LIKE SUANLƐ 46
?Wafa sɛ yɛ Zoova uka e naan y’a jran kekle-ɔ?
“Zoova su minndɛ kpa naan ɔ́ sí amun aunnvɔɛ, ɔ́ wá jáso, kpɛkun ɔ́ sí amun aunnvɔɛ.”—EZA. 30:18.
JUE 3 Ɔ su yɛ e fa e wla gua-ɔ
I SU FITILƐ a
1-2. (1) ?Kosan benin mun yɛ é wá tɛ́ be su like suanlɛ nga nun-ɔn? (2) ?Ngue yɛ ɔ kle kɛ Zoova kunndɛ kpa kɛ ɔ́ úka e-ɔ?
ZOOVA kunndɛ kɛ ɔ́ úka e naan e jran sa nga be tɔ e su’n be ɲrun kekle naan e di i junman’n aklunjɔɛ su. ?Sanngɛ ngue yɛ Zoova yo fa uka e-ɔ? ?Ngue yɛ e kwla yo naan y’a ɲan ukalɛ mɔ Zoova uka e’n i su ye kpa ekun-ɔn? Like suanlɛ nga nun’n é wá tɛ́ kosan sɔ’m be su. Kwlaa naan y’a tɛ be su’n, é dún mmua tɛ́ kosan nga su: ?Ngue yɛ ɔ kle kɛ Zoova kunndɛ kpa kɛ ɔ́ úka e-ɔ?
2 Kɛ akoto Pɔlu klɛ́ Klisifuɛ nga be ti Ebre’n be fluwa’n, ɔ kannin ndɛ kun m’ɔ kwla uka e naan y’a tɛ kosan sɔ’n su-ɔ. Ɔ seli kɛ: “Zoova ti min ukafuɛ. Ɔ maan srɛ su kunman min. ?Ngue yɛ klɔ sran kwla yo min-ɔn?” (Ebr. 13:6) Fluwa wie mɔ be tu Biblu’n nun ndɛ’m be bo’n, be seli kɛ ndɛ nga be kacili i Biblu’n nun ndɛ mma nga nun kɛ ‘ukafuɛ’n,’ be fa kan sran kun m’ɔ su wanndi kɔ sran kun m’ɔ kpan kɛ be ukɛ i’n i delɛ’n i ndɛ. Maan e se kɛ sran kun o ɲrɛnnɛn nun kpɛkun Zoova su wanndi kɔ i delɛ. Kɛ e bu i sɔ liɛ’n i akunndan’n, e wun i wlɛ kɛ Zoova kunndɛ kpa kɛ ɔ́ úka e. Sɛ Zoova nin e o nun’n, é kwlá jrán sa kwlaa nga be tɔ e su’n be ɲrun kekle kpɛkun é dí aklunjɔɛ.
3. ?Ninnge nsan benin mun yɛ Zoova yo fa ukɛ e-ɔ?
3 ?Ninnge benin wie mun yɛ Zoova yo fa ukɛ e naan y’a kwla jran sa nga be tɔ be su’n, be ɲrun kekle-ɔ? Kɛ ɔ ko yo naan y’a tɛ kosan sɔ’n su’n, é wá fá e ɲin é síe Ezai fluwa’n i nun ndɛ wie’m be su. ?Ngue ti-ɔ? Afin fluwa sɔ’n i nun ndɛ sunman be ti be nga be su Zoova andɛ’n be liɛ. Asa ekun’n, Zoova i su ndɛ nga Ezai kannin’n i wlɛ wunlɛ ti pɔpɔ. I wie yɛle ndɛ ng’ɔ o Ezai ndɛ tre 30 nun’n. Ndɛ tre sɔ’n nun’n, Ezai fali sunnzun ase wie mun fa kannin wafa nga Zoova ukɛ i sufuɛ mun’n i ndɛ. I klikli’n kle kɛ Zoova tie e srɛlɛ mun yɛ ɔ tɛ be su. I nɲɔn su’n kle kɛ Zoova kle e atin. Yɛ i nsan su’n kle kɛ Zoova yra e su dɔ nga su yɛ ɔ́ yrá e su e ɲrun lɔ wie. É wá kán ninnge nsan sɔ mɔ Zoova yo fa uka e’n be ndɛ.
