1. ?Ajalɛ cinnjin benin yɛ ɔ fata kɛ sran’m be fa-ɔ?

 ANDƐ’N, ɔ fata kɛ sran’m be tinuntinun be fa ajalɛ cinnjin kun. ?Bé súan Ɲanmiɛn Kpli Zoova m’ɔ le atin sie nglo nin asiɛ’n i bo annzɛ bé súɛn i kpɔfuɛ Satan i bo? Sran kun kwlá seman kɛ ɔ́ súan be nɲɔn’n be bo. Ɔ fata kɛ ɔ kle kun. Yɛ ajalɛ ng’ɔ́ fá’n, yɛ ɔ́ yó maan i liɛ yó ye annzɛ ɔ su yoman ye-ɔ. (Mat. 25:31-33, 46) “Ɲrɛnnɛn dan’n” nun’n, bé wá síe sran’m be nzɔliɛ naan be nunnun be annzɛ be ka nguan nun.—Ngl. 7:14; 14:9-11; Eze. 9:4, 6.

2. (1) ?Ngue yɛ Ebre Mun 10:35-39 wla e fanngan kɛ e yo-ɔ? (2) ?Wafa sɛ yɛ Sa Nglo Yilɛ fluwa’n kwla uka e-ɔ?

² An kanngan Ebre Mun 10:35-39 nun. Sɛ a fali ajalɛ kɛ á súan Zoova i sielɛ’n i bo’n, ajalɛ kpa yɛ a fali-ɔ. Yɛ e si kɛ a kunndɛ kpa kɛ á úka sran uflɛ naan be fa ajalɛ kunngba’n wie. I sɔ yolɛ nun’n, Sa Nglo Yilɛ fluwa’n i nun ndɛ’n kwla uka ɔ kpa. Fluwa sɔ’n kan sa ng’ɔ́ wá jú be nga be suanman Zoova i sielɛ’n i bo’n be su’n i ndɛ. Asa’n, ɔ kan suyralɛ nga be nga be suɛn i sielɛ’n i bo’n bé wá ɲɛ́n i’n i ndɛ wie. Sɛ e fa e ɲin sie i fluwa sɔ’n i nun ndɛ’n su’n ɔ́ úka e kpa. Yɛle kɛ ɔ́ úka e naan y’a fua kpa kɛ é sú Zoova titi. Asa ekun’n, é kwlá úka sran uflɛ naan be su Zoova wie.

3. ?Kosan benin mun yɛ é wá tɛ́ be su like suanlɛ nga nun-ɔn?

³ Like suanlɛ nga nun’n, é wá tɛ́ kosan nga’m be su: ?Sa benin yɛ ɔ́ wá jú be nga be suan Ɲanmiɛn i sielɛ’n i bo’n be su-ɔ? ?Kpɛkun sa benin yɛ ɔ́ wá jú be nga be suan nnɛn ɔkwlɛ bioun nga Sa Nglo Yilɛ fluwa’n kɛn i ndɛ’n i bo’n be su-ɔ?

4. ?Wan mun yɛ akoto Zan wunnin be mɔ be nin Zezi be o ɲanmiɛn su lɔ-ɔ?

⁴ Aolia nun’n, akoto Zan wunnin sran akpasua nɲɔn mɔ be suan Zoova i sielɛ’n i bo’n. Sran sɔ’m bé ɲán nguan m’ɔ leman awieliɛ’n. Sran akpasua klikli’n be ti sran 144.000. (Ngl. 7:4) Be kpali be asiɛ’n su wa naan be nin Zezi be ko di famiɛn ɲanmiɛn su lɔ. Sran sɔ’m be nin Zezi bé síe asiɛ’n. (Ngl. 5:9, 10; 14:3, 4) Aolia nun’n, Zan wunnin i kɛ be nin Zezi be jinjin Siɔn Oka’n su ɲanmiɛn su lɔ.—Ngl. 14:1.

5. ?Sa benin yɛ ɔ ka kan’n ɔ́ jú sran 144.000 onga nga be o asiɛ’n su wa’n be su-ɔ?

