Zezi seli kɛ: “N le bua wie mun ekun. Be nunman tuin nga nun. Ɔ fata kɛ n fa be n bla naan be ti min nɛn’n wie. Kpɛkun bé yó bua fa kun, yɛ be tafuɛ’n yó kun.” (Zan 10:16) Sran nga Zezi kan be ndɛ’n yɛle Zoova i sufuɛ nga be lafi su kɛ bé trán Mɛn klanman’n nun tititi asiɛ’n su wa’n. (Mat. 25:31-33, 46) Kɛ gbanflɛn kan nga e kɛnnin i ndɛ’n ɔ nin Zoova i Lalofuɛ onga’m be wunnin ndɛ sɔ’n i wlɛ’n, wafa nga be yo ninnge mun’n ɔ kacili. Maan e fa e ɲin e sie i like nga be yoli’n i su.—Jue. 97:11; Nya. 4:18.

3-4. (1) ?Nvle kun aɲia nga be yoli i afuɛ 1935 nun i bo’n, ngue yɛ sran kpanngban kpa’n be wunnin i wlɛ-ɔ? (2) ?Yɛ ngue ti-ɔ?

³ Kɛ aniaan bian Ritɛɛfɔdu yíyí i ndɛ’n nun’n, blɛ kun nun’n ɔ seli be nga be yiali lɛ’n be kɛ: “Be kwlaa nga be lafi su kɛ bé trán asiɛ’n su wa tititi’n, maan be jaso.” Aniaan bian kun m’ɔ trannin aɲia sɔ’n i bo wie’n, ɔ seli kɛ sran kɔe 20.000 nga be bali aɲia’n i bo’n be nun kpanngban kpa be jasoli. Kɛ ɔ yoli sɔ’n, aniaan bian Ritɛɛfɔdu seli kɛ: “Amun nian, sran kpanngban kpa mun yɛ.” I sin’n, sran’m be kwlakwla be boli ndɛ kpɛkun be taloli. Be nga be jasoli’n, be wunnin i wlɛ kɛ Zoova w’a kpaman be kɛ be ko tran ɲanmiɛn su lɔ wie. Kɛ lika’n cɛnnin’n, sran 840 nga be yoli be batɛmun’n, be nun kpanngban kpa be wunnin i wlɛ kɛ be o bua’m be wie’m be nun wie.

⁴ Kɛ ɔ fɛ i lɛ’n, aniaan gbanflɛn nga e kɛnnin i ndɛ’n, ɔ nin aniaan kpanngban wie mun ekun b’a diman kpanwun yɛ b’a nɔnman duvɛn’n e Wla kpɛnlɛ aɲia’n i bo kun. Aniaan bian kun dili i nanwlɛ kɛ: “Kɛ afuɛ 1935 nun’n é yó e Wla kpɛnlɛ aɲia mɔ n dili kpanwun yɛ n nɔnnin duvɛn’n, m’an yomɛn i sɔ kun. Afin n wunnin i wlɛ kɛ Zoova w’a kpaman min kɛ n wɔ ɲanmiɛn su wie. Sanngɛ asiɛ’n su wa yɛ ń ká-ɔ. Kpɛkun e nin be nga bé trán asiɛ’n su wa wie’n, e bo yó kun é dí junman naan asiɛ’n kaci Mɛn klanman. Aniaan kpanngban kpa be kannin ndɛ kunngba’n. (Rɔm. 8:16, 17; 2 Kor. 1:21, 22) Kɛ ɔ fɛ i afuɛ sɔ’n nun’n, be nga be o sran kpanngban kpa’n be nun’n be su wa ukali kpa yɛ be nin be nga be kpali be sieli be ngunmin’n be onga’m be dili junman likawlɛ. *

5. ?Wafa sɛ yɛ Zoova bu be nga e Wla kpɛnlɛ aɲia’n i bo’n, b’a diman kpanwun kun yɛ b’a nɔnman duvɛn kun’n niɔn?

