1. ?Sɛ é yó sran kpa annzɛ é yó sran tɛ’n, i sɔ’n fin ngue?

 KANNZƐ be yoli e batɛmun w’a cɛ-o annzɛ ɔ nin-a cɛman-o, e kwlakwla e kunndɛ kɛ é yó Zoova i awlɛn su sran. Kɛ ɔ ko yo naan y’a kwla yo sɔ’n, ɔ fata kɛ e nian e klun akunndan’n su. ?Ngue ti-ɔ? Afin sɛ é yó sran kpa annzɛ é yó sran tɛ’n, i sɔ’n fin akunndan nga e bu’n. Sɛ e bu ninnge nga e konvi o su’n be akunndan titi’n, ndɛ ng’ɔ́ fín e nuan fíte’n nin e ayeliɛ’n be su yoman kpa. (Efɛ. 4:17-19) Sanngɛ sɛ e bu ninnge nga be ti kpa’n be akunndan’n, e ijɔlɛ’n nin ninnge nga e yo be’n bé jɔ́ Zoova klun.—Gal. 5:16.

2. ?Kosan benin mun yɛ é wá tɛ́ be su like suanlɛ nga nun-ɔn?

² Kɛ nga e fa wunnin i like suanlɛ ng’ɔ sinnin lɛ’n nun sa’n, fɔ m’ɔ o e nun ti’n e kwlá yaciman akunndan tɛtɛ’m be bulɛ le. Sanngɛ like nga e kwla yo’n yɛle kɛ sɛ akunndan sɔ’m be ba e ti nun’n, nán maan e yo be nuan su sa. Ka naan b’a yo sran kun i batɛmun’n, ɔ fata kɛ ɔ yaci ndɛ tɛtɛ’m be kanlɛ nin ninnge nga be jɔman Zoova klun’n be yolɛ. Sɛ sran kun waan ɔ́ kpló i nzuɛn laa’n gúa’n, like klikli ng’ɔ fata kɛ ɔ yo’n yɛle ngalɛ’n. Sanngɛ sɛ ɔ kunndɛ kɛ Zoova i klun jɔ i wun kpa ekun’n, ɔ fata kɛ ɔ nanti ndɛ yɛ’n su: “Amun fa nzuɛn uflɛ’n.” (Kol. 3:10) Like suanlɛ nga nun’n, é wá tɛ́ kosan nga’m be su: ?Ngue yɛle “nzuɛn uflɛ’n”? ?Wafa sɛ yɛ e kwla fa nzuɛn uflɛ’n niɔn? ?Yɛ é yó sɛ naan y’a fa nzuɛn uflɛ’n titi?

3. ?Sran ng’ɔ fa nzuɛn uflɛ’n, nzuɛn benin yɛ ɔ yi be nglo mɔ Galasifuɛ Mun 5:22, 23 kan be ndɛ-ɔ?

³ Kɛ sran kun fa “nzuɛn uflɛ’n,” akunndan ng’ɔ bu’n nin ninnge ng’ɔ yo be’n be jɔ Zoova klun. Sran ng’ɔ fa nzuɛn  uflɛ’n, ɔ yi nzuɛn nga Ɲanmiɛn wawɛ’n yo maan sran yi i nglo’n, be nglo. Kpɛkun ɔ man Ɲanmiɛn wawɛ’n i atin naan ɔ kaci i akunndan’n nin i ayeliɛ’n. (An kanngan Galasifuɛ Mun 5:22, 23 nun.) Asa’n, ɔ klo Zoova nin i sufuɛ mun. (Mat. 22:36-39) Kannzɛ lika’n jrɛn i su sɛ’n, sanngɛ ɔ di aklunjɔɛ titi. (Zak. 1:2-4) Ɔ kloman ndɛnngan. (Mat. 5:9) Ɔ trɛ i awlɛn i wiengu’m be wun, yɛ ɔ yo be ye. (Kol. 3:13) Ɔ klo sa kpa’n yɛ ɔ miɛn i ɲin yo ninnge nga be ti kpa’n. (Lik. 6:35) I ayeliɛ’n kle kɛ ɔ lafi Ɲanmiɛn su kpa. (Zak. 2:18) Sɛ be lo i ngasi’n, ɔ faman ya tratraman su yɛ ɔ si i wun su nian.—1 Kor. 9:25, 27; Tit. 3:2.

