?A kanngannin afuɛ nga nun Sasafuɛ Tranwlɛ’n nga be fiteli’n be nun kpa? Sɛ ɔ ti sɔ’n, tɛ kosan nga’m be su:

?Sɛ e fa blɛ e kan Zoova i ndɛ, e tie ndɛ ng’ɔ kan’n yɛ e bu i akunndan’n, i su ye benin yɛ é ɲɛ́n i-ɔ?

Sɛ e yo sɔ’n, é fá ajalɛ kpa, é sí sran’m be like kle kpa, é láfi Ɲanmiɛn su kpa ekun kpɛkun é kló Zoova tankaan kpa.—w22.01, b. 30-31.

?Sɛ e lafi Zoova nin i janunfuɛ’m be su’n, wafa sɛ yɛ i sɔ’n úka e-ɔ?

Dɔ nga su’n, maan e mian e ɲin naan e nanti ajalɛ nga Zoova kle e’n su. Yɛle kɛ nán e si ajalɛ nga asɔnun kpɛnngbɛn’m be fa be’n be su akplowa yɛ nán e se kɛ e nantiman be su. I liɛ’n, Aamagedɔn alɛ nun’n, sɛ be fa ajalɛ wie naan e wunmɛn i wlɛ annzɛ ɔ timan e liɛ’n su’n, é nánti be su.—w22.02, b. 4-6.

Anzi kun seli Zakari kɛ “bé wún ɲanman mɔ sunmun o i nuan’n [nvle siefuɛ] Zorobabɛli i sa nun.” ?Ndɛ sɔ’n i bo’n yɛle benin? (Zkr. 4:8-10)

Ndɛ sɔ’n kle kɛ Ɲanmiɛn i sufuɛ’m bé wíe Ɲanmiɛn i sua’n i kplan yɛ bé kplɛ́n i kɛ nga Ɲanmiɛn bɔbɔ fa klo’n sa.—w22.03, b. 16-17.

?Wafa sɛ yɛ e kwla kle ajalɛ kpa e ijɔlɛ’n nun-ɔn? (1 Tim. 4:12)

Kɛ é bó jasin fɛ’n, sɛ be kan ndɛ tɛtɛ kle e’n, maan e tɛ su amanniɛn su nin aɲinyiɛ su. Maan e tu e klun e to jue aɲia’m be bo yɛ e tɛ kosan’m be su titi. Asa ekun’n, maan e di nanwlɛ e kle e wiengu yɛ e wla be fanngan. Kpɛkun nán ndɛ tɛ fin e nuan fite.—w22.04, b. 6-9.

?Ngue ti yɛ nnɛn nnan (awa mun) nga Daniɛli ndɛ tre 7 kan be ndɛ’n, Sa Nglo Yilɛ 13:1, 2 nun’n be kannin nnɛn nnan sɔ’m be boli nun m’ɔ yoli nnɛn kunngba-ɔ?

Nnɛn nga Sa Nglo Yilɛ 13 kɛn i ndɛ’n, ɔ timan awa kunngba cɛ i nzɔliɛ, kɛ Rɔmun awa’n sa. Sanngɛ ɔ ti mɛn’n nun awa kwlaa mɔ be sie sran mun’n be nzɔliɛ.—w22.05, b. 9.

?Ngue yɛ e kwla yo e fa kle kɛ e lafi su kɛ Ɲanmiɛn yo sa nuan su sɛsɛ-ɔ?

Sɛ sran wie kpɛ e nzowa’n, annzɛ ɔ wɔ e safle’n annzɛ ɔ yo e tɛ’n, nán e fa sa sɔ’n e sie e klun yɛ nán e fa ya. Sanngɛ maan e fa sa sɔ’n e wlɛ i Zoova i sa nun. Cɛn wie lele’n, ɔ́ wá núnnún sa yaya kwlaa nga sa tɛ’n kpɛli i ba’n.—w22.06, b. 10-11.

?Sɛ e su yo aɲia naan be se aniaan bian kun kɛ ɔ srɛ Ɲanmiɛn’n, ngue yɛ ɔ fataman kɛ i wla fi su-ɔ?

Ɔ fataman kɛ blɛ sɔ’n nun’n, ɔ man aniaan’m be afɔtuɛ annzɛ ɔ bo jasin mun be su. Kɛ aɲia’n bó i bo’n, sɛ be se i kɛ ɔ srɛ Ɲanmiɛn’n, ɔ fataman kɛ ɔ kan “ndɛ kpanngban.” (Mat. 6:7)—w22.07, b. 24-25.

?Kɛ be se kɛ ‘be nga be yoli sa tɛ’n, bé dí be jɔlɛ’n’ i bo’n yɛle benin? (Zan 5:29)

Ndɛ sɔ’n kleman kɛ bé wá nían be nga be yoli sa tɛ’n be sa tɛtɛ nga be yoli be ka naan b’a wu’n be su bé bú be fɔ. Sanngɛ kɛ be ko cɛn’n, like nga bé wá yó’n Zezi wá fɛ́ i ɲin síe su kpa.—w22.09, b. 18.

?Aɲia dan nga be yoli i afuɛ 1922 Sɛptanblu anglo nun’n i bo’n, ndɛ benin yɛ aniaan bian Ritɛɛfɔdu kannin-ɔn?

Aɲia dan nga be yoli i Sedaa Puɛnti m’ɔ o Etazinin lɔ klɔ nga be flɛ i kɛ Oyo’n i su lɔ’n i bo’n, aniaan bian’n seli kɛ: “Famiɛn’n w’a bo i sielɛ’n i bo! Amun yɛ amun ti i Sielɛ’n i jɔ bofuɛ-ɔ. Ɔ maan amun bo i jɔ, amun bo i jɔ, amun bo Famiɛn’n ɔ nin i Sielɛ’n be jɔ!”—w22.10, b. 3-5.

?Kɛ nga Ezai 30 fa kan’n sa’n, like nsan nga Ɲanmiɛn fa uka e naan y’a jran kekle’n yɛle benin?

I klikli’n yɛle kɛ ɔ tie e srɛlɛ mun yɛ ɔ tɛ be su. I nɲɔn su’n yɛle kɛ ɔ kle e atin. Yɛ i nsan su’n yɛle kɛ ɔ yra e su dɔ nga su, kpɛkun ɔ́ yrá e su e ɲrun lɔ.—w22.11, b. 9.

?Ngue ti yɛ e kwla se kɛ ndɛ ng’ɔ o Jue Mun 37:10, 11, 29 nun kpɛnnin su laa naan ɔ́ wá kpɛ́n su ekun-ɔn?

Davidi su kan wafa nga Izraɛli mɛn nun tranlɛ’n fa ti’n i ndɛ. Ɔ ti kɛ Salomɔn blɛ su liɛ’n sa. Kɛ Zezi kán asiɛ m’ɔ́ wá káci lika klanman’n i ndɛ’n, ɔ boli ndɛ mma 11 su. (Mat. 5:5; Lik. 23:43)—w22.12, b. 8-10, 14.