⁵ ?Kɛ afuɛ 1935 sinnin’n, be nga be yacili kpanwun dilɛ mɔ b’a nɔnman duvɛn kun’n, wafa sɛ yɛ Zoova buli be-ɔ? ?Yɛ Zoova i sufuɛ nga andɛ’n be di kpanwun yɛ be nɔn duvɛn kpɛkun i sin’n be wun i wlɛ kɛ Zoova w’a kpaman be w’a sieman be ngunmin wie’n be li? ?Wafa sɛ yɛ Zoova bu be wie-ɔ? (1 Kor. 11:28) Aniaan sɔ’m be nun kpanngban b’a wunman like nga be wla o su’n i wlɛ kpa, i ti yɛ be yoli sɔ-ɔ. Sanngɛ sɛ be di i nanwlɛ kɛ be fɔnnin naan be yaci i sɔ’n i yolɛ’n kpɛkun be su Zoova kpa titi’n, Zoova kplín su kɛ be tran bua’m be wie’m be nun. Kannzɛ bɔbɔ be diman kpanwun kun yɛ be nɔnman duvɛn kun’n, sanngɛ be tran e Wla kpɛnlɛ aɲia’n i bo wie. Afin be si like nga Zoova nin Zezi be yo mannin be’n i su ye.

6. ?Ngue yɛ Zezi seli anzi’m be kɛ be yo-ɔ?

⁶ Ɲrɛnnɛn dan’n w’a mantan koko kpa. I sɔ’n ti’n, ɔ fata kɛ e wun ndɛ nga Sa Nglo Yilɛ ndɛ tre 7 kɛn i be nga be kpali be sieli be ngunmin’n, ɔ nin sran kpanngban kpa mɔ be ti bua wie’m be nunfuɛ’n be su’n, i wlɛ. Zezi seli anzi nga be tra aunmuan nnan’m be nun’n be kɛ nán be yaci be nun. Ɔ seli be kɛ be tra be nun lele naan be wie be nga be kpali be sieli be ngunmin’n be ngban su nzɔliɛ sie. (Ngl. 7:1-4) Kɛ mɔ be suli Zoova lele be guɛli i ti nin i bo’n ti’n, be nin Klisi bé dí Ɲanmiɛn ɲrun jranlɛ junman’n kpɛkun bé dí famiɛn ɲanmiɛn su lɔ. (Ngl. 20:6) Kɛ bé wá fá sran 144.000 be akatua’n bé mán be’n, Zoova nin Zezi ɔ nin anzi’m bé wá dí aklunjuɛ kpa.

7. (1) ?Kɛ nga Sa Nglo Yilɛ 7:9, 10 fa kan’n sa’n, wan mun yɛ Zan wunnin be-ɔ? (2) ?Yɛ ngue yɛ be su yo-ɔ? (An nian foto ng’ɔ o fluwa’n i bui’n su’n.)

⁷ Kɛ akoto Zan wunnin sran 144.000 mɔ b’a kaci famiɛn nin Ɲanmiɛn ɲrun jranfuɛ’n, i sin’n ɔ wunnin sran kpanngban kpa mɔ be ɲannin be ti Aamagedɔn alɛ’n nun’n. Sran akpasua sɔ’n i nunfuɛ’m be sɔnnin tra sran akpasua klikli ng’ɔ dun mmua wunnin be’n. (An kanngan Sa Nglo Yilɛ 7:9, 10 nun.) Yɛ “Tralɛ ufue” o sran kpanngban kpa sɔ’m be wun. I sɔ’n kle kɛ ‘b’a yoman Satan i mɛn’n nun sa tɛtɛ’m be wie’ yɛ b’a kpɔciman Ɲanmiɛn nin Klisi be le. (Zak. 1:27) Delɛ mɔ Zoova nin Zezi m’ɔ ti Ɲanmiɛn i Bua ba’n be deli be’n ti’n, be bo be sro. Asa ekun’n, mme nɲa o be sa nun. I sɔ’n kle kɛ, kɛ Ɲanmiɛn sieli Zezi famiɛn’n, ɔ yo be fɛ.—An nian Zan 12:12, 13 nun.

