1-2. ?Like nga ti yɛ ɔ fata kɛ Sa Nglo Yilɛ fluwa’n yo e cinnjin’n, i kun yɛle benin?

 WIENUN-ƆN, sran kun w’a yia wɔ kɛ amun ko nian foto wie mun. Kɛ amún nían foto mun’n, a wun sran kaka mɔ a siman be-ɔ. Sanngɛ foto kun o lɛ’n, a fa ɔ ɲin sie su kpa. ?Ngue ti-ɔ? Afin ɔ bɔbɔ a o foto sɔ’n su wie. Ɔ maan a usa ɔ wun kɛ: ?Blɛ benin nun yɛ e cili foto nga-ɔ? ?Yɛ ninfan yɛ e cili-ɔ? Kpɛkun a nian sɛ a si be nga be o su’n nin-o. Foto sɔ’n ti ɔ cinnjin kpa afin a o su wie.

² Sa Nglo Yilɛ fluwa’n ti kɛ foto sɔ’n sa. ?Ngue ti-ɔ? Like nɲɔn ti-ɔ. I klikli’n yɛle kɛ e ti yɛ be klɛli Biblu’n nun fluwa sɔ’n niɔn. Sa Nglo Yilɛ fluwa’n i ndɛ mma klikli’n se kɛ: “Ɲanmiɛn maan Zezi Klisi yili sa ng’ɔ cɛ kan bé wá jú’n, be nglo kleli i sran mun.” (Ngl. 1:1) Ɔ maan nán sran kwlaa ti yɛ be klɛli fluwa sɔ’n niɔn. Sanngɛ e mɔ e ti Ɲanmiɛn i sran mun’n, e ti yɛ be klɛli-ɔ. E mɔ e ti Ɲanmiɛn i sufuɛ’n, sɛ e wun kɛ Ɲanmiɛn nuan ndɛ nga be o fluwa sɔ’n nun’n be kpɛn su e lika’n, ɔ fataman kɛ ɔ bo e nuan. Afin be kan e ndɛ fluwa sɔ’n nun wie. Sɛ é kwlá sé’n, e o “foto sɔ’n” su wie.

3-4. (1) ?Blɛ benin nun yɛ ɔ fata kɛ Sa Nglo Yilɛ fluwa’n i nun ndɛ’m be kpɛn su-ɔ? (2) ?Ngue yɛ ɔ fata kɛ e tinuntinun e yo-ɔ?

³ Like nɲɔn su nga ti yɛ ɔ fata kɛ fluwa sɔ’n yo e cinnjin’n, yɛle blɛ nga i nun ndɛ’n kpɛn su’n. Akoto Zan kannin blɛ sɔ’n i ndɛ seli kɛ: “Ɲanmiɛn wawɛ’n i fanngan nun’n, be fa min ɔli e Min’n i cɛn’n nun.” (Ngl. 1:10) Kɛ Zan klɛ́ ndɛ sɔ’n, nn afuɛ 96 su wa ju. Kɛ ɔ́ yó sɔ’n nn “e Min’n i cɛn’n” te o mmua kpa. (Mat. 25:14, 19; Lik. 19:12)  Biblu’n kle kɛ cɛn sɔ’n boli i bo afuɛ 1914 nun. Afuɛ sɔ’n nun yɛ be sieli Zezi famiɛn ɲanmiɛn su lɔ-ɔ. Kɛ ɔ fɛ i afuɛ sɔ’n nun’n, Ɲanmiɛn nuan ndɛ nga be o Sa Nglo Yilɛ fluwa’n nun mɔ be kan Ɲanmiɛn i sufuɛ’m be ndɛ’n, be boli su kpɛnlɛ bo. Ɔ maan kɛ é sé yɛ’n, e o “e Min’n i cɛn’n” nun.

⁴ Kɛ mɔ e o blɛ cinnjin sɔ’n nun ti’n, ɔ fata kɛ e fa e ɲin e sie i afɔtuɛ ng’ɔ o Sa Nglo Yilɛ 1:3 nun’n su kpa. Ɔ se kɛ: “Sran ng’ɔ mɛn i nɛn’n su kanngan Ɲanmiɛn i ndɛ nga nun’n, ɔ nin be nga be sie be su’n, ɔ nin be nga be fɛ i nun ndɛ’n su’n, be liɛ su ti ye. Afin blɛ nga be kleli’n, w’a mantan koko kpa.” Ɔ maan ɔ fata kɛ ‘e man e nɛn’n su e kanngan’ Ɲanmiɛn nuan ndɛ sɔ’n nun naan ‘y’a kwla tie’ naan ‘y’a kwla fa su.’ ?Sanngɛ Ɲanmiɛn nuan ndɛ sɔ m’ɔ fata kɛ e fa su’n yɛle benin?

