LIKE SUANLƐ 10
A kwla ‘kplo ɔ nzuɛn laa’n gua’
“Amun kplo amun nzuɛn laa’n nin i wunsu ninnge nga amun yo be’m be kwlaa gua.”—KOL. 3:9.
JUE 29 Nán e yo Ɲanmiɛn dunman’n i finfin
I SU FITILƐ *
1. ?Kwlaa naan y’a suan Biblu’n nun like’n, wafa sɛ yɛ e nun sunman e ti-ɔ?
?KWLAA naan Zoova i Lalofuɛ’m b’a kle e Biblu’n nun like’n, wafa sɛ yɛ e ti-ɔ? E nun sunman be kunndɛman kɛ bé bú i akunndan bɔbɔ. Afin wafa nga mɛn nunfuɛ’m be yo ninnge mun’n, i su yɛ e nian e yo e ninnge liɛ mun wie-ɔ. Ɔ maan ‘e leman like kpa kun sa mɔ é fá e wla é gúa su-ɔ. Asa ekun’n, e nin Ɲanmiɛn e nunman nun.’ (Efɛ. 2:12) Sanngɛ kɛ e wa suannin Biblu’n nun like’n, e mɛn dilɛ’n kacili mlɔnmlɔn.
2. ?Kɛ e suannin Biblu’n nun like’n, ngue yɛ e wunnin i wlɛ-ɔ?
2 Kɛ e suannin Biblu’n nun like’n, e wunnin i wlɛ kɛ e le Siɛ kpa kun ɲanmiɛn su lɔ naan ɔ klo e dan. Kpɛkun e wunnin i kɛ sɛ e waan Zoova i klun jɔ e wun’n, yɛ sɛ e kunndɛ kɛ é káci i sufuɛ’n, ɔ fata kɛ e kaci e akunndan’n yɛ e kaci e sa ninnge wie’m be yolɛ’n nun. Asa ekun’n, e wunnin i kɛ ɔ ti cinnjin kɛ e nanti i mmla’m be su.—Efɛ. 5:3-5.
3. (1) ?Kɛ nga Kolɔsufuɛ Mun 3:9, 10 fa kan’n sa’n, ngue yɛ Zoova kunndɛ kɛ e yo-ɔ? (2) ?Kosan benin mun yɛ é wá tɛ́ be su like suanlɛ nga nun-ɔn?
3 Zoova ti e Yifuɛ yɛ i kunngba’n ti e Si. Ɔ maan ɔ le atin kle e like ng’ɔ fata kɛ e yo’n. Ɔ kunndɛ kɛ kwlaa naan b’a yo sran kun i batɛmun’n, sran sɔ’n ‘kplo i nzuɛn laa’n nin i wunsu ninnge ng’ɔ yo be’m be kwlaa gua.’ * (An kanngan Kolɔsufuɛ Mun 3:9, 10 nun.) Like suanlɛ nga wá úka be nga be kunndɛ kɛ be yo be batɛmun’n naan b’a si kosan nsan nga’m be su tɛlɛ’n: (1) ?Ngue yɛle “nzuɛn laa’n”? (2) ?Ngue ti yɛ Zoova kunndɛ kɛ e kplo nzuɛn sɔ’n e gua-ɔ? (3) ?Yɛ wafa sɛ yɛ e kwla yo sɔ-ɔ? Asa kusu’n, be nga b’a dun mmua b’a yo be batɛmun’n, like suanlɛ nga wá klé be like ng’ɔ fata kɛ be yo naan be nzuɛn laa’n w’a sɛmɛn i sin’n.
?NGUE YƐLE “NZUƐN LAA’N”?
4. ?Sran nga i “nzuɛn laa’n” yɛ ɔ sie i’n, ngue yɛ ɔ yo-ɔ?
