1. ?Ngue yɛ Zoova yo mannin wɔ-ɔ?

?WAFA sɛ yɛ a kacili Zoova i Lalofuɛ-ɔ? E si kɛ i klikli nun’n, sran kun boli “jasin fɛ’n” kleli wɔ. Sran sɔ’n kwla yo ɔ si annzɛ ɔ nin annzɛ ɔ wiengu junman difuɛ annzɛ ɔ wiengu suklu ba annzɛ kusu aniaan kun m’ɔ su bo jasin fɛ’n awloawlo’m be nun’n. (Mar. 13:10) I sin’n, aniaan kun miɛnnin i ɲin kleli ɔ Biblu’n nun like. Like mɔ a suannin’n ti’n, a kloli Zoova yɛ a wunnin i wlɛ kɛ i kusu klo wɔ wie. Zoova ukali wɔ naan w’a si ndɛ nanwlɛ’n. Siɛn mɔ w’a kaci Zezi i sɔnnzɔnfuɛ’n, a lafi su kɛ á ɲán nguan m’ɔ leman awieliɛ’n. (Zan 6:44) E si kɛ kɛ Zoova maan sran kun ukali wɔ naan w’a si ndɛ nanwlɛ’n, i sɔ’n yo ɔ fɛ kpa. Ɔ maan a lɛ i ase cɛn kwlaa.

2. ?Ngue yɛ é wá kɛ́n i ndɛ like suanlɛ nga nun-ɔn?

² Siɛn mɔ a si ndɛ nanwlɛ’n, a kwla uka sran uflɛ naan ɔ ɲan nguan m’ɔ leman awieliɛ’n wie. Atrɛkpa’n, awloawlo’m be nun jasin fɛ bolɛ’n ti pɔpɔ ɔ sa nun. Sanngɛ kɛ ɔ ko yo naan w’a kle sran kun i Biblu’n nun like annzɛ w’a se sran kun kɛ á klé i Biblu’n nun like bɔbɔ’n, ɔ ti kekle man wɔ. Sɛ ɔ ti sɔ’n, like suanlɛ nga i nun ndɛ’n wá úka wɔ kpa. Afin é wá kán like nga ti yɛ e kle sran’m be like’n i ndɛ. Asa ekun’n, é wá kán sa nga ti yɛ ɔ ju wie’n e sisi e bo naan y’a kle sran’m be like’n, be nun wie’m be ndɛ. Kpɛkun é wá kán wafa nga e kwla jran sa sɔ’m be ɲrun kekle’n i ndɛ wie. Sanngɛ maan e dun mmua e kan like nga ti yɛ ɔ fata kɛ e bo jasin fɛ’n yɛ e kle sran’m be like’n i ndɛ.

3. ?Ngue ti yɛ ɔ fata kɛ e bo jasin fɛ’n niɔn?

³ I nun mɔ Zezi wo asiɛ’n su wa’n, ɔ fali junman kun wlɛli i sɔnnzɔnfuɛ’m be sa nun. Junman sɔ’n i dilɛ nun’n, ɔ fata kɛ be yo like cinnjin nɲɔn. I klikli’n yɛle kɛ ɔ seli be kɛ be bo Ɲanmiɛn i Famiɛn dilɛ’n i jasin fɛ’n be kle sran mun. Kpɛkun ɔ kleli be  wafa nga be kwla di junman sɔ’n. (Mat. 10:7; Lik. 8:1) I wie yɛle kɛ, kɛ bé bó jasin fɛ’n sɛ sran’m be sɔ be nun annzɛ be sɔman be nun’n, like ng’ɔ fata kɛ be yo’n ɔ kleli be. (Lik. 9:2-5) Asa ekun’n, ɔ seli kɛ i sɔnnzɔnfuɛ’m bé wá bó jasin fɛ’n lele ‘nvlenvle’m be kwlaa be nunfuɛ’m bé tí.’ (Mat. 24:14; Yol. 1:8) Kannzɛ sran’m be sɔ jasin fɛ’n nun-o annzɛ be sɔman nun-o, ɔ fata kɛ be kan Ɲanmiɛn i Famiɛn dilɛ’n i ndɛ be kle be titi.

4. ?Kɛ nga Matie 28:18-20 fa kan’n sa’n, ngue yɛ ɔ fata kɛ e yo fa uka jasin fɛ bolɛ’n su-ɔ?

