Zoova seli sran’m be kɛ ‘be yi asiɛ’n yɛ be sie i.” I sɔ’n kle kɛ ɔ fata kɛ be yo naan asiɛ wunmuan’n kaci lika klanman. (Bob. 1:28) Ɔ fata kɛ be nga bé wá trán asiɛ’n su tititi’n, be nanti ndɛ sɔ mɔ Zoova kannin’n su. Afin i bo bolɛ’n nun’n, asiɛ’n su yoman klanman. Afin Edɛnin lɔ fie klanman’n nunnunnin nán andɛ sɔ-ɔ. Kɛ Aamagedɔn alɛ’n ko sin’n, é wá dí junman kekle kpa naan y’a siesie asiɛ’n i lika nga be sacili’n. Nanwlɛ, nán junman kaan yɛ é wá dí-ɔ.

Junman nga é wá dí i asiɛ su’n ti’n, e wla kpɛn junman nga kɛ Izraɛlifuɛ’m be sali be sin be nvle nun’n be dili’n i su. B’a tranman be nvle nun lele afuɛ 70. Sanngɛ Ezai seli kɛ Zoova fanngan nun’n bé wá yó maan be nvle’n yó klanman ekun. Ezai seli kɛ: “Ɔ́ wá yó maan i aawlɛ flɛnnɛn’n ɔ́ yó kɛ Edɛnin’n sa, kpɛkun i lika kpɛtɛkplɛɛ’n ɔ́ yó kɛ Zoova i fie klanman’n sa.” (Eza. 51:3) Zoova ukali Izraɛlifuɛ. I sɔ’n ti’n, be kwla yoli maan be nvle’n yoli klanman ekun. I wafa kunngba’n,  Zoova wá úka be nga asiɛ’n yó be liɛ’n. Ɔ maan bé wá yó maan asiɛ’n káci lika klanman. ?Ngue yɛ e kwla yo i dɔ nga su e fa kle kɛ e kunndɛ kɛ é dí junman sɔ’n wie-ɔ?

Like nga e kwla yo’n, i kun yɛle kɛ maan e yo e awlo’n nun yɛinyɛin yɛ e siesie e ninnge mun sɛsɛsɛ. Kannzɛ e mantanfuɛ’m be yoman be lika nun yɛinyɛin’n, sanngɛ e liɛ’n maan e yo sɔ. Asa’n, kɛ aniaan’m bé yó Ɲanmiɛn Sielɛ Sua’n nin aɲia dandan’m be yowlɛ’m be nun yɛinyɛin mɔ bé síesíe be ye’n, maan e ko uka be. Sɛ a ɲɛn i wun atin’n, klɛ ɔ dunman naan a nin be nga kɛ sanvuɛsa ju lika kun be ko uka lɔfuɛ mun’n be di junman. Sɛ a yo sɔ’n, á klé kɛ a kunndɛ kɛ á úka aniaan mun blɛ kekle nun. A kwla usa ɔ wun kɛ: ‘?Junman benin yɛ n kwla suɛn i dilɛ dɔ nga su naan sɛ Zoova man min atin kɛ n tran asiɛ su wa’n titi’n, m’an kwla di i kpa-ɔ?’

Kɛ Zezi cɛnnin Zairisi i wla bla’n cɛ’n, ɔ seli kɛ be mɛn i like maan ɔ di. (Mar. 5:42, 43) Ba bla kan sɔ m’ɔ le afuɛ 12 i lika nianlɛ w’a yoman kekle. Sanngɛ kɛ Zezi wá yía nda ng’ɔ tali’n i nuan’n, junman nga é wá dí’n ɔ su yoman blɛblɛ. Zezi seli kɛ: “Be kwlaa nga be o ndia’m be nun’n, bé tí i nɛn’n kpɛkun bé fín ndia’m be nun bé fíte.” (Zan 5:28, 29) Biblu’n w’a kanman be nga bé wá cɛ́n be’n be su ndɛ kpanngban. Sanngɛ e si kɛ é wá úka be naan be ɲan aliɛ nin lawlɛ nin tralɛ. Dɔ nga su bɔbɔ’n, e kwla yo ninnge wie mun e fa kle kɛ e kunndɛ kɛ é úka be. Maan e kan ninnge sɔ’m be nun wie’m be ndɛ.