4 Sran nga i “nzuɛn laa’n” yɛ ɔ sie i’n, i akunndan’n timan kpa yɛ ɔ yo sa tɛtɛ mun. Ɔ bu i ngunmin i wun akunndan, ɔ fa ya ndɛndɛ, ɔ siman ye, yɛ ɔ tu i wun. Asa ekun’n, ɔ nian bla nin bian nna nga be fa fite nzra nun’n, ɔ nin flimun nga be kunndɛ bla nin bian sukusuku nun’n annzɛ be yo nzaje sa mun nun’n. I yo, sran sɔ’n le nzuɛn kpakpa wie mun, yɛ kɛ ɔ yo sa tɛ’n ɔ ju wie’n i akunndan’n bu i fɔ. Sanngɛ kɛ ɔ ko yo naan ɔ kaci i akunndan’n nin i ayeliɛ’n, ɔ lemɛn i wun fanngan.—Gal. 5:19-21; 2 Tim. 3:2-5.
Sɛ e kplo e “nzuɛn laa’n” e gua’n, ayeliɛ tɛtɛ nin akunndan tɛtɛ’m be su sieman e kun. (An nian ndɛ kpɔlɛ 5 nun.) *
5. ?E kwla wla e ayeliɛ tɛtɛ’m be kwlaa be ase? An yiyi nun. (Sa Nga Be Yoli’n 3:19)
5 Kɛ mɔ fɔ o e nun’n ti’n, e su kwlá wlaman e ayeliɛ tɛtɛ nin akunndan tɛtɛ’m be kwlaa be ase le. Ɔ ju wie’n, é kán ndɛ wie annzɛ é yó ninnge wie mɔ bé yó e nsisɔ-ɔ. (Zer. 17:9; Zak. 3:2) Sanngɛ sɛ e kplo e nzuɛn laa’n e gua’n, ayeliɛ tɛ nin akunndan tɛ sɔ’m be su sieman e kun. Ɔ maan é káci mlɔnmlɔn.—Eza. 55:7; an kanngan Sa Nga Be Yoli’n 3:19 nun.
6. ?Ngue ti yɛ Zoova se e kɛ e wla e ayeliɛ tɛtɛ nin akunndan tɛtɛ’m be ase-ɔ?
6 Like nga ti yɛ Zoova se e kɛ e wla e ayeliɛ tɛtɛ nin akunndan tɛtɛ’m be ase’n, yɛle kɛ ɔ klo e dan yɛ ɔ kunndɛ kɛ e di aklunjɔɛ. (Eza. 48:17, 18) Ɔ si kɛ be nga be yo sa tɛtɛ mun’n, be yo be bɔbɔ be wun tɛ yɛ be yo be wiengu’m be tɛ wie. Kɛ ɔ wun i sɔ liɛ’n, ɔ yo i ya.
7. ?Kɛ nga Rɔmunfuɛ Mun 12:1, 2 fa kan’n sa’n, ajalɛ benin yɛ ɔ fata kɛ e tinuntinun e fa-ɔ?
7 Kɛ é mían e ɲin naan y’a wla e ayeliɛ tɛ’m be ase’n, e osufuɛ nin e janvuɛ wie’m be kwla sri e. (1 Piɛ. 4:3, 4) Be nun wie’m be kwla se e kɛ nán e yaci sran uflɛ lɛ naan ɔ kle e like ng’ɔ fata kɛ e yo’n. Kpɛkun be kwla se e kɛ e yo e bɔbɔ e klunklo like. Sanngɛ kɛ e niɛn i kpa sa’n be nga be nantiman Zoova i mmla’m be su’n, be yoman be klunklo like. Afin Satan yɛ ɔ sie be-ɔ. (An kanngan Rɔmunfuɛ Mun 12:1, 2 nun.) Ɔ fata kɛ e tinuntinun e fa ajalɛ kun. Yɛle kɛ é yáci e nzuɛn laa’n i lɛ naan ɔ sie e annzɛ é ló e wun é mán Zoova naan ɔ yo naan e kaci sran kpa.—Eza. 64:8.
?WAFA SƐ YƐ A KWLA “KPLO” Ɔ NZUƐN LAA’N GUA-Ɔ?
8. ?Ngue yɛ ɔ kwla uka e naan y’a wla akunndan tɛtɛ nin nzuɛn tɛtɛ’m be ase-ɔ?