⁴ Like nɲɔn su nga Zezi seli i sɔnnzɔnfuɛ’m be kɛ be yo’n yɛle kɛ be kle sran’m be like naan be nanti like kwlaa ng’ɔ seli e kɛ e yo’n su. Sran wie’m be waan Klisifuɛ klikli’m be ngunmin yɛ Zezi seli be kɛ be di junman sɔ’n niɔn. Sanngɛ be ndɛ sɔ’n timan su. Afin Zezi seli kɛ bé wá dí junman sɔ’n lele “mɛn’n fá wíe.” (An kanngan Matie 28:18-20 nun.) Atrɛkpa’n, i nun nga Zezi fiteli i sɔnnzɔnfuɛ 500 tra su be ɲrun’n yɛ ɔ kannin ndɛ sɔ’n niɔn. (1 Kor. 15:6) Asa ekun’n, aolia nun’n Zezi seli Zan kɛ ɔ fata kɛ i sɔnnzɔnfuɛ’m be kwlaa be uka sran mun naan be si Zoova.​—Ngl. 22:17.

5. ?Kɛ nga 1 Korɛntifuɛ Mun 3:6-9 fa kan’n sa’n, sunnzun ase benin yɛ Pɔlu fali fa kleli kɛ jasin fɛ bolɛ’n nin sran’m be like klelɛ’n be kɔ likawlɛ-ɔ?

⁵ Akoto Pɔlu fali jasin fɛ bolɛ junman’n sunnzunnin like lualɛ. Kɛ sran kun lua like kun’n, ɔ yo like uflɛ naan like sɔ’n w’a yo kpa. Pɔlu kannin like sɔ’n i ndɛ kleli Korɛntifuɛ mun. Ɔ seli be kɛ: “N luali, Apolɔsu kusu guali su nzue. [...] Amun ti Ɲanmiɛn i fie m’ɔ su di nun junman’n.” (An kanngan 1 Korɛntifuɛ Mun 3:6-9 nun.) Sɛ é kwlá sé’n, e di junman “Ɲanmiɛn i fie’n” nun. Kɛ e bo jasin fɛ’n ɔ ti kɛ e su lua like sa. Yɛ kɛ e kle sran’m be like’n, ɔ ti kɛ e su gua su nzue sa. (Zan 4:35) Sanngɛ e si kɛ Ɲanmiɛn yɛ ɔ yo maan like sɔ’n yo kpa-ɔ. Yɛle kɛ i yɛ ɔ yo maan sran’m be bɛ i sulɛ-ɔ.

6. ?Kɛ é klé sran’m be like’n, ngue yɛ ɔ fata kɛ e yo-ɔ?

⁶ Kɛ é bó jasin fɛ’n, be nga “be nin nguan m’ɔ leman awieliɛ’n fata’n” yɛ e kunndɛ be-ɔ. (Yol. 13:48) Kɛ ɔ ko yo naan y’a kwla uka sran sɔ mun naan b’a kaci Zezi i sɔnnzɔnfuɛ’n, ɔ fata kɛ e yo ninnge cinnjin nsan. I klikli’n maan e uka be naan be wun Biblu’n nun ndɛ’n i wlɛ. I nɲɔn su’n e uka be naan be lafi su, yɛ i nsan su’n e uka be naan be nanti su. (Zan 17:3; Kol. 2:6, 7; 1 Tes. 2:13) Asa ekun’n kɛ be ba aɲia’m be bo’n maan e kle be kɛ e klo be, yɛ e yo naan be wun be wun fɛ. (Zan 13:35) Kɛ é klé sran’m be like’n, maan e uka be naan be wla be ayeliɛ tɛtɛ’m be ase. Kpɛkun e uka be naan be yaci ndɛ nga be nin Biblu’n nun ndɛ’n be kɔman likawlɛ’n be su falɛ. Kɛ e yo sɔ’n, ɔ ti kɛ e su uka be naan be bubu “ninnge mɔ be ti kɛ talɛ ngblingbli mun sa’n.” (2 Kor. 10:4, 5) Kɛ ɔ ko yo naan sran kun w’a yo ninnge kwlaa sɔ mun naan b’a yo i batɛmun’n, ɔ fa blɛ. Sanngɛ sɛ e mian e ɲin e ukɛ i’n, ɔ su kaman ngbɛn.