⁵ Kɛ ɔ fɛ i laa lele andɛ’n, Ɲanmiɛn kpali sran akpi kpanngban naan be ko di famiɛn ɲanmiɛn su lɔ. (Lik. 12:32; Rɔm. 8:17) Sanngɛ Ɲanmiɛn seli Zan kɛ mɛn’n i awieliɛ blɛ nga nun’n be nun kaan sa yɛ bé ká asiɛ’n su-ɔ. Bé wá síe ‘sran akpasua sɔ mɔ be te o asiɛ’n su wa’n’ be “nzɔliɛ” fá klé kɛ Zoova i klun jɔ be wun kwlaa naan ɲrɛnnɛn dan’n w’a bo i bo. (Ngl. 7:2, 3; 12:17) Kɛ ɲrɛnnɛn dan’n wá bó i bo’n, sran sɔ’m bé wá tó sran 144.000 onga nga be o ɲanmiɛn su lɔ’n be lɔ. Kpɛkun be nin Zezi bé dí famiɛn.—Mat. 24:31; Ngl. 5:9, 10.

6-7. (1) ?Wan mun yɛ Zan wunnin be ekun-ɔn? (2) ?Be su ndɛ benin yɛ e si i-ɔ? (3) ?Ngue ti yɛ ɔ fata kɛ Sa Nglo Yilɛ ndɛ tre 7 i nun ndɛ’n yo e kwlaa e cinnjin-ɔn?

⁶ Kɛ Zan wunnin sran 144.000 mun’n, i sin’n ɔ wunnin “sran kpanngban kpa.” Sanngɛ be liɛ’n be kwlá kaman be. (Ngl. 7:9, 10) ?Wan yɛle sran sɔ mun? Ɲanmiɛn seli Zan kɛ: “Sran sɔ’m be fin ɲrɛnnɛn dan’n nun. Be kpuli be tralɛ’n Bua ba’n i mmoja’n nun, kpɛkun be yoli ufue.” (Ngl. 7:14) Ɔ maan “sran kpanngban” sɔ’m bé ɲán be ti ɲrɛnnɛn dan’n nun. Kpɛkun bé trán asiɛ’n su tititi yɛ bé ɲán suyralɛ uflɛ kpanngban.—Jue. 37:9-11, 27-29; Nya. 2:21, 22; Ngl. 7:16, 17.

⁷ ?Sɛ é kɔ́ ɲanmiɛn su-o annzɛ é ká asiɛ’n su wa-o, e lafi su kɛ ndɛ ng’ɔ o Sa Nglo Yilɛ ndɛ tre 7 nun’n ɔ́ kpɛ́n su e lika? Ɔ fata kɛ e lafi su. Kɛ ndɛ sɔ’n wá kpɛ́n su’n, e kwlaa e klun jɔ́ dan. É wá wún kɛ, kɛ e fali ajalɛ kɛ é súan Zoova i sielɛ’n i bo’n, ajalɛ kpa yɛ e fɛli i lɛ-ɔ. ?Ɲrɛnnɛn dan’n i su ndɛ benin ekun yɛ Sa Nglo Yilɛ fluwa’n kan-ɔn?—Mat. 24:21.

8. (1) ?Wafa sɛ yɛ ɲrɛnnɛn dan’n wá bó i bo-ɔ? (2) ?Ngue yɛ sran’m bé wá yó-ɔ?

⁸ Kɛ nga e fa wunnin i like suanlɛ ng’ɔ sinnin lɛ nun sa’n, ɔ cɛ kan’n mɛn siefuɛ’m bé wá núnnún Babilɔnin klɔ dan’n mɔ yɛle Ɲanmiɛn sulɛ wafa nga be timan su’n. (Ngl. 17:16, 17) Blɛ sɔ’n nun yɛ ɲrɛnnɛn dan’n wá bó i bo-ɔ. ?Kɛ ɲrɛnnɛn dan’n wá bó i bo’n, sran wie’m bé wá kúnndɛ kɛ bé sú Zoova? Cɛcɛ. I kpa bɔbɔ’n, Sa Nglo Yilɛ ndɛ tre 6 kle kɛ blɛ sɔ’n nun’n be nga be suman Zoova’n bé wá kúnndɛ kɛ mɛn’n nun awa mun nin aata difuɛ dandan mɔ be ti kɛ oka mun sa’n, be sasa be. Kɛ mɔ sran sɔ’m be su suanman Zoova i Sielɛ’n i bo’n ti’n, ɔ́ bú be i kpɔfuɛ.—Lik. 11:23; Ngl. 6:15-17.

9. (1) ?Ɲrɛnnɛn dan’n nun’n, wafa sɛ yɛ Zoova i sufuɛ’m bé wá klé kɛ be nin sran onga’m be timan kun-ɔn? (2) ?Yɛ wafa sɛ yɛ i bo’n guá-ɔ?

