1. (1) ?Sa benin yɛ e si kɛ ɔ́ jú-ɔ? (2) ?Ngue yɛ e kwla lafi su-ɔ?

 E SI kɛ kɛ é bó jasin fɛ’n, sran wie’m bé tánndan e ɲrun. Yɛ e si kɛ e ɲrun lɔ’n, sran’m bé wá tánndan e ɲrun kpa trá laa’n. (Dan. 11:44; 2 Tim. 3:12; Ngl. 16:21) Sanngɛ e kwla lafi su kɛ Zoova mán e wunmiɛn naan y’a kwla bo jasin fɛ’n. ?Ngue ti yɛ e se sɔ-ɔ? Afin kɛ Zoova mɛn i sufuɛ’m be junman’n, kannzɛ lika’n ti kekle sɛ’n, ɔ man be wunmiɛn naan b’a kwla di junman sɔ’n. I wie yɛle Ɲanmiɛn nuan ijɔfuɛ Ezekiɛli liɛ’n. Kɛ Ɲanmiɛn seli i kɛ ɔ bo jasin fɛ’n kle Zifu nga be sali be sin be nvle’n nun’n, sa wie’m be tɔli i su. Maan e kan sa sɔ’m be nun wie’m be ndɛ.

2. (1) ?Be ng’ɔ fata kɛ Ezekiɛli kan Ɲanmiɛn ndɛ’n kle be’n, be su ndɛ benin yɛ Zoova kannin-ɔn? (2) ?Ngue yɛ é wá kɛ́n i ndɛ like suanlɛ nga nun-ɔn?

² ?Wafa sɛ yɛ be ng’ɔ fata kɛ Ezekiɛli kan Ɲanmiɛn ndɛ’n kle be’n be ti-ɔ? Zoova kannin sran sɔ’m be ndɛ seli kɛ be ti “ɲin keklefuɛ” naan be “awlɛn’n w’a kete.” Be ti kɛ owieowie nin ɲannglan mun sa. I sɔ’n ti’n, Zoova seli Ezekiɛli kpɛ sunman kɛ: “Nán maan srɛ kun wɔ.” (An kanngan Ezekiɛli 2:3-6) ?Ngue yɛ ɔ ukali Ezekiɛli naan w’a kwla di i junman’n niɔn? Like klikli’n yɛle kɛ Zoova yɛ ɔ sunmɛnnin i-ɔ. Like nɲɔn su’n yɛlɛ kɛ Zoova fɛli i wawɛ’n mɛnnin i. Yɛ i nsan su’n yɛle kɛ Ɲanmiɛn ndɛ’n ukɛli i. ?Wafa sɛ yɛ ninnge nsan sɔ’m be ukali Ezekiɛli-ɔ? ?Wafa sɛ yɛ ninnge sɔ’m be kwla uka e wie andɛ-ɔ?

3. (1) ?Ndɛ benin yɛ ɔ wlali Ezekiɛli i fanngan-ɔn? (2) ?Wafa sɛ yɛ Zoova kleli Ezekiɛli kɛ ɔ́ súɛn i bo-ɔ?

³ Zoova seli Ezekiɛli kɛ: “Ń má súnman wɔ.” (Eze. 2: 3, 4) Ndɛ sɔ’n wlali Ezekiɛli i fanngan kpa. ?Ngue ti yɛ e se sɔ-ɔ? Ezekiɛli i wla kpɛnnin su kɛ i nun mɔ Zoova kpali Moizi nin Ezai kɛ be yo i nuan ijɔfuɛ’n, ɔ kannin ndɛ sɔ’n i wunsu kleli be. (Tul. 3:10; Eza. 6:8) Ezekiɛli si kɛ Zoova suɛnnin i nuan ijɔfuɛ sɔ’m be bo naan b’a kwla di junman kekle wie mun. Ɔ maan kɛ Zoova seli Ezekiɛli kpɛ nɲɔn kɛ ‘ń má súnman wɔ’n,’ ɔ lafili su kɛ Zoova súɛn i bo sakpa. Ezekiɛli fluwa’n nun’n, Ezekiɛli klɛli i kpɛ sunman kɛ: “Zoova kannin ndɛ kleli min.” (Eze. 3:16) Asa ekun’n, ɔ seli kpɛ sunman kɛ: “Zoova kannin ndɛ kleli min ekun.” (Eze. 6:1) I sɔ’n kle kɛ Ezekiɛli wunnin i wlɛ weiin kɛ Zoova yɛ ɔ sunmɛnnin i-ɔ. Asa’n, Ezekiɛli i si’n yoli Ɲanmiɛn nuan ijɔfuɛ. Ɔ maan e si kɛ ɔ kan kleli Ezekiɛli kɛ kɛ ɔ fɛ i laa lele m’ɔ́ fá jú be blɛ liɛ’n su’n, Zoova suɛnnin i nuan ijɔfuɛ’m be bo titi. I wie yɛle kɛ Zoova seli Izaaki nin Zakɔbu nin Zeremin be kɛ ‘ɔ jin be sin.’—Bob. 26:24; 28:15; Zer. 1:8.