8. ?Ngue ndɛ yɛ Sa Nglo Yilɛ 7:11, 12 kɛn i Zoova i awlobofuɛ nga be o ɲanmiɛn su lɔ’n be su-ɔ?

⁸ An kanngan Sa Nglo Yilɛ 7:11, 12 nun. ?Kɛ be nga be o ɲanmiɛn su lɔ’n be wunnin sran kpanngban kpa’n, ngue yɛ be yoli-ɔ? Zan wunnin i kɛ be klun jɔli yɛ be manmannin Ɲanmiɛn. Kɛ Zoova i awlobofuɛ nga be o ɲanmiɛn su lɔ’n bé wá wún i kɛ sran kpanngban kpa’n b’a fi ɲrɛnnɛn dan nun b’a fite sakpasakpa’n, aklunjuɛ nga bé wá dí’n ɔ su yoman aɔwi.

9. ?Kɛ nga Sa Nglo Yilɛ 7:13-15 fa kan’n sa’n, ngue yɛ sran kpanngban kpa’n be yo-ɔ?

⁹ An kanngan Sa Nglo Yilɛ 7:13-15 nun. Zan seli kɛ sran kpanngban kpa sɔ’m be “kpuli be tralɛ’n Bua ba’n i mmoja’n nun kpɛkun be yoli ufue.” I sɔ’n kle kɛ be akunndan’n ti sanwun naan Zoova i klun jɔ be wun. (Eza. 1:18) Be fali be wun be mannin Ɲanmiɛn yɛ be yoli be batɛmun. Kpɛkun be lafi Zezi i tɛ m’ɔ yili’n su, yɛ be nin Zoova be afiɛn mantan kpa. (Zan 3:36; 1 Piɛ. 3:21) I sɔ’n ti yɛ Ɲanmiɛn i klun jɔ be wun kpɛkun ɔ man be atin kɛ “be su i kɔnguɛ nin wia nun” asiɛ’n su wa’n niɔn. Be mian be ɲin be su Zoova juejue su. Yɛle kɛ be bo i Famiɛn dilɛ’n i jasin fɛ’n be kle sran mun. Afin Ɲanmiɛn i Famiɛn dilɛ’n ti be cinnjin tra like kwlaa. Kpɛkun be uka sran mun naan be kaci Zezi i sɔnnzɔnfuɛ.—Mat. 6:33; 24:14; 28:19, 20.

10. (1) ?Ngue yɛ sran kpanngban kpa’n be kwla lafi su-ɔ? (2) ?Yɛ nda benin yɛ Ɲanmiɛn tali mɔ bé wá wún i kɛ w’a kpɛn su-ɔ?

¹⁰ Sran kpanngban kpa mɔ bé wá fín ɲrɛnnɛn dan’n nun bé fíte’n be lafi su kɛ Ɲanmiɛn nían be lika titi. Afin Biblu’n se kɛ ‘Ɲanmiɛn i tannin sua’n wo be afiɛn.’ Yɛ ɔ “núnnún be ɲinmuɛn’n kwlaa, wie’n su tranman lɛ kun be su yoman sɛ kun, be su sunman kun, be su wunman ɲrɛnnɛn kun.” (Ngl. 21:3,4) Bé wá wún i kɛ sa sɔ mɔ be ɲin trɛnnin i sin lele’n w’a kpɛn su sakpasakpa.

11-12. (1) ?Kɛ nga Sa Nglo Yilɛ 7:16, 17 fa kan’n sa’n, ngue yɛ cɛn wie lele’n sran kpanngban kpa’n bé ɲɛ́n i-ɔ? (2) ?Ngue yɛ bua’m be wie’m be yo i e Wla kpɛnlɛ aɲia’n i bo-ɔ? (3) ?Ngue ti yɛ be yo sɔ-ɔ?