5. ?Sa Nglo Yilɛ fluwa’n nun ndɛ benin yɛ ɔ kle kɛ ɔ ti cinnjin kɛ e su Zoova kpa-ɔ?

⁵ Sa Nglo Yilɛ ndɛ tre klikli’n kle kɛ Zezi si sa nga be o asɔnun bo’m be nun’n be kpa. (Ngl. 1:12-16, 20; 2:1) Ndɛ ng’ɔ kan kleli asɔnun bo nso nga be o Azi Minɛɛ lɔ’n kle sɔ weiin. Ɔ kleli Klisifuɛ klikli sɔ mun like trele ng’ɔ fata kɛ be yo naan Zoova w’a sɔ sulɛ nga be su i’n nun’n. Ndɛ ng’ɔ kan kleli be’n ti e liɛ wie andɛ. ?Ngue yɛ i sɔ’n kle e-ɔ? Ɔ kle e kɛ sɛ e nin Zoova e afiɛn mantan kpa annzɛ ɔ mantanman kpa’n, Klisi Zezi m’ɔ ti e su Kpɛn’n si nun. Ɔ nian e su, yɛ like fi timan fiawa i ɲrun. Ɔ si like ng’ɔ fata kɛ e yo naan Zoova i klun w’a jɔ e wun titi’n. ?Ndɛ benin yɛ ɔ kannin m’ɔ fata kɛ e nian su e nanti wie andɛ-ɔ?

6. (1) ?Kɛ nga Sa Nglo Yilɛ 2:3, 4 fa kan’n sa’n, sa benin yɛ ɔ o Efɛzi lɔ asɔnun’n nun-ɔn? (2) ?Ngue yɛ i sɔ’n kle e-ɔ?

⁶ An kanngan Sa Nglo Yilɛ 2:3, 4 nun. Maan e klo Zoova kɛ nga i klikli nun’n e fa kloli i’n sa titi. Ndɛ nga Zezi kan kleli be nga be o Efɛzi lɔ asɔnun’n nun’n kle kɛ be jrannin kekle sa fanunfanun be ɲrun yɛ be suli Zoova kpa. Sanngɛ be klomɛn i kɛ i klikli’n nun’n sa kun. Ɔ maan ɔ fata kɛ be yo naan be klo i kpa kɛ laa’n sa ekun. Ɔ timɛn i ti’n, ɔ su sɔman sulɛ nga be su i’n nun kun. Andɛ kusu’n, ɔ fata kɛ e mian e ɲin e su Ɲanmiɛn kpa titi. Sanngɛ nɛ́n i ngba-ɔ. Ɔ fata kɛ like nga ti yɛ e su i’n, ɔ yo kpa wie. E Ɲanmiɛn’n fɛmɛn i ɲin siemɛn i like nga e yo’n su ngunmin. Ɔ fɛ i ɲin sie i like nga ti yɛ e yo like sɔ’n i su wie. Ɔ kunndɛ kɛ klolɛ mɔ e klo i’n, yɛ ɔ su e bo naan e su i-ɔ.—Nya. 16:2; Mar. 12:29, 30.

7. (1) ?Kɛ nga Sa Nglo Yilɛ 3:1-3 fa kan’n sa’n, sa benin yɛ ɔ o Sadi lɔ asɔnun’n nun-ɔn? (2) ?Ngue yɛ ndɛ sɔ’n kle e-ɔ?

