Cɛcɛ. Sanngɛ ndɛ nga Davidi kɛnnin i lɛ’n ɔ ti su.

Maan e fa e ɲin e sie i ndɛ nga Davidi kannin m’ɔ o Jue Mun 61:8 nun’n, ɔ nin ndɛ ng’ɔ kannin be mɔ be o ndɛ mma uflɛ wie’m be nun’n be su e nian. Ndɛ ng’ɔ kannin’n, be nun wie mun yɛ: “Ń tó jue ń mánmán ɔ dunman’n tititi, yɛ ń yía nda nga n tali’n i nuan cɛn kwlakwla.” “Ee Zoova, min Ɲanmiɛn, n fa min awlɛn’n kwlaa n manman wɔ, yɛ ń mánmán ɔ dunman’n tititi.” “Ń mánmán ɔ dunman’n tititi.”—Jue. 61:8; 86:12; 145:1, 2.

Ndɛ nga Davidi kannin’n kleman kɛ ɔ bu i kɛ ɔ su wuman le. Ɔ si kɛ Zoova seli kɛ sa tɛ mɔ sran’m be yoli’n ti’n, bé wú. Kusu i bɔbɔ ti sa tɛ yofuɛ wie. (Bob. 3:3, 17-19; Jue. 51:4, 5) Asa’n, Davidi si kɛ be nga Ɲanmiɛn klun jɔli be wun kpa bɔbɔ’n be wuli. Be nun wie yɛle Abraamun nin Izaaki nin Zakɔbu. Ɔ maan Davidi si kɛ kannzɛ ɔ yo sɛ’n, saan ɔ́ wú cɛn kun. (Jue. 37:25; 39:4) Sanngɛ ndɛ ng’ɔ kannin m’ɔ o Jue Mun 61:8 nun’n kle kɛ ɔ kunndɛ kpa kɛ ɔ́ mánmán Ɲanmiɛn titi lele ɔ́ fá wú.—2 Sam. 7:12.

Kpɛ sunman’n, sa nga be juli Davidi su’n, be ndɛ yɛ ɔ kannin-ɔn. Be kannin sa sɔ’m be nun wie’m be ndɛ Jue Mun 18, nin 51, nin 52 be su fitilɛ’n nun. Jue Mun 23 nun’n, Davidi seli kɛ Zoova ti kɛ bua tafuɛ kun m’ɔ kle i nnɛn’m be atin, ɔ nian be lika yɛ ɔ sasa be’n sa. Davidi bɔbɔ yoli kɛ bua tafuɛ sɔ’n sa. Ɔ maan ɔ kunndɛli kpa kɛ ‘blɛ mɔ i ɲin te o su’n’, ɔ́ sú Ɲanmiɛn titi. —Jue. 23:6.

Nán e wla fi su kɛ Zoova yɛ maan Davidi klɛli ndɛ kwlaa sɔ mun-ɔn. Ndɛ ng’ɔ klɛli’n be kan sa nga bé wá jú cɛn wie lele’n be ndɛ. I wie yɛle ndɛ ng’ɔ o Jue Mun 110 nun’n. Ɔ kan blɛ mɔ i Min’n ‘wá trán Ɲanmiɛn i sa fama’ su ɲanmiɛn su lɔ mɔ bé wá mɛ́n i kwlalɛ dan’n i ndɛ. ?Ngue yɛ ɔ́ wá yó i blɛ sɔ’n nun-ɔn? Ɔ́ wá kwlá Ɲanmiɛn i kpɔfuɛ mun. Kpɛkun “ɔ́ wá dí nvlenvle’m be jɔlɛ.” Davidi ti Mesi’n i nannan kun. Mesi’n wá trán ɲanmiɛn su lɔ síe asiɛ’n. Yɛ ɔ́ yó “Ɲanmiɛn ɲrun jranfuɛ tititi.” (Jue. 110:1-6) Zezi seli kɛ i ndɛ yɛ Jue Mun 110 kan-ɔn. Asa’n, ɔ seli kɛ cɛn wie lele yɛ ndɛ sɔ’n kpɛ́n su-ɔ.—Mat. 22:41-45.

Zoova maan Davidi klɛli like ng’ɔ kwla yo i blɛ m’ɔ te o nguan nun’n nin like ng’ɔ́ wá yó i kɛ bé wá cɛ́n i nguan’n be ndɛ. Yɛle kɛ ɔ́ wá mánmán Zoova titi. Ndɛ sɔ’n uka e maan e wun ndɛ ng’ɔ o Jue Mun 37:10, 11, 29 nun’n i wlɛ kpa. Yɛle kɛ ndɛ sɔ’n kpɛnnin su Izraɛli mɛn’n nun lɔ laa. Yɛ ɔ́ wá kpɛ́n su e ɲrun lɔ ekun. Blɛ sɔ’n nun’n, Ɲanmiɛn wá yía nda kwlaa ng’ɔ tali’n be nuan.—An nian like suanlɛ nga be flɛ i kɛ “E nin wɔ é trán Mɛn klanman’n nun lɔ” m’ɔ o fluwa nga nun’n i ndɛ kpɔlɛ 8 nun.

Jue Mun 61:8 nin ndɛ mma wie mun ekun be kle kɛ Davidi kunndɛli kɛ ɔ́ mánmán Zoova Izraɛli mɛn’n nun lele ɔ́ fá wú. Asa’n, kɛ Zoova wá cɛ́n Davidi’n i nguan’n like ng’ɔ́ wá yó’n, ndɛ mma sɔ’m be kɛn i ndɛ wie.