4. ?Ngue ti yɛ sɛ e waan é fá nzuɛn uflɛ’n, ɔ fata kɛ e yi nzuɛn kwlaa nga Galasifuɛ Mun 5:22, 23 kan be ndɛ’n nin nzuɛn uflɛ wie mun ekun be nglo-ɔ? An yiyi nun.

⁴ Sɛ e kunndɛ kɛ é fá nzuɛn uflɛ’n, ɔ fata kɛ e yi nzuɛn kwlaa nga Galasifuɛ Mun 5:22, 23 kan be ndɛ’n ɔ nin nzuɛn uflɛ wie mɔ Biblu’n kan be ndɛ’n be nglo. * Nzuɛn sɔ’m be timan kɛ tralɛ mɔ be ti ngunminngunmin mɔ sɛ e klo’n e wla wie yɛ e yaci wie lɛ’n sa. Be kwlaa be kɔ likawlɛ. Yɛle kɛ sɛ e yi nzuɛn kun i nglo’n, saan é yí nzuɛn uflɛ wie’m be nglo wie. I wie yɛle kɛ sɛ e klo e wiengu mun’n, saan é trá e awlɛn be wun yɛ é yó be ye. Asa kusu’n, sɛ e waan é yó e wiengu’m be ye sakpa’n, ɔ fata kɛ e yo wɛtɛɛfuɛ yɛ e si e wun su nian.

5. (1) ?Kɛ be sɛ kɛ e ‘bu akunndan kunngba nga Klisi buli’n wie’n’ i bo’n yɛle benin? (2) ?Sɛ e suan Zezi i su like’n i su ye benin yɛ é ɲɛ́n i-ɔ? (1 Korɛntifuɛ Mun 2:16)

⁵ An kanngan 1 Korɛntifuɛ Mun 2:16 nun. Sɛ e kunndɛ kɛ é fá nzuɛn uflɛ’n, ɔ fata kɛ e bu ‘akunndan kunngba nga Klisi buli’n wie.’ Yɛle kɛ ɔ fata kɛ e suan Zezi i su like naan e si akunndan ng’ɔ buli’n kpɛkun e niɛn i ajalɛ’n su. Wafa nga Zezi yili nzuɛn nga Ɲanmiɛn wawɛ’n yo maan sran yi i nglo’n, be nglo’n ɔ leman wunsu. Ɔ yili Zoova i nzuɛn’m be nglo kpa kɛ Zoova bɔbɔ sa. (Ebr. 1:3) Sɛ e bu akunndan kunngba nga Zezi buli’n wie’n, é kwlá níɛn i ajalɛ’n su. Ɔ maan é kwlá fá nzuɛn uflɛ’n.—Fp. 2:5.

6. ?Sɛ e bu i kɛ nzuɛn uflɛ’n i falɛ’n ti kekle’n, ngue yɛ ɔ fataman kɛ e wla fi su-ɔ?

⁶ ?Sanngɛ yoo, e kwla nian Zezi i ajalɛ’n  su sakpa? Afin sran kun kwla se i wun kɛ: ‘Zezi liɛ’n fɔ nunmɛn i nun. Ɔ maan n kwlá yoman kɛ i sa le.’ Sɛ e bu i sɔ wie’n, maan e bu ndɛ nga’m be akunndan. I klikli’n yɛle kɛ wafa nga Zoova yili e’n ti’n, e kwla yo kɛ i bɔbɔ nin i Wa Zezi be sa. Ɔ maan sɛ e waan é nían be ajalɛ’n su’n, e kwla yo. Kannzɛ bɔbɔ e su kwlá yomɛn i kpa kɛ fɔ nunman e nun sa’n, sanngɛ é kwlá yó e liɛ kan. (Bob. 1:26) I nɲɔn su’n yɛle kɛ Ɲanmiɛn wawɛ m’ɔ le wunmiɛn kpa’n, ɔ kwla uka e. I fanngan nun’n, e kwla yo ninnge nga e bu i kɛ e kwlá yoman’n. I nsan su’n yɛle kɛ Zoova si kɛ fɔ o e nun. Ɔ maan dɔ nga su’n, ɔ seman e kɛ e yi nzuɛn kpakpa’m be nglo kɛ fɔ nunman e nun sa. Ɔ si kɛ Zezi i afuɛ 1.000 famiɛn dilɛ blɛ nun yɛ fɔ’n tú e nun-ɔn. (Ngl. 20:1-3) Dɔ nga su’n, like nga Zoova kunndɛ’n yɛle kɛ e mian e ɲin e yo e liɛ nga e kwla yo’n yɛ e lafi i su.