⁹ Blɛ kekle sɔ’n nun’n, Zoova i sufuɛ’m bé wá klé kɛ be nin sran onga’m be timan kun. Yɛle kɛ be ngunmin cɛ yɛ bé sú Zoova  asiɛ’n su wa-ɔ. Kpɛkun be ngunmin cɛ yɛ be su suanman “nnɛn’n” i bo-ɔ. (Ngl. 13:14-17) I sɔ’n ti’n, be nga be suanman Zoova i sielɛ’n i bo’n bé wá fá be ɲin cí be. Nvlenvle’m be bo wá yó kun yɛ bé fá alɛ wlá be sin asiɛ wunmuan’n su. Nvlenvle sɔ mɔ be bo wá yó kun’n yɛ Biblu’n flɛ i kɛ Gɔgu m’ɔ fin Magɔgu niɔn.—Eze. 38:14-16.

10. ?Kɛ nga Sa Nglo Yilɛ 19:19-21 fa kan sa’n, kɛ bé wá fá alɛ wlá e sin’n, ngue yɛ Zoova wá yó-ɔ?

¹⁰ ?Kɛ bé wá fá alɛ wlá e sin’n, ngue yɛ Zoova wá yó-ɔ? I bɔbɔ tɛli su kɛ: “Min ya’n ɔ́ wá jáso.” (Eze. 38:18, 21-23) I sin’n Sa Nglo Yilɛ ndɛ tre 19 kle sa ng’ɔ́ wá jú’n. Zoova wá súnmɛn i Wa’n naan ɔ ko kun i sufuɛ’m be ti alɛ naan ɔ kwlɛ i kpɔfuɛ mun. Zezi nin “ɲanmiɛn su lɔ alɛ kunfuɛ” mɔ be yɛle anzi mun nin sran 144.000 yɛ bé kɔ́-ɔ. (Ngl. 17:14; 19:11-15) ?Wafa sɛ yɛ alɛ sɔ’n i bo’n gúa-ɔ? Be kwlaa nga be tanndan Zoova i ɲrun’n, i sran-o, i anuannzɛ-o, bé núnnún be mlɔnmlɔn.—An kanngan Sa Nglo Yilɛ 19:19-21 nun.

11. ?Sa Nglo Yilɛ fluwa’n i nun ndɛ fɛfɛ kpa benin yɛ ɔ́ wá kpɛ́n su-ɔ?

¹¹ Kɛ Ɲanmiɛn wá núnnún i kpɔfuɛ’m be kwlaa’n, aklunjɔɛ nga i sufuɛ nga be o asiɛ’n su’n bé wá dí’n, maan e bu i akunndan kan e nian. Nanwlɛ, e klun wá jɔ́ dan-o. Kɛ bé wá núnnún Babilɔnin klɔ dan’n, ɲanmiɛn su lɔfuɛ’m be klun jɔ́. Sanngɛ like uflɛ wá yó maan be klun jɔ́ kpa ekun. (Ngl. 19:1-3) Yɛle kɛ Sa Nglo Yilɛ fluwa’n i nun ndɛ fɛfɛ kpa kun wá kpɛ́n su. Yɛle “Bua ba’n i aja’n.”—Ngl. 19:6-9.

12. ?Kɛ nga Sa Nglo Yilɛ 21:1, 2 fa kan sa’n, blɛ benin nun yɛ bé yó Bua ba’n i aja’n niɔn?

¹² ?Blɛ benin nun yɛ bé yó aja sɔ’n niɔn? Ka naan Aamagedɔn alɛ’n w’a bo i bo’n, sran 144.000 be kwlaa be ti yía ɲanmiɛn su lɔ. Sanngɛ nán blɛ sɔ’n nun yɛ bé yó Bua ba’n i aja’n niɔn. (An kanngan Sa Nglo Yilɛ 21:1, 2 nun.) Kɛ bé wá kún Aamagedɔn alɛ’n mɔ bé núnnún Ɲanmiɛn i kpɔfuɛ’m be kwlaa’n, i sin yɛ bé yó Bua ba’n i aja’n niɔn.—Jue. 45:4, 5, 14-18.

13. ?Kɛ bé wá yó Bua ba’n i aja’n, sa benin yɛ ɔ́ jú-ɔ?

¹³ ?Kɛ bé wá yó Bua ba’n i aja’n, sa benin yɛ ɔ́ jú-ɔ? Kɛ yasua kun nin bla kun be ja’n, be bo yo kun. I wafa kunngba’n, kɛ bé wá yó Bua ba’n i aja’n, Famiɛn Zezi Klisi nin i “atɔnvlɛ’n” mɔ yɛle sran 144.000 be bo wá yó kun. Blɛ sɔ’n nun yɛ bé táka awa ng’ɔ́ wá síe asiɛ’n lele afuɛ 1.000 niɔn.—Ngl. 20:6.