⁷ An kanngan Sa Nglo Yilɛ 3:1-3 nun. Maan e ɲin tran su titi. Sa uflɛ o aniaan nga be o Sadi lɔ asɔnun’n nun’n be su. Kannzɛ bɔbɔ laa’n be suli Ɲanmiɛn juejue su’n, sanngɛ siɛn’n be sa w’a kan ase. I sɔ’n ti’n, Zezi seli be kɛ ‘be tinnge.’ ?Ngue yɛ ndɛ sɔ’n kle e-ɔ? Ɔ ti su kɛ Zoova i wla su fiman junman nga e di e mɛn i’n su le. (Ebr. 6:10) Sanngɛ nán e se e wun kɛ, kɛ mɔ laa’n e dili Zoova i junman wie mun ti’n, e su tuman e klun e sumɛn i kun. Kannzɛ bɔbɔ e kwlá suman Ɲanmiɛn kpa kɛ laa’n sa kun’n, sanngɛ maan e mian e ɲin e di “e Min’n i junman’n” titi. Ɔ fata kɛ e ɲin tran junman sɔ’n su lele e ju i awieliɛ.—1 Kor. 15:58; Mat. 24:13; Mar. 13:33.

8. ?Ngue yɛ ndɛ nga Zezi kan kleli Laodise lɔ aniaan mun’n, ɔ kle e-ɔ? (Sa Nglo Yilɛ 3:15-17)

 ⁸ An kanngan Sa Nglo Yilɛ 3:15-17 nun. Maan e tu e klun e su Ɲanmiɛn titi. Ndɛ nga Zezi kan kleli aniaan nga be o Laodise lɔ’n kle kɛ sa uflɛ o be su. Yɛle kɛ Ɲanmiɛn sulɛ nun’n, be ti “mlɛnmlɛn.” Kɛ mɔ be tuman be klun be suman Ɲanmiɛn’n ti’n, Zezi seli be kɛ be ti ‘ɲrɛnnɛnfuɛ yɛ be yo annvɔ.’ Ɔ maan ɔ fata kɛ be su Zoova juejue su. (Ngl. 3:19) ?Ngue yɛ ndɛ sɔ’n kle e-ɔ? Sɛ e suman Zoova kpa kun’n, maan e wla kpɛn ninnge kpakpa nga Zoova nin i anuannzɛ’n be yo man e’n be su. (Ngl. 3:18) Asa’n, nán e fa aɲanbeun ninnge’m be kunndɛlɛ’n e fa cici e ti. Ɔ timɛn i ti’n, é fá Ɲanmiɛn i sulɛ’n é síe i siɛn.

9. ?Ngue yɛ ndɛ nga Zezi kan kleli Klisifuɛ nga be o Pɛɛgamun nin Tiatii lɔ’n ɔ kle e-ɔ?

⁹ Maan e kpalo ndɛ nga be nga be nin Ɲanmiɛn b’a bu’n be kan’n. Zezi tuli Pɛɛgamun lɔ aniaan wie’m be fɔ. Afin be fali mɛn’n nun ngwlɛlɛfuɛ wie’m be ato ndɛ’m be su yɛ be yoli maan aniaan’m be bubuli be wun nun. (Ngl. 2:14-16) Sanngɛ ɔ yoli Tiatii lɔ aniaan’m be mo. Afin be kpaloli “Satan i ninnge nga be bo ti kploun’n.” Asa’n, ɔ wlali be fanngan kɛ ‘be tra ndɛ nanwlɛ’n nun kpa.’ (Ngl. 2:24-26) Ɔ fata kɛ Klisifuɛ nga be fali ato ndɛ sɔ’m be su’n, be kaci be sa. ?Ngue yɛ ndɛ sɔ’n kle e-ɔ? Maan e kpalo ndɛ kwlaa ng’ɔ nin Zoova liɛ’n be kɔman likawlɛ’n. Be nga be nin Ɲanmiɛn b’a bu’n ‘be yo be wun kɛ be ti Ɲanmiɛn sufuɛ sa.’ Kusu nn ‘be ayeliɛ’n kleman sɔ.’ (2 Tim. 3:5) Sanngɛ sɛ e bo e ɲin ase e suan Ɲanmiɛn Ndɛ’n nun like kpa’n, é wún be ato ndɛ’m be wlɛ kpɛkun é kpálo be.—2 Tim. 3:14-17; Zid. 3, 4.

10. ?Like uflɛ benin yɛ ndɛ nga Zezi kan kleli Klisifuɛ nga be o Pɛɛgamun nin Tiatii lɔ’n ɔ kle e-ɔ?