ZOOVA TIE E SRƐLƐ MUN
4. (1) ?Ezai blɛ su’n, Zifu’m be su ndɛ benin yɛ Zoova kannin-ɔn? (2) ?Yɛ sa benin yɛ ɔ juli be su-ɔ? (3) ?Ndɛ benin yɛ Zoova kannin m’ɔ cicili i sufuɛ’m be wla-ɔ? (Ezai 30:18, 19)
4 Ezai ndɛ tre 30 i su fitilɛ’n nun’n, Zoova kannin Zifu’m be ndɛ seli kɛ be ti “ba ɲin keklefuɛ” yɛ “be yo sa tɛ uka sa tɛ su.” Ɔ seli ekun kɛ: “Be ti nvle kun mɔ be ɲin su ti kekle-ɔ. […] Be kunndɛman kɛ bé tí Zoova i mmla’n.” (Eza. 30:1, 9) Kɛ mɔ be waan be tieman Zoova i nuan ndɛ’n ti’n, Ezai seli be kɛ Zoova wá yáci be lɛ naan ɲrɛnnɛn tɔ be su. (Eza. 30:5, 17; Zer. 25:8-11) Ɔ maan Babilɔninfuɛ’m be wa trali be ɔli. Sanngɛ Zifu sɔ’m be nun wie’m be su Zoova kpa. I sɔ’n ti’n, Ezai kannin ndɛ kun m’ɔ kwla cici be wla’n kleli be. Ɔ seli be kɛ cɛn kun’n, Zoova wá yó maan bé sá be sin be nvle’n nun ekun. (An kanngan Ezai 30:18, 19 nun.) I sɔ kusu yɛ Zoova yoli-ɔ. Zoova yoli maan be sali be sin be nvle’n nun. Sanngɛ kɛ Ezai kannin ndɛ’n kleli be’n, ɔ cɛli kpa ka naan Zoova w’a de be. Ezai seli kɛ “Zoova su minndɛ kpa naan ɔ́ sí amun aunnvɔɛ.” I sɔ’n kle kɛ Zoova su kaman lɛ demɛn i sufuɛ mun. Izraɛlifuɛ’m be dili afuɛ 70 Babilɔnin lɔ ka naan be nun wie’m b’a sa be sin Zerizalɛmun. (Eza. 10:21; Zer. 29:10) I nun mɔ be o Babilɔnin lɔ’n, awlabɔɛ ti’n be sun. Yɛ kɛ be sali be sin be nvle’n nun’n, be klun jɔli dan ti’n be sunnin wie.
5. ?Ndɛ fɛ benin yɛ ɔ o Ezai 30:19 nun-ɔn?
5 Ezai kannin ndɛ kun m’ɔ kwla wla e fanngan wie andɛ-ɔ. Ɔ seli kɛ: “Kɛ á wá kpán flɛ́ i kɛ ɔ uka wɔ’n, saan ɔ́ sí ɔ aunnvɔɛ.” (Eza. 30:19) Ndɛ sɔ’n kle kɛ kɛ e kpan flɛ Zoova’n ɔ sie i su tie, yɛ ɔ tɛ e su ndɛndɛ. Ezai seli ekun kɛ: “Kɛ ɔ́ wá tí ɔ nɛn’n cɛ’n, ɔ́ ká lɛ tɛ́ ɔ su.” Ndɛ sɔ’n kle kɛ e Si Ɲanmiɛn kunndɛ kpa kɛ ɔ́ úka be nga be srɛ i kɛ ɔ uka be’n. Kɛ e si kɛ Zoova uka e’n, i sɔ man e wunmiɛn maan e jran kekle yɛ e klun jɔ.
6. ?Ndɛ benin yɛ Ezai kannin m’ɔ kle kɛ Zoova tie i sufuɛ’m be tinuntinun be srɛlɛ’n niɔn?