8 Zoova si kɛ kɛ ɔ ko yo naan y’a wla akunndan tɛtɛ nin nzuɛn tɛtɛ’m be ase’n, ɔ timan pɔpɔ yɛ ɔ fa blɛ. (Jue. 103:13, 14) Sanngɛ ɔ yaciman e lɛ sa ngbɛn. Ɔ sin i nuan Ndɛ’n, nin i wawɛ’n, ɔ nin i anuannzɛ’n be lika kle e ngwlɛlɛ yɛ ɔ man e wunmiɛn naan y’a kwla kaci e sa. I yo, e si kɛ Zoova dun mmua ukali wɔ naan w’a wla ayeliɛ wie’m be ase. Sanngɛ maan e fa e ɲin e sie i ninnge trele wie mɔ a kwla yo be naan w’a wla ɔ nzuɛn laa’n i ase naan b’a yo ɔ batɛmun’n be su.
9. ?Wafa sɛ yɛ Ɲanmiɛn Ndɛ’n kwla uka e-ɔ?
9 Nian Ɲanmiɛn Ndɛ’n nun naan si sran wafa nga a ti’n. Ɲanmiɛn Ndɛ’n ti kɛ niannun sa. Ɔ kwla uka wɔ naan w’a wun i wlɛ sɛ akunndan nga a bu’n nin ninnge nga a yo be’n be ti kpa-o. (Zak. 1:22-25) Asa ekun’n, aniaan ng’ɔ kle wɔ Biblu’n nun like’n annzɛ aniaan uflɛ mɔ w’a tin Ɲanmiɛn sulɛ nun’n kwla man wɔ afɔtuɛ naan w’a kaci ɔ sa ninnge wie’m be yolɛ’n nun. I wie yɛle kɛ be kwla fa Ɲanmiɛn Ndɛ’n uka wɔ naan w’a wun ɔ nzuɛn kpa’n nin ɔ nzuɛn tɛ’n be wlɛ. Kpɛkun be kwla kle wɔ wafa nga a kwla wun ndɛ wie mɔ be kwla uka wɔ naan w’a wla ɔ ayeliɛ tɛtɛ’m be ase’n. Asa ekun’n, Zoova o lɛ, ɔ kunndɛ kpa kɛ ɔ́ úka wɔ. I kpa bɔbɔ’n, i yɛ ɔ kwla uka wɔ kpa-ɔ. Afin ɔ si ɔ klun akunndan’n. (Nya. 14:10; 15:11) I sɔ’n ti’n, srɛ i yɛ suɛn i nuan Ndɛ’n i nun like titi.
10. ?Ngue yɛ Eli i su ndɛ’n kle e-ɔ?
10 Lafi su kɛ Zoova i mmla’m be ti kpa dan. Like kwlaa nga Zoova se e kɛ e yo’n, e ɲan su ye. Be nga be nanti Zoova i mmla’m be su’n, be bu be wun sran, be si like nga ti yɛ be o mɛn’n nun’n, yɛ be di aklunjɔɛ kpa. (Jue. 19:8-12) Sanngɛ be nga be nantimɛn i mmla’m be su’n, be wun i su afɛ’n. Afin be yi klɔ sran nzuɛn’n i nglo. Be flɛ aniaan bian kun kɛ Eli. I si nin i nin be klo Zoova yɛ be tɛli i kpa. Sanngɛ kɛ ɔ ɲinnin gbanflɛn’n, ɔ nin sran tɛtɛ’m be sannin nun. I sɔ’n ti’n, ɔ wa nɔnnin drɔgi, ɔ kunndɛli bla sukusuku yɛ ɔ kacili awiefuɛ. Asa ekun’n, ɔ fa ya ndɛndɛ yɛ ɔ yo sran’m be like yaya. Ɔ seli kɛ: “Maan e kpɛ i kpo e se kɛ n yoli like kwlaa ng’ɔ fataman Klisifuɛ kun yo’n.” Sanngɛ Eli i wla kpɛnnin like nga i si nin i nin be kleli i kaan nun’n i su. Ɔ maan ɔ wa suannin Biblu’n nun like ekun. Ɔ miɛnnin i ɲin kpa wlɛli i ayeliɛ tɛtɛ’m be ase. Ɔ maan afuɛ 2000 nun’n, be yoli i batɛmun. ?Kɛ ɔ miɛnnin i ɲin nantili Zoova i mmla’m be su’n, i su ye benin yɛ ɔ ɲɛnnin i-ɔ? I bɔbɔ tɛli su kɛ: “Min wla gua ase siɛn’n, yɛ min akunndan’n buman min fɔ kun.” * Eli i su ndɛ’n kle e kɛ be nga be nantiman Zoova i mmla’m be su’n, be yo be bɔbɔ be wun tɛ. Ɔ nin i sɔ ngba’n, Zoova kunndɛ kpa kɛ ɔ́ úka be naan be kaci be sa.
