Zoova kunndɛ kɛ be nga b’a ja bla nin bian’n, be di aklunjɔɛ naan be ka likawlɛ titi. (Mat. 19:4-6) ?Sɛ a kunndɛ kɛ á já bla annzɛ bian’n, ngue yɛ a kwla yo naan w’a ɲan sran kpa-ɔ? Kɛ mɔ Zoova ti e Yifuɛ’n ti’n, ɔ si like ng’ɔ fata kɛ e yo naan e aja’n w’a yo ye’n. I sɔ’n ti’n, sɛ e nanti i mmla’m be su’n, e aja’n yó ye. Maan e fa e ɲin e sie i mmla sɔ’m be nun wie’m be su.

Like klikli ng’ɔ fata kɛ e wun i wlɛ’n, yɛle kɛ “klɔ sran’n i klun akunndan’n ti tɛ tra like kwlaa, be yo akunndan sɔ’n i sa fi-ɔ ɔ yoman ye.” (Zer. 17:9) Kɛ sran kun waan ɔ́ já bla annzɛ bian’n, m’ɔ wun i awlɛn su sran’n ɔ kwla wu i ti kpo. Kɛ ɔ ko yo sɔ’n, sran sɔ’n i wun akunndan ng’ɔ́ bú’n ɔ su yomɛn i nuan su sɛsɛ kun. Kɛ sran kun jran wafa nga i wun yo i’n i ngunmin su ja bla annzɛ bian’n, kpɛ sunman’n i bo guaman kpa. (Nya. 28:26) I sɔ’n ti’n, kɛ sran nɲɔn be bo be wiengu nzuɛn nianlɛ bo’n, ɔ fataman kɛ be kan klolɛ ndɛ wie’m be kle be wiengu. Sɛ be nin-a siman be wiengu kpa’n, nán maan be ta nda kɛ bé já.

Nyanndra Mun ndɛ tre 22 i mma 3 se kɛ: “Sran ng’ɔ ti ngwlɛlɛfuɛ’n, kɛ ɔ wun kɛ ndɛ tɛ wie su ba’n, kpɛkun w’a cuɛn i wun w’a yi i ja. Sanngɛ be nga be bɔbɔ be kwlá ukaman be wun’n be liɛ’n, be ko kuku be wun yi nun, kpɛkun b’a wun i nuan sa fiaan.” ?Ngue sa yɛ ɔ kwla ju sran ng’ɔ kɔ ɛntɛnɛti su ko kunndɛ bian annzɛ bla kɛ ɔ́ jɛ́ i’n, i su-ɔ? Be nga be yoli sɔ’n, be nun kaka be wunnin be ɲrun. Afin be nin sran mɔ be simɛn i kpa’n be wa sannin nun. Kpɛkun kasiɛn su’n be wa wunnin i wlɛ kɛ sran sɔ’n timan kpa. Asa ekun’n ɛntɛnɛti su’n, awiefuɛ wie’m be yo be wun kɛ be ti sran kpa sa naan bé wúa sran’m be sika’n. Ɔ ju wie’n, awiefuɛ sɔ’m be laka sran’m be kɛ be ti Zoova i Lalofuɛ.

Maan e kan sa uflɛ m’ɔ ju be nga be kɔ ɛntɛnɛti su ko kunndɛ bian annzɛ bla’n i ndɛ kan. Kɛ be kɔ lɔ’n, be klɛ be su ndɛ wie mun sie i lɔ. Kɛ ɔ ko yo sɔ’n, ɔɔdinatɛli kun fa be su ndɛ’n sunnzun sran uflɛ liɛ’n nian sɛ be kwla ja-o. Ɔ maan ɔɔdinatɛli yɛ ɔ kle be sran ng’ɔ fata kɛ be jɛ i’n niɔn. Aja kɛ ngalɛ sa’n ɔ yoman ye. Aja’n ti like cinnjin kpa kun. Ɔ maan ɔɔdinatɛli mɔ klɔ sran mɔ fɔ o be nun’n yɛ be yili’n, ɔ kwlá ukaman e naan y’a ɲan bian kpa annzɛ bla kpa y’a jɛ i. Sanngɛ Biblu’n yɛ ɔ kwla uka e-ɔ. Kusu e kwlá faman ndɛ nga Biblu’n  kan’n e sunnzunman ɔɔdinatɛli liɛ mlɔnmlɔn.​—Nya. 1:7; 3:5-7.

Nyanndra Mun ndɛ tre 14 i mma 15 se kɛ: “Sran nga i bɔbɔ ɔ kwlá ukɛmɛn i wun’n, ɔ lafi ndɛ kwlaa nga be kan kle i’n su. Sran ng’ɔ si sa’n kusu, ɔ niɛn i ja ng’ɔ tu’n su kpa.” Kwlaa naan sran kun w’a fa ajalɛ kɛ ɔ́ já sran kun’n, ɔ fata kɛ ɔ si i kpa ka. Sanngɛ sɛ i waan ɔ́ yó i sɔ’n ɛntɛnɛti su’n, ɔ́ yó kekle i sa nun. Kannzɛ bɔbɔ e nin sran kun e koko yalɛ ɛntɛnɛti su annzɛ e klɛ e wiengu fluwa tikatika’n, sanngɛ e kwlá seman kɛ e si i kpa. Kɛ sran wie’m be ɔli ɛntɛnɛti su’n, be buli i kɛ nn b’a ɲan sran kpa. Sanngɛ kɛ be nin sran’n be wa yiali’n, be wunnin i kɛ be lafili klenzua kplɔwa su.