6 ?Ngue yɛ Ezai 30:19 kle e Ɲanmiɛn srɛlɛ’n su-ɔ? Ndɛ mma sɔ’n kle kɛ Zoova tie e tinuntinun e srɛlɛ’n. ?Ngue ti yɛ e se sɔ-ɔ? Ezai ndɛ tre 30 i bue klikli nun’n, kɛ Zoova kán ndɛ’n ɔ se kɛ “amun.” I sɔ’n kle kɛ i sufuɛ’m be kwlaa yɛ ɔ kan ndɛ’n kle be-ɔ. Sanngɛ ndɛ mma 19 nun’n, kɛ ɔ́ kán ndɛ’n ɔ se “a” annzɛ “ɔ.” I sɔ’n kle kɛ i sufuɛ’m be tinuntinun yɛ ɔ kan ndɛ’n kle be-ɔ. Ezai klɛli i kɛ: “A su sunman kun mlɔnmlɔn,” “saan ɔ́ sí ɔ aunnvɔɛ,” “ɔ́ ká lɛ tɛ́ ɔ su.” I sɔ’n kle kɛ e Si Zoova m’ɔ klo e’n, ɔ su semɛn i wa yasua annzɛ i wa bla kun mɔ i sa sin w’a bubu i’n kɛ: “Ɔ fata kɛ a tra ɔ awlɛn kɛ ɔ niaan bian annzɛ ɔ niaan bla sa.” Sanngɛ e ndɛ lo i yɛ ɔ fɛ i ɲin sie i e srɛlɛ’m be su kpa.—Jue. 116:1; Eza. 57:15.
?Kɛ Ezai se kɛ ‘Nán amun yaci Zoova i diin’n,’ ngue ndɛ yɛ i waan ɔ́ kán-ɔn? (An nian ndɛ kpɔlɛ 7 nun.)
7. ?Wafa sɛ yɛ Ezai nin Zezi be kleli kɛ ɔ fata kɛ e srɛ Zoova titi-ɔ?
7 Kɛ sa o e su mɔ e srɛ Zoova’n, like ng’ɔ dun mmua yo’n yɛle kɛ ɔ man e wunmiɛn naan y’a kwla jran sa sɔ’n i ɲrun kekle. Sɛ e kunndɛ kɛ sa ng’ɔ o e su’n wie ndɛndɛ naan ɔ wieman’n, maan e srɛ Zoova titi kɛ ɔ man e wunmiɛn naan e jran kekle. I kpa bɔbɔ’n, i sɔ’n yɛ Zoova kunndɛ kɛ e yo-ɔ. I sɔ’n i ɲin fite ndɛ yɛ mɔ Ezai kannin’n i nun. I waan: “Nán amun yaci [Zoova] i diin.” (Eza. 62:7) ?Ndɛ sɔ’n i bo’n yɛle benin? Yɛle kɛ kɛ é srɛ́ Zoova’n maan e jran su kpa. Kɛ e yo sɔ’n, e kle kɛ e yacimɛn i diin. Ndɛ nga Ezai kannin’n ti’n, e wla kpɛn sunnzun ase kun mɔ Zezi fali m’ɔ o Liki 11:8-10, 13 nun’n i su. Sunnzun ase sɔ’n nun’n Zezi wla e fanngan kɛ kɛ é srɛ́ Ɲanmiɛn’n, sɛ é kwlá sé’n maan ‘e kle i yalɛ’ yɛ e ‘srɛ i titi’ kɛ ɔ fɛ i wawɛ’n man e. Asa ekun’n, sɛ e waan é yó like wie’n maan e srɛ Zoova tankaan kɛ ɔ uka e naan e fa ajalɛ kpa.
ZOOVA KLE E ATIN
8. ?Wafa sɛ yɛ ndɛ ng’ɔ o Ezai 30:20, 21 nun’n, ɔ kpɛnnin su laa blɛ liɛ’n nun-ɔn?
8 An kanngan Ezai 30:20, 21 nun. Kɛ Babilɔnin sonja’m be wa boli be nanmue Zerizalɛmun klɔ’n i wun koko lɛ’n, ɔ dili afuɛ kun nin sin. Blɛ sɔ’n nun’n ɲrɛnnɛn’n yoli dan. Ɲrɛnnɛn sɔ m’ɔ o Zifu’m be su blɛ kwlaa nun’n, ɔ yoli kɛ kpanwun mɔ be di’n nin nzue mɔ be nɔn’n sa. Sanngɛ ndɛ mma 20 nin 21 be nun’n, Zoova seli Zifu’m be kɛ sɛ be sa tɛ’n yo be nsisɔ naan be kaci be ayeliɛ’n, ɔ́ dé be ɲrɛnnɛn sɔ’n nun. Ezai seli Zifu’m be kɛ Zoova m’ɔ ti “Like Klefuɛ Dan’n,” ɔ́ wá klé be wafa ng’ɔ fata kɛ be su i naan i klun w’a jɔ su’n. Kɛ Zifu’m be sali be sin Zerizalɛmun lɔ’n yɛ ndɛ sɔ’n kpɛnnin su-ɔ. Blɛ sɔ’n nun’n, Zoova kleli kɛ ɔ ti be Like Klefuɛ Dan. Yɛle kɛ i fanngan nun’n, i sufuɛ’m be wa suli i kpa kɛ laa’n sa. Andɛ’n, kɛ e wun kɛ Zoova yɛ ɔ ti e Like Klefuɛ Dan’n, i sɔ’n yo e fɛ kpa.