7. ?Ngue yɛ é wá kɛ́n i ndɛ siɛn’n niɔn?

⁷ ?Wafa sɛ yɛ e kwla nian Zezi i ajalɛ’n su-ɔ? Kɛ ɔ ko yo naan y’a kwla yo sɔ’n, é wá fá e ɲin é síe i nzuɛn nga Ɲanmiɛn wawɛ’n yo maan sran yi i nglo’n be nun nnan su. Kɛ é kán nzuɛn kun i ndɛ’n, é wún wafa nga Zezi yili nzuɛn sɔ’n i nglo’n. Kpɛkun é fá e ɲin é síe i kosan wie’m be su. Kosan sɔ’m bé wá úka e naan y’a fa nzuɛn uflɛ’n i kpa ekun.

8. ?Wafa sɛ yɛ Zezi yili i nglo kɛ ɔ klo Ɲanmiɛn nin sran-ɔn?

⁸ Zezi kloli Zoova dan ti’n, ɔ tuli i klun yoli i klun sa’n yɛ ɔ fɛli i wun mannin naan e ɲan e ti. (Zan 14:31; 15:13) Kɛ ɔ bali asiɛ’n su wa’n, ninnge ng’ɔ yoli be’n be kleli weiin kɛ ɔ klo sran dan. Blɛ kwlaa nun’n, ɔ yili i nglo kɛ ɔ klo sran naan ɔ si sran aunnvuɛ. I kpɔfuɛ mun bɔbɔ’n, ɔ yoli sɔ be lika wie. Like cinnjin kpa kun m’ɔ yoli fa kleli kɛ ɔ klo sran mun’n, yɛle kɛ ɔ kannin Ɲanmiɛn i Sielɛ’n i ndɛ kleli be. (Lik. 4:43, 44) Asa ekun’n, ɔ kplinnin su kɛ ɔ́ wú ɲrɛnnɛn wie naan sa tɛ yofuɛ’m be ɲan be ti. I sɔ m’ɔ yoli’n ti’n, e kwla lafi su kɛ é ɲán nguan m’ɔ leman awieliɛ’n.

9. ?Wafa sɛ yɛ e kwla yi i nglo kɛ e klo sran mun kɛ Zezi sa-ɔ?

⁹ Klolɛ mɔ e klo Zoova ti’n, e fali e wun e mɛnnin i kpɛkun be yoli e batɛmun. Sanngɛ sɛ e waan é klé kɛ e klo Zoova kpa’n, kɛ Zezi sa’n ɔ fata kɛ e klo e wiengu mun. Akoto Zan seli kɛ: “Sran ng’ɔ klomɛn i niaan m’ɔ wun i’n, ɔ kwlá kloman Ɲanmiɛn m’ɔ wunmɛn i’n.” (1 Zan 4:20) I sɔ’n ti’n, maan e usa e wun kɛ: ‘?N klo min wiengu’m be kpa? ?Kannzɛ min wiengu’m be yo min tɛ’n, sanngɛ n yo be kpa? ?N tu min klun n uka be naan b’a si Zoova? ?Kannzɛ be tanndan min ɲrun’n, sanngɛ n uka be titi? ?Ń yó sɛ naan m’an ɲan blɛ m’an bo jasin fɛ’n i kpa?’—Efɛ. 5:15, 16.

10. ?Wafa sɛ yɛ Zezi kleli kɛ ɔ kloman ndɛnngan-ɔn?

