Pɔlu seli kɛ: “Mmla’n i dunman nun ti’n, n wuli naan Ɲanmiɛn i dunman nun’n, n ɲan nguan.”—Gal. 2:19.

Pɔlu kannin ndɛ sɔ’n naan Klisifuɛ nga be o Rɔmun lɔ klɔ nga be flɛ i kɛ Galasi’n su’n, be wun ndɛ cinnjin kpa kun wlɛ. Klisifuɛ sɔ’m be nun wie’m be fali ato ndɛ nga sran wie’m be kan’n su. Sran sɔ’m be waan sɛ sran kun kunndɛ kɛ ɔ́ ɲɛ́n i ti’n, ɔ fata kɛ ɔ di Moizi mmla’n su. I li klɛn wlalɛ’n i su mmla’n yɛ ɔ fata kɛ ɔ nanti su kpa’n niɔn. Sanngɛ Pɔlu si kɛ Ɲanmiɛn ɲrun’n, ɔ timan cinnjin kɛ be wla sran kun i klɛn naan w’a ɲɛn i ti. Ɔ maan ɔ yiyili nun kpa kleli Klisifuɛ sɔ’m be kɛ ndɛ nga sran sɔ’m be kan’n, ɔ ti ato. Asa’n, ɔ wlali be fanngan kɛ be lafi e ti kpɔlɛ tɛ nga Zezi Klisi yili’n su kpa ekun.—Gal. 2:4; 5:2.

Pɔlu seli kɛ: ‘Mmla’n i dunman nun ti’n, ɔ wuli.’ ?Ngue ndɛ yɛ i waan ɔ́ kán-ɔn? Biblu’n kle kɛ kɛ sran kun ko wu’n, ɔ wunman sa fi wlɛ kun. Ɔ maan ninnge nga be yo be i sin wa’n, be leman ta i su kun. (Aku. 9:4, 5) Kɛ Pɔlu kannin ndɛ sɔ’n, i waan ɔ́ sé kɛ kɛ m’ɔ diman Moizi mmla’n su kun’n ti’n ɔ ti kɛ mmla’n leman ta i su kun sa. Sanngɛ kɛ m’ɔ lafi e ti kpɔlɛ tɛ’n su’n ti’n, ‘Ɲanmiɛn dunman nun’n ɔ ɲannin nguan.’

“Mmla’n i dunman nun ti’n,” Pɔlu wunnin sa kun wlɛ. Yɛle kɛ “nán sran ng’ɔ fa mmla’n su’n yɛ Ɲanmiɛn bu i sran kpa-ɔ. Sanngɛ sran ng’ɔ lafi Zezi Klisi su’n, yɛ Ɲanmiɛn bu i sran kpa-ɔ.” (Gal. 2:16) Asa ekun’n, mmla’n ti’n be wunnin sa cinnjin kpa kun ekun i wlɛ. Pɔlu kannin sa sɔ’n i ndɛ kleli Galasifuɛ mun. Ɔ seli be kɛ: ‘Kɛ ɔ ko yo naan sa tɛ’n i ɲin w’a fite weiin lele naan osu’n nunfuɛ mɔ be tɛli i nda’n w’a ba’n, i ti yɛ mmla’n wo lɛ-ɔ.’ (Gal. 3:19) Mmla’n ti’n, sran’m be wunnin i wlɛ kɛ be ti sa tɛ yofuɛ naan be kwlá nantiman seiin be guɛmɛn i ti nin i bo. I sɔ’n ti’n, ɔ fata kɛ be yi tɛ be fa de be. Asa ekun’n, be wunnin i wlɛ kɛ Zezi Klisi yɛ ɔ ti ‘osu’n nunfuɛ’n’ niɔn. I sɔ’n ti’n, sɛ be lafi i su’n Ɲanmiɛn bú be sran kpa. (Gal. 3:24) Kɛ mɔ Pɔlu lafili Zezi Klisi su’n ti’n, Ɲanmiɛn buli i sran kpa. Ɔ maan ‘mmla’n i dunman nun ti’n, Pɔlu wuli,’ sanngɛ ‘Ɲanmiɛn dunman nun’n, ɔ ɲannin nguan.’ Sɛ é kwlá sé’n, mmla’n siemɛn i kun. Sanngɛ Ɲanmiɛn yɛ ɔ sie i siɛn’n niɔn.

Pɔlu kannin ndɛ kunngba’n kleli Klisifuɛ nga be o Rɔmun lɔ’n. Ɔ seli kɛ: “Aniaan mun, amun kusu Mmla’n sieman amun kun. Afin Klisi fɛli i wunnɛn’n yili tɛ. [...] Y’a ɲan e ti Mmla’n i sa nun. Afin like sɔ m’ɔ tanndannin e ɲrun’n ti’n, e wuli.” (Rɔm. 7:4, 6) Ndɛ mma sɔ’n nin Galasifuɛ Mun 2:19 be nun’n, Pɔlu kan wulɛ’n i ndɛ. Nán sran ng’ɔ fɔn Ɲanmiɛn i mmla’n i wulɛ liɛ’n i ndɛ yɛ ɔ kan-ɔn. Sanngɛ ɔ su kan be ti ɲanlɛ’n i ndɛ. Yɛle kɛ, kɛ mɔ i bɔbɔ ɔ nin Klisifuɛ onga’m be lafi e ti kpɔlɛ tɛ nga Zezi Klisi yili’n su’n ti’n, b’a ɲan be ti mmla’n i sa nun.