 ¹¹ An kanngan Sa Nglo Yilɛ 7:16, 17 nun. Andɛ’n, alɛ’n ɔ nin lika m’ɔ w’a yo kekle’n be ti’n, Zoova i sufuɛ wie’m be ɲanman sika naan b’a to aliɛ b’a di. I sɔ’n ti’n awe kun be. Wie’m be kusu Ɲanmiɛn mɔ be waan bé sú i’n ti’n, be wlali be bisua. Sanngɛ be nga be o sran kpanngban kpa’n be nun’n be klun jɔ. Afin be si kɛ, kɛ bé wá núnnún klunwifuɛ mun mɔ bé wá ɲán be ti’n, Zoova maan bé wá ɲán aliɛ bé dí. Kpɛkun ɔ́ klé be like naan b’a kwla su i titi. Kɛ Zoova wá núnnún Satan i mɛn’n i ya m’ɔ ti kɛ “aunyɛyɛ dan” wie sa’n ɔ su kunman sran kpanngban kpa’n be wie. Kɛ ɲrɛnnɛn dan’n ko sin’n, Zezi wá fá bé kɔ́ “nzue ti mɔ be man nguan’n be nuan.” Yɛle kɛ ɔ́ wá yó maan bé ɲán nguan m’ɔ leman awieliɛ’n. Nanwlɛ, like nga sran kpanngban kpa’n be lafi su’n ɔ yo ɲɛnmɛn dan. Sran miliaa kpanngban kpa sɔ’m be su wuman kun le.—Zan 11:26.

¹² Like nga bua’m be wie’m be wla o su’n ti’n be si Zoova nin Zezi be ye. Kannzɛ Zoova w’a kpaman be kɛ be ko tran ɲanmiɛn su lɔ wie’n, sanngɛ ɔ klo be kɛ ng’ɔ fa klo be ng’ɔ kpali be sieli be ngunmin’n be sa wie. Sran akpasua nɲɔn sɔ’n be bo yo kun be manman Ɲanmiɛn nin Klisi. Wafa nga be yo sɔ’n i kun yɛle kɛ be tran e Wla kpɛnlɛ aɲia’n i bo.

13-14. ?Ngue ti yɛ ɔ fata kɛ e kwlakwla e tran e wla kpɛnlɛ aɲia’n i bo-ɔ?

¹³ Kɛ é yó e Wla kpɛnlɛ aɲia’n be nga be nɔn duvɛn’n kpɛkun be di kpanwun’n b’a sɔnman. I sɔ’n kle kɛ asɔnun kpanngban nun’n kɛ é yó e Wla kpɛnlɛ aɲia’n sran fi diman kpanwun’n yɛ ɔ nɔnman duvɛn’n. Ɔ maan e kwla se kɛ be nga be tran e Wla kpɛnlɛ aɲia’n i bo’n be nun kpanngban kpa be lafi su kɛ asiɛ’n su wa yɛ bé trán-ɔn. ?Kɛ m’ɔ ti sɔ’n niɔn, ngue ti yɛ be tran e Wla kpɛnlɛ aɲia’n i bo wie-ɔ? Like nga ti yɛ e kɔ e janvuɛ kun i aja’n i bo’n, like kunngba sɔ’n ti yɛ be tran e Wla kpɛnlɛ aɲia’n i bo-ɔ. Kɛ e kɔ e janvuɛ kun i aja’n i bo’n e kle kɛ e suɛn i bo naan e klo i. I wafa kunngba’n kɛ bua’m be wie’m be tran e Wla kpɛnlɛ aɲia’n i bo’n, be kle kɛ be klo Klisi nin be nga be kpali be sieli be ngunmin’n naan be suan be bo. Asa ekun’n, be klun jɔ tɛ mɔ Zezi yili’n su. Afin tɛ sɔ’n ti yɛ be kwla tran nguan nun tititi asiɛ’n su wa-ɔ.