¹⁰ Zezi kloman ndɛnngan. Kɛ sran’m be yoli i tɛ’n, w’a yiman w’a manman be le. Sanngɛ nɛ́n i ngba-ɔ. Kɛ sran’m be kunndɛli i ndɛnngan’n, ɔ tɛli be su amanniɛn su. Yɛ ɔ wlali sran’m be fanngan kɛ sɛ be nin sran ɲan ndɛ’n, maan be siesie i ndɛndɛ. I wie yɛle kɛ ɔ seli be kɛ sɛ be kunndɛ kɛ Zoova sɔ sulɛ nga be su i’n nun’n, ɔ fata kɛ be nin be wiengu’m be siesie be afiɛn. (Mat. 5:9, 23, 24) Asa’n kɛ i akoto’m be sili akplowa naan bé sí be nun sran ng’ɔ le ɲrun tra be kwlaa’n, ɔ wlali be fanngan titi kɛ be di anuansɛ.—Lik. 9:46-48; 22:24-27.

11. ?Wafa sɛ yɛ e kwla kle kɛ e kloman ndɛnngan-ɔn?

¹¹ Sɛ e waan é klé kɛ e kloman ndɛnngan’n, ɔ fata kɛ e nin sran kwlaa e tran klanman yɛ sɛ e nin sran e ɲan ndɛ’n maan e siesie e afiɛn ndɛndɛ. Asa’n, maan e wla aniaan’m be fanngan kɛ sɛ be nin sran be  ɲan ndɛ’n maan be siesie be afiɛn. (Fp. 4:2, 3; Zak. 3:17, 18) I lɛ nun’n, e kwla usa e wun kɛ: ‘?Kɛ e nin sran e ɲan ndɛ’n, n yo like kwlaa nga n kwla yo naan e nin i y’a siesie e afiɛn? ?Kɛ aniaan kun yo min sa’n, n fɛ i wun ndɛ n sie min klun? ?Kɛ e nin sran e ɲan ndɛ’n, n kunndɛ kɛ sran’n bɔbɔ yɛ ɔ wa to min naan e siesie e afiɛn annzɛ n bɔbɔ yɛ n to i lɔ-ɔ? ?Kannzɛ bɔbɔ sran’n i ndɛ yoman fɛ’n sanngɛ n to i lɔ naan y’a siesie e afiɛn? ?Sɛ ɔ nin i fata’n n wla min wiengu’m be fanngan kɛ be siesie be afiɛn?’

12. ?Wafa sɛ yɛ Zezi kleli kɛ i klun ti ufue-ɔ?

¹² Zezi i klun ti ufue. (Mat. 11:28-30) Blɛ kwlaa nun’n ɔ yoli sran’m be ye. Cɛn kun’n, Fenisi bla kun srɛli i kɛ ɔ yo i wa’n i juejue. Uflɛ nun’n Zezi w’a kplinman su. Sanngɛ kɛ mɔ bla’n kleli kɛ ɔ lafi Ɲanmiɛn su tankaan ti’n, ɔ yoli i wa’n i juejue. (Mat. 15:22-28) Kannzɛ Zezi i klun ti ufue’n, sanngɛ kɛ sran’m be yo sa m’ɔ timan kpa’n ɔ tu i ɲin kle be. Be ng’ɔ klo be bɔbɔ’n ɔ ju wie’n ɔ tu be fɔ. I wie yɛle kɛ cɛn kun’n, Piɛli waan ɔ́ tɛ́nndɛn i ɲrun naan w’a yoman Zoova i klun sa’n. Kɛ ɔ yoli sɔ’n, Zezi tutuli i i sɔnnzɔnfuɛ onga’m be kwlaa be ɲrun lɛ. (Mar. 8:32, 33) Nán kɛ i waan ɔ́ gúa Piɛli i ɲin ase ti-ɔ. Sanngɛ i waan ɔ́ klé i ngwlɛlɛ. Kpɛkun ɔ́ klé i sɔnnzɔnfuɛ onga’m be kɛ ɔ fataman kɛ be tɛnndɛn i ɲrun sanngɛ be suɛn i bo. E si kɛ blɛ sɔ’n nun’n ɲannzuɛn kunnin Piɛli, sanngɛ ɔ ɲannin fɔ nga be tuli i’n i su ye.