4. ?Ndɛ benin mun yɛ be wlali Ezekiɛli i fanngan-ɔn?

⁴ ?Kɛ Ezekiɛli wá kán Ɲanmiɛn nuan ndɛ’n klé Izraɛlifuɛ mun’n, wafa sɛ yɛ be nun sunman bé sɔ́ nun-ɔn? Zoova seli i kɛ: “Izraɛlifuɛ’m be su faman be su be sieman ɔ nuan bo, afin be kunndɛman kɛ bé fá be su bé síe i min nuan bo.” (Eze. 3:7) Ɔ maan sɛ sran’m be kpalo Ezekiɛli i nuan ndɛ’n, i sɔ’n kle kɛ Zoova i nuan ndɛ’n yɛ be kpaloli i-ɔ. Ndɛ sɔ’n ukali Ezekiɛli maan ɔ wunnin i wlɛ kɛ sɛ nvlefuɛ’m be sɔnmɛn i ndɛ’n nun klanman’n, i sɔ’n kleman kɛ w’a dimɛn i junman’n i kpa. Asa’n, Zoova seli Ezekiɛli ekun kɛ kɛ ndɛ ng’ɔ kannin be’n bé wá kpɛ́n su’n, sran’m bé wá sí kpa  kɛ “Ɲanmiɛn nuan ijɔfuɛ kun trannin be afiɛn.” (Eze. 2:5; 33:33) E si kɛ ndɛ sɔ’m be mannin Ezekiɛli i wunmiɛn naan w’a kwla di i junman’n i kpa.

5. ?Ndɛ benin yɛ ɔ o Ezai 44:8 nun m’ɔ wla e fanngan-ɔn?

⁵ Kɛ e si kɛ Zoova sunmannin e wie’n, i sɔ’n wla e fanngan dan. Ɔ flɛ e kɛ i “lalofuɛ mun.” I sɔ’n kle kɛ ɔ bu e sran. (Eza. 43:10) Yɛ ɔ ti e cenjele like dan. Zoova seli Ezekiɛli kɛ: “Nán srɛ kun wɔ.” Andɛ kusu’n Zoova se e wie kɛ: “Nán maan srɛ kun amun.” Ɔ maan ɔ fataman kɛ e sro be nga be tanndan e ɲrun’n. Afin kɛ Ezekiɛli sa’n, Zoova sunmannin e wie yɛ ɔ jin e sin.—An kanngan Ezai 44:8 nun.

6. (1) ?Wafa sɛ yɛ Zoova kle e kɛ ɔ́ súan e bo titi-ɔ? (2) ?Ndɛ benin yɛ Biblu’n kan m’ɔ wla e fanngan-ɔn?

⁶ Zoova tali e nda kɛ ɔ́ úka e titi. Ɔ seli kɛ: “Amun ti min lalofuɛ. ” Sanngɛ kwlaa naan w’a se sɔ’n, ɔ seli kɛ: “Kɛ á wá sín nzue’n nun’n, e nin wɔ-ɔ, kɛ á wá sín nzue ba’m be nun’n, nzue ba’m be su kataman ɔ su. Kɛ á wá nánti sin’n nun’n, a su yraman, sin taaman’n su yoman ɔ like fi.” (Eza. 43:2) Kɛ é bó jasin fɛ’n, ɔ ju wie’n sa nga be tɔ e su’n be ti kɛ nzue dan wie sa annzɛ kɛ sin sa. Ɔ nin i sɔ ngba’n, kɛ mɔ Zoova suan e bo’n ti’n, e bo jasin fɛ’n titi. (Eza. 41:13) Kɛ Ezekiɛli blɛ su sa’n, andɛ sran sunman be sieman be su e nuan bo. Sanngɛ i sɔ’n kleman kɛ e boman jasin fɛ’n i kpa ti-ɔ. Kɛ e si kɛ e ɲin mɔ e mian e bo jasin fɛ’n ɔ jɔ Zoova klun’n, i sɔ’n wla e fanngan. Akoto Pɔlu seli kɛ: ‘Junman nga e tinuntinun e di’n i su yɛ bé nían bé túa e kalɛ-ɔ.’ (1 Kor. 3:8; 4:1, 2) Aniaan bla kun m’ɔ ti atin bofuɛ w’a cɛ kpa’n, seli kɛ: “Kɛ n si kɛ e ɲin mɔ e mian e di Zoova i junman’n ɔ su kaman ngbɛn’n, i sɔ’n yo min fɛ.”