11. ?Ninnge benin wie mun yɛ Zoova kpɔ be-ɔ?
11 Kpɔ ninnge nga Zoova kpɔ be’n. (Jue. 97:10) Biblu’n se kɛ Zoova i ɲin ci ‘tutre’n nin gblɛ’n nin sran kunlɛ’n.’ (Nya. 6:16, 17) Asa’n, ɔ se kɛ ɔ kpɔ “sran kunfuɛ mun nin ndrunmun difuɛ mun.” (Jue. 5:7) Zoova kpɔ ayeliɛ sɔ mun dan ti’n, Nowe blɛ su’n ɔ nunnunnin be kwlaa nga be yi ayeliɛ sɔ’m be nglo’n. (Bob. 6:13) Asa kusu’n, Ɲanmiɛn nuan ijɔfuɛ Malaki blɛ su’n, Zoova seli kɛ i ɲin ci be nga be fa gblɛ be yo ninnge wie mun naan b’a kwla yra be yi mun’n. I sɔ’n ti’n, w’a sɔman sulɛ nga be su i’n nun kun yɛ ɔ tuli be fɔ.—Mal. 2:13-16; Ebr. 13:4.
Sɛ Zoova se e kɛ nán e yo like kun’n, ɔ fata kɛ like sɔ’n yo e kain kɛ nga aliɛ ng’ɔ w’a saci’n yo e kain’n sa. (An nian ndɛ kpɔlɛ 11-12 be nun.)
12. ?Kɛ e kpɔ like kun’n, ngue yɛ e yo-ɔ?
12 Zoova kunndɛ kɛ ‘e kpɔ sa tɛ’n.’ (Rɔm. 12:9) Kɛ e kpɔ like kun’n, e kunndɛman kɛ e ɲin tá like sɔ’n bɔɔ kaan sa. ?Sɛ sran kun se e kɛ e di aliɛ kun m’ɔ ti saciwa’n, ngue yɛ é yó-ɔ? E su diman. I kpa bɔbɔ’n, i dilɛ’n i akunndan bulɛ ngbɛn sa’n kwla kun e fiɛ. I sɔ wie yɛ ɔ fata kɛ e bu ninnge nga Zoova kpɔ be’n niɔn. Ɔ fataman kɛ ɔ kpɛn e ti nun kɛ é yó ninnge sɔ mun bɔbɔ.
13. ?Ngue ti yɛ ɔ fata kɛ e nian e wun su naan y’a buman akunndan tɛ-ɔ?
13 Nian ɔ wun su naan w’a buman akunndan tɛ. Akunndan nga e bu’n ti yɛ maan e yo ninnge mun-ɔn. I sɔ’n ti yɛ Zezi seli e kɛ e kpalo akunndan kwlaa ng’ɔ kwla fa e yi sa tɛ’n nun’n niɔn. (Mat. 5:21, 22, 28, 29) E kwlaa e kunndɛ kɛ e Si m’ɔ o ɲanmiɛn su lɔ’n i klun jɔ e wun. I sɔ’n ti’n, sɛ akunndan tɛ wie ba e ti nun’n, maan e kpalo i ndɛndɛ kpa.
14. (1) ?Ngue yɛ ndɛ ng’ɔ fin e nuan fite’n ɔ yi i nglo-ɔ? (2) ?Kosan benin mun yɛ ɔ fata kɛ e fa usa e wun-ɔn?