9. ?Wafa nga Zoova kle e like andɛ’n i kun yɛle benin?
9 Ezai 30:20, 21 nun’n, Ezai seli kɛ e ti kɛ like suanfuɛ mun sa yɛ Zoova yɛ ɔ kle e like-ɔ. Wafa ng’ɔ kle e like’n ɔ ti nɲɔn. I klikli’n, Ezai seli kɛ: “Ɔ Like Klefuɛ Dan’n, ɔ su fiaman ɔ ɲrun kun.” Ndɛ sɔ’n nun’n, ɔ ti kɛ Ezai su se kɛ like klefuɛ’n jin be ng’ɔ kle be like’n be ɲrun lɛ sa. Zoova kle e like wie andɛ. ?Wafa sɛ yɛ ɔ yo sɔ-ɔ? Ɔ sin i anuannzɛ’n i lika yɛ ɔ kle e like-ɔ. Kɛ anuannzɛ’n kle e atin weinwein’n, i sɔ’n yo e fɛ! Ninnge nga anuannzɛ’n fa kle e like’n yɛle aɲia kanngan mun nin aɲia dandan mun, nin e fluwa mun, nin jw televiziɔn’n, ɔ nin ninnge uflɛ wie mun ekun. Ninnge sɔ’m be uka e naan blɛ kekle nun’n y’a kwla jran kekle naan y’a di aklunjɔɛ titi.
10. ?Wafa sɛ yɛ sɛ é kwlá sé’n, e ti ‘ndɛ kun e sin lɔ-ɔ’?
10 Ezai kannin wafa nga Zoova kle e like’n i nɲɔn su’n i ndɛ seli kɛ: “Á wá tí ndɛ kun ɔ sin lɔ.” Ezai seli kɛ Zoova ti kɛ like klefuɛ kun m’ɔ o be ng’ɔ kle be like’n be sin lɔ m’ɔ kle be atin ng’ɔ fata kɛ be fa su’n sa. Andɛ’n, e ti Ɲanmiɛn i nɛn’n e sin lɔ wie. ?Wafa sɛ? Ɲanmiɛn maan be klɛli i nuan Ndɛ mɔ yɛle Biblu’n i afuɛ kpanngban yɛ. Afuɛ sɔ’m be sinnin nán andɛ sa-ɔ. Ɔ maan kɛ e kanngan Biblu’n nun’n, ɔ ti kɛ e ti Ɲanmiɛn i nɛn’n e sin lɔ sa.—Eza. 51:4.
11. (1) ?Sɛ e waan é jrán kekle’n, ngue yɛ ɔ fata kɛ e yo-ɔ? (2) ?Yɛ ngue ti-ɔ?
11 ?Ngue yɛ e kwla yo naan y’a ɲan like nga Zoova sin i anuannzɛ’n nin i nuan Ndɛ’n be lika kle e’n i su ye kpa-ɔ? Kɛ ɔ ko yo naan y’a tɛ kosan sɔ’n su’n, é wá fá e ɲin é síe i ndɛ cinnjin nɲɔn mɔ Ezai kannin’n be su. I klikli’n yɛle kɛ ɔ seli kɛ “atin’n yɛ ɔ o yɛ.” Yɛ i nɲɔn su’n i waan “amun fa su.” (Eza. 30:21) Ɔ ti cinnjin kɛ e si “atin’n.” Kɛ e ko si i kusu’n, ɔ fata kɛ ‘e fa su.’ Zoova i nuan Ndɛ’n nin ndɛ nga anuannzɛ’n yiyi nun’n be uka e naan y’a si like nga Zoova kunndɛ kɛ e yo’n. Asa’n, be kle e wafa nga e kwla nanti like nga e suan’n su’n. Sɛ e waan é dí aklunjɔɛ Zoova i sulɛ’n nun’n, ɔ fata kɛ e yo ninnge nɲɔn sɔ mun. Sɛ e yo sɔ’n, e kwla lafi su kɛ Zoova yrá e su.