7. ?Blɛ kwlaa nga Ezekiɛli bu aolia nun like ng’ɔ wunnin i’n i akunndan’n, wafa sɛ yɛ i wun yo i-ɔ? (An nian foto ng’ɔ o fluwa’n i bui’n su’n.)

⁷ Ezekiɛli wunnin i kɛ Ɲanmiɛn wawɛ’n leman wunsu. Aolia nun’n, ɔ wunnin i kɛ Ɲanmiɛn wawɛ’n man anzi’m be wunmiɛn yɛ ɔ yo maan Zoova i kakaklolo’n i kondokaa mɔ be ti dandan kpa’n be kwla man be wun su. (Eze. 1:20, 21) ?Kɛ Ezekiɛli wunnin aolia nun like sɔ’n, ngue sa yɛ ɔ juli-ɔ? I bɔbɔ seli kɛ: “Kɛ n wunnin i’n, n utuli min ɲin ase.” Kɛ mɔ aolia nun like sɔ’n boli Ezekiɛli i nuan dan’n ti’n ɔ tɔli. (Eze. 1:28) Blɛ kwlaa nga Ezekiɛli bu aolia nun like sɔ’n i akunndan’n, ɔ lafi su kɛ Ɲanmiɛn wawɛ’n kwla ukɛ i naan w’a di junman nga be fa mɛnnin i’n.

8-9. (1) ?Kɛ Zoova seli Ezekiɛli kɛ ɔ ‘jaso jran nglo’n,’ sa benin yɛ ɔ juli-ɔ? (2) ?Wafa sɛ yɛ Zoova ukali Ezekiɛli naan w’a kwla di i junman’n niɔn?

⁸ Zoova seli Ezekiɛli kɛ: “Sran wa, jaso jran nglo maan n kan ndɛ n kle wɔ.” Kɛ Zoova seli Ezekiɛli sɔ’n, ɔ ɲannin wunmiɛn yɛ ɔ jaso jrannin nglo. Ezekiɛli seli kɛ: “Wawɛ’n jrali min su, kpɛkun ɔ yoli maan n jrannin nglo.” (Eze. 2:1, 2) Kɛ Ezekiɛli kán Ɲanmiɛn ndɛ’n, Ɲanmiɛn i “sa’n” mɔ yɛle i wawɛ’n, ɔ ukɛli i. (Eze. 3:22; 8:1; 33:22; 37:1; 40:1) Ɲanmiɛn wawɛ’n ukali Ezekiɛli naan w’a kwla kan Ɲanmiɛn ndɛ’n w’a kle Izraɛlifuɛ mɔ ‘be ti sɛ’n ti kekleke mɔ be awlɛn’n ti ketewa’n.’ (Eze. 3:7) Zoova seli Ezekiɛli kɛ: “M’an yo maan ɔ ɲrun’n w’a yo kekleke kɛ be ɲrun’n sa, yɛ ɔ ngban’n w’a yo kekleke kɛ be ngban’n sa. M’an yo maan ɔ ngban’n w’a yo kɛ diaman sa, i kekleke  liɛ’n tra yɔbuɛ ng’ɔ ti kekleke kpa’n bɔbɔ. Nán srɛ kun wɔ be wun, yɛ nán maan be ɲrun’n kun wɔ srɛ.” (Eze.3:8, 9) Ɔ ti kɛ Zoova su se Ezekiɛli kɛ: ‘Nán yaci ɲin keklefuɛ sɔ’m be lɛ naan be bubu ɔ sa sin. Ń má úka ɔ.’