14 Nian ndɛ ng’ɔ fin ɔ nuan fite’n su kpa. Zezi seli kɛ: “Ninnge nga be fin sran kun i nuan’n nun fite’n, be fin i awlɛn’n nun.” (Mat. 15:18) Ndɛ sɔ’n ti nanwlɛ. Afin ndɛ ng’ɔ fin e nuan fite’n yi sran wafa nga e ti’n i nglo. I sɔ’n ti’n, maan e tinuntinun e usa e wun kɛ: ‘?Kannzɛ bɔbɔ sɛ n di nanwlɛ’n ń ɲán ndɛ’n, sanngɛ ń dí nanwlɛ? ?Sɛ n le bla annzɛ bian’n, n nian min wun su naan e nin sran uflɛ y’a traman ndalie? ?Bla nin bian nna ndɛ nga be kan be fa di aɔwi’n, n tɛ i sɔ ndɛ’n i kan? ?Kɛ sran kun kan ndɛ tɛtɛ kle min’n, n tɛ i su amanniɛn su?’ Sɛ e bu kosan sɔ’m be su akunndan’n, i sɔ’n úka e kpa. E kwla fa e nzuɛn laa’n e sunnzun tralɛ kun m’ɔ o e wun’n. Kpɛkun e fa ndɛ ng’ɔ fin e nuan fite’n fa sunnzun i wun butɔn mun. Sɛ e kunndɛ kɛ é yí tralɛ’n, saan é dún mmua tíketíke butɔn mun. I wafa kunngba’n, sɛ e waan é kpló e nzuɛn laa’n é gúa’n, ɔ fata kɛ e wla ndɛ tɛtɛ kanlɛ’n nin ato’n nin bla nin bian nna ndɛ nga be kan be fa di aɔwi’n be ase.
15. ?Kɛ be se kɛ e bobo e nzuɛn laa’n “waka’n su’n” i bo’n yɛle benin?
15 Nán sisi ɔ bo naan w’a fa ajalɛ. Akoto Pɔlu fali sunnzun ase kun fa kleli kɛ ɔ ti cinnjin kpa kɛ e wla e ayeliɛ tɛtɛ’m be ase. Ɔ seli kɛ ɔ fata kɛ e bobo e nzuɛn laa’n “waka’n su.” (Rɔm. 6:6) Zezi kplinnin su kɛ be bobo i waka’n su naan Zoova i klun w’a jɔ i wun. I wafa kunngba’n, ɔ fata kɛ e wla ayeliɛ kwlaa nga Zoova kloman be’n be ase naan i klun w’a jɔ e wun. Sɛ e yo sɔ’n, e akunndan’n su buman e fɔ yɛ é kwlá ɲán nguan m’ɔ leman awieliɛ’n. (Zan 17:3; 1 Piɛ. 3:21) Nán e wla fi su kɛ Zoova su seman le kɛ, kɛ mɔ e kwlá nantiman i mmla’m be su’n ti’n, ɔ́ káci be naan y’a kwla nanti su. E bɔbɔ yɛ ɔ fata kɛ e mian e ɲin e nanti su-ɔ.—Eza. 1:16-18; 55:9.
16. ?Ngue ti yɛ ɔ fata kɛ e nin e ayeliɛ tɛ mun e kpli titi-ɔ?
