Kɛ sran kun tá nda’n, “ɔ kan ndɛ fa kle kɛ w’a fua kpa kɛ ɔ́ yó like kun. Ɔ ju wie’n, ɔ bo Ɲanmiɛn dunman fa kle kɛ Ɲanmiɛn ti i lalofuɛ.” Ɔ kwla kan ndɛ’n i nuan nun annzɛ ɔ kwla klɛ.

Sran wie’m be bu i kɛ ɔ fataman kɛ e ta nda. Afin Zezi seli kɛ: “Nán amun ta nda mlɔnmlɔn. […] Sɛ amun se kɛ ‘Ɛɛn’ maan ɔ ka su. Sɛ amun se kɛ ‘Cɛcɛ’ kusu’n maan ɔ ka su. Afin ndɛ kwlaa nga be kan gua su’n, ɔ fin klunwifuɛ’n.” (Mat. 5:33-37) Zezi si kɛ Moizi Mmla se kɛ sa wie’m be nun’n ɔ fata kɛ Izraɛlifuɛ’m be ta nda. Kpɛkun ɔ si kɛ Ɲanmiɛn i sufuɛ kpa wie’m be tali nda. (Bob. 14:22, 23; Tul. 22:10, 11) Asa’n, ɔ si kɛ blɛ wie nun’n Zoova bɔbɔ tali nda wie. (Ebr. 6:13-17) Ɔ maan Zezi kwlá seman kɛ nán e ta nda mlɔnmlɔn. Sanngɛ ndɛ nga i waan ɔ́ kán’n yɛle kɛ nán e ta nda ngbɛnngbɛn. Yɛ sɛ e ta nda’n ɔ fata kɛ e yiɛ i nuan. Afin Zoova bu nda talɛ’n i like cinnjin kpa. Ɔ maan kwlaa naan y’a ta nda’n, maan e bu i sin kpa.

?Yɛ sɛ be se e kɛ e ta nda nin? ?Ngue yɛ ɔ fata kɛ e yo-ɔ? I klikli’n yɛle kɛ maan e nian sɛ é kwlá yía nda sɔ’n i nuan-o. Sɛ é nían naan e su kwlá yiɛmɛn i nuan’n, nán e ta nda sɔ’n. Ɲanmiɛn Ndɛ’n se kɛ: “Sɛ w’a taman nda’n, ɔ ti kpa tra kɛ w’a ta nda naan w’a yiɛmɛn i nuan.” (Aku. 5:5, NWT) Kpɛkun maan e bu Biblu’n nun ndɛ mma nga be kan nda talɛ’n i ndɛ’n be su akunndan. I sin’n, maan e jran su e fa ajalɛ. ?Sanngɛ Biblu’n nun ndɛ mma benin mun yɛ e kwla bu be su akunndan-ɔn?

Nda wie’m be jɔ Ɲanmiɛn klun. I wie yɛle kɛ, kɛ Zoova i Lalofuɛ’m bé já’n, be ta be wiengu nda. Ɲanmiɛn nin sran’m be ɲrun’n, yasua’n nin bla’n be ta be wiengu nda kɛ bé kló be wun, bé nían be wiengu lika, yɛ be ɲin yí be wiengu lele “saan wie’n yɛ ɔ́ títí be nun-ɔn.” (Kannzɛ nán ndɛ kunngba’n yɛ be kan’n, sanngɛ ndɛ nga be kan’n ɔ ti nda yɛ be tɛ i Ɲanmiɛn ɲrun-ɔn.) I sin’n, be se be kɛ b’a ja siɛn’n, naan bé já lele saan wie’n yɛ ɔ́ títí be nun-ɔn. (Bob. 2:24; 1 Kor. 7:39) Ɔ maan kɛ bé yó aja’n, nda nga be ta’n ɔ ti Ɲanmiɛn i klun su.

Nda wie’m be jɔman Ɲanmiɛn klun. I wie yɛle kɛ ɔ fataman kɛ Klisifuɛ kun ta nda kɛ ɔ́ kún alɛ fá kplí i nvle’n i ti. Annzɛ ɔ ta nda kɛ ɔ su suman Ɲanmiɛn kun. Sɛ ɔ yo sɔ’n nn w’a fɔn Ɲanmiɛn mmla’n. Afin Ɲanmiɛn mmla’n se kɛ Klisifuɛ’m be “timan mɛn’n nunfuɛ.” I sɔ’n ti’n, ɔ fataman kɛ be fa be wun be wla mɛn’n nun ninnge mun nin alɛ’m be nun.—Zan 15:19; Eza. 2:4; Zak. 1:27.