ZOOVA YRA E SU
12. ?Kɛ nga Ezai 30:23-26 fa kan’n sa’n, wafa sɛ yɛ Zoova yrɛli i sufuɛ’m be su-ɔ?
12 An kanngan Ezai 30:23-26 nun. ?Kɛ Zifu’m be sali be sin Izraɛli mɛn’n nun’n, wafa sɛ yɛ Ɲanmiɛn nuan ndɛ ngalɛ’n kpɛnnin su be lika-ɔ? Kɛ be juli lɔ’n Zoova yrali be su dan. Yɛle kɛ ɔ mannin be ninnge ng’ɔ kwla uka be naan b’a ka nguan nun’n, nin ninnge ng’ɔ kwla uka be naan b’a su i kpa titi’n. Zoova yoli maan i sufuɛ’m be ɲannin aliɛ kpanngban. I nun cinnjin kpafuɛ’n yɛle kɛ Zoova mannin be ninnge ng’ɔ kwla uka be naan be nin i be afiɛn w’a mantan kpa’n naan b’a kwla su i kpa ekun’n. Blɛ sɔ’n nun’n, wafa nga Zoova yrɛli i sufuɛ’m be su’n, ɔ nin-a yraman be su sɔ le. Ndɛ mma 26 kle kɛ Zoova kpajali be su dan. Yɛle kɛ ɔ ukali be maan be wunnin i nuan Ndɛ’n i wlɛ kpa. (Eza. 60:2) Wafa nga Zoova yrɛli i sufuɛ’m be su’n ti’n, ‘be klun jɔli dan.’ I sɔ’n mannin be wunmiɛn naan b’a kwla su i aklunjɔɛ nun titi.—Eza. 65:14.
13. ?Kɛ Ɲanmiɛn seli kɛ Zifu’m bé wá sá bé sín bé sú i kpa ekun’n, wafa sɛ yɛ ndɛ sɔ’n kpɛn su andɛ-ɔ?
13 ?Kɛ Ɲanmiɛn seli kɛ Zifu’m bé wá sá bé sín bé sú i kpa ekun’n, ndɛ sɔ’n ti e liɛ wie andɛ? Ɛɛn. ?Ngue ti yɛ e se sɔ-ɔ? Kɛ ɔ fɛ i afuɛ 1919 nun’n, sran miliɔn kpanngban be jaso Babilɔnin Klɔ Dan mɔ yɛle Ɲanmiɛn sulɛ wafa ng’ɔ timan su’n i nun. Kpɛkun be ba Zoova i sulɛ. Kɛ mɔ be bo yo kun be su Zoova’n ti’n, ɔ ti kɛ be o mɛn klanman kun nun sa. Yɛ mɛn sɔ’n i kpa tra mɛn nga Zoova tali nda kɛ ɔ́ fá mán Izraɛlifuɛ mun’n. (Eza. 51:3; 66:8) ?Ngue ti yɛ e kwla se kɛ Zoova i sufuɛ’m be o mɛn klanman kun nun-ɔn?
14. ?Ngue ti yɛ e kwla se kɛ Zoova i sufuɛ’m be o mɛn klanman kun nun-ɔn? (An nian Ndɛ wie’m be nun yiyilɛ nun.)
14 Kɛ ɔ fɛ i afuɛ 1919 nun’n, be nga be kpali be sieli be ngunmin’n be bo w’a yoli kun be suli Zoova. Ɔ maan ɔ ti kɛ b’a wlu mɛn klanman kun nun sa. b Kɛ afuɛ bé sín’n, be nga be lafi su kɛ bé trán asiɛ’n su wa’n mɔ be yɛle “bua’m be wie mun” be wlu mɛn klanman sɔ’n nun wie yɛ Zoova yra be su dan.—Zan 10:16; Eza. 25:6; 65:13.
