Laa’n, Izraɛlifuɛ’m be man sika fa suan Ɲanmiɛn sulɛ kpafuɛ’n i bo. Sanngɛ Zezi blɛ su’n, i sɔ yolɛ’n wa yoli kekle kpa mannin be. Afin ɔ fata kɛ be tua lapo fanunfanun wie mun.

Laa’n, Zifu yasua nga be le afuɛ 20 nin 20 tra su’n be tua draki nɲɔn fa suan junman nga be di i Ɲanmiɛn sua’n nun’n, i bo. Zezi blɛ su’n be fa sika sɔ’n be suan junman nga be di i Ɲanmiɛn i sua nga Erɔdu kplannin’n nun’n, i bo. Zifu wie’m be usali Piɛli sɛ Zezi tua lapo sɔ’n wie-o. I sin’n, Zezi seli kɛ sɛ be tua lapo sɔ’n b’a fɔnman mmla. I kpa bɔbɔ’n, ɔ kleli Piɛli like ng’ɔ fata kɛ ɔ yo naan w’a ɲan jɛtɛ mma w’a tua lapo’n.—Mat. 17:24-27.

Asa ekun’n, ɔ fata kɛ Ɲanmiɛn i nvle’n nunfuɛ’m be yi be fie’m be su ninnge nga be ti’n ɔ nin be akatua’n be blusu’n. (Sau. 27:30-32; Kal. 18:26-28) Zifu’m be Ɲanmiɛn sulɛ wafa’m be su kpɛnngbɛn’m be miannin sran’m be kɛ be yi be fie’m be su waka mma kwlaa be blusu’n. “Manti nin kimɛn nin anɛti” bɔbɔ’n, ɔ fata kɛ be yi be blusu’n wie. Zezi w’a seman kɛ blusu yilɛ’n ti tɛ. Sanngɛ ɔ seli kɛ, kɛ fluwa klɛfuɛ mun nin Farizifuɛ’m be mian sran’m be kɛ be yi blusu’n, yɛ ɔ timan kpa-ɔ.—Mat. 23:23.

Blɛ sɔ’n nun’n, Rɔmunfuɛ mun yɛ be sie Zifu mun-ɔn. Ɔ maan be seli be kɛ be tua lapo uflɛ wie mun ekun. I wie yɛle kɛ ɔ fata kɛ be nga be le asiɛ’n be tuɛ i ti lapo. Lapo sɔ’n be kwla tuɛ i sika nun annzɛ be fa be fie’m be su ninnge wie’m be man. Ɔ maan sɛ be fie’m be su ninnge nga be titi’n ju kilo ya kun’n, ɔ fata kɛ be fɛ i nun kilo 20 annzɛ 25 be man Rɔmunfuɛ mun. Asa ekun’n, ɔ fata kɛ Zifu kun tuɛ i bɔbɔ i ti lapo. Lapo sɔ’n i tualɛ’n i su sa yɛ Farizifuɛ wie’m be fa usali Zezi-ɔ. Kɛ ɔ yoli sɔ’n, Zezi kleli akunndan ng’ɔ fata kɛ e bu i lapo tualɛ’n su’n. Ɔ seli kɛ: “An fa ninnge nga be ti Sezaa liɛ’n be man Sezaa. Sanngɛ an fa ninnge nga be ti Ɲanmiɛn liɛ’n be man Ɲanmiɛn.”—Mat. 22:15-22.

Asa ekun’n, sɛ sran kun fa ninnge wie mun ko yo be atɛ klɔ uflɛ su’n, ɔ fata kɛ ɔ tuɛ i ti lapo. Annzɛ sɛ ɔ fɛ i klɔ uflɛ su lɔ naan ɔ wa yo i atɛ i klɔ liɛ’n su wa’n, ɔ fata kɛ ɔ tuɛ i ti lapo wie. Sran’m be de lapo sɔ mun mmeli jranwlɛ’m be nun, nin pɔn’m be su, nin anngɔnda’m be su, nin klɔ’m be anuan’m be nun ɔ nin gua’m be bo.

I nun mɔ Rɔmunfuɛ’m be sie Zifu mun’n, lapo nga Zifu’m be tua’n ɔ wa kacili kɛ be ti su trɔ nɔnninnɔnnin wie sa. Rɔmun lɔ fluwa sifuɛ kun m’ɔ suan Tasiti’n seli kɛ: “Mɛn siefuɛ Tibɛɛ blɛ su’n, lapo nga be nga be o Siri nin Zide mɛn’n nun’n be tua’n ɔ timan aɔwi. Ɔ maan be kpɛtɛli i kɛ ɔ ti su man be.”

Sa nga ti yɛ lapo tualɛ’n wa yoli kekle mannin Zifu mun ekun’n, yɛle wafa nga be siesieli lapo delɛ junman’n. Be nga be kunndɛ kɛ bé dí junman sɔ’n wie’n, ɔ fata kɛ be man sika kaka kpa. Kɛ ɔ ko yo naan be sika sɔ’n w’a fite’n, be fa sran uflɛ wie mun be de lapo be man be. Sran sɔ’m be kusu kɛ ɔ ko yo naan b’a ɲan be liɛ kan’n, be uka lapo ng’ɔ fata kɛ sran’m be tua’n su. Atrɛkpa’n, Zase kusu le sran wie mɔ be de lapo be mɛn i-ɔ. (Lik. 19:1, 2) Ɔ maan sɛ sran’m be ɲin ci lapo defuɛ mun’n, i sɔ’n boman e nuan.