ALƐ Dan Nɲɔn Su nun’n, Itilɛɛ i sonja’m be nun kun kpannin Zoova i Lalofuɛ’m be su seli kɛ: “Sɛ amun nun wie fi waan ɔ nin Aflansi nin Angle mun be kunman alɛ’n, amun kwlaa amún wú!” Kannzɛ bɔbɔ sonja kpanngban be jinjin lɛ be su minndɛ be’n, e niaan sɔ’m be nun wie fi w’a kplinman su kɛ ɔ́ fɔ́n Zoova i mmla’n. Nanwlɛ, be kleli kɛ be ti yakpafuɛ dan! Like nga be yoli’n kle e like ng’ɔ fata kɛ e yo i mɛn’n nun alɛ’m be kunlɛ nun’n. Yɛle kɛ ɔ fataman kɛ e fa e wun e wla nun. Kannzɛ bɔbɔ be waan sɛ y’a yoman sɔ’n bé kún e’n, sanngɛ e kunman alɛ, yɛ e yoman politiki.

1. LAA’N ƝANMIƐN I SUFUƐ’M BE KWLAA BE TI NVLE KUNNGBA NUNFUƐ

Laa’n, Zoova yoli maan i sufuɛ’m be kwlaa be trannin nvle kunngba nun. Nvle sɔ’n yɛle Izraɛli nvle’n. Zoova seli kɛ Izraɛlifuɛ’m be ti i “liɛ klonglo nvle’m be kwlaa be afiɛn.” (Tul. 19:5) Asa’n, ɔ fali lika trele kun mannin be kɛ be tran nun. Ɔ maan kɛ Ɲanmiɛn se Izraɛlifuɛ’m be kɛ be nin nvle uflɛ nunfuɛ’m be ko kun alɛ’n, be kunman be wiengu Izraɛlifuɛ mun. a

Andɛ’n, Zoova i sufuɛ mun “be fin nvlenvle kwlaa nun nin akpasua kwlaa su. Sran wafawafa kwlaa o be nun, yɛ be kan aniɛn wafawafa kwlaa.” (Ngl. 7:9) Ɔ maan sɛ Zoova i sufuɛ’m be waan bé fá be wun bé wlɛ́ i alɛ nga be kun be andɛ’n be nun’n, be kwla kun be wiengu Zoova sufuɛ mun.

 2. ZOOVA YƐ Ɔ SELI IZRAƐLIFUƐ’M BE KƐ BE KO KUN ALƐ-Ɔ

Laa’n, Zoova bɔbɔ yɛ ɔ kle blɛ nga i nun yɛ ɔ fata kɛ Izraɛlifuɛ’m be kun alɛ’n niɔn. Yɛ ɔ kle sa nga ti yɛ ɔ fata kɛ be kun alɛ sɔ’n. I wie yɛle kɛ Ɲanmiɛn seli Izraɛlifuɛ’m be kɛ be nunnun Kanaanfuɛ mun. Afin be su mmusu mun, be kunndɛ bla nin bian sukusuku, yɛ be fa be mma’m be yi tɛ. Kɛ ɔ ko yo naan Izraɛlifuɛ’m b’a yomɛn i sɔ ninnge mun wie’n ti’n, Zoova seli be kɛ be nunnun sran sɔ mɔ be o mɛn ng’ɔ seli kɛ ɔ́ fá mán be’n nun’n be kwlakwla. (San. 18:24, 25) Kɛ Izraɛlifuɛ’m be trannin mɛn nga Ɲanmiɛn waan ɔ́ fá mán be’n i nun’n, ɔ ju wie’n, ɔ man be atin kɛ be nin be kpɔfuɛ’m be kun. (2 Sam. 5:17-25) Sanngɛ Zoova w’a manman Izraɛlifuɛ’m be atin le kɛ be bɔbɔ be fa ajalɛ kɛ bé kún alɛ. Kɛ Izraɛlifuɛ’m be bɔbɔ be fɛ i sɔ ajalɛ’n, i bo guaman kpa manman be.—Kal. 14:41-45; 2 Ɲol. 35:20-24.