14-15. ?Sa Nglo Yilɛ ndɛ tre 21 fa sran 144.000 sunnzun ngue? (An nian foto ng’ɔ o fluwa’n i bui’n su’n.)

¹⁴ I sin’n, Sa Nglo Yilɛ ndɛ tre 21 fa sran 144.000 sunnzun klɔ klanman kpa kun. Be flɛ i kɛ “Zerizalɛmun uflɛ’n.” (Ngl. 21:2, 9) Be wlali klɔ sɔ’n i bo ase yɔbuɛ 12 su. Be klɛli “Bua ba’n i akoto blu-nin-nɲɔn (12) mun be dunman blu-nin-nɲɔn (12) mun” yɔbuɛ sɔ’m be su. ?Ngue ti yɛ Zan fɛli i ɲin sieli i sa sɔ’n su kpa-ɔ? Afin ɔ wunnin i kɛ be klɛli i dunman yɔbuɛ sɔ’m be nun kun su. Nanwlɛ, i liɛ su ti ye-o!—Ngl. 21:10-14; Efɛ. 2:20.

¹⁵ Klɔ sɔ’n ti i liɛ ngunmin kun. I akpɔ dan’n ti sika ɔkwlɛ ngunmin. I anuan 12 be ti afle mma ngunmin. Be fali yɔbuɛ  kpakpa be wlali klɔ’n i bo ase yɛ be fa yoli i wun talɛ mun wie. Asa’n klɔ’n i bue kwlaa’m be sɛ. (Ngl. 21:15-21) Sanngɛ Zan sieli i nzɔliɛ kɛ like kun nunman klɔ’n su. I bɔbɔ seli kɛ: “M’an wunman Ɲanmiɛn i sua klɔ’n su. Afin Ɲanmiɛn Zoova m’ɔ kwla sa’n kwlaa yo’n nin Bua ba’n yɛ be ti Ɲanmiɛn i sua klɔ sɔ’n su-ɔ. Klɔ’n mianman wia’n nin anglo ba’n be kpajalɛ’n i wun. Afin Ɲanmiɛn i aɲrunɲan’n kpaja klɔ’n su. Yɛ klɔ’n i su kannin’n yɛle Bua ba’n.” (Ngl. 21:22, 23) Be nga Zerizalɛmun uflɛ’n ti be nzɔliɛ’n be nin Zoova bé trán. Ɔ maan ɔ nunman nun kɛ be ɲan Ɲanmiɛn sua. (Ebr. 7:27; Ngl. 22:3, 4) Zoova bɔbɔ nin Zezi yɛ bé wá yó be Ɲanmiɛn sua liɛ’n niɔn.

16. ?Zezi i Afuɛ Akpi Famiɛn Dilɛ Blɛ’n nun’n, ninnge kpakpa benin mun yɛ sran’m bé ɲán be-ɔ?

¹⁶ Kɛ be nga be kpali be sieli be ngunmin’n be bu klɔ sɔ’n i akunndan’n be klun jɔ dan. Sanngɛ ɔ fata kɛ be nga be lafi su kɛ bé trán asiɛ’n su wa’n be bu klɔ sɔ’n i akunndan wie. Afin Zezi i Afuɛ Akpi Famiɛn Dilɛ Blɛ’n nun’n, Zerizalɛmun uflɛ’n wá yó ninnge kpakpa kpanngban mán be. Zan wunnin kɛ ninnge sɔ’m be gua kɛ nzue ba m’ɔ sonji kpuu’n sa. “Nzue ba sɔ’n i nun nzue’n man nguan.” Yɛ “waka mɔ be man nguan’n,” be o i bue nɲɔn’m be su. Asa’n, be nɲa’m “be ti nvlenvle’m be nunfuɛ’m be juejue yolɛ liɛ.” (Ngl. 22:1, 2) Sran’m be kwlaa bé wá ɲán ninnge sɔ’m be su ye. Blɛblɛblɛ fɔ’n wá tú be nun. Ɔ maan be su tɔman tukpacɛ kun, be su wunman ɲrɛnnɛn kun yɛ be su yoman sɛ kun.—Ngl. 21:3-5.