7. ?Ngue ti yɛ e bo jasin fɛ’n kpɛkun e kle sran’m be like-ɔ?

⁷ ?Ngue ti yɛ e bo jasin fɛ’n kpɛkun e kle sran’m be like-ɔ? Like klikli nga ti yɛ e di junman sɔ’n, yɛle kɛ e klo Zoova. Kɛ e mian e ɲin e bo jasin fɛ’n mɔ e kle sran’m be like’n, e yi i nglo kɛ e klo Ɲanmiɛn. (1 Zan 5:3) E si kɛ klolɛ mɔ a klo Zoova’n, i ti yɛ a bo jasin fɛ’n kle sran mun-ɔn. Sanngɛ i bo bolɛ nun’n, atrɛkpa’n i sɔ yolɛ’n w’a yoman pɔpɔ ɔ sa nun. I wie yɛle kɛ kpɛ klikli nga á bóbó sran kun i anuan naan á bó jasin fɛ’n klé i’n, atrɛkpa’n ɔ klun titili wɔ. Sanngɛ kɛ mɔ a si kɛ junman sɔ’n yɛ Zezi seli e kɛ e di’n ti’n, a miannin ɔ ɲin boli jasin fɛ’n. Yɛ kɛ ɔ́ kɔ́ i ɲrun’n, ɔ sa’n tɔli junman sɔ’n i dilɛ’n nun. ?Yɛ sran’m be Biblu’n nun like klelɛ’n nin?  Atrɛkpa’n, i sɔ liɛ’n kun wɔ srɛ. Sɛ ɔ ti sɔ’n, srɛ Zoova kɛ ɔ wla ɔ yakpa.

8. ?Kɛ nga Marki 6:34 fa kan’n sa’n, like nga ti yɛ e kle sran’m be like’n i kun ekun yɛle benin?

⁸ Like nɲɔn su nga ti yɛ e bo jasin fɛ’n kpɛkun e kle sran’m be like’n, yɛle kɛ e klo sran mun. I wie yɛle Zezi liɛ’n. Cɛn kun’n, ɔ nin i sɔnnzɔnfuɛ’m be boli jasin fɛ’n lelee. Ɔ maan be fɛli kpa. I sɔ’n ti’n, be kunndɛli lika kun naan bé kó ló wunmiɛn. Sanngɛ sran kaka kpa be wa toli be. Kɛ Zezi wunnin sran sɔ mun’n, be yoli i annvɔ. Ɔ maan ɔ kleli be “like kpanngban.” (An kanngan Marki 6:34 nun.) Kannzɛ bɔbɔ Zezi w’a fɛ’n, sanngɛ ɔ miɛnnin i ɲin kannin Ɲanmiɛn ndɛ kleli be. ?Ngue ti-ɔ? Afin ɔ yoli kɛ sa ng’ɔ o be su’n, ɔ o i bɔbɔ i su sa. Ɔ wunnin i kɛ afɛ o be su naan be kunndɛ kɛ sran uka be. Ɔ maan ɔ ukali be. Andɛ’n, sa kunngba’n wo sran’m be su wie. Kannzɛ be yo kɛ be di aklunjɔɛ naan be mianman like fi wun sa’n, sanngɛ afɛ o be su yɛ be kunndɛ kɛ be uka be. Be ti kɛ bua mɔ be leman sran taman be’n sa. Akoto Pɔlu seli kɛ sran sɔ’m be siman Ɲanmiɛn yɛ be leman like kpa kun sa mɔ bé fá be wla gúa su-ɔ. (Efɛ. 2:12) Asa’n, be o ‘akpɔ ng’ɔ ti dan mɔ i awieliɛ’n yɛle wie’n’ i su. (Mat. 7:13) I kwlaa sɔ’n kle kɛ sran sɔ’m be mian Ɲanmiɛn wun dan. Ɔ maan be yo annvɔ. Yɛ klolɛ mɔ e klo be’n ti’n, e kunndɛ kɛ é úka be. Like kpafuɛ nga e kwla yo fa uka be’n, yɛle be Biblu’n nun like klelɛ.

9. ?Kɛ nga Filipufuɛ Mun 2:13 fa kan’n sa’n, ngue yɛ Zoova kwla uka wɔ naan w’a yo-ɔ?