Andɛ’n, Zoova manman sran’m be atin kɛ be kun alɛ. Ɔ maan andɛ’n kɛ sran’m be kun alɛ’n, i sɔ’n finman Ɲanmiɛn, ɔ fin sran’m be bɔbɔ. I wie yɛle kɛ asiɛ kplilɛ, annzɛ sika kunndɛlɛ, annzɛ politiki yolɛ’n ti’n, be kun alɛ. Yɛ wie liɛ’n be nuan m’ɔ sɛman ndɛ wie’m be su’n i ti yɛ be kun alɛ-ɔ. ?Yɛ be nga be waan bé kún alɛ Ɲanmiɛn dunman nun bé fá sásá Ɲanmiɛn i sufuɛ mun, annzɛ bé kún Ɲanmiɛn i kpɔfuɛ’m be li? Zoova waan ɔ cɛ kan’n, Aamagedɔn alɛ’n nun’n, ɔ́ wá sɛ́sɛ́ i sufuɛ mun, kpɛkun ɔ́ núnnún i kpɔfuɛ mun. (Ngl. 16:14, 16) Zoova i sonja nga be o ɲanmiɛn su lɔ’n be yɛ bé wá kún i sɔ’n alɛ’n niɔn. Nɛ́n i sufuɛ nga be o asiɛ’n su wa mun-ɔn.—Ngl. 19:11-15.

3. KƐ IZRAƐLIFUƐ’M BÉ KÚN ALƐ’N, BE YACI BE NGA BE LAFI ƝANMIƐN SU’N BE LƐ

Laa’n, Izraɛli sonja’m be sili be nga be kleli kɛ be lafi Ɲanmiɛn su’n, be aunnvɔɛ. Be nga Zoova seli kɛ be nin kunlɛ fata’n be ngunmin cɛ yɛ be kunnin be-ɔ. Maan e kan sa sɔ’m be nun nɲɔn be ndɛ. Kɛ Zoova seli Izraɛlifuɛ’m be kɛ be nunnun Zeriko klɔ’n i nunfuɛ mun’n, be yacili Raabu nin i awlofuɛ’m be lɛ. Afin ɔ kleli kɛ ɔ lafi Ɲanmiɛn su. (Zoz. 2:9-16; 6:16, 17) Kɛ ɔ́ kɔ́ i ɲrun’n, Izraɛlifuɛ’m  be yacili Gabaɔnfuɛ’m be kwlaa be lɛ. Afin be kleli kɛ be sro Ɲanmiɛn.—Zoz. 9:3-9, 17-19.

Andɛ’n, kɛ sran’m bé kún alɛ’n be yaciman be nga be lafi Ɲanmiɛn su’n be lɛ. Be nga be lafi Ɲanmiɛn su-o, be nga be timan sonja-o be kun be ngba.

4. IZRAƐLIFUƐ’M BE NIAN WAFA NGA ƝANMIƐN SE BE KƐ BE KUN ALƐ’N SU

Laa’n, Zoova seli Izraɛli sonja’m be kɛ be nian ajalɛ ng’ɔ kle be alɛ kunlɛ’n nun’n su. I wie yɛle kɛ ɔ ju wie’n, Ɲanmiɛn kle i kpɔfuɛ mun ‘like ng’ɔ fata kɛ be yo naan b’a yaci be lɛ’n.’ (Mml. 20:10) Asa ekun’n, Zoova kunndɛ kɛ Izraɛli sonja’m be yo be wun sanwun, yɛ be yo kan be tran lɛ’n i sanwun wie. Asa’n, ɔ kunndɛ kɛ be nanti i mmla’m be su. (Mml. 23:9-14) Kɛ nvle nga be bo sin yia Izraɛlifuɛ’m bé kún alɛ’n, be nin bla mun be la kekle nun. Sanngɛ Zoova seli Izraɛlifuɛ’m be kɛ nán be yo sɔ. I kpa bɔbɔ’n, sɛ be kun alɛ naan be tra bla wie mun’n, sɛ be nin-a diman anglo kun’n, be kwlá faman be yoman be yi.—Mml. 21:10-13.