⁹ I sin’n, Ɲanmiɛn wawɛ’n fali Ezekiɛli ɔli kan ɔ fata kɛ ɔ di i junman’n lɔ’n. Ezekiɛli seli kɛ: “Zoova i tinmin’n ɔ dili junman min nun dan.” Ezekiɛli fali lemɔcuɛ kun fa buli ndɛ nga Ɲanmiɛn kan kleli i’n i su akunndan naan w’a kwla kan ndɛ’n juejue su. (Eze. 3:14, 15) I sin’n, Zoova seli i kɛ ɔ wɔ lika kpɛtɛkplɛɛ kun nun. Kɛ ɔ juli lika sɔ’n nun lɔ’n, ‘Ɲanmiɛn wawɛ’n wluli i nun.’ (Eze. 3:23, 24) Ɔ maan, ɔ kwla bo i junman’n i dilɛ bo siɛn’n.

10. (1) ?Ngue yɛ ɔ kwla uka e naan y’a bo jasin fɛ’n i kpa andɛ-ɔ? (2) ?Ngue ti-ɔ?

¹⁰ ?Ngue yɛ ɔ kwla uka e naan y’a bo jasin fɛ’n i kpa andɛ-ɔ? Kɛ ɔ ko yo naan y’a tɛ kosan sɔ’n su’n, maan e bu sa ng’ɔ juli Ezekiɛli su’n i akunndan. Kwlaa naan w’a bo i junman’n i dilɛ bo’n, Ɲanmiɛn wawɛ’n mɛnnin i wunmiɛn. Andɛ’n kɛ Ezekiɛli liɛ’n sa’n, Ɲanmiɛn wawɛ’n man e wunmiɛn naan y’a kwla bo jasin fɛ’n. ?Ngue ti-ɔ? Afin Satan wla e sin alɛ naan e yaci e junman’n i dilɛ. (Ngl. 12:17) Sran sunman be bu i kɛ Satan le tinmin dan naan e nin i e kwlá kunman. Sanngɛ kɛ e bo jasin fɛ’n, ɔ ti kɛ y’a kwlɛ i sa. (Ngl. 12:9-11) ?Wafa sɛ? Kɛ e bo jasin fɛ’n, e kle kɛ e sroman Satan. Ɔ maan sɛ é kwlá sé’n, blɛ kwlaa nga e bo jasin fɛ’n, Satan i ɲin gua ase. Andɛ’n kannzɛ bɔbɔ sran’m be kle e yalɛ’n, sanngɛ e kwla bo jasin fɛ’n. ?Ngue yɛ i sɔ’n kle e-ɔ? I sɔ’n kle kɛ Ɲanmiɛn wawɛ’n wo e su naan Zoova i klun jɔ e wun.—Mat. 5:10-12; 1 Piɛ. 4:14.

11. (1) ?Wafa sɛ yɛ Ɲanmiɛn wawɛ’n uka e-ɔ? (2) ?Ngue yɛ ɔ fata kɛ e yo naan Ɲanmiɛn w’a fɛ i wawɛ’n w’a man e-ɔ?

¹¹ ?Kɛ Zoova yoli maan sɛ é kwlá sé’n,  Ezekiɛli i ɲrun nin i ngban’n be yoli kekleke’n, ngue yɛ i sɔ’n kle e-ɔ? Ndɛ sɔ’n kle kɛ Ɲanmiɛn wawɛ’n kwla man e wunmiɛn naan y’a jran sa nga kɛ é bó jasin fɛ’n be tɔ e su’n, be ɲrun kekle. (2 Kor. 4:7-9) ?Ngue yɛ e kwla yo naan Ɲanmiɛn w’a fɛ i wawɛ’n w’a man e titi-ɔ? Maan e srɛ Ɲanmiɛn tankaan kpa kɛ ɔ fɛ i wawɛ’n man e. Yɛ e lafi su kpa kɛ Zoova tɛ́ e srɛlɛ’m be su. Zezi seli i sɔnnzɔnfuɛ’m be kɛ: “Amun srɛ like titi, […] amun kunndɛ like titi, […] amun bobo anuan titi.” Sɛ e yo sɔ’n, Zoova fɛ́ i ‘wawɛ’n mán e lele.’—Lik. 11:9, 13; Yol. 1:14; 2:4.

12. (1) ?Kɛ nga Ezekiɛli 2:9–3:3 fa kan’n sa’n, nin yɛ fluwa ɲɔnɲɔnwa’n fin-ɔn? (2) ?Ngue ndɛ yɛ ɔ o fluwa sɔ’n nun-ɔn?