15. ?Nin yɛ mɛn klanman mɔ Zoova i sufuɛ’m be o nun’n, ɔ wo-ɔ?
15 ?Nin yɛ mɛn klanman mɔ Zoova i sufuɛ’m be o nun’n, ɔ wo-ɔ? Andɛ’n, Zoova i sufuɛ’m be o asiɛ wunmuan’n su. Ɔ maan mɛn klanman sɔ’n wo asiɛ wunmuan’n su. Andɛ’n, kan kwlaa nga e o lɛ’n, sɛ e suan Ɲanmiɛn sulɛ kpafuɛ’n i bo’n, nn e o mɛn klanman sɔ’n nun wie.
?Ngue yɛ e tinuntinun e kwla yo naan mɛn klanman mɔ Zoova i sufuɛ’m be o nun’n, w’a yo klanman kpa ekun-ɔn? (An nian ndɛ kpɔlɛ 16-17 be nun.)
16. ?É yó sɛ naan e ɲin w’a tran mɛn klanman mɔ Zoova i sufuɛ’m be o nun’n, i klanman m’ɔ ti’n i su titi?
16 Sɛ e waan é trán mɛn klanman mɔ Zoova i sufuɛ’m be o nun’n i nun titi’n, ɔ fata kɛ e yo like uflɛ ekun. Yɛle kɛ maan e klo e niaan mɔ be o asiɛ wunmuan’n su’n. ?Wafa sɛ yɛ e kwla yo sɔ-ɔ? Maan e fa e ɲin e sie i e niaan’m be nzuɛn kpa’n su, nán e fa e ɲin e sie i be fɔnlɛ’m be su. (Zan 17:20, 21) ?Ngue ti yɛ i sɔ yolɛ’n ti cinnjin-ɔn? Maan e fa sunnzun ase kun e yiyi nun. Kɛ e kɔ fie klanman kun nun wlanwlanlɛ’n, e si kɛ é wún waka fanunfanun fie sɔ’n nun. I wafa kunngba’n, andɛ’n mɛn klanman mɔ Zoova i sufuɛ’m be o nun’n, i nun sran’m be ti fanunfanun kɛ fie’n i nun waka mun sa. (Eza. 44:4; 61:3) Maan e fa e ɲin e sie i “fie’n” i klanman m’ɔ ti’n i su. Nán e fa e ɲin e sie i “waka” kunngun nga be o e wun lɛ mɔ be timan kpa’n be su. Nán maan e yaci fɔ ng’ɔ o e nun’n annzɛ fɔ ng’ɔ o e wiengu’m be nun’n be lɛ naan ɔ yo naan e ɲin kpa Ɲanmiɛn i sufuɛ mɔ be bo ti kun mɔ i sɔ’n yo ɲɛnmɛn’n i su.
17. ?Ngue yɛ e tinuntinun e kwla yo naan bo kun yolɛ w’a tran asɔnun’n nun-ɔn?
17 ?Ngue yɛ e tinuntinun e kwla yo naan bo kun yolɛ w’a tran asɔnun’n nun-ɔn? Maan e yo sran afiɛn siesiefuɛ. (Mat. 5:9; Rɔm. 12:18) Blɛ kwlaa nga e mian e ɲin mɔ e nin e wiengu mun e tran klanman’n, e yo maan mɛn klanman mɔ Zoova i sufuɛ’m be o nun’n, ɔ yo klanman kpa ekun. Nán e wla fi su kɛ Zoova yɛ ɔ yoli maan be kwlaa nga be o mɛn klanman sɔ’n nun’n be bɛli i sulɛ-ɔ. (Zan 6:44) Zoova klo sran sɔ mɔ be su i’n be kpa. I sɔ’n ti’n, kɛ e mian e ɲin mɔ e nin be e tran klanman kpɛkun e bo yo kun’n, i sɔ’n yo i fɛ kpa!—Eza. 26:3; Aze 2:7.
18. (1) ?Ninnge benin mun yɛ ɔ fata kɛ e bu be akunndan kpɛ sunman-ɔn? (2) ?Yɛ ngue ti-ɔ?