⁹ Sran’m be Biblu’n nun like klelɛ’n fa blɛ. Ɔ maan kɛ a bu i sɔ’n i akunndan’n, atrɛkpa’n a sisi ɔ bo naan w’a kle sran’m be Biblu’n nun like. Sɛ ɔ ti sɔ’n, srɛ Zoova naan kan wafa nga ɔ wun yo wɔ’n i ndɛ kle i. Kpɛkun se i kɛ ɔ uka wɔ naan a ɲan sran kun kle i Biblu’n nun like. (An kanngan Filipufuɛ Mun 2:13 nun.) Akoto Zan seli kɛ sɛ like nga e srɛ Ɲanmiɛn’n ɔ ti i klun su’n, ɔ́ tɛ́ e su. (1 Zan 5:14, 15) Ɔ maan sɛ a srɛ Zoova kɛ ɔ uka wɔ naan a ɲan sran kun kle i Biblu’n nun like’n, ɔ́ úka wɔ.

10-11. ?Ngue ti yɛ ɔ ju wie’n e sisi e bo naan y’a kle sran’m be Biblu’n nun like-ɔ?

¹⁰ Sran’m be like klelɛ junman nga Zezi fa mannin e’n ti e cinnjin kpa. Sanngɛ sa wie’m be kwla tanndan e ɲrun junman sɔ’n i dilɛ’n nun. Maan e kan sa sɔ’m be nun wie’m be ndɛ. Kpɛkun é wá kán wafa nga e kwla jran be ɲrun kekle’n i ndɛ wie.

¹¹ E kwlá boman jasin fɛ’n kɛ nga e fa klo’n sa. I wie yɛle kɛ aniaan wie’m b’a yo oke annzɛ tukpacɛ kekle wie kle be yalɛ. ?Sa sɔ’n wie o ɔ su? Sɛ ɔ ti sɔ’n, bu wafa nga kɛ tukpacɛ tɛ nga be flɛ i kɛ koronavirisi’n bali’n e boli jasin fɛ’n i akunndan. E wunnin i wlɛ kɛ e kwla fa e pɔɔtablu mun annzɛ ajulisu mannzin uflɛ wie mun e kle sran’m be Biblu’n nun like. Ɔ maan kannzɛ bɔbɔ a o awlo lɔ naan a kwlá fiteman’n, sanngɛ a kwla kle sran’m be Biblu’n nun like. Asa ekun’n, sran wie’m be kunndɛ kɛ bé súan Biblu’n nun like. Sanngɛ kɛ aniaan’m be kɔ be awlo lɔ’n be toman be. Afin nglɛmun ndɛ kpa’n annzɛ kɔnguɛ yɛ be o be awlo lɛ-ɔ. Ɔ maan, a kwla kle sran sɔ’m be like blɛ sɔ’n nun. Zezi bɔbɔ kannin Ɲanmiɛn ndɛ kleli Nikodɛmun kɔnguɛ. Afin blɛ sɔ’n nun yɛ Nikodɛmun kunndɛli kɛ ɔ́ tíe Ɲanmiɛn ndɛ’n niɔn.​—Zan 3:1, 2.

12. ?Ngue yɛ ɔ kle kɛ e kwla kle sran’m be Biblu’n nun like-ɔ?

¹² E kwla bu i kɛ e kwlá kleman sran’m be Biblu’n nun like. Aniaan wie’m be bu i kɛ ɔ fata kɛ be si Ɲanmiɛn ndɛ’n kpa annzɛ be si like kle kpa, ka naan b’a kle sran’m be Biblu’n nun like. Sɛ a bu i sɔ wie’n, bu ninnge nsan nga’m be akunndan.  I klikli’n yɛle kɛ Zoova si kɛ a kwla kle sran’m be Biblu’n nun like. (2 Kor. 3:5) I nɲɔn su’n yɛle kɛ Zezi m’ɔ ‘sie ninnge nga be o ɲanmiɛn su lɔ nin asiɛ’n su wa’n be kwlaa’n’ yɛ ɔ se wɔ kɛ a kle sran’m be like-ɔ. (Mat. 28:18) Kpɛkun i nsan su’n yɛle kɛ Zoova nin aniaan’m be kwla uka wɔ. I wie yɛle Zezi liɛ’n. Ndɛ kwlaa ng’ɔ kannin’n nin like kwlaa ng’ɔ kleli’n, i Si’n yɛ ɔ kleli i-ɔ. Ɔ maan ɔ kusu Zoova kwla uka wɔ naan w’a kle sran’m be like wie. (Zan 8:28; 12:49) Asa ekun’n, a kwla se amun jasin fɛ bolɛ akpasua’n i sunianfuɛ’n annzɛ atin bofuɛ kun annzɛ jasin bofuɛ kun mɔ i sa w’a tɔ sran’m be like klelɛ nun’n kɛ ɔ uka wɔ. Like uflɛ m’ɔ kwla uka wɔ kpa’n yɛle kɛ, kɛ aniaan sɔ’m be nun kun kɔ́ sran kun i Biblu’n nun like klelɛ’n, a nin i be wɔ.