¹² Ɲanmiɛn wawɛ’n ukali Ezekiɛli naan w’a kwla di i junman’n. Sanngɛ nɛ́n i ngba-ɔ. Ɲanmiɛn fɛli i nuan ndɛ’n ukɛli i wie. Aolia nun’n, Ezekiɛli wunnin fluwa ɲɔnɲɔnwa kun m’ɔ o sran kun i sa nun’n. (An kanngan Ezekiɛli 2:9–3:3 nun.) ?Nin yɛ fluwa sɔ’n fin-ɔn? ?Ngue ndɛ yɛ ɔ o fluwa sɔ’n nun-ɔn? ?Wafa sɛ yɛ fluwa sɔ’n i nun ndɛ’n ukali Ezekiɛli-ɔ? Maan e tɛ kosan sɔ’m be su. Fluwa sɔ’n fin Ɲanmiɛn i famiɛn bia’n i wun lɔ. Anzi nnan nga Ezekiɛli wunnin be’n, be nun kun yɛ Zoova seli i kɛ ɔ fa fluwa’n man Ezekiɛli-ɔ. (Eze. 1:8; 10:7, 20) Zifu nga be sali be sin be nvle’n nun’n, be jɔlɛ dilɛ ndɛ nga Zoova kannin’n yɛ ɔ o fluwa sɔ’n nun-ɔn. (Eze. 2:7) Be klɛli ndɛ sɔ’n fluwa’n i ɲrun nin i sin’n su.

13. (1) ?Zoova seli Ezekiɛli kɛ ɔ yo fluwa ɲɔnɲɔnwa’n i sɛ? (2) ?Ngue ti yɛ fluwa’n yoli fɛ Ezekiɛli i nuan nun-ɔn?

¹³ Zoova seli i nuan ijɔfuɛ’n kɛ ɔ di fluwa ɲɔnɲɔnwa’n naan ‘ɔ yi i ku.’ Ezekiɛli kusu dili fluwa’n i wunmuan’n. ?Ngue yɛ aolia nun like nga Ezekiɛli wunnin i’n, i bue sɔ’n kle e-ɔ? Ɔ fata kɛ Ezekiɛli wun ndɛ ng’ɔ su wa ko kan’n, i wlɛ kpa. Yɛ ɔ fata kɛ ɔ lafi su kpa naan w’a kwla kan kle sran mun. I sin’n, abonuan sa kun juli. Yɛle kɛ kɛ Ezekiɛli dili fluwa ɲɔnɲɔnwa’n, ‘ɔ yoli fɛ i nuan nun kɛ awɛma nzue sa.’ (Eze. 3:3) ?Ngue ti-ɔ? Ezekiɛli ɲrun’n, Zoova i nuan ijɔlɛ junman’n ti i cenjele like dan. (Jue. 19:8-11) Ɔ maan kɛ Zoova seli i kɛ ɔ di i junman’n, ɔ yoli i fɛ dan.

14. ?Ngue yɛ ɔ ukali Ezekiɛli naan w’a kwla di i junman’n i kpa-ɔ?

¹⁴ Kɛ ɔ́ kɔ́ i ɲrun’n, Zoova seli Ezekiɛli kɛ: “Ndɛ kwlaa nga n kan kle wɔ’n, sie ɔ su tie, yɛ maan ɔ awlɛn tran su.” (Eze. 3:10) Ɔ ti kɛ nn Zoova su se Ezekiɛli kɛ maan fluwa ɲɔnɲɔnwa’n i nun ndɛ’n kɛ i klun naan ɔ bu su akunndan. Sɛ ɔ yo sɔ’n, ɔ́ ɲán wunmiɛn dí i junman’n, yɛ ɔ́ kán ndɛ’n juejue su klé sran mun. (Eze. 3:11) Sɛ ndɛ’n tran Ezekiɛli i klun naan i kanlɛ’n yo pɔpɔ i sa nun’n, ɔ́ kwlá dí i junman’n i kpa.—An nian Jue Mun 19:14 nun.

15. ?Sɛ e waan é bó jasin fɛ’n juejue su’n, ngue su yɛ ɔ fata kɛ ‘e awlɛn’n tran-ɔn’?

¹⁵ Sɛ e waan é bó jasin fɛ’n juejue su’n, ɔ fata kɛ e suan Ɲanmiɛn Ndɛ’n i nun like titi yɛ e bu su akunndan. Asa’n, maan ‘e awlɛn’n tran’ ndɛ kwlaa nga Zoova kan kle e’n be su. Andɛ’n, Zoova sin Biblu’n i lika yɛ ɔ kan ndɛ kle e-ɔ. ?Ɔ maan é yó sɛ naan Biblu’n nun ndɛ’n w’a ɲan ta e su titi?