¹⁰ Maan e kpalo sa sukusuku yolɛ’n i wafa’n kwlaa. Sa kun ekun kle Klisifuɛ nga be o Pɛɛgamun nin Tiatii lɔ’n be yalɛ. Yɛle kɛ be nun wie’m be yo sa sukusuku kpanngban. I sɔ’n ti’n Zezi tuli be fɔ. (Ngl. 2:14, 20) ?Ngue yɛ ndɛ sɔ’n kle e-ɔ? Kannzɛ bɔbɔ e su Zoova w’a cɛ annzɛ e di junman kpanngban anuannzɛ’n nun’n, nán e bu i kɛ sɛ e yo sa sukusuku’n Zoova yáci cɛ́ e. (1 Sam. 15:22; 1 Piɛ. 2:16) Kannzɛ mɛn’n nunfuɛ’m b’a saci’n, sanngɛ ɔ kunndɛ kɛ e  niɛn i mmla mɔ be ti kpa dan’n be su e nanti titi.—Efɛ. 6:11-13.

11. ?Ngue yɛ e wunnin i-ɔ? (An nian kuku ng’ɔ suan “ Afɔtuɛ ng’ɔ man e’n” i nun wie.)

¹¹ ?Ngue yɛ e wunnin i-ɔ? E wunnin i kɛ ɔ ti cinnjin kɛ e mian e ɲin naan e su Zoova kɛ ng’ɔ fa klo’n sa. Asa’n, sɛ e sie i nzɔliɛ kɛ e yo ninnge wie mɔ be ti’n, Ɲanmiɛn su sɔman sulɛ nga e su i’n nun’n, maan e kaci e sa ndɛndɛ. (Ngl. 2:5, 16; 3:3, 16) Sanngɛ Zezi kannin like uflɛ ndɛ kleli asɔnun bo mun. ?Ngue like yɛle i sɔ’n?

12. ?Ndɛ benin yɛ Zezi kan kleli aniaan nga be o Smirinin nin Filadɛlfi lɔ m’ɔ fata kɛ ɔ yo e cinnjin wie-ɔ? (Sa Nglo Yilɛ 2:10)

¹² Siɛn’n, maan e fa e ɲin e sie i ndɛ nga Zezi kan kleli Smirinin nin Filadɛlfi lɔ asɔnun mun’n i su. Ɔ seli Klisifuɛ nga be o lɔ’n be kɛ nán maan ɲrɛnnɛn nga bé wá klé be’n, ɔ kun be srɛ. Kpɛkun ɔ seli be kɛ sɛ be jran kekle’n, ɔ́ yó be mo. (An kanngan Sa Nglo Yilɛ 2:10 nun; 3:10) ?Ngue yɛ i sɔ’n kle e-ɔ? Maan e wun i wlɛ kɛ sran’m bé wá klé e yalɛ. Kpɛkun maan e siesie e wun naan y’a kwla jran kekle. (Mat. 24:9, 13; 2 Kor. 12:10) ?Ngue ti yɛ ndɛ sɔ’n ti cinnjin-ɔn?

13-14. ?Kɛ ndɛ ng’ɔ o Sa Nglo Yilɛ ndɛ tre 12 nun’n kpɛnnin su’n, sa benin yɛ ɔ juli Ɲanmiɛn i sufuɛ’m be su-ɔ?

¹³ Sa Nglo Yilɛ fluwa’n kle kɛ “e Min’n i cɛn’n nun’n” yɛle kɛ e blɛ liɛ nga nun’n, sran’m bé wá klé Ɲanmiɛn i sufuɛ’m be yalɛ. Sa Nglo Yilɛ ndɛ tre 12 kle kɛ, kɛ Ɲanmiɛn i Sielɛ’n boli i bo’n, alɛ kun tɔli ɲanmiɛn su lɔ. Mikaɛli mɔ yɛle Zezi Klisi’n, ɔ nin i anzi mun be nin Satan nin i mmusu’m be kunnin. (Ngl. 12:7, 8) Sanngɛ Satan nin i mmusu’m b’a ɲanman jranwlɛ. Ɔ maan be toli be yili be asiɛ’n su wa. I sɔ’n ti’n, be fali ɲrɛnnɛn yili asiɛ’n sufuɛ’m be kwlaa be su. (Ngl. 12:9, 12) ?Kɛ ɔ yoli sɔ’n, sa benin yɛ ɔ juli Ɲanmiɛn i sufuɛ’m be su-ɔ?