13. ?Wafa sɛ yɛ e kwla kle kɛ e klun ti ufue sakpa-ɔ?

¹³ Sɛ e waan é klé kɛ e klun ti ufue sakpa’n, ɔ ju wie’n ɔ fata kɛ e di be nga e klo be’n be nanwlɛ sa wie’m be nun. I sɔ yolɛ nun’n, maan e yo kɛ Zezi sa. Yɛle kɛ maan afɔtuɛ kwlaa nga é mán be’n, be taka Ɲanmiɛn Ndɛ’n su. Kpɛkun e kan ndɛ’n amanniɛn su. Yɛ maan e lafi su kɛ bé yó sa kpa’n. Asa’n, maan e lafi su kɛ kɛ mɔ be klo Zoova nin e bɔbɔ ti’n, bé fá afɔtuɛ nga e mannin be’n su. Maan e usa e wun kɛ: ‘?Kɛ sran kun mɔ n klo i kpa’n ɔ yo like kun m’ɔ timan kpa’n, n tu i ɲin n kle i? ?Sɛ ɔ fata kɛ n man sran kun i afɔtuɛ’n, n kan ndɛ’n i amanniɛn su annzɛ n kan ndɛ’n i ya su? ?Ngue ti yɛ min waan ń mɛ́n i afɔtuɛ-ɔ? ?I wun ndɛ o min klun laa ti yɛ min waan ń mɛ́n i afɔtuɛ kekle nun-ɔn? ?Annzɛ n kunndɛ kɛ ń úkɛ i naan ɔ kaci ti yɛ min waan ń mɛ́n i afɔtuɛ-ɔ?’

14. ?Wafa sɛ yɛ Zezi yoli sran’m be ye-ɔ?

¹⁴ Zezi yoli sran’m be ye. Yɛ kɛ ɔ́ yó be ye’n, akunndan tɛ w’a trɛnmɛn i sin le. Sran ng’ɔ ti aklunyefuɛ’n, ɔ fɛ i ɲin sie i wiengu’m be su. Kpɛkun kɛ ɔ sie i nzɔliɛ kɛ be o asamian nun’n, ɔ ti be wun ɲanman nun. Sɛ e sie i nzɔliɛ kɛ e kwla yo e wiengu’m be ye’n, nán e sisi e bo naan y’a yo be ye. Asa’n kɛ é yó be ye’n, nán akunndan tɛ trɛn i sin. Sanngɛ sran kun kwla usa kɛ: ‘?Sran kun kwla yo sran ye kpɛkun akunndan tɛ trɛn i sin?’ Ɛɛn, ɔ kwla yo sɔ. I wie yɛle kɛ Zezi seli kɛ sran wie’m be yo yalɛfuɛ’m be ye sanngɛ be klun akunndan’n timan kpa. Afin kɛ bé yó be ye’n, be kunndɛ kɛ sran’m be wun be naan be yi be ayɛ. Kannzɛ like nga be yo’n ɔ ti kpa’n, sanngɛ i sɔ’n jɔman Zoova i klun.—Mat. 6:1-4.

15. ?Wafa sɛ yɛ e kwla yo e wiengu’m be ye sakpa-ɔ?

¹⁵ Sɛ e kunndɛ kɛ é yó e wiengu’m be ye sakpa’n, kɛ é yó be ye’n ɔ fataman kɛ akunndan tɛ trɛn i sin. I lɛ nun’n, e kwla usa e wun kɛ: ‘?Wafa sɛ yɛ n kwla yo min wiengu’m be ye-ɔ? ?Sɛ ń nían naan n kwla yo be ye’n, n yo like sɔ’n man be? ?Ngue ti yɛ min waan ń yó be ye-ɔ?’

16. (1) ?Ngue yɛ ɔ fata kɛ e yo i aliɛ ba kwlaa nun-ɔn? (2) ?Ngue ti-ɔ?