13. ?Ngue ti yɛ ɔ fata kɛ e mian e ɲin naan e si ninnge uflɛ nga e fa kle sran’m be like’n i nun junman di-ɔ?

¹³ Wafa nga e kle sran’m be like siɛn’n nin ninnge nga e fa kle be like’n b’a kaci. Fluwa nga e fa kle sran’m be Biblu’n nun like siɛn’n yɛle fluwa A kwla di aklunjɔɛ tititi! Kɛ ɔ ko yo naan y’a fa fluwa sɔ’n y’a di junman kpa’n, ɔ fata kɛ e siesie e wun kpa. Fluwa sɔ’n nin fluwa nga e fa kle sran’m be Biblu’n nun like laa’n be timan kun. I wie yɛle kɛ i nun ndɛ kpɔlɛ’m b’a sɔnman. Ɔ maan e nin like suanfuɛ’n e le blɛ e koko ndɛ’n i su yalɛ kpa. Asa’n, kɛ é fá fluwa sɔ’n é klé sran’m be like’n, e fa video mun nin ninnge nga be o e ɛntɛnɛti lika’n nun’n ɔ nin JW Library^® e di junman tra laa’n. Sɛ a siman ninnge sɔ’m be nun junman di’n, se aniaan kun m’ɔ si be nun junman di’n kɛ ɔ uka wɔ. Kɛ e si like kun yo’n, e kunndɛman kɛ é káci wafa nga e yo like sɔ’n. Ɔ maan sɛ be kle e like sɔ’n i yolɛ wafa uflɛ’n, i su nantilɛ’n ti kekle. Sanngɛ sɛ e kplin su kɛ Zoova nin aniaan’m be uka e’n, é sí ninnge sɔ’m be nun junman di. Kpɛkun é dí aklunjɔɛ sran’m be like klelɛ’n nun trá laa’n. I sɔ yɛ aniaan bla kun m’ɔ ti atin bofuɛ’n kannin-ɔn. Ɔ seli kɛ: “I like suanfuɛ-o, i like klefuɛ-o, be kwlaa be ɲan sran’m be like klelɛ wafa sɔ’n i su ye.”

14. (1) ?Sɛ e jasin bowlɛ nun’n sran’m be sieman be su e nuan bo’n, ngue yɛ ɔ fataman kɛ e wla fi su-ɔ? (2) ?Wafa sɛ yɛ ndɛ ng’ɔ o 1 Korɛntifuɛ Mun 3:6, 7 nun’n ɔ wla e fanngan-ɔn?

¹⁴ Sɛ lika nga e bo jasin fɛ’n lɛ’n, sran’m be kunndɛman kɛ bé súan Biblu’n nun like’n. Sran wie’m be ndɛ nunman jasin fɛ nga e bo’n nun. Wie liɛ bɔbɔ be tanndan e ɲrun. ?Sɛ lika nga e bo jasin fɛ’n lɛ’n sran’m be yo sɔ’n, ngue yɛ ɔ kwla uka e naan e sa sin w’a bubuman e-ɔ? Nán e wla fi su kɛ mɛn nga e o nun yɛ nun’n, ninnge’m be kacikaci ndɛndɛ kpa. Ɔ maan sran’m be su sa’n kwla kaci wie. I sɔ’n ti’n, be nga laa’n be sɔman e nun’n, kɛ ɔ́ kɔ́ i ɲrun’n be kwla sɔ e nun. Afin be wun i wlɛ kɛ be mian Ɲanmiɛn wun. (Mat. 5:3) Sran wie mɔ laa’n be sɔman e fluwa’m be nun’n, i sin’n be wa kplinnin su kɛ e kle be Biblu’n nun like. Asa ekun’n, e si kɛ Zoova yɛ ɔ ti junman nga e di’n i su Kpɛn’n niɔn. (Mat. 9:38) Ɔ se e kɛ e lua like yɛ e gua su nzue titi. Sanngɛ i yɛ ɔ kwla yo maan like sɔ’n yo kpa-ɔ. (1 Kor. 3:6, 7) Like ng’ɔ wla e fanngan kpa ekun’n, yɛle kɛ kannzɛ bɔbɔ dɔ nga su’n e kleman sran kun i Biblu’n nun like’n, sanngɛ Zoova yrá e su. Afin nán junman nga e di’n yɛ ɔ ti i cinnjin-ɔn. Sanngɛ e ɲin nga e mian e di junman sɔ’n yɛ ɔ ti i cinnjin-ɔn. *