16 A nin ɔ ayeliɛ tɛ mun amun kpli titi. Kɛ be ko yo e batɛmun bɔbɔ’n, ɔ fata kɛ e nin e ayeliɛ tɛ mun e kpli titi. Aniaan bian kun i su ndɛ’n kle sɔ weiin. Be flɛ i kɛ Morisio. I nun ng’ɔ te yo gbanflɛn’n, ɔ nin i wiengu yasua’m be la. Sanngɛ i sin’n Zoova i Lalofuɛ’m be boli jasin fɛ’n be kleli i. Kpɛkun be boli i Biblu’n nun like klelɛ bo. Ɔ miɛnnin i ɲin wlali i ayeliɛ tɛtɛ’m be ase. Ɔ maan afuɛ 2002 nun’n, be yoli i batɛmun. Kannzɛ bɔbɔ be yoli i batɛmun w’a cɛ’n, sanngɛ i waan: “Nanwlɛ ti kpa, ɔ ju wie’n min konvi sɔ ninnge tɛtɛ nga n wlali be ase’n. Kɛ ɔ ko yo sɔ’n, n kpli kpa naan m’an yoman be.” Sanngɛ i sɔ’n w’a bubumɛn i sa sin. I kpa bɔbɔ’n, ɔ seli kɛ: “N si kɛ kɛ n yoman ninnge sɔ mun’n, i sɔ’n jɔ Zoova klun. I sɔ liɛ’n man min wunmiɛn.” *
17. ?Nabiya i su ndɛ benin yɛ ɔ wla amun fanngan kpa-ɔ?
17 Srɛ Zoova kɛ ɔ uka wɔ yɛ lafi i su, nán lafi ɔ bɔbɔ ɔ wun su. (Gal. 5:22; Fp. 4:6) Ɔ fata kɛ e mian e ɲin kpa naan y’a kwla kplo e nzuɛn laa’n y’a gua. Kpɛkun ɔ fata kɛ e mian e ɲin naan nzuɛn sɔ’n w’a sɛmɛn i sin kun. Aniaan bla kun m’ɔ suan Nabiya’n i su ndɛ’n kle sɔ weiin. I kaan nun’n, i baba yacili be ɔli. Kɛ ɔ́ yó sɔ’n nn ɔ le afuɛ nsiɛn cɛ. Ɔ seli kɛ: “I sɔ’n sanngannin min akunndan dan.” Sa sɔ’n ti’n, kɛ ɔ ɲinnin’n i nzuɛn’n yoli tɛ kpa. Yɛle kɛ ɔ fa ya ndɛndɛ yɛ i like yolɛ yo ya kpa. Asa ekun’n, ɔ yoli drɔgi atɛ, be wlɛli i bisua, yɛ ɔ dili afuɛ kpanngban bisua lɔ. Cɛn kun’n, aniaan nga be bo jasin fɛ’n be bisua lɔ’n be toli i yɛ be kleli i Biblu’n nun like. Nabiya wa wlali i ayeliɛ tɛtɛ’m be ase. Ɔ seli kɛ: “Ayeliɛ wie’m be ase wlalɛ yoli pɔpɔ min sa nun. Sanngɛ siklɛti nɔnlɛ’n i ase wlalɛ fuɛ’n, w’a yoman pɔpɔ kaan sa.” Nabiya miɛnnin i ɲin lele afuɛ kun naan w’a kwla jran siklɛti nɔnlɛ’n. ?Ngue yɛ ɔ ukɛli i-ɔ? I bɔbɔ tɛli su kɛ: “Like ng’ɔ ukali min kpa’n yɛle Zoova i srɛlɛ titi’n.” Siɛn’n, aniaan bla’n se kɛ: “Sɛ n kwla kacili’n, nn sran ngba kwla yo sɔ wie.” *
KACI Ɔ SA NAAN BE YO Ɔ BATƐMUN
18. ?Kɛ nga 1 Korɛntifuɛ Mun 6:9-11 fa kan’n sa’n, ngue yɛ Ɲanmiɛn i sufuɛ kpanngban be kwla yoli-ɔ?
18 Klisifuɛ klikli’m be blɛ su’n, be nga Zoova kpali be kɛ be nin Klisi be ko di famiɛn ɲanmiɛn su lɔ’n be nun wie’m be yili ayeliɛ tɛtɛ wie’m be nglo laa. I wie yɛle kɛ be nun wie’m be kunndɛ bla be yi bo annzɛ bian be wun bo. Wie’m be nin be wiengu yasua annzɛ be wiengu bla be la. Wie mun ekun be ti awiefuɛ. Sanngɛ Ɲanmiɛn wawɛ fanngan nun’n, be kwla kacili be ayeliɛ’n. (An kanngan 1 Korɛntifuɛ Mun 6:9-11 nun.) Andɛ kusu’n, Biblu’n maan sran miliɔn kaka be kaci be ayeliɛ’n. * Kannzɛ bɔbɔ ayeliɛ sɔ’m be ase wlalɛ’n ti kekle kpa’n, sanngɛ be wlali be ase. Be su ndɛ’n kle weiin kɛ ɔ kusu a kwla wla ɔ ayeliɛ tɛtɛ’m be ase naan b’a yo ɔ batɛmun.