¹⁶ Ɔ fataman kɛ e bu i kɛ, kɛ be ko yo e batɛmun’n nn y’a wie nzuɛn uflɛ’n i fa naan ɔ timan cinnjin kɛ e mian e ɲin kun. Nzuɛn uflɛ’n ti kɛ “tralɛ klanman kpa kun” sa. Ɔ fata kɛ e yo naan tralɛ sɔ’n ka klanman titi. Wafa nga e kwla yo sɔ’n i kun yɛle kɛ maan aliɛ ba kwlaa nun’n, e yi nzuɛn nga Ɲanmiɛn wawɛ’n yo maan sran yi i nglo’n be nglo. ?Ngue ti-ɔ? Afin Zoova i wawɛ’n di junman titi. (Bob. 1:2) Ɔ maan sɛ i wawɛ’n wo e nun sakpa’n, é yí nzuɛn kpakpa’m be nglo titi. Zaki seli kɛ: “Sɛ sran kun se kɛ ɔ lafi Ɲanmiɛn su naan be wunmɛn i sɔ’n i nzuɛn’n nun’n, i Ɲanmiɛn sulafilɛ sɔ’n ti ngbɛn.” (Zak. 2:26) I kunngba’n yɛle nzuɛn onga nga Ɲanmiɛn wawɛ’n yo maan sran yi i nglo’n be liɛ’n. Sɛ sran’m be wunmɛn i kɛ e yi be nglo’n, nn Ɲanmiɛn wawɛ’n sieman e sakpa.

17. ?Sɛ y’a kwlá yiman nzuɛn nga Ɲanmiɛn wawɛ’n yo maan sran yi i nglo’n be nglo’n, ngue yɛ ɔ fata kɛ e yo-ɔ?

¹⁷ Kannzɛ be yoli e batɛmun w’a cɛ bɔbɔ’n, sanngɛ ɔ ju wie’n e yiman nzuɛn nga Ɲanmiɛn wawɛ’n yo maan sran yi i nglo’n be nglo. Sɛ i sɔ sa’n ju’n, nán maan e sa sin bubu e. Maan e fa sunnzun ase kun e yiyi nun. Wienun-ɔn, e le tralɛ klanman kpa kun. Kpɛkun i bue kun w’a ti. ?Kɛ mɔ w’a ti’n ti’n é sé kɛ é kó yí i blo? Cɛcɛ. Sɛ e kwla kpa nun’n, é kpá nun yɛ é síe i kpa naan w’a timan kun. I wafa kunngba’n, sɛ ɔ ju wie naan y’a kwlá yiman nzuɛn nga Ɲanmiɛn wawɛ’n yo maan sran yi i nglo’n be nglo aniaan kun i lika’n, ɔ fataman kɛ e sa sin bubu e. Maan e ko wun i wun naan e siesie e afiɛn. Kpɛkun e mian e ɲin naan y’a yoman sɔ cɛn uflɛ.

18. ?Ngue su yɛ e kwla lafi-ɔ?

¹⁸ Kɛ e si kɛ e kwla nian Zezi i ajalɛ’n su’n, i sɔ’n yo e fɛ kpa. Sɛ e bu akunndan kunngba ng’ɔ buli’n wie’n, é kwlá níɛn i ajalɛ’n su. Kusu sɛ e niɛn i ajalɛ su’n, é fá nzuɛn uflɛ’n. Like suanlɛ nga nun’n, e fali e ɲin e sieli i nzuɛn nga Ɲanmiɛn wawɛ’n yo maan klɔ sran yi i nglo’n be nun nnan su. Maan e fa blɛ e suan nzuɛn onga’m be su like yɛ e bu wafa nga e kwla yi be nglo’n i akunndan. Sɛ e nian Zoova i Lalofuɛ’m be like kunndɛlɛ fluwa nun’n é wún ndɛ kpanngban mɔ be kan nzuɛn sɔ’m be ndɛ’n. Sɛ a tike fluwa’n su’n, kunndɛ “Klisifuɛ’m be nantilɛ.” I sin’n, kunndɛ “Sa nga Ɲanmiɛn wawɛ’n maan sran yo’n.” Maan e yo like kwlaa nga e kwla yo naan y’a fa nzuɛn uflɛ’n. Sɛ e yo sɔ’n, e kwla lafi su kɛ Zoova fanngan nun’n é yí nzuɛn uflɛ’n i nglo titi.