15. ?Kɛ sran kun kplin su kɛ be kle i Biblu’n nun like m’ɔ nanti like ng’ɔ suan’n su’n, wafa sɛ yɛ Zoova i wun yo i-ɔ?

¹⁵ Kɛ sran kun fa Biblu’n nun ndɛ nanwlɛ’n su m’ɔ kɛn i ndɛ kle sran uflɛ’n, Zoova i klun jɔ. (Nya. 23:15, 16) E si kɛ  kɛ Zoova wun junman nga e di i andɛ’n, i klun jɔ dan. I wie yɛle kɛ afuɛ 2020 nun’n kannzɛ tukpacɛ tɛ kpa kun fali mɛn wunmuan’n, sanngɛ e kwla kleli sran 7.705.765 be Biblu’n nun like. Ɔ maan sran 241.994 be fali be wun mannin Zoova yɛ be yoli be batɛmun. Sran sɔ’m be kusu bé wá klé sran uflɛ be Biblu’n nun like naan be kaci Zezi i sɔnnzɔnfuɛ wie. (Lik. 6:40) E si kɛ kɛ e kle sran’m be Biblu’n nun like’n, i sɔ’n jɔ Zoova klun.

16. ?Ngue yɛ w’a fua kpa kɛ á yó-ɔ?

¹⁶ Sran’m be like klelɛ junman’n leman ba. Sanngɛ Zoova fanngan nun’n, e kwla di junman sɔ’n. I sɔ’n ti’n, sɛ e leman sran e klemɛn i Biblu’n nun like’n, maan e fua kpa kɛ é mían e ɲin é kúnndɛ sran kun é klé i Biblu’n nun like. Blɛ kwlaa nga e ɲɛn i wun atin’n, maan e se sran’m be kɛ e kunndɛ kɛ é klé be Biblu’n nun like. Sɛ e yo sɔ’n, Zoova úka e yɛ ɔ́ yrá su.

17. ?Sɛ e mian e ɲin e kle sran kun i Biblu’n nun like’n, i su ye benin yɛ é ɲɛ́n i-ɔ?

¹⁷ Jasin fɛ bolɛ’n nin sran’m be like klelɛ junman’n ti e cenjele like dan. Kɛ e di junman sɔ’n e klun jɔ dan. I wie yɛle akoto Pɔlu liɛ’n. Ɔ ukali sran kaka naan b’a kaci Zezi i sɔnnzɔnfuɛ Tesaloniki lɔ. Kɛ ɔ yoli sɔ’n, ɔ kannin wafa nga i wun yoli i’n i ndɛ. Ɔ seli kɛ: “?Kɛ e Min Zezi ko ba’n, wan mun yɛ é fá e wla é gúa be su-ɔ? ?Wan mun ti yɛ é dí aklunjuɛ-ɔ? ?Wan mun ti yɛ é wá ɲán akatua mɔ i ti’n, é bó sró-ɔ? ?Nán amun ti-ɔ? Amun ti yɛ é ɲán ɲrun-ɔn, yɛ amun ti yɛ é dí aklunjuɛ-ɔ.” (1 Tes. 2:19, 20; Yol. 17:1-4) Andɛ’n, aniaan kaka be wun yo be sɔ wie. I wie yɛle aniaan bla kun m’ɔ suan Sitefanin’n i liɛ’n. Ɔ nin i wun’n be ukali sran kpanngban naan b’a yo be batɛmun. Ɔ seli kɛ: “Kɛ a uka sran kun lele mɔ be yo i batɛmun’n, aklunjɔɛ nga a di’n ɔ lemɛn i wunsu.”