?Kɛ be se e kɛ akpasua sunianfuɛ’n su ba e osu nianlɛ’n, e siesie e wun naan y’a sɔ i nun e awlo lɔ? ?Kɛ be se aniaan kun m’ɔ di junman Betɛli lɔ’n kɛ ɔ jrɛn i junman’n annzɛ be se akpasua sunianfuɛ kun kɛ ɔ jrɛn i junman’n, e ukɛ i naan w’a ɲan sua? ?Sɛ be se kɛ bé wá yó nvle kun aɲia’n annzɛ aɲia ngunmin kun e asa liɛ su’n, ka naan aɲia’n w’a bo i bo annzɛ kɛ ɔ ko wie’n, e di junman kekle kpa naan y’a nian be nga bé wá ba’n be lika?

Kɛ nga Sa Nga Be Yoli’n 24:15 fa kan’n sa’n, e si kɛ bé wá cɛ́n sran miliaa kpanngban be nguan. Sran sɔ’m be nun kpanngban b’a siman Zoova ka naan b’a wu. Ɔ maan kɛ bé wá cɛ́n be’n, é wá klé be like naan be si Zoova. a Ɲanmiɛn i sufuɛ kpa mɔ be si like kle kpa’n yɛ bé wá klé sran sɔ’m be like-ɔ. (Eza. 11:9) Be flɛ aniaan bla kun kɛ Salɔtu. Ɔ boli jasin fɛ’n Abloki nin Amlɛnkɛn’m be mɛn’n i ngua lɔ lika’n nun ɔ nin sran ble’m be mɛn’n nun. I ɲin o blɛ mɔ é wá klé be nga bé wá cɛ́n be’n be like’n i sin kpa. Ɔ seli kɛ: “N kunndɛ kpa kɛ ń klé be nga bé wá cɛ́n be’n be like. Kɛ n kanngan lalafuɛ sran’m be nun kun i su ndɛ nun’n, ɔ ju wie’n n se min wun kɛ: ‘Sɛ ɔ ti kɛ sran nga sili Zoova sa’n, nn w’a yoman like nga.’ N kunndɛ kpa kɛ ń kán Zoova i ndɛ ń klé be nga bé wá cɛ́n be’n. Asa’n, n kunndɛ kɛ ń sé be kɛ sɛ be su Zoova’n, bé dí mɛn’n i kpafuɛ’n.”

Zoova i sufuɛ kpa nga be wuli ka naan Zezi w’a ba’n, bé wá súan like kaka. Blɛ sɔ’n nun’n, é wá yíyí ndɛ nga Daniɛli kannin mɔ w’a wunmɛn i wlɛ’n i nun é klé i. (Dan. 12:8) Asa’n, é wá úka Riti nin Naomin naan be wun i wlɛ kɛ be yoli Mesi’n i nannan. Kɛ é wá klé sran’m be like’n, like fi su kleman e yalɛ yɛ ninnge nga be kwla yo maan e sie e ɲin nɲɔnnɲɔn’n be su tranman lɛ kun. Nanwlɛ’n, blɛ sɔ’n nun é wá dí aklunjɔɛ dan!

?Ngue yɛ e kwla yo i dɔ nga su e fa kle kɛ e kunndɛ kɛ é klé be nga bé wá cɛ́n be’n be like-ɔ? Maan e mian e ɲin naan e si sran’m be like kle kpa yɛ e bo jasin fɛ’n titi. (Mat. 24:14) Kannzɛ kpɛnngbɛn yolɛ annzɛ like uflɛ ti’n, e kwlá boman jasin fɛ’n i kpa’n, sanngɛ sɛ e mian e ɲin e yo e liɛ nga e kwlɛ i yo’n, é klé kɛ e kunndɛ kɛ é klé be nga bé wá cɛ́n be’n be like.

Maan e bu kosan cinnjin yɛ’m be su akunndan: ?E kunndɛ kpa kɛ asiɛ’n yo e liɛ wie? ?E kunndɛ kɛ é yó naan asiɛ’n kaci lika klanman? ?E kunndɛ kɛ é nían be nga bé wá cɛ́n be’n be lika wie? ?E kunndɛ kɛ é klé be nga bé wá cɛ́n be’n be like wie? Dɔ nga su bɔbɔ’n, e kwla kle kɛ e kunndɛ kɛ é dí junman sɔ mun wie. Yɛle kɛ junman nga be nga bé wá trán asiɛ su’n titi’n bé wá dí, i wun su junman nga e di be dɔ nga su’n nán e sisi e bo naan y’a di wie!