¹⁴ I sin’n, like nga Satan yoli’n Sa Nglo Yilɛ fluwa’n kɛnnin i ndɛ. Kɛ m’ɔ kwlá sɛmɛn i sin ɲanmiɛn su lɔ kun’n ti’n, ɔ fɛli i ya’n guali be nga be kpali be sieli be ngunmin’n be onga nga be o asiɛ’n su wa’n be su. Afin be yɛ be ti Ɲanmiɛn i Sielɛ’n i janunfuɛ asiɛ’n su wa-ɔ. Kpɛkun be dun ‘Zezi i ndɛ kanlɛ’ junman’n i ɲrun mmua. (Ngl. 12:17; 2 Kor. 5:20; Efɛ. 6:19, 20) ?Sa trele benin yɛ ɔ yoli-ɔ?

15. (1) ?Wan mun yɛle “lalofuɛ nɲɔn” nga Sa Nglo Yilɛ ndɛ tre 11 kan be ndɛ’n? (2) ?Sa benin yɛ ɔ juli be su-ɔ?

¹⁵ Satan kleli be nga be kpali be sieli be ngunmin mɔ be dun Ɲanmiɛn i Sielɛ’n i jasin fɛ bolɛ junman’n i ɲrun mmua’n,  be yalɛ. Sran akpasua sɔ’m be nun nga be dun anuannzɛ’n i ɲrun mmua’n, be nzɔliɛ yɛle “lalofuɛ nɲɔn” mɔ be seli kɛ bé kún be’n. * (Ngl. 11:3, 7-11) Afuɛ 1918 nun’n, be tɔnnin aniaan sɔ’m be nun mɔcuɛ be suɛn kpɛkun be dili be jɔlɛ. Be buli be fɔ yɛ be seli be kɛ bé dí bisua cɛ́ kpa. Ɔ maan sran kaka be buli i kɛ be su diman be junman sɔ’n kun mlɔnmlɔn.

16. (1) ?Abonuan sa benin yɛ ɔ juli afuɛ 1919 nun-ɔn? (2) ?Sanngɛ ngue yɛ Satan w’a yacimɛn i yolɛ-ɔ?

¹⁶ Sa Nglo Yilɛ ndɛ tre 11 kle kɛ, kɛ bé wá kún “lalofuɛ nɲɔn” mun’n, be su cɛman naan b’a sa be sin nguan nun ekun. I sɔ kusu yɛ ɔ juli-ɔ. Kɛ be wlali aniaan’m be bisua m’ɔ dili afuɛ kun cɛ’n, abonuan sa kun juli. Yɛle kɛ afuɛ 1919 Marsi anglo’n nun’n, be yacili be nun. Kpɛkun b’a boman sa nga be waan be nian kɛ b’a yo’n su b’a diman jɔlɛ kun. Kɛ ɔ yoli sɔ’n, aniaan’m b’a sisiman be bo, be sali be sin be ko dili Ɲanmiɛn junman’n ekun. Sanngɛ Satan w’a yaciman be yalɛ klelɛ. Kɛ ɔ fɛ i lɛ’n, ɔ wa kleli be yalɛ tɛtɛ kpa trali laa’n. Ɔ yoli kɛ “nzue dan” wie yɛ ɔ su gua be su sa-ɔ. (Ngl. 12:15) I sɔ’n ti’n, “ɔ fata kɛ Ɲanmiɛn i sran’m be tra be awlɛn, yɛ be lafi i su.”—Ngl. 13:10.

17. ?Kannzɛ Satan kleli Ɲanmiɛn i sufuɛ’m be yalɛ’n, sanngɛ wan mun yɛ be ukali be-ɔ?

¹⁷ I sin’n, Sa Nglo Yilɛ ndɛ tre 12 se kɛ Ɲanmiɛn i sufuɛ’m bé wá ɲán ukalɛ sran wie mɔ b’a bumɛn i kɛ be kwla uka be’n be sa nun. Ɔ́ yó kɛ “asiɛ’n” w’a mɛn “nzue” mɔ yɛle yalɛ klelɛ’n sa. (Ngl. 12:16) I sɔ sa’n kusu yɛ ɔ juli-ɔ. Yɛle kɛ laa nun’n, Satan i mɛn’n nun sran dandan mun, mɔ i wie yɛle jɔlɛ difuɛ mun’n, be ukali Ɲanmiɛn i sufuɛ mun. Kpɛ sunman’n, Zoova i sufuɛ’m be ɲannin ndɛ fɛ jɔlɛ difuɛ’m be ja su. Ɔ maan be ɲannin be ti kan. ?Kɛ be ɲannin be ti sɔ’n, ngue yɛ be yoli-ɔ? Be wlali be wun ase kpa be dili junman nga Zoova fa mannin be’n. (1 Kor. 16:9) ?Sanngɛ junman benin yɛ be dili-ɔ?