 Nda wie’m be o lɛ’n sran kun yɛ ɔ fa ajalɛ kɛ ɔ́ tá annzɛ ɔ taman-ɔn. Ɔ ju wie’n, kwlaa naan y’a fa ajalɛ kɛ é tá nda kun’n ɔ fata kɛ e bu ndɛ kun mɔ Zezi kannin’n i akunndan. Ɔ seli kɛ: “An fa ninnge nga be ti Sezaa liɛ’n be man Sezaa. Sanngɛ an fa ninnge nga be ti Ɲanmiɛn liɛ’n be man Ɲanmiɛn.”—Lik. 20:25.

Wienun-ɔn, aniaan kun kunndɛ kɛ ɔ́ káci nvle kun nunfuɛ annzɛ ɔ́ ɲán nvle sɔ’n i fluwa kun. Kpɛkun be se i kɛ ɔ ta awa’n i nda. Sɛ be se i kɛ ɔ ta nda kɛ ɔ́ yó like wie m’ɔ nin Ɲanmiɛn mmla’n be kɔman likawlɛ’n, Ɲanmiɛn Ndɛ’n m’ɔ si i’n ti’n ɔ su kplinman su. Sanngɛ sɛ awa’n mɛn i atin kɛ ɔ kpɛ ndɛ’n i wun naan w’a fɔnman Ɲanmiɛn i mmla’n, ɔ kwla yo sɔ.

Sɛ awa’n man e atin kɛ e kpɛ ndɛ’n i wun naan y’a fɔnman Ɲanmiɛn mmla’n naan e kplin su’n, ɔ timan tɛ. Afin Rɔmunfuɛ Mun 13:1 se kɛ: “Maan sran’m be kwlaa be ɲin yi mɛn siefuɛ mun.” Ɔ maan aniaan kun kwla se kɛ, kɛ mɔ Ɲanmiɛn bɔbɔ se e kɛ e yi ɲin mɛn siefuɛ mun’n ti’n, sɛ ɔ ta be nda’n w’a yoman sa tɛ.

Sɛ be se e kɛ, kɛ é tá nda’n e fa e sa e fua like wie su annzɛ e yo like uflɛ’n, ɔ fata kɛ e bu i sin kpa. I liɛ’n, kasiɛn su’n e akunndan’n su buman e fɔ. Laa nun’n, kɛ Rɔmunfuɛ mun nin Sitifuɛ’m bé tá nda’n be tinngɛ be sa’n be tokofi’n su. Be yo sɔ naan bé fá klé be alɛ kunlɛ amuin kun kɛ be kwla lafi be su. Glɛkifuɛ’m be liɛ’n, kɛ bé tá nda’n be man be sa su nglo. Afin be lafi su kɛ nglo lɔ like kun m’ɔ le tinmin’n i ɲin ta be, naan like kwlaa nga be yo’n, bé kɛ́n i su ndɛ bé klé i.

I yo, ɔ fataman kɛ, kɛ Zoova i sufuɛ kun tá nda’n, ɔ fɛ i sa fua be nvle’n i nzɔliɛ like wie su annzɛ Ɲanmiɛn sulɛ wafa nga be timan su’n be like wie su. ?Yɛ sɛ be fɛ i kɔ jɔlɛ difuɛ’m be ja su naan be se i kɛ ɔ fɛ i sa sie i Biblu’n su naan ɔ ta nda kɛ ɔ́ dí nanwlɛ nin? I lɛ nun’n, ɔ kwla kplin su. Afin Ɲanmiɛn Ndɛ’n se kɛ, kɛ Ɲanmiɛn i sufuɛ wie’m bé tá nda’n, be fali be sa yoli ninnge wie mun. (Bob. 24:2, 3, 9; 47:29-31) Sanngɛ kusu nán e wla fi su kɛ sɛ e ta nda jɔlɛ difuɛ’m be ɲrun kɛ é dí nanwlɛ’n, Ɲanmiɛn ɲrun yɛ e tali nda sɔ’n niɔn. Ɔ maan ɔ fata kɛ e siesie e wun kpa naan kɛ bé úsa e sa’n, y’a kwla di nanwlɛ.

E kunndɛ kɛ e nin Zoova e afiɛn mantan kpa titi. I sɔ’n ti’n, sɛ be se e kɛ e ta nda’n, maan e dun mmua e srɛ Ɲanmiɛn. Kpɛkun e bu i sin kpa. Sɛ e yo sɔ’n, e akunndan’n su buman e fɔ yɛ e su fɔnman Biblu’n nun mmla mun. Sɛ kusu e fali ajalɛ kɛ é tá nda’n, maan e yiɛ i nuan.—1 Piɛ. 2:12.