17. ?Kɛ nga Sa Nglo Yilɛ 20:11-13 fa kan sa’n, wan mun yɛ bé wá ɲán Zezi i Afuɛ Akpi Famiɛn Dilɛ Blɛ’n i su ye-ɔ?

¹⁷ ?Wan mun yɛ bé wá ɲán ninnge kpakpa sɔ’m be su ye-ɔ? I klikli’n, yɛle be nga bé ɲán be ti Aamagedɔn alɛ’n nun’n nin ba nga bé wá wú be mɛn uflɛ’n nun’n. Asa’n, Sa Nglo Yilɛ ndɛ tre 20 kle kɛ be nga be wuli’n bé cɛ́n nguan. (An kanngan Sa Nglo Yilɛ 20:11-13 nun.) “Be nga be yoli sa kpa” mɔ be wuli’n ɔ nin “be nga b’a yoman sa kpa” mɔ be yɛle be nga b’a kwlá suman Zoova mɔ be wuli’n, be kwlaa bé sá be sin nguan nun ekun  asiɛ’n su wa. (Yol. 24:15; Zan 5:28, 29) ?I sɔ’n kle kɛ Zezi i Afuɛ Akpi Famiɛn Dilɛ Blɛ’n nun’n be kwlaa nga be wuli’n bé cɛ́n nguan? Cɛcɛ. Be nga b’a kplinman su kɛ bé sú Zoova’n, be su cɛnman be wie. Afin be ɲannin Zoova i sulɛ’n i wun atin sanngɛ b’a sumɛn i. I lɛ nun’n, be kleli kɛ be nin Mɛn klanman’n i nun tranlɛ fataman.—Mat. 25:46; 2 Tes. 1:9; Ngl. 17:8; 20:15.

18. ?Afuɛ 1.000 i awieliɛ lɔ’n, lika’n wá yó sɛ?

¹⁸ Afuɛ 1.000 i awieliɛ lɔ’n, fɔ su tranman sran’m be nun kun. Blɛ sɔ’n nun’n, sran fi su fɛman sa tɛ nga Adan yoli’n i ti kun. (Rɔm. 5:12) Afin i sin afɛ’n kwlakwla w’a wie. Kɛ mɔ afuɛ 1.000 i awieliɛ lɔ’n fɔ su tranman sran’m be nun kun ti’n, ɔ́ yó kɛ ‘b’a ɲan nguan’ ekun sa.—Ngl. 20:5.

19. ?Ngue ti yɛ ɔ fata kɛ be sa sran mun ekun be nian-ɔn?

¹⁹ E kwlaa e si kɛ kɛ Satan sali Zezi niannin’n Zezi mɔ fɔ nunmɛn i nun’n ɔ jrannin kekle. W’a kpɔciman Ɲanmiɛn. ?Sanngɛ kɛ fɔ su tranman sran’m be nun mɔ bé wá mán Satan i atin kɛ ɔ sa be nian’n, bé kwlá jrán kekle wie? Kɛ afuɛ 1.000 wá wíe mɔ bé yáci Satan nun’n, sran’m be tinuntinun bé tɛ́ kosan sɔ’n su. (Ngl. 20:7) Blɛ sɔ’n nun’n, be nga be su kpɔciman Ɲanmiɛn’n bé ɲán be ti mlɔnmlɔn yɛ bé ɲán nguan m’ɔ leman awieliɛ’n. (Rɔm. 8:21) Sanngɛ be nga bé yó ɲin kekle Ɲanmiɛn su’n, bé núnnún be nin Satan nin i mmusu mun.—Ngl. 20:8-10.

20. ?Kɛ e fali e ɲin sieli i Sa Nglo Yilɛ fluwa’n i nun ndɛ’m be su’n, i sɔ’n yo wɔ sɛ?

²⁰ ?Kɛ e fali e ɲin sieli i Sa Nglo Yilɛ fluwa’n i nun ndɛ’m be su’n, i sɔ’n yo wɔ sɛ? ?Ɔ wun blibliman wɔ kɛ á trán blɛ nga ndɛ sɔ’m bé kpɛ́n su’n, i nun wie? ?I sɔ’n wlaman wɔ fanngan kɛ a uka sran uflɛ naan ɔ bla naan e su e Ɲanmiɛn’n likawlɛ? (Ngl. 22:17) Siɛn mɔ e si sa nga be wá jú e ɲrun lɔ’n, e wun blibli e kpa kɛ be ju ndɛndɛ. Kɛ akoto Zan sa’n, e se kɛ: “Maan ɔ yo sɔ! E Min Zezi, bla.”—Ngl. 22:20.