18. ?Junman cinnjin kpa benin yɛ e di i mɛn’n i awieliɛ blɛ nga nun-ɔn?

¹⁸ Zezi seli kɛ Ɲanmiɛn i sufuɛ’m bé wá bó “Ɲanmiɛn i Famiɛn dilɛ’n i jasin  fɛ’n” asiɛ wunmuan’n su ka naan mɛn’n i awieliɛ’n w’a ju. (Mat. 24:14) Junman sɔ’n i dilɛ nun’n, anzi’m be uka be kpa. ‘Jasin fɛ kpa kun m’ɔ ti anannganman’n wo anzi sɔ’m be nuan. Be bo jasin’n kle be kwlaa nga be tran asiɛ’n su’n nin be nga be o mɛnmɛn kwlaa nun’n, ɔ nin be nga be fin akpasuaakpasua kwlaa su’n nin be nga be kan aniɛn wafawafa kwlaa’n, ɔ nin sran wafawafa kwlaa.’—Ngl. 14:6.

19. ?Jasin uflɛ benin yɛ ɔ fata kɛ be nga be klo Zoova’n be bo-ɔ?

¹⁹ Nán Ɲanmiɛn Sielɛ’n i jasin fɛ’n ngunmin yɛ ɔ fata kɛ Ɲanmiɛn i sufuɛ’m be bo-ɔ. Ɔ fata kɛ be suan junman nga anzi nga Sa Nglo Yilɛ ndɛ tre 8 lele 10 kan be ndɛ’n be di’n, i bo wie. Anzi sɔ’m be bo ɲrɛnnɛn sa nga bé wá jú be nga be suanman Ɲanmiɛn Sielɛ’n i bo’n be su’n be jɔ. I sɔ’n ti’n, kɛ ɔ fɛ i laa lele andɛ’n, Zoova i Lalofuɛ’m be bo fɔ nga Ɲanmiɛn wá tú Satan i mɛn’n i jɔ. Ndɛ sɔ mɔ be kan’n ti kɛ “nzraama mɔ kɛ nzue tɔ́’n ɔ gua’n, ɔ nin sin” sa. (Ngl. 8:7, 13) Ɔ fata kɛ sran’m be si kɛ mɛn’n i awieliɛ’n w’a mantan koko. I liɛ’n, bé kwlá káci be ayeliɛ’n kpɛkun bé ɲán be ti Zoova i ya cɛn’n nun. (Sof. 2:2, 3) Sanngɛ nán sran ngba yɛ junman sɔ mɔ e di’n ɔ yo i fɛ-ɔ. I sɔ’n ti’n, ɔ fata kɛ e yo yakpafuɛ. Asa’n, e si kɛ kɛ ɲrɛnnɛn dan’n wá bó i bo’n, junman sɔ’n i dilɛ wá yó kekle kpa ekun.—Ngl. 16:21.

20. ?Ngue yɛ é wá kɛ́n i ndɛ like suanlɛ nɲɔn nga bé bá lɛ’n be nun-ɔn?

²⁰ Ɔ fata kɛ e nian “Ɲanmiɛn i ndɛ” ng’ɔ o Sa Nglo Yilɛ fluwa’n nun’n su e nanti. Afin ndɛ sɔ’n kpɛn su e lika. (Ngl. 1:3) ?Sanngɛ ngue yɛ ɔ kwla uka e naan y’a jran yalɛ klelɛ’n i ɲrun kekle naan y’a bo jasin wafa nɲɔn nga e kannin be ndɛ’n yakpa su-ɔ? Like nɲɔn kwla uka e. I klikli’n, yɛle ndɛ nga Sa Nglo Yilɛ fluwa’n kɛn i Ɲanmiɛn i kpɔfuɛ’m be su’n. Kpɛkun i nɲɔn su’n yɛle ninnge kpakpa nga Ɲanmiɛn wá fá mán be nga be su i kpa titi’n. Like suanlɛ nɲɔn nga bé bá lɛ’n be nun’n, é wá kán ninnge sɔ’m be ndɛ.