16. (1) ?Zoova kunndɛ kɛ e yo i nuan Ndɛ’n i sɛ? (2) ?É yó sɛ naan Ɲanmiɛn Ndɛ’n w’a tran e awlɛn’n nun?

 ¹⁶ Kɛ e di like’n, e ɲan wunmiɛn. I wafa kunngba’n, kɛ e suan Ɲanmiɛn Ndɛ’n nun like mɔ e bu su akunndan’n, e ɲan wunmiɛn e su Ɲanmiɛn kpa tra laa’n. Nán e wla fi like nga fluwa ɲɔnɲɔnwa’n kle e’n su. Sɛ é kwlá sé’n, Zoova kunndɛ kɛ e di i nuan Ndɛ’n naan ɔ ‘yi e ku.’ Yɛle kɛ ɔ kunndɛ kɛ e wun i nuan Ndɛ’n i wlɛ kpa. I lɛ nun’n, maan e srɛ Ɲanmiɛn, e kanngan Biblu’n nun yɛ e bu su akunndan. I klikli nun’n, maan e srɛ Ɲanmiɛn kɛ ɔ uka e naan e sɔ i nuan Ndɛ nga e su wa kanngan nun’n, i nun klanman. I sin’n, maan e kanngan Biblu’n nun. Kpɛkun maan e jran kan naan e bu ndɛ nga kanngannin’n i su akunndan kpa. ?Sɛ e yo sɔ’n, wafa sɛ yɛ i bo’n gúa-ɔ? Sɛ e bu Ɲanmiɛn Ndɛ’n i su akunndan kpa’n, é wún i nun ndɛ’n i wlɛ kpa yɛ é láfi Ɲanmiɛn su kpa.

17. ?Ngue ti yɛ ɔ ti cinnjin kɛ e kanngan Biblu’n nun naan e bu su akunndan-ɔn?

¹⁷ ?Ngue ti yɛ ɔ ti cinnjin kɛ e kanngan Biblu’n nun naan e bu su akunndan-ɔn? Sɛ e yo sɔ’n, é ɲán wunmiɛn é bó jasin fɛ’n andɛ. Kpɛkun e ɲrun lɔ’n, é ɲán wunmiɛn é kán sran’m be jɔlɛ dilɛ ndɛ ng’ɔ fata kɛ e kan kle be’n. Asa ekun’n, kɛ e bu Zoova i nzuɛn’n i akunndan’n, e nin i e afiɛn mantan kpa tra laa’n. Ɔ maan i agualiɛ su’n, é wún e wun fɛ. Yɛle kɛ e wla gúa ase, yɛ like nga e le i’n, ɔ́ jú e.—Jue. 119:103.

18. (1) ?Ngue yɛ be nga e bo jasin fɛ’n e kle be’n, bé wá wún i wlɛ-ɔ? (2) ?Ngue ti-ɔ?

¹⁸ E liɛ’n, e timan Ɲanmiɛn nuan ijɔfuɛ kɛ Ezekiɛli sa. Sanngɛ y’a fua kpa kɛ é kán Zoova i nuan ndɛ m’ɔ o Biblu’n nun’n, é klé sran mun lele saan w’a se e kɛ w’a yo kpa sɔ. Kɛ sran’m be jɔlɛ dilɛ blɛ’n wá jú’n, sran fi su seman kɛ w’a timan ndɛ sɔ’n annzɛ Ɲanmiɛn w’a nianman i lɔ. (Eze. 3:19; 18:23) Bé wá wún i wlɛ weiin kɛ ndɛ nga e kan’n fin Ɲanmiɛn sakpa.

19. ?Ngue yɛ ɔ kwla uka e naan y’a bo jasin fɛ’n i kpa titi-ɔ?

¹⁹ ?Ngue yɛ ɔ kwla uka e naan y’a bo jasin fɛ’n i kpa titi-ɔ? Ninnge nsan nga be ukali Ezekiɛli’n, be kwla uka e wie. Yɛle kɛ e si kɛ Zoova yɛ ɔ sunmannin e-ɔ. Asa’n, ɔ fɛ i wawɛ’n suan e bo yɛ ɔ fɛ i nuan Ndɛ’n uka e. I sɔ’n ti’n, e kwla bo jasin fɛ’n titi. Kɛ mɔ Zoova uka e’n ti’n, y’a fua kpa kɛ é bó jasin fɛ’n titi yɛ ‘é jrán kekle lele é jú i awieliɛ.’—Mat. 24:13.