18 Zoova mɛnnin i sufuɛ’m be ninnge kpanngban. ?É yó sɛ naan y’a ɲan ninnge sɔ’m be su ye? I lɛ nun’n, kɛ e suan Biblu’n nin e fluwa’m be nun like’n maan e bu be su akunndan kpa. Sɛ e yo sɔ’n, é yí nzuɛn kpakpa’m be nglo. I wie yɛle kɛ e ‘klo e wun kpa kɛ sran kun nin i niaan sa,’ asɔnun’n nun. (Rɔm. 12:10) Kɛ e bu ninnge kpakpa nga e le i dɔ nga su’n be akunndan’n, e nin Zoova e afiɛn mantan kpa. Asa’n sɛ e bu ninnge kpakpa nga Zoova wá fá mán e e ɲrun lɔ’n be akunndan’n, i sɔ’n yó maan e su yacimɛn i sulɛ le. Asa’n i sɔ’n úka e naan y’a su Zoova aklunjɔɛ nun titi dɔ nga su.
MAAN E FUA KPA KƐ É JRÁN KEKLE
19. (1) ?Kɛ nga Ezai 30:18 fa kan’n sa’n, ngue yɛ e kwla lafi su-ɔ? (2) ?Ngue yɛ ɔ kwla uka e naan y’a jran kekle-ɔ?
19 Ɔ ka kan’n, Zoova “wá jáso” klé kɛ ɔ nin e o nun. Yɛle kɛ ɔ́ wá núnnún klunwifuɛ’m be mɛn tɛ kain nga. (Eza. 30:18) E si kɛ Zoova ti “Ɲanmiɛn kun m’ɔ yo sa nuan su sɛsɛ-ɔ.” Ɔ maan ɔ su yaciman Satan i mɛn nga lɛ naan ɔ cɛ tra blɛ ng’ɔ sieli’n su. (Eza. 25:9) E ɲin o blɛ mɔ Zoova wá dé e’n i sin kpa. Ka naan blɛ sɔ’n w’a ju’n, maan Ɲanmiɛn srɛlɛ’n, nin Ɲanmiɛn Ndɛ’n i nun like suanlɛ’n nin i su nantilɛ’n, ɔ nin ninnge kpakpa nga Zoova yo mannin e’n be su akunndan bulɛ’n, be yo e cinnjin titi. Sɛ e yo sɔ’n, Zoova úka e naan y’a jran kekle y’a su i kpa aklunjɔɛ nun.
JUE 142 E kplin e ɲin e ɲan like nga e wla o su’n
a Like suanlɛ nga nun’n, é wá kan ninnge nsan mɔ Zoova yo fa ukɛ i sufuɛ mun naan b’a kwla jran sa ng’ɔ o be su’n be ɲrun kekle’n be ndɛ. Kɛ ɔ ko yo naan y’a wun ninnge sɔ’m be wlɛ kpa’n, é wá fá e ɲin é síe ndɛ ng’ɔ o Ezai ndɛ tre 30 nun’n i su. Ndɛ sɔ’n wá úka e naan y’a wun i wlɛ kɛ Zoova i srɛlɛ’n, nin Biblu’n nun like suanlɛ’n, nin ninnge nga Zoova yo man e dɔ nga su’n, ɔ nin ng’ɔ́ wá yó mán e e ɲrun lɔ’n be su akunndan bulɛ’n be ti cinnjin kpa.
b NDƐ WIE’M BE NUN YIYILƐ: Kɛ e bo yo kun e su Zoova’n, ɔ ti kɛ e o mɛn klanman kun nun sa. Mɛn sɔ’n nun’n, Zoova kle e like naan y’a faman Ɲanmiɛn sulɛ wafawafa’m be ato ndɛ’m be su kun. Asa’n e di junman kun m’ɔ man e aklunjɔɛ dan-ɔn. Yɛle Ɲanmiɛn i Famiɛn Dilɛ’n i jasin fɛ’n i bolɛ’n. E nin Zoova e afiɛn mantan kpa yɛ e nin e niaan mun e tran klanman. E niaan sɔ’m be uka e maan e kwla jran sa nga be tɔ e su’n be ɲrun kekle. Kɛ sran kun su Zoova kɛ ɔ nin i fata’n sa, m’ɔ yo like kwla ng’ɔ kwla yo naan w’a yi Zoova i nzuɛn’m be nglo’n, i lɛ nun yɛ ɔ wlu mɛn klanman sɔ’n nun-ɔn.