 ¹⁴ Like nga ti yɛ bua’m be wie’m be tran e wla kpɛnlɛ aɲia’n i bo’n, i wie ekun yɛle kɛ be kunndɛ kɛ bé nánti ndɛ nga Zezi kannin’n su. Kɛ Zezi kpɛli e Wla kpɛnlɛ aɲia’n i ba’n, ɔ seli i akoto’m be kɛ: “Amun yo i kɛ nga sa titi. Maan amun wla kpɛn min su.” (1 Kor. 11:23-26) I sɔ’n kle kɛ bua’m be wie’m bé yó e Wla kpɛnlɛ aɲia’n lele saan be nga be kpali be sieli be ngunmin be kwlaa b’a ɔ ɲanmiɛn su yɛ bé yáci i yolɛ-ɔ. Ɔ maan bé yía sran mun titi naan be nin be yo aɲia sɔ’n.

15. ?E Wla kpɛnlɛ aɲia’n i bo’n, ngue yɛ e kwla yo e fa manman Ɲanmiɛn nin Klisi-ɔ?

¹⁵ Kɛ e kɔ e Wla kpɛnlɛ aɲia’n i bo’n e manman Ɲanmiɛn nin Klisi. Yɛle kɛ e to jue kpɛkun e srɛ Ɲanmiɛn likawlɛ. Afuɛ nga nun’n ndɛ nga bé wá yíyí nun e Wla kpɛnlɛ aɲia’n i bo’n yɛ: “Maan e kle kɛ e si like nga Ɲanmiɛn nin Klisi be yoli mannin e’n i su ye.” Ndɛ sɔ’n wá úka e naan y’a si Zoova nin Zezi be ye. Blɛ sɔ’n nun’n, kɛ bé wá fá kpanwun’n nin duvɛn’n bé sínsín’n, e wla kpɛ́n su kɛ ninnge sɔ’m be ti Zezi i wunnɛn’n nin i mmoja’n be nzɔliɛ. Asa ekun’n, é wá bú klolɛ mɔ Zoova yili i nglo e lika’n i akunndan. Afin ɔ kplinnin su kɛ i Wa’n wu naan y’a kwla ɲan nguan titi. (Mat. 20:28) Sran kwlaa ng’ɔ klo e Si m’ɔ o ɲanmiɛn su lɔ’n nin i Wa’n, ɔ fata kɛ ɔ tran e Wla kpɛnlɛ aɲia’n i bo.

16. ?Ngue ti yɛ e kwla se kɛ be nga kpali be sieli be ngunmin’n nin bua’m be wie’m be ti kun-ɔn?

¹⁶ Ngbaciɛ nunman be nga be kpali be sieli be ngunmin’n nin bua’m be wie’m be afiɛn. Afin Zoova klo be kwlakwla yɛ be ndɛ lo Zoova. Ɔ kloman akpasua kun traman kun. Like nga ti yɛ e se sɔ’n yɛle kɛ i Wa kunngba cɛ’n yɛ ɔ fa toli be kwlaa be ti-ɔ. Sanngɛ like nga be lafi su’n yɛ ɔ timan kun-ɔn. Ɔ nin i sɔ ngba’n ɔ fataman kɛ be bue nɲɔn’n be kpɔci Klisi le. (Jue. 31:24) Ɔ maan sɛ é kɔ́ ɲanmiɛn su-o, annzɛ é ká asiɛ’n su wa-o, Zoova fɛ i wawɛ’n man e kwlakwla.

17. ?Ngue yɛ be nga be kpali be sieli be ngunmin mɔ be te o asiɛ’n su wa’n be ɲin o i sin-ɔn?