Jue tofuɛ kun seli kɛ: “E nin finfinfuɛ mun e tranman, e nin gblɛfuɛ mun e sanman nun.” (Jue. 26:4) Sran sunman be bu i kɛ sɛ be kpɛ sran nga be nin i san nun ɛntɛnɛti su’n i gblɛ’n, i sɔ’n timan tɛ. Kɛ be nin sran’n bé kókó yalɛ ɛntɛnɛti su’n, be yo be wun kɛ be ti sran kpa sa. I sɔ’n ti’n maan e usa e wun kɛ: ?Sɛ ɛntɛnɛti su’n, sran kun se e kɛ ɔ ti Zoova i Lalofuɛ’n, ngue yɛ ɔ kle kɛ ɔ ti Zoova i Lalofuɛ sakpa? ?Yɛ kannzɛ bɔbɔ ɔ ti Zoova i Lalofuɛ’n, ngue yɛ ɔ kle kɛ ɔ nin Zoova be afiɛn mantan kpa-ɔ? ?I asɔnun’n nun lɔ’n, aniaan’m be kɛn i ndɛ kpa? ?I kpa bɔbɔ’n nán “sran tɛ” wie-ɔ? (1 Kor. 15:33; 2 Tim. 2:20, 21) ?Ɲanmiɛn mmla’n man sran sɔ’n i atin kɛ ɔ ja bla annzɛ bian? Ɔ ti cinnjin kɛ a si kosan sɔ’m be su tɛlɛ’n. Sanngɛ sɛ w’a usaman aniaan wie mɔ be si sran sɔ’n i kpa’n, a su kwlá siman kosan sɔ’m be su tɛlɛ’n. (Nya. 15:22) Asa ekun’n, e kwlakwla e si kɛ ɔ fataman kɛ Zoova i sufuɛ kun ja sran ng’ɔ suman Zoova’n.​—2 Kor. 6:14; 1 Kor. 7:39.

Ndɛ kwlaa nga e kɛnnin i lɛ’n kle kɛ sɛ e kɔ ɛntɛnɛti su e ko kunndɛ bla annzɛ bian’n, sa kwla ɲan e. ?Sanngɛ nin yɛ e kwla ɲan sran kpa e jɛ i-ɔ? Kɛ e kɔ asɔnun aɲia mun nin akpasua kun aɲia mun nin nvle kun aɲia mun nin aɲia uflɛ’m be bo’n, e kwla wun sran nga e kunndɛ’n.

Kɛ sa wie ti’n e kwlá yiaman e yoman aɲia sɔ mun kɛ koronavirisi blɛ nga nun sa’n, e yo aɲia sɔ mun ɛntɛnɛti su. Aɲia sɔ’m be bo’n, a kwla wun aniaan wie mɔ be nin-a jaman bla annzɛ bian’n. Kɛ aniaan sɔ’m bé dí junman aɲia’m be bo’n annzɛ kɛ bé tɛ́ kosan’m be su’n, a kwla fa ɔ ɲin sie be su. (1 Tim. 6:11, 12) Asa ekun’n, kɛ e ko wie aɲia’m be yo ɛntɛnɛti su’n, aniaan’m be bubu aniaan’m be nun akpasuaakpasua. Ɔ maan a kwla kɔ akpasua sɔ’m be nun kun nun naan a nin aniaan’m b’a koko yalɛ. Blɛ sɔ’n nun’n sɛ sran nga ɔ ɲin o i su’n ɔ o lɔ’n, á kwlá wún wafa ng’ɔ nin aniaan’m be yo ninnge mun’n. I liɛ’n á sí i kpa. (1 Piɛ. 3:4) Kɛ ɔ́ kɔ́ i ɲrun mɔ á sí sran’n i kpa’n, á wá wún i wlɛ sɛ ninnge ng’ɔ sunnzun kɛ ɔ́ yó be’n be nin ɔ liɛ’m be kɔ likawlɛ-o. Ɔ maan sɛ a kwla ja sran sɔ’n, á wún i wlɛ weiin.

Kɛ be nga be nin-a jaman bla annzɛ bian’n be nanti aja’n i su ndɛ nga Biblu’n kan’n su’n, ndɛ yɛ’n kpɛn su be lika. Ɔ se kɛ: “Sran nga b’ɔ nyan bla [annzɛ bian] kpa ja’n nn w’a nyan muae, afin like yɛ Anannganman fa cɛli i-ɔ.”​—Nya. 18:22.