19. ?Ngue yɛ é wá kɛ́n i ndɛ like suanlɛ nga i sin liɛ’n nun-ɔn?
19 E wunnin i kɛ be nga be kunndɛ kɛ be yo be batɛmun’n, ɔ fata kɛ be kplo be nzuɛn laa’n be gua. Sanngɛ kusu ɔ fata kɛ be fa nzuɛn uflɛ’n wie. Like suanlɛ nga i sin liɛ’n nun’n, é wá kán wafa nga be kwla yo sɔ’n ɔ nin wafa nga aniaan’m be kwla uka be i sɔ yolɛ nun’n be ndɛ.
JUE 41 Yaci, tie min srɛlɛ’n
^ ndɛ kpɔlɛ 5 Kɛ ɔ ko yo naan b’a yo sran kun i batɛmun’n, ɔ fata kɛ ɔ kaci i sa ninnge wie’m be yolɛ’n nun. Like suanlɛ nga nun’n, é wá tɛ́ kosan nga’m be su: ?Ngue yɛle nzuɛn laa’n? ?Ngue ti yɛ ɔ fata kɛ e kplo nzuɛn sɔ’n e gua-ɔ? ?Yɛ wafa sɛ yɛ e kwla yo sɔ-ɔ? Like suanlɛ nga i sin liɛ’n nun’n, é wá kán wafa nga kɛ be ko yo e batɛmun’n e kwla fa nzuɛn uflɛ’n titi’n i ndɛ.
^ ndɛ kpɔlɛ 3 NDƐ WIE’M BE NUN YIYILƐ: Kɛ be se kɛ “e kplo e nzuɛn laa’n e gua’n” i bo’n yɛle kɛ e wla ayeliɛ nga be jɔman Zoova klun’n be kwlaa be ase. Ɔ fata kɛ e bo i sɔ yolɛ bo kwlaa naan b’a yo e batɛmun.—Efɛ. 4:22.
^ ndɛ kpɔlɛ 10 Sɛ a kunndɛ kɛ á sí aniaan bian’n i su ndɛ’n nun kpa ekun’n, kanngan ndɛ ng’ɔ suan “La Bible transforme des vies—‘Il fallait que je revienne vers Jéhovah’” nun. Ɔ o afuɛ 2012, Avrili 1 Sasafuɛ Tranwlɛ’n blɔfuɛ nun liɛ’n i nun.
^ ndɛ kpɔlɛ 16 Sɛ a kunndɛ kɛ á sí aniaan bian’n i su ndɛ’n nun kpa ekun’n, kanngan ndɛ ng’ɔ suan “La Bible transforme des vies—‘Ils m’ont parlé avec bonté’” nun. Ɔ o afuɛ 2012, Mɛ 1 Sasafuɛ Tranwlɛ’n blɔfuɛ nun liɛ’n i nun.
^ ndɛ kpɔlɛ 17 Sɛ a kunndɛ kɛ á sí aniaan bla’n i su ndɛ’n nun kpa ekun’n, kanngan ndɛ ng’ɔ suan “La Bible transforme des vies—‘J’étais une jeune femme coléreuse et agressive’” nun. Ɔ o afuɛ 2012, Ɔktɔblu 1 Sasafuɛ Tranwlɛ’n blɔfuɛ nun liɛ’n i nun.
^ ndɛ kpɔlɛ 18 An nian kuku ng’ɔ suan “ Biblu’n maan sran’m be kaci” i nun.
^ ndɛ kpɔlɛ 64 FOTO’N I SU NDƐ’N: Ayeliɛ tɛtɛ’m be ase wlalɛ’n ti kɛ tralɛ nvuɛn wie i yilɛ sa.