¹⁷ Be nga be kpali be sieli be ngunmin’n, be nin i sɔ liɛ’n finman be nin klun. Ɲanmiɛn ti yɛ be lafi su kɛ bé kɔ́ ɲanmiɛn su-ɔ. Sanngɛ be bu like nga be wla o su’n i akunndan. Like sɔ’n ti’n be srɛ Ɲanmiɛn. Kpɛkun be kunndɛ kɛ bé ɲán be akatua’n i ndɛndɛ. I kpa bɔbɔ’n, be siman wunnɛn wafa nga bé wá ɲɛ́n i ɲanmiɛn su lɔ’n. (Fp. 3:20, 21; 1 Zan 3:2) Sanngɛ be si kɛ, kɛ bé wá jú ɲanmiɛn su lɔ’n bé wún Zoova nin Zezi nin anzi mun. Asa ekun’n, bé wún be wiengu nga be kpali be sieli be ngunmin mɔ be o ɲanmiɛn su lɔ’n yɛ be nin be dí famiɛn.

18. ?Ngue yɛ bua’m be wie’m be ɲin o i sin kpa-ɔ?

¹⁸ Bua’m be wie’m be ɲin o asiɛ’n su tranlɛ’n i sin kpa. I kpa bɔbɔ’n, sran’m be  kwlaa be bu asiɛ’n su wa tranlɛ’n i akunndan. (Aku. 3:11) Be ɲin o blɛ mɔ bé wá yó naan asiɛ’n kaci Mɛn klanman’n i sin kpa. Kpɛkun be ɲin o blɛ mɔ fɔ su tranman be nun kun mɔ bé wá dí be fie mun, bé kplán be sua mun yɛ bé tá be mma mun fɔun nun’n, i sin kpa. (Eza. 65:21-23) Asa ekun’n, be ɲin o blɛ mɔ bé wá ɲán atin bé kɔ́ asiɛ’n i likalika’m be nun’n i sin wie. Blɛ sɔ’n nun’n, bé kó níannían oka mun, bé wlánwlán bo’m be nun annzɛ bé kó nían jenvie’n. Yɛ bé súan ninnge kwlaa nga Zoova yili be’n, be su like. Sanngɛ like nga ti yɛ bé wá dí aklunjuɛ kpa’n yɛle kɛ be nin Zoova be afiɛn wá mántan kpa tititi.

19. (1) ?E Wla kpɛnlɛ aɲia’n i bo’n, ngue yɛ e tinuntinun e kwla yo-ɔ? (2) ?Afuɛ’n, cɛn benin yɛ é yó e Wla kpɛnlɛ aɲia’n niɔn?

¹⁹ Zoova mɛn i sufuɛ’m be kwlaa be like kpa kun mɔ be kwla fa be wla be gua su-ɔ. (Zer. 29:11) E Wla kpɛnlɛ aɲia’n i bo’n, bua’m be wie mun nin be nga be kpali be sieli be ngunmin’n, be manman Ɲanmiɛn nin Klisi. Afin like nga be yo mannin be’n ti’n be kwla tran ngua nun tititi. Ɔ maan e Wla kpɛnlɛ aɲia’n yɛ ɔ ti aɲia kwlaa nga e yo be’n be nun cinnjin kpafuɛ’n niɔn. Afuɛ’n é yó aɲia sɔ’n, Marsi i le 27 m’ɔ ti Fue cɛn’n i nnɔsua nun. Be nga bé wá trán aɲia sɔ’n i bo’n, be nun kpanngban kpa be tran nvle nga mɛn siefuɛ’m be kleman be yalɛ’n be nun. Ɔ maan bé kwlá yó aɲia sɔ’n fɔun nun. Wie’m be liɛ’n kannzɛ be tanndan be ɲrun sɛ’n, sanngɛ bé mían be ɲin bé trɛ́n i bo. Wie mun ekun be liɛ’n, bé yó aɲia sɔ’n bisua lɔ. Kannzɛ lika’n ti sɛ ti sɛ’n, nán e wla fi su kɛ Zoova nin Zezi nin anzi mun ɔ nin be nga be kpali be sieli be ngunmin mɔ dɔ nga su’n be o ɲanmiɛn su lɔ’n, be fa be ɲin be sie i aɲia sɔ’n su kpa. I sɔ’n ti’n, maan e kwlakwla e mian e ɲin naan e tran aɲia sɔ’n i bo. Amun mo nin aɲia-o.