Andɛ’n, nvle kpanngban be bo yoli kun be kpɛli alɛ kunlɛ’n i su mmla wie mun. Mmla sɔ’m be nun wie’m be sasa be nga be timan sonja’n. Sanngɛ ng’ɔ ti tɛ’n, yɛle kɛ blɛ sunman’n kɛ bé kún alɛ’n, be diman mmla sɔ’m be su.

5. ƝANMIƐN KUNNIN I NVLE’N I TI ALƐ

Laa’n, Zoova kunnin Izraɛlifuɛ’m be ti alɛ. Ɔ ju wie’n, ɔ yo abonuan sa wie mun naan Izraɛlifuɛ’m b’a kwla be kpɔfuɛ mun. ?Wafa sɛ yɛ Zoova ukali Izraɛlifuɛ mun naan b’a kwla Zeriko klɔ’n nunfuɛ mun-ɔn? Kɛ Zoova maan Izraɛlifuɛ mun “be kpannin alɛ kpanlɛ kekle kpa’n, talɛ’n ka lɛ bu guali.” Ɔ maan sonja’m be kwla fali klɔ’n. (Zoz. 6: 20) ?Yɛ Amɔnfuɛ’m be li? ?Wafa sɛ yɛ Zoova ukali Izraɛlifuɛ mun naan b’a kwla be-ɔ? Biblu’n se kɛ: “Zoova yoli maan nzraama nga kɛ nzue tɔ́’n ɔ gua’n, i dandan wie’m be fin ɲanmiɛn su lɔ be guali be su […]. I kpa bɔbɔ’n, sran nga nzraama sɔ’m be kunnin be’n, be sɔn trali be nga Izraɛlifuɛ’m be fali tokofi kunnin be’n.”—Zoz. 10:6-11.

KLISIFUƐ KPA’M BE TI SRAN AFIƐN SIESIEFUƐ

Kɛ nga e fa wunnin i’n sa’n, ngbaciɛ o Klisifuɛ mun nin laa Izraɛlifuɛ’m be afiɛn. Sanngɛ nán ngbaciɛ sɔ’n i ngunmin ti yɛ e faman e wun e wlɛmɛn i alɛ nga be kun be andɛ’n be nun-ɔn. Sa wie mun ekun be o lɛ. I wie yɛle kɛ Ɲanmiɛn seli kɛ mɛn’n i awieliɛ blɛ’n nun’n, be nga ɔ́ wá klé be like’n, “be su suanman alɛ kunlɛ kun,” naan se kɛ bé fá be wun bé wlɛ́ i alɛ kunlɛ nun. (Eza. 2:2-4) Asa’n, Zezi Klisi seli i sɔnnzɔnfuɛ’m be kɛ nán be yo “mɛn’n nunfuɛ.” I sɔ’n ti’n, be yoman politiki, yɛ be kunman alɛ.—Zan 15:19.

Zezi seli i sɔnnzɔnfuɛ’m be kɛ be yo ninnge wie mun ekun. Ɔ seli be kɛ ninnge wie mɔ be kwla yo maan be fa sa sie be klun’n, annzɛ be fa ya ble’n, annzɛ be kun alɛ’n nán maan be yo be. (Mat. 5:21, 22) Asa ekun’n, ɔ seli be kɛ be yo “sran afiɛn siesiefuɛ” yɛ be klo be kpɔfuɛ mun.—Mat. 5:9, 44.

?Yɛ e tinuntinun e li? Ɔ ti su kɛ e kunman alɛ, sanngɛ wie liɛ’n, akunndan nga e bu’n ɔ kwla yo maan asɔnun’n nunfuɛ’m be bubu be wun nun. I sɔ’n ti’n, maan e mian i ɲin naan akunndan nga e bu’n ɔ yo kpa titi.—Zak. 4:1, 11.

Ɔ fataman kɛ e fa e wun e wlɛ i mɛn’n nun alɛ kunlɛ’n nun. Sanngɛ ɔ fata kɛ e yo naan anuansɛ nin klolɛ tran e afiɛn. (Zan 13:34, 35) Kɛ é mínndɛ kɛ Zoova yo naan alɛ’n wie mlɔnmlɔn mɛn’n nun’n, maan e yo like kwlaa nga e kwla yo naan y’a faman e wun y’a wlɛmɛn i alɛ kunlɛ nun